مشیر خزانہ و بین الصوبائی رابطہ خیبرپختونخوا مزمل اسلم نے خیبرپختونخوا ریونیو اتھارٹی کی جانب سے ماہ جنوری کے ٹیکس محصولات بارے بیان جاری کرتے ہوئے کہا ہے کہ خیبرپختونخوا ریونیو اتھارٹی (کیپرا) کی جانب سے جنوری کے مہینے میں بھی اضافی محصولات جمع کرنے کی روایت برقرار رکھی گئی کیپرا اعدادوشمار کے مطابق جولائی تا جنوری ٹیکس وصولی بڑھ کر 28.92 ارب ہوگئی ہے جبکہ ٹیکس محصولات میں گزشتہ سال کے مقابلے میں 46 فیصد اضافہ ہوا ہے۔ مشیر خزانہ نے کہا کہ خیبرپختونخوا میں میں نان ٹیکس وصولی 55 فیصد سے زیادہ ہے جس سے محصولات 50فیصد سے زیادہ ہو جائیں گے۔ مزمل اسلم نے کہا کہ وزیراعلیٰ خیبرپختونخوا علی آمین گنڈاپور کے مسلسل تعاون کا شکریہ ادا کرتا ہوں اور کیپرا حکام کو اضافی محصولات جمع کرنے پر مبارکباد پیش کرتا ہوں۔

ٹرانسمشن لائن کے ذریعے صوبائی حکومت اپنی بجلی سستے نرخوں پر مقامی صنعتوں کو بھی فراہم کرے گی

یہ منصوبہ 8 ارب روپے کی لاگت سے ڈیڑھ سال میں مکمل کیا جائے گا جس سے سرمایہ کاری کوفروغ ملے گا،سیکرٹری توانائی زبیرخان

خیبرپختونخوامیں بجلی کے ترسیلی نظام کی بہتری اورصوبے میں اپنے ذرائع سے پیداہونے والی سستی پن بجلی کو بہترطریقے سے استعمال میں لانے کے لئے صوبے کی تاریخ میں پہلی مرتبہ قائم ہونے والی خیبرپختونخوا ٹرانسمیشن اینڈ گرڈسسٹم کمپنی(KPT&GSC) جلد ہی پیڈوکے مکمل ہونے والے منصوبوں سے پیداہونے والی سستی بجلی کواپنے نظام سے استعمال میں لاکر نئی تاریخ رقم کرے گی۔سوات کوریڈورسے40کلومیٹرطویل220کے وی ٹرانسمیشن لائن بچھاناموجودہ صوبائی حکومت کا ایک فلیگ شپ منصوبہ ہے جس پرتیز ی سے کام کیا جارہا ہے۔ان خیالات کااظہارسیکرٹری توانائی وبرقیات محمدزبیرخان نے خیبرپختونخوا ٹرانسمیشن اینڈ گرڈسسٹم کمپنی کے بارہویں بورڈ آف ڈائیریکٹرز کے اجلاس کی صدارت کرتے ہوئے کیا۔اجلاس میں کمپنی کے چیف ایگزیکٹومحمدایوب سمیت دیگربورڈ ممبرزمشیر طلاء محمد،ایڈیشنل سیکرٹری عبدالحسیب،ڈائریکٹرایچ آراینڈایڈمن پیڈومحمدادریس خٹک اورڈپٹی سیکرٹری توانائی اعجازاکرم نے شرکت کی۔ اجلاس میں مٹلتان سے مدین تک 40 کلو میٹر طویل 132/220 کے وی ٹرانسمشن لائن بچھانے کے جاری منصوبے پر ہونے والی پیش رفت کے بارے میں بتایا گیاکہ ٹرانسمشن لائن کا منصوبہ 8 ارب روپے کے تخمینہ لاگت سے ڈیڑھ سال کے عرصے میں مکمل کیا جائے گا۔ ٹرانسمشن لائن 84 میگاواٹ مٹلتان ہائیڈرو پاور پراجیکٹ اور سوات میں صوبائی حکومت کے دیگر منصوبوں سے پیدا ہونے والی بجلی کو نیشنل گرڈ یا رعایتی نرخوں پر مقامی صنعتوں کو فراہم کرے گی۔