خیبر پختونخوا فوڈ سیفٹی اینڈ حلال فوڈ اتھارٹی کی جانب سے صوبہ بھر میں خوردونوش اشیاء سے وابستہ یونٹس اورکاروباروں کے لیے خصوصی رجسٹریشن و تجدیدِ لائسنس مہم کا آج 16 جون 2025 سے باضابطہ آغاز کر دیا گیا ہے، جو 30 جون 2025 تک جاری رہے گی۔فوڈ اتھارٹی کے ترجمان کے مطابق اس مہم کے دوران پہلے سے رجسٹرڈ خوراک کے کاروبار جن کے لائسنس کی میعاد ختم ہو چکی ہے، ان کی تجدید کی جائے گی، جبکہ غیر رجسٹرڈ یونٹس اور کاروباروں کو قانونی دائرے میں لاتے ہوئے ان کی رجسٹریشن کی جائے گی۔اس مہم کا بنیادی مقصد قانونی دائرے میں لا کرعوام کو محفوظ، معیاری اور حلال خوراک کی فراہمی کو یقینی بنانا ہے۔ڈائریکٹر جنرل فوڈ سیفٹی اینڈ حلال فوڈ اتھارٹی واصف سعید نے خوراک سے منسلک کاروباروں کے مالکان سے اپیل کی ہے کہ وہ اس خصوصی مہم سے بھرپور استفادہ کرتے ہوئے اپنی بروقت رجسٹریشن اور لائسنس کی تجدید کو یقینی بنائیں، اور اتھارٹی کی ٹیموں سے مکمل تعاون کریں۔ان کا کہنا تھا کہ بغیر رجسٹریشن کام کرنے والے غیر معیاری خوراک کے کاروباروں کے خلاف قانون کے مطابق سخت کارروائی عمل میں لائی جائے گی۔مزید بتایا گیا ہے کہ مہم کے دوران صوبے کے تمام اضلاع میں فوڈ سیفٹی ٹیمیں متحرک رہیں گی، جو نہ صرف بازاروں کا معائنہ کریں گی بلکہ رجسٹریشن کے حوالے سے رہنمائی بھی فراہم کریں گی۔

خیبرپختونخوا حکومت نے مالی سال 2025-26 کے بجٹ میں جنگلات، جنگلی حیات اور موسمیاتی تبدیلی جیسے اہم شعبوں کو خصوصی ترجیح دیتے ہوئے 62 مختلف نئے اور جاری منصوبوں کے لیے خطیر رقم مختص کی ہے،مذکورہ شعبوں کے 33 منصوبوں پر کام جاری ہے جبکہ 29 نئے منصوبوں پر کام کا آغاز کیا جائے گا، ان منصوبوں کے لئے تقریبا 4 ارب 40 کروڑ روپے مختص کیے گئے ہیں، جاری منصوبوں کے لئے تین ارب 79 کروڑ 40 لاکھ روپے جبکہ نئے منصوبوں کے لیے تقریباً 445 ملین روپے مختص کیے گئے ہیں، جنگلات کے شعبے میں 10 بلین ٹری سونامی پروگرام، گرین پاکستان پروگرام کو وسعت دینے اور جنگلاتی وسائل کے احیاء کے لیے ایک ارب روپے مختص کئے گئے ہیں، جنگلی حیات کے تحفظ اور عوام بالخصوص بچوں کی تفریح کی غرض سے کانجو ٹاؤن شپ سوات میں منی چڑیا گھر کے قیام کے لیے 371.5 ملین روپے جبکہ پشاور ڈویژن میں چڑیا گھر کے لیے 405.5 ملین روپے مختص کیے گئے ہیں،موسمیاتی تبدیلی کے شعبے میں مختلف اہم منصوبوں کے لیے بجٹ میں 454 ملین روپے رکھے گئے ہیں، صوبائی حکومت نے بجٹ میں ماحولیاتی تحفظ کو ابھی اولین ترجیح دی ہے ماحولیات کے تین جاری اور دو نئے منصوبوں کے لئے تقریبا 94 ملین روپے مختص کئے گئے ہیں، صوبائی حکومت کا مذکورہ شعبہ جات کو ترجیح دینا صرف ماحول کا تحفظ ہی نہیں بلکہ عوام کو صاف ستھرا اور تفریحی ماحول فراہم کرنا بھی ہے،وزیراعلی کے معاون خصوصی برائے جنگلات و ماحولیات پیر مصور خان کی نگرانی میں ان منصوبوں کی تکمیل سے بانی چیئرمین عمران خان کا سرسبز و شاداب خیبرپختونخوا کا خواب شرمندہ تعبیر ہوگا۔

وزیر قانون خیبر پختونخوا، آفتاب عالم ایڈوکیٹ نے مالی سال 2025-26 کے لیے صوبائی بجٹ میں شعبہ قانون و انصاف کے لیے مختص کی گئی رقم کا خیر مقدم کیا ہے۔ انہوں نے کہا کہ یہ بجٹ صوبے میں انصاف کی فراہمی کو مزید بہتر بنانے اور قانونی ڈھانچے کو مضبوط کرنے کے حکومتی عزم کا عکاس ہے۔ جاری کردہ تفصیلات کے مطابق، مالی سال 2025-26 کے لیے شعبہ قانون و انصاف کے لیے مجموعی طور پر 6460.661 ملین روپے مختص کیے گئے ہیں۔ مختص کی گئی رقم 42 منصوبوں پر مشتمل ہے، جن میں سے 32 جاری منصوبے ہیں اور 10 نئے منصوبے شامل ہیں۔وزیر قانون نے اس موقع پر بتایا کہ جاری منصوبوں کے لیے 5866.329 ملین روپے جبکہ نئے منصوبوں کے لیے 594.332 ملین روپے مختص کیے گئے ہیں۔ یہ تخصیص انصاف تک رسائی کو آسان بنانے، عدالتی نظام کو جدید خطوط پر استوار کرنے، اور قانونی اداروں کی استعداد کار بڑھانے میں معاون ثابت ہوگی۔ انہوں نے مزید کہا کہ اس بجٹ کے تحت 20 منصوبے تکمیل کے قریب ہیں، جن میں سے 18 جاری منصوبے ہیں اور 2 نئے منصوبے ہیں۔ یہ جلد ہی مکمل ہو کر عوام کو براہ راست فائدہ پہنچائیں گے۔بجٹ دستاویزات کے مطابق، کئی اہم منصوبے مالی سال 2025-26 کے دوران تجویز کئے گئے ہیں جن میں پشاور ہائی کورٹ کے تحت عدالتی کمپلیکسز کی تعمیر، ڈسٹرکٹ بیسڈ ریسورس سنٹرز کا قیام، اور امتیازی سلوک اور کام کی جگہ پر ہراسانی کے خاتمے کے لیے محتسب کے دفتر کے حوالے سے منصوبے شامل ہیں۔ جاری منصوبوں میں خواتین کی ہراسگی سے تحفظ کے لیے محتسب سیکرٹریٹ خیبر پختونخوا کے دائرہ کار کو بڑھانے کا منصوبہ بھی شامل ہے جس کