وزیر اعلیٰ خیبر پختونخوا کے معاون خصوصی برائے صنعت عبدالکریم تورڈھیر کی زیر صدارت محکمہ صنعت کے کمیٹی روم میں وزیر اعلیٰ خیبر پختونخوا کی ہدایات کی روشنی میں صنعتی شعبے کی اراضیات کے بہتر استعمال اور اس سلسلے میں انتقالات میں شفافیت لانے کے حوالے سے غوروخوض کرنے کی غرض سے ایک اجلاس منعقد ہوا۔اجلاس میں ایڈیشنل سیکرٹری بورڈ آف ریونیو محمد سلیم،ڈپٹی سیکرٹری صنعت اعزازاللہ،ڈپٹی ڈائریکٹر صنعت حنیف خان و دیگر افسران نے شرکت کی۔ اجلاس میں مختلف مقاصد کیلئے صنعتی اراضیات کے انتقالات میں ممکنہ غلطیوں کی وجہ سے متعلقہ شعبے کی اراضیات کو نقصان سے بچانے کیلئے مختلف تجاویز کا جائزہ لیا گیا اور اس سلسلے میں انڈسٹریز و بورڈ آف ریونیو کے افسران نے اپنی اپنی آرا پیش کیں۔ اجلاس میں ڈائریکٹوریٹ جنرل انڈسٹریز کے افسران نے موقف اختیار کیا کہ 1953 میں ون یونٹ کے دوران لینڈ ایکوزیشن ایکٹ کا نفاذ عمل میں لایا گیا تھا تاہم بعد میں 1980 کے دوران وہ قانون واپس لے لیا گیا اور دیگر صوبوں میں انڈسٹریل لینڈ کلیکٹر کا اختیار نظامت صنعت کے پاس چلا گیا جبکہ خیبر پختونخوا میں صنعتی اراضیات کے لینڈ کلیکٹر کے اخراجات ڈپٹی کمشنرز کے پاس ہیں۔نظامت اعلیٰ صنعت کے افسران نے بتایا کہ دیگر صوبوں کے ماڈل کو اپنانے سے یہاں کے صنعتی شعبے کی قیمتی اراضی کے استعمال میں شفافیت آئے گی اور اس کے حصول و انتقالات میں کسی بھی قسم کی غلطی کا ابہام نہیں رہے گا اور یہاں پر قیمتی صنعتی اراضیات کی ایکوزیشن کا مکمل ریکارڈ بھی محکمہ کے پاس محفوظ رہے گا۔اس موقع پر بورڈ آف ریونیو کے افسران نے بتایا کہ لینڈ ایکوزیشن ایکٹ کے تحت اراضیات کے انتقالات کا اختیار بورڈ آف ریونیو کے پاس ہے تاہم انڈسٹریل اراضیات کے زمرے میں متعلقہ محکمہ کو بورڈ سے ہی بطور لینڈ ایکوزیشن کلیکٹر درکار عملہ فراہم کیا جاسکتا ہے جس کے ذریعے اس نوعیت کے کیسز کے معاملات کے حل میں تیزی آئے گی۔اس موقع پر معاون خصوصی نے محکمہ صنعت اور ڈائریکٹوریٹ جنرل انڈسٹری کے افسران کو ہدایت کی کہ وہ دیگر صوبوں میں صنعتی اراضیات کے انتقالات اور حصول کے مروجہ قوانین و اختیارات کے تفصیلات اور صوبے میں زیر استعمال طریقہ کار و بورڈ آف ریونیو کی رائے پر مشتمل سمری/رپورٹ مرتب کرے جسے مزید عملدرآمد کیلئے وزیر اعلیٰ خیبر پختونخوا کو پیش کیا جائے گا۔

ایجوکیشنل ٹیسٹنگ اینڈ ایوالویشن ایجنسی (ایٹا) نے خیبر پختونخوا کے سرکاری سکولوں کے چھٹی اور ساتویں جماعت کے طلبہ کے لیے پہلے کمپیوٹر بیسڈ سکالرشپ ٹیسٹ (CBT) کا کامیابی سے انعقاد کیا۔ یہ اہم اقدام حکومت خیبر پختونخوا کے تعلیمی معیار میں بہتری، شفافیت اور انصاف کے عزم کا عکاس ہے۔