منصوبے کے پہلے مرحلے کی تکمیل سے صوبائی حکومت کو سالانہ تقریباً 7 ارب روپے کی آمدن ہوگی۔اس سلسلے میں پیڈواورنجی کمپنی کے درمیان پہلے ہی معاہدہ طے پاچکا ہے۔ منصوبے کی تکمیل سے صوبے میں توانائی اور صنعت کے شعبوں میں انقلاب آئے گا۔ پاور ٹرانسمشن لائن کے ذریعے صوبائی حکومت اپنی بجلی سستے نرخوں پر مقامی صنعتوں کو بھی فراہم کرے گی جس سے زیادہ سے زیادہ سرمایہ کاروں کو صوبے کی طرف راغب کرنے میں مدد ملے گی۔اس موقع پرسیکرٹری توانائی نے کمپنی کے حکام پر زوردیا کہ ٹرانسمیشن لائن بچھانے کیلئے فزبیلٹی سٹڈی کی تیاری اورکنسلٹنٹ کی تقرری کا عمل مزید تیزکیا جائے تاکہ منصوبہ مقررہ وقت میں مکمل کیا جاسکے۔ KPٹرانسمیشن اینڈ گرڈسسٹم کمپنی کے بورڈ کو مزید فعال بنانے کے لئے تیکنیکی ماہرین پر مشتمل ٹیم کو شامل کیا جائے تاکہ آنے والے دنوں میں کمپنی کو صوبے کے منافع بخش ادارے کے طورپر سامنے لایاجائے۔اجلاس میں کمپنی کے امورکی بہتری کے لئے کئی اہم فیصلوں کی بھی منظوری دی گئی۔

وزیر اعلیٰ خیبر پختونخوا کے معاون خصوصی برائے ہاؤسنگ ڈاکٹر امجد علی نے کہا ہے کہ نیو پشاور ویلی منصوبے کی بروقت تکمیل کے لئے بھر پور اقدامات جاری ہیں اور اس منصوبے کو عوامی امنگوں کے مطابق مکمل کیا جائے گا جس میں دور جدید کی اہم سہولیات دستیاب ہو ں گی۔ ان خیالات کا اظہار انہوں نے پشاور ویلی منصوبے کی تکمیلی امور کے حوالے سے پشاور میں منعقدہ جائزہ اجلاس کی صدارت کر تے ہوئے کیا۔ اجلاس میں سیکرٹری محکمہ ہاؤسنگ خیام حسن، ڈائریکٹر جنرل عمران وزیر اور دیگر متعلقہ افسران بھی موجود تھے۔ اس موقع پر سیکرٹری ہاؤسنگ نے گزشتہ اجلاس میں نیو پشاور ویلی سے متعلق کیے گئے فیصلوں پر ہونے والی پیشرفت سے معاون خصوصی کو آگاہ کیا جبکہ ڈائریکٹر جنرل خیبر پختونخوا پختونخوا ہاؤسنگ اتھارٹی نے بریفنگ دیتے ہوئے بتایاکہ نیو پشاور ویلی منصوبہ خیبر پختونخوا کا سب سے بڑا ہاؤسنگ منصوبہ ہے جس کا رقبہ ایک لاکھ چھ ہزار کنال اراضی پر محیط ہے جو کئی گاؤں اور علاقوں پر مشتمل ہے۔ انہوں نے کہا کہ ابتدائی مرحلے میں جرگہ کمیٹی کے چیئرمین نے اراضی مالکان کے ساتھ معاوضے اور دیگر معاملات کے امورطے کئے ہیں اور اس کی ہفتہ وار رپورٹ سیکرٹری ہاؤسنگ کو پیش کی جا رہی ہے۔ ڈائریکٹر جنرل نے اجلاس کے شرکاء کو بتایاکہ اس ہاؤسنگ منصوبے میں اب تک کی بڑی پیشرفت ایکسپریس وے ہے جو 15 سالوں سے نیو پشاور ویلی ہاؤسنگ سکیم کی تکمیل کی راہ میں رکاوٹ تھی۔