وظائف کے منعقدہ یہ کمپیوٹر بیسڈ ٹیسٹ 11 جنوری سے 27 جنوری 2025 تک صوبے کے تمام اضلاع میں کامیابی سے منعقد کیا گیا، اس امتخان میں کامیابی حاصل کرنے والے 506 ہونہار طالب علموں کو خیبرپختونخوا حکومت کی جانب سے صوبہ کے بہترین تعلیمی اداروں میں بارہوں جماعت تک مفت تعلیم فراہم کی جائے گی۔ایٹا کی جانب سے جاری اعداد و شمار کے مطابق، اس سکالرشپ پروگرام کے لیے صوبہ بھر سے 13,251 طلبہ نے درخواستیں جمع کی تھی جن میں سے 12,104 طلبہ نے ٹیسٹ میں شرکت کی۔ نتائج کے مطابق 3,152 طلبہ کامیاب ہوئے، جب کہ 8,939 طلبہ کامیابی حاصل نہ کرسکیں۔ اور اس امتحان میں فیل قرار پائے گئے۔ 13 امیدواروں کو امتحانی قواعد کی خلاف ورزی اور نقل کی کوشش پر تادیبی کارروائی کا سامنا ہے۔
مقابلے کے اس امتحان میں کل 12,104 امیداروں میں سے 9,902 لڑکے اور 2,202 لڑکیاں شریک تھیں۔ لڑکوں کی کامیابی کی شرح 26.8 فیصد جبکہ لڑکیوں کی کامیابی کی شرح 22.6 فیصد رہی۔ ماضی میں کامیابی کی مجموعی شرح صرف 10 فیصد تھی، جس سے کمپیوٹر بیسڈ ٹیسٹ کے نفاذ کے فوائد کی واضح نشاندہی ہوتی ہے۔ کمپوٹر بیسڈ ٹیسٹ کے نفاذ کے بعد ایٹا 24 گھنٹوں کے اندر نتائج کا اعلان کرتا ہے جو کہ نظام کی تیز رفتاری اور پائیداری کی نشانی ہے۔ ماضی میں یہ امتحانات روایتی پیپر بیسڈ طریقے سے ہوتے تھے، جس میں غلطیوں، تاخیر اور بدعنوانیوں کے امکانات موجود تھے۔ جبکہ کمپیوٹر بیسڈ ٹیسٹ شفاف، معیاری اور محفوظ امتحانی عمل فراہم کرتا ہے۔وظائف کے لئے منعقدہ اس امتحان میں سرکاری سکولوں کے تین طالب علموں نے 99 نمبر حاصل کئے جس سے اس نئے نظام کی افادیت ثابت ہوتی ہے۔حکومت خیبر پختونخوا کا عزم ہے کہ وہ تعلیمی معیار میں مزید بہتری لائے گی، اور تمام طلبہ کو برابر کے مواقع فراہم کرے گی تاکہ وہ اپنی صلاحیتوں کے مطابق کامیاب ہو سکیں۔ ایٹا اس عزم کے تحت مسلسل اپنے امتحانی نظام میں بہتری کے لیے کام کر رہا ہے اور کمپیوٹر بیسڈ ٹیسٹ کے ذریعے ایک شفاف، منصفانہ اور ٹیکنالوجی پر مبنی امتحانی نظام قائم کر رہا ہے۔

وزیراعلیٰ خیبرپختونخوا کے معاون خصوصی برائے جنگلات، جنگلی حیات، ماحولیات و موسمیاتی تبدیلی پیر مصور خان نے کہا ہے کہ خیبرپختونخوا حکومت خصوصی افراد کی فلاح و بہبود کے لئے عملی اقدامات اٹھارہی ہے، اس سلسلے میں وزیراعلیٰ خیبرپختونخوا نے خصوصی افراد کی مالی معاونت کا پروگرام بھی شروع کر دیا ہے جس کے تحت خصوصی افراد کی مالی