انہوں نے کہا کہ یہ رہائشی منصوبہ آٹھ فیزز پر مشتمل ہے اور دور جدید کے رہائشی تقاضوں سے ہم آہنگ ہوگا جس میں ہیلتھ زون، کالج ویونیورسٹی،مساجد اور سپورٹس کمپلیکس جیسی سہولتیں بھی شامل ہونگیں۔ معاون خصوصی نے بریفنگ میں گہری دلچسپی لیتے ہوئے کہا کہ منصوبے کی اراضی سے متعلق جتنے بھی تصفیہ طلب معاملات ہیں وہ متعلقہ ممبر قومی اسمبلی کے تعاون اور جرگوں کے ذریعے حل کیے جائیں۔ انہوں نے مزید کہا کہ نیو پشاور ویلی ہاؤسنگ سکیم کے ہر فیز میں یکساں سہولیات فراہم کی جائیں گی۔ اس ہاؤسنگ منصوبے کو وزیر اعلیٰ خیبر پختونخوا کے ویژن کے مطابق پایہ تکمیل تک پہنچائیں گے اور یہ ہاؤسنگ منصوبہ صوبے کی ترقی میں اہم سنگ میل ثابت ہوگا۔

مشیر صحت خیبر پختونخوا احتشام علی نے عوامی و میڈیا شکایات کے پیش نظر رات گئے ڈسٹرکٹ ہیڈکوارٹر ہسپتال چارسدہ اور تحصیل ہیڈکوارٹر ہسپتال تنگی کا اچانک دورہ کیا۔دورے کے دوران انہوں نے ہسپتالوں کے مختلف شعبوں کا معائنہ کیا اور ایمرجنسی ادویات سمیت طبی آلات کی دستیابی کا جائزہ لیا۔ مریضوں سے ہسپتال کی سہولیات اور انتظامیہ کے رویے کے بارے میں بھی معلومات حاصل کیں۔ڈی ایچ کیو چارسدہ میں بدانتظامی اور ویمن میڈیکل آفیسر کی غیر حاضری پر برہمی کا اظہار کرتے ہوئے مشیر صحت نے فوری انکوائری کا حکم دیا۔ انہوں نے ہسپتال میں ادویات کی فراہمی کے حوالے سے بھی تفصیلات طلب کیں۔تحصیل ہیڈکوارٹر ہسپتال تنگی کے حوالے سے شکایات تھیں لیکن موقع پر سب کچھ بہتر پایا گیا۔ مشیر صحت نے کہا کہ انتظامی معاملات کو مزید مؤثر بنانے کے لیے ہر ممکن اقدامات کیے جا رہے ہیں۔انہوں نے کہا کہ حکومت صحت کے شعبے کے لئے وسائل فراہم کر رہی ہے اس کے باوجود عوام کو بہترین سہولیات کی عدم فراہمی ناقابل فہم ہے، محکمہ صحت میں کچھ بھی خراب ہو تو میں ذمہ دار ہوں جبکہ ہسپتالوں میں ایم ایس اور اضلاع میں ڈی ایچ اوز ذمہ دار ہیں۔مشیر صحت نے کہا کہ وزیراعلیٰ خیبر پختونخوا علی امین خان گنڈاپور صحت کے معاملات پر کوئی سمجھوتہ نہیں کرتے اور عوام کو بہترین صحت سہولیات کی فراہمی حکومت کی اولین ترجیح ہے۔

خیبر پختونخوا کے وزیرکھیل اور امور نوجوانان سید فخر جہان نے 5 فروری یوم یکجہتی کشمیر کے موقع پر اپنے ایک پیغام میں کہا ہے کہ ہندوستان نے جموں و کشمیر پر غیر قانونی قبضہ کرکے نہ صرف کشمیری عوام سے انکی آزادی کا حق چھین لیا ہے بلکہ ان کے بنیادی انسانی حقوق بھی پامال کیے گئے۔انھوں نے کہا کہ عالمی تاریخ میں کشمیر کے مظلوم عوام کے ساتھ ہونے والے ظلم اور بربریت کی مثال نہیں ملتی اور ہم اپنے کشمیری بھائیوں،بہنوں ماؤں،بزرگوں اور بچوں سے مکمل یکجہتی اور ہمدردی کا اظہار کرتے ہیں اور انکی سیاسی،اخلاقی اور انسانی حمایت جاری رکھیں گے۔انھوں نے عالمی برادری سے اپیل کی کہ وہ مسئلہ کشمیر کے منصفانہ حل کے لئے اپنا کردار ادا کرے اور کشمیری عوام کو ان کا جائز حق دلانے میں اپنا حصہ ڈالے۔انھوں نے کہا کہ ہندوستان نے ظلم، جبر اور بربریت کی انتہا کرکے ہزاروں کشمیریوں کو شہید کر دیا ہے تاکہ انھیں زبردستی اپنے حق سے محروم رکھ سکے تاہم وہ اپنے اس مقصد میں کامیاب نہیں ہو گا اور کشمیر انشاء اللہ آزاد ہوگا۔

پانچ فروری کشمیری بھائیوں کے ساتھ اظہار یکجہتی کیلے ملک بھر کی طرح ضلع تورغر میں بھی یوم یکجہتی کشمیر جوش و جذبہ کے ساتھ منایا گیا۔ڈپٹی کمشنر تورغر انورزیب خان کی سربراہی میں یوم یکجہتی کشمیر کے حوالے سے ایک منٹ کی خاموشی اور واک/ریلی کا انعقاد کیا گیا۔ریلی میں تورغر کے مختلف محکمہ جات کے افسران و جوانوں کے علاوہ مختلف شعبہ جات سے تعلق رکھنے والوں نے شرکت کی۔واک/ ریلی ڈپٹی کمشنر آفس سے شروع ہوکر میرہ بازار جدباء پر اختتام پذیر ہوئی۔ ریلی کے بعد ڈی سی آفس میں پودے لگا کر شجرکاری مہم کا آغاز بھی کیا گیا۔پروگرامز میں ڈسٹرکٹ پولیس کی طرف سے سکیورٹی کے فول پروف انتظامات کیے گئے تھے۔یوم یکجہتی کشمیر کے حوالے سے جدبا ہائی سکول میں پروگرام کا انعقاد کیا گیا تھا جسمیں طلباء اور افسران نے اپنے خیالات کا اظہار کیا۔

کوہستان لوئر، پٹن: حکومت خیبر پختونخوا کی ہدایات پر ضلعی انتظامیہ کوہستان لوئر کے زیر اہتمام آج 5 فروری یومِ کشمیر کے موقع پر کشمیری بھائیوں سے اظہارِ یکجہتی اور جدوجہدِ آزادی کے لیے ان کی لازوال قربانیوں کو خراجِ تحسین پیش کرنے کے لیے گورنمنٹ ہائی سکول پٹن میں ایک پروقار تقریب منعقد کی گئی۔ تقریب میں بچوں نے کشمیر کی آزادی کی جدوجہد کے موضوع پر خصوصی تقاریر پیش کیں۔ایڈیشنل ڈپٹی کمشنر جنرل ارشد عباسی اور ایڈیشنل ڈپٹی کمشنر ریلیف محمد اظہر خان نے اس موقع پر شہدائے کشمیر کو خراجِ عقیدت پیش کیا اور ایک منٹ کی خاموشی اختیار کی گئی۔ اس موقع پر پاکستان کا قومی ترانہ اور کشمیر کے ترانے بھی بجائے گئے۔تقریب کا مقصد کشمیری عوام سے اظہارِ یکجہتی، مقبوضہ وادی میں بھارتی فوج کے وحشیانہ مظالم، خواتین کی بے حرمتی، نوجوانوں کو لاپتہ کر کے قتل کیے جانے جیسے افسوسناک واقعات کو عالمی برادری کے سامنے اجاگر کرنا تھا۔