معاونت کی جارہی ہے،ان خیالات کا اظہار انھوں نے گزشتہ روز خرکی درگئی ملاکنڈ میں خصوصی افراد کے لئے قائم سکول میں صوبائی حکومت کی جانب سے خصوصی افراد میں دس دس ہزار روپے کے مالی معاونت کے چیکس کی تقسیم کے موقع پر کیا ا س موقع پر ضلعی سوشل ویلفئیر آفیسر صابر خان، سکول پرنسپل نصیب گل، محکمہ سماجی بہبود کے دیگر افسران سمیت خصوصی افراد بھی بڑی تعداد میں موجود تھے، وزیراعلیٰ کے معاون خصوصی پیر مصور خان نے اس موقع پر خطاب کرتے ہوئے کہا کہ معاشرے کے دیگر طبقات کے ساتھ ساتھ خصوصی افراد بھی ہماری خصوصی توجہ کی مستحق ہیں یہی وجہ ہے کہ وزیراعلیٰ خیبرپختونخوا نے صوبے میں انکے لئے مالی معاونت کا آغاز کیا ہے، انھوں نے کہا کہ پہلے مرحلے میں ضلع ملاکنڈ کے تقریباً 2700 خصوصی افراد میں مالی معاونت کے چیکس تقسیم کئے جارہے ہیں جس کے بعد حکومتی ڈیٹا کے مطابق دیگر خصوصی افراد کو مرحلہ وار چیکس دئیے جائینگے، پیر مصور خان کا مزید کہنا تھا کہ صوبائی حکومت نے معاشرے کے دیگر کمزور طبقات اور بے سہارا افراد کی فلاح و بہبود پر خصوصی توجہ مرکوز کر رکھی ہے، صحت، تعلیم اور دیگر شعبوں میں صوبائی حکومت نے انقلابی اقدامات اٹھائے ہیں جسکی بدولت صوبے کی عوام کا پاکستان تحریک انصاف کی صوبائی حکومت پر اعتماد بڑھ گیا ہے پیر مصور خان کا کہنا تھا کہ صحت انصاف کارڈ، مستحقِ افراد کو مفت سولر سسٹم کی فراہمی،صوبے میں پناہ گاہوں کا قیام، نشے کے عادی افراد کی بحالی اور انھیں معاشرے کا کار آمد شہری بنانے جیسے منصوبے اسکی واضح مثال ہیں، دریں اثناء معاون خصوصی پیر مصور خان نے تحصیل ہیڈکوارٹر ہسپتال درگئی کا بھی دورہ کیا جہاں وہ ہسپتال میں داخل مریضوں اور انکے تیمارداروں سے ملے اور ان سے ہسپتال میں علاج و معالجے کی سہولیات کے حوالے سے معلومات حاصل کیں، معاون خصوصی نے ہسپتال میں لیبارٹری سمیت مختلف وارڈز کا بھی معائنہ کیا اور ہسپتال انتظامیہ کو مریضوں کو بہتر ین علاج و معالجے کی سہولیات فراہم کرنے کی ہدایات جاری کیں۔

صوبائی ٹاسک فورس برائے انسدادِ پولیو کا اجلاس چیف سیکرٹری خیبرپختونخوا ندیم اسلم چوہدری کی زیرصدارت سول سیکریٹریٹ پشاور میں منعقد ہوا۔ اجلاس میں متعلقہ انتظامی سیکرٹریز، قانون نافذ کرنے والے اداروں کے اعلیٰ حکام، کوآرڈینیٹر ای او سی، عالمی معاون اداروں یونیسف اور عالمی ادارہ صحت کے نمائندوں سمیت دیگر متعلقہ حکام نے شرکت کی جبکہ نیشنل ایمرجنسی آپریشنز سنٹر اسلام آباد کے حکام، کمشنرز اور ڈپٹی کمشنرز ویڈیو لنک کے ذریعے اجلاس میں شریک ہوئے۔ اجلاس کی صدارت کرتے ہوئے چیف سیکرٹری خیبرپختونخوا ندیم اسلم چوہدری نے کہا کہ ماحولیاتی نمونے مثبت آنے والے اور پولیس کیسسز رپورٹ ہونے والے اضلاع کی یونین کونسل میں پولیو وائرس کو کنٹرول کرنے کے لئے مربوط حکمت اپنائی جائے، فیک فنگر مارکنگ و ڈیٹا رپورٹنگ میں کوتاہیوں کو روکا جائے, اس ضمن میں کوتاہی کے مرتکب سٹاف کے خلاف ضابطے کے تحت سخت کارروائی کی جائے۔ مختلف اضلاع میں کیسسز رپورٹ ہونا،ماحولیاتی نمونوں کا مثبت آنا خطرے کی علامت ہے اور اس کے تدارک کیلئے ہر ممکن اقدامات کئے جائیں۔ ایسے میں ٹیموں کو پوری ذمہ داری سے کام کرنے کی ضرورت ہے. ماحولیاتی نمونے مثبت آنے والے علاقوں پر بات کرتے ہوئے چیف سیکرٹری نے حکام پر زور دیا کہ وہ تمام وسائل بروئے کار لاتے ہوئے وجوہات کا تعین کریں اور اس ضمن میں اقدامات جاری رکھے جائیں۔ انہوں نے حکام کو مہم کے معیار پر خصوصی توجہ دینے کی ہدایت کی اور کہا کہ پولیو وائرس کے انسداد کا دارومدار معیاری پولیو مہم پر منحصر ہے. چیف سیکرٹری کا کہنا تھا کہ پولیو مہمات کی معیار اور مانیٹرنگ کے حوالے سے کوئی کوتاہی نہ برتی جائے۔ انسداد پولیو ایک قومی فریضہ ہے۔ معیاری اور بروقت اقدامات سے ہی پولیو کا مکمل تدارک کیا جاسکتا ہے اور ہم اپنے بچوں کو ایک محفوظ مستقبل دے سکتے ہیں۔ اجلاس میں گزشتہ ٹاسک فورس میں کئے گئے فیصلوں پر عملدرآمد کا بھی تفصیلی جائزہ لیا گیا۔چیف سیکرٹری نے فکس پوانٹس اور ہسپتالوں میں پولیو ویکسین کی دستیابی یقینی بنانے کی ہدایت کی اور کہا کہ والدین کی سہولت کے لئے ڈور ٹو ڈور ویکسین مہم کے ساتھ صحت مراکز میں بھی یہ ویکسین دستیاب ہونی چاہیے۔ چیف سیکرٹری کا مزید کہنا تھا کہ پولیو مہم کیساتھ ساتھ بچوں کی حفظان صحت اور غذائیت، بچوں کے لئے صاف پانی کی فراہمی اور صفائی ستھرائی کے معاملات کے حوالے سے اقدامات پر بھی خصوصی توجہ دی جائے۔ چیف سیکرٹری نے اضلاع کی کارکردگی کا بغور جائزہ بھی لیا اور بعض اضلاع بشمول ضلع بنوں کی کارکردگی کو سراہا۔

وزیر اعلیٰ خیبرپختونخوا کے معاون خصوصی برائے ٹرانسپورٹ حاجی رنگیز احمد نے کہا ہے کہ ہماری کوشش ہے کہ محکمہ ٹرانسپورٹ کے محاصل میں خاطر خواہ اضافہ کیا جاسکے انہوں نے کہا ہے کہ بنک آف خیبر میں محکمہ ٹرانسپورٹ روڈ ٹرانسپورٹ بورڈ کے 44 کروڑ روپے جو کہ سر پلس سرمایہ تھا بنک آف خیبر میں 11.30 فیصد منافع پر انویسٹ کردئیے گئے ہیں۔ ان خیالات کا اظہار انہوں نے جمعرات کے روز بنک آف خیبر کے بزنس ہیڈ سے اپنے دفتر میں ملاقات کے دوران کیا ہے، اس موقع پر ڈائریکٹر ٹرانسپورٹ ودیگر اعلیٰ حکام بھی موجود تھے۔ معاون خصوصی نے اپنے ہاتھوں سے بینک آف خیبر کو 44 کروڑ روپے کا چیک دیا ہے، انہوں نے کہا ہے کہ روڈ ٹرانسپورٹ بورڈ کے اس سرپلس سرمایہ سے محکمہ ٹرانسپورٹ کے محاصل میں اضافہ ہوگا جس سے صوبے کی معیشت میں حاطر خواہ بہتری دیکھنے کو ملے گی۔ ملاقات کے دوران معاون خصوصی نے اظہار خیال کرتے ہوئے کہا کہ ہماری کوشش ہے کہ محکمہ ٹرانسپورٹ کی ریونیو کو مزید بہتر کریں اور محکمہ میں حقیقی مثبت تبدیلی لاسکیں۔

وزیر اعلیٰ خیبرپختونخوا کے معاون خصوصی برائے ٹیکنیکل ایجوکیشن طفیل انجم نے کہا ہے کہ خیبرپختونخوا ٹیکنیکل ایجوکیشن اینڈ ووکیشنل ٹریننگ اتھارٹی کو جدید خطوط پر استوار کرنے جارہے ہیں، انہوں نے کہا ہے کہ کے پی ٹیوٹا ملازمین کے مسائل کو ترجیحی بنیادوں پر حل کریں گے۔ ان خیالات کا اظہار انہوں نے کے پی ٹیوٹا ملازمین ایسوسی ایشن کے نمائندہ وفد سے ایک ملاقات کے دوران کیا ہے۔ ملاقات کے دوران کے پی ٹیوٹا ملازمین کی ایسوسی ایشن اور منیجنگ ڈائریکٹر کے پی ٹیوٹا منصور قیصر و دیگر اعلیٰ حکام بھی موجود تھے۔ اجلاس سے خطاب کرتے ہوئے معاون خصوصی برائے ٹیکنیکل ایجوکیشن طفیل انجم نے کہا ہے کہ خیبرپختونخوا ٹیکنیکل ایجوکیشن اینڈ ووکیشنل ٹریننگ اتھارٹی ملازمین (پبلک سرونٹس) کے مسائل ترجیحی بنیادوں پر حل کریں گے۔ انہوں نے تمام ملازمین کو یقین دہانی کرائی ہے کہ ان کے جتنے بھی جائز مطالبات ہیں ان کے حل کے لیے اقدامات اٹھائے جائیں گے۔ اجلاس کے دوران ایسوسی ایشن نے کے پی ٹیوٹا کے امور اور ملازمین کو درپیش مسائل پر تفصیلی بریفننگ دی ہے۔ اس موقع پر معاون خصوصی نے کہا ہے کہ کے پی ٹیوٹا کے ملازمین کے مسائل جن میں سی پی فنڈ کا مسئلہ، سروس سٹرکچر، لازمی ٹر یننگ،ملازمین کی پروموشن کیلئے آسامیوں کی تخلیق،پی ایچ ڈی اور ایم پل الاوئنس،EOBI،اور ڈیتھ گرانٹ وغیرہ کے مسائل حل کئے جائیں گے۔ اجلاس کے دوران ایسوسی ایشن کے وفد نے معاون خصوصی برائے ٹیکنیکل ایجوکیشن طفیل انجم کا خصوصی شکریہ ادا کیا اور امید ظاہر کی ہے کہ ان کے تمام حل طلب مسائل حل کئے جائیں گے۔

محکمہ ریلیف کا ایک اعلیٰ سطحی اجلاس وزیر اعلیٰ کے معاون خصوصی برائے ریلیف، بحالی و آبادکاری ملک نیک محمد خان داوڑ کی زیر صدارت سول سیکرٹریٹ پشاور میں منعقد ہوا، جس میں سیکرٹری ریلیف یوسف رحیم، ڈائریکٹر جنرل پی ڈی ایم اے، ڈائریکٹر جنرل ریسکیو 1122، ڈائریکٹر سول ڈیفنس اور دیگر اعلیٰ حکام نے شرکت کی۔اجلاس کے دوران معاون خصوصی ملک نیک محمد خان داوڑ نے میرٹ اور شفافیت کی اہمیت پر زور دیتے ہوئے تمام اداروں کو ہدایت کی کہ وہ اپنے امور کو دیانتداری اور قانونی تقاضوں کے مطابق انجام دیں۔ انہوں نے کہا کہ عوامی خدمت اور ہنگامی صورتحال میں فوری رسپانس کو یقینی بنانے کے لیے تمام متعلقہ اداروں کو مکمل ہم آہنگی کے ساتھ کام کرنا ہوگا۔اجلاس میں ضلع شمالی وزیرستان کے ڈپٹی کمشنر نے بھی خصوصی طور پر شرکت کی اور علاقے میں جاری ریلیف سرگرمیوں پر بریفنگ دی۔ اجلاس کے شرکاء نے عوام کو درپیش مسائل کے حل کے لیے مشترکہ حکمت عملی اپنانے اور مزید اقدامات کرنے پر اتفاق کیا۔

وزیر اعلیٰ خیبر پختونخوا علی امین خان گنڈاپور کی ہدایات کی روشنی میں سیکرٹری محکمہ ایکسائز سید فیاض علی شاہ کی زیر صدارت ایکسائز تھانہ جات اور ایکسائز اینٹیلیجنس بیورو کا ہنگامی اجلاس منعقد ہوا جس میں محکمہ ایکسائز، ٹیکسیشن اینڈ نارکوٹکس کنٹرول اور ڈائریکٹر جنرل ایکسائز سمیت دیگر افسران نے شرکت کی۔اجلاس میں تمام سرکل افسران اور انچارج ایکسائز اینٹیلیجنس بیورو کو منشیات کے تدارک کے لیے موئثر اقدامات اٹھانے اور اس حوالے سے کاروائی مزید تیز کرنے کی ہدایت کی گئی اور کہا گیا کہ تمام سرکل افسران، ایس ایچ اوز اور ایکسائز اینٹلیجنس سکواڈز انچارج 15 دن کے اندر منشیات کے خلاف نمایاں کارکردگی سرانجام دیں اور اس کے حوالے سے رپورٹ پیش کریں۔ اسی طرح صوبہ بھر میں منشیات فروشوں کے فہرستیں مرتب کرنے، بڑے پیمانے پر کریک ڈاؤن کرنے کی منشیات کے کاروبار میں ملوث افراد کو گرفتار کرنے، ان کے خلاف انویسٹیگیشن نظام کو جدید خطوط کے مطابق کرنے، مقدمات کی بھر پور پیروی کرنے کی بھی ہدایت کی گئی تاکہ لوگوں کو منشیات کا عادی بنانے اور انہیں برباد کرنے والوں کو عدالتوں سے سخت سے سخت سزائیں دلوائی جا سکیں۔ اجلاس میں منشیات کے خلاف غیر تسلی بخش کارکردگی والے افسران کے تبادلوں، ایکسائز تھانوں کی استعداد کار بڑھانے کیلئے مزید سٹاف تعینات کرنے پر بھی زور دیا گیا۔ اس موقع پر ڈائریکٹر نارکوٹکس کنٹرول نے سیکریٹری ایکسائز کو ماہ جنوری میں منشیات کی روک تھام کے حوالے سے کئے گئے اقدامات،پکڑی گئی منشیات ا و رگرفتار ملزمان کے حوالے سے تفصیلی بریفنگ دی جبکہ ایکسائز اینڈ ٹیکسیشن آفیسر فیصل خورشید برکی نے ڈائریکٹر جنرل کو منشیات کیسز میں عدالتی مقدمات کی پیروی اور پیش رفت پر بریفنگ دی۔، سیکریٹری ایکسائز نے اس موقع پر منظم منصوبہ بندی اور لائحہ عمل کے مطابق منشیات کی کسی بھی قسم سرگرمی کے خلاف ہمہ وقت الرٹ رہنے اور مشیات نیٹ ورکس کے خلاف انٹیلیجنس کا دائرہ کار بڑھانے کے ہدایات جاری کیں۔