تقریب سے خطاب کرتے ہوئے ایڈیشنل ڈپٹی کمشنر نے کہا کہ پاکستان کی عوام اس مشکل گھڑی میں کشمیری بھائیوں، ماؤں، بہنوں اور ان معصوم بچوں کے ساتھ ہے جن پر مودی سرکار ظلم ڈھا رہی ہے۔ انہوں نے کہا کہ انشاء اللہ وہ دن ضرور آئے گا جب اسلامی جمہوریہ پاکستان غالب ہوگا اور کشمیر پاکستان کا حصہ بنے گا۔اس سلسلے میں ایڈیشنل ڈپٹی کمشنر جنرل اور ایڈیشنل ڈپٹی کمشنر ریلیف کی قیادت میں گورنمنٹ ہائی اسکول پٹن سے پٹن لوئر بازار تک ایک ریلی نکالی گئی۔علاوہ ازیں، ضلع کوہستان لوئر کے مختلف مقامات اور پلوں پر کشمیری بھائیوں سے اظہارِ یکجہتی کے لیے بینرز آویزاں کیے گئے۔

یوم یکجہتی کشمیر کے موقع پر ضلع ایبٹ آباد میں ضلع انتظامیہ کی جانب سے کشمیر کے مظلوم عوام سے یکجہتی کا بھرپور اظہار کیا گیا۔ اس سلسلے میں ایوب پل حویلیاں پر انسانی ہاتھوں کی زنجیر بنائی گئی اور کشمیری عوام سے یکجہتی اور ان کی حمایت کے لیے ایوب پل سے پرانا پل حویلیاں تک واک بھی کی گئی۔ اس موقع پر ڈپٹی کمشنر ایبٹ آباد کیپٹن (ر) ثناء اللہ خان، وائس چانسلر ایبٹ آباد یونیورسٹی آف اینڈ ٹیکنالوجی ملک مجدد الرحمان، تحصیل چیئرمین حویلیاں عزیز شیر خان، ایڈیشنل ڈپٹی کمشنر ایبٹ آباد عثمان اشرف، اسسٹنٹ کمشنر حویلیاں، لائن ڈیپارٹمنٹس کے افسران اور نمائندوں سمیت سکولوں کے طلباء و طالبات اور اساتذہ نے شرکت کی۔ شرکاء نے بھارتی ظلم و تسلط کے خلاف کشمیری عوام کے غیر متزلزل عزم و حوصلے کو سراہا اور انہیں یقین دلایا کہ ہمارا دل کشمیریوں کے ساتھ دھڑکتا ہے۔ کشمیر کی بھارتی تسلط سے آزادی تک کشمیریوں کی حمایت کے عزم کا اعادہ کرتے ہوئے بھارتی سامراج کے خلاف اور کشمیری عوام کے حق میں نعرے بازی کی گئی۔ دریں اثناء گورنمنٹ ماڈل ہائی سکول حویلیاں میں یوم یکجہتی کشمیر کے حوالے سے پروقار تقریب کا انعقاد کیا گیا جس کے مہمان خصوصی ڈپٹی کمشنر ایبٹ آباد کیپٹن (ر) ثناء اللہ خان تھے جبکہ اس موقع پر ایڈیشنل ڈپٹی کمشنر، اسٹنٹ کمشنرز، اساتذہ اور نجی و سرکاری سکولوں کے طلباء و طالبات نے بڑی تعداد میں شرکت کی۔ تقریب میں طلباء و طالبات نے کشمیری عوام سے یکجہتی کے اظہار اور ان پر بھارتی مظالم کو اجاگر کرنے حوالے سے ٹیبلوز پیشں کیے اور تقاریر کیں۔ تقریب سے خطاب کرتے ہوئے ڈپٹی کمشنر ایبٹ آباد کیپٹن ر ثناء اللہ خان نے کہا کہ آج یوم یکجہتی کشمیر کے موقع پر ایک دفعہ پھر ہم سب مل کر کشمیری عوام کو یقین دلاتے ہیں کہ ان کے حق خودارادیت کے حصول کے لیے پاکستان کے عوام ان کے ساتھ کھڑے ہیں۔ پاکستان نے کشمیر اور کشمیری عوام کے لیے ہر عالمی فورم پر آواز اٹھائی ہے اور اٹھاتا رہے گا۔ انہوں نے کہا کہ ایک دن کشمیر میں بھی آزادی کا سورج طلوع ہوگا۔ ہم سب مل کر کشمیری عوام کے ساتھ کھڑے ہیں اور کشمیر کی بھارتی تسلط سے آزادی تک ان کے ساتھ کھڑے رہیں گے۔ قبل ازیں یوم یکجہتی کشمیر کے موقع پر ڈپٹی کمشنر آفس میں پرچم کشائی کی تقریب کا انعقاد بھی کیا گیا جس کے مہمان خصوصی کمشنر ہزارہ ڈویژن ظہیر اسلام تھے۔ پرچم کشائی کے بعد ملک خدادا پاکستان کی سلامیت اور کشمیر کی بھارتی سامراج اور کشمیریوں کی بھارتی ظالم افواج سے آزادی کے لیے خصوصی دعا کی گئی۔

یوم یکجہتی کشمیر کے حوالے سے پختونخوا ہاؤس میں خصوصی تقریب ہوئی۔ کمشنر ڈویژن مردان نثار احمد مہمان خصوصی تھے۔ تقریب میں ڈپٹی کمشنر مردان ڈاکٹر عظمت اللہ وزیر, ڈی پی او ظہور بابر آفریدی، سیکرٹری ٹو کمشنر سارا تواب، اے ڈی سی فنانس فہد افتخار، سرکاری افسران، میڈیا، سول سوسائٹی، سکولوں کے طلباء و طالبات نے شرکت کی۔ کشمیری بھائیوں کے ساتھ اظہار یکجہتی کے لیے ایک منٹ کی خاموشی اختیار کی گئی۔ سکول کے بچے بچیوں نے قومی نغمے، ترانے، تقاریر اور ٹیبلو پیش کیے جن میں کشمیری مسلمانوں کی قربانیوں کو اجاگر کیا گیا اور ان پر بھارتی قابض فوج کے ظلم و بربریت کی منظر کشی کی گئی۔ مقررین نے کشمیری مسلمانوں پر بھارتی غاصب فوج کے مظالم کی مذمت کی۔ انہوں نے کشمیر میں انسانی حقوق کی خلاف ورزیوں پر عالمی ضمیر کی خاموشی کو افسوسناک قرار دیا۔ تقریب سے خطاب کرتے ہوئے کمشنر مردان نثار احمد نے کہا کہ کشمیری مسلمانوں کی جدوجہد آزادی ضرور کامیاب ہوگی۔ انہوں نے کہا کہ مسئلہ کشمیر کو کشمیری عوام کی امنگوں اور اقوام متحدہ کی قراردادوں کے مطابق حل کیا جائے۔ انہوں نے اقوام متحدہ اور انسانی حقوق کے اداروں پر زور دیا کہ وہ کشمیر میں بھارتی مظالم اور انسانی حقوق کی سنگین خلاف ورزیوں کا نوٹس لیں۔ کمشنر مردان نے کہا کہ یہ دن ہمیں یہ احساس دلاتا ہے کہ آزادی کتنی اہم ہے اور ہمارے اسلاف نے آگ و خون کے دریا پار کر کے ہمارے لیے آزادی حاصل کی جس کی ہمیں قدر کرنی چاہییے۔ انہوں نے کہا کہ ہندوستان نے مقبوضہ کشمیر کی خصوصی حیثیت کا خاتمہ کرکے وہاں کی ڈیموگرافی تبدیل کرنے کی کوشش کی ہے۔ پاکستان اپنے کشمیری بہن بھائیوں کی جدوجہد آزادی میں ان کے ساتھ ہے اور کشمیری مسلمانوں کی قربانیوں کی بدولت کشمیر آزاد ہو کر پاکستان کا حصہ بنے گا۔ آخر میں کمشنر مردان نثار احمد اور ڈپٹی کمشنر ڈاکٹر عظمت اللہ وزیر نے واک کی قیادت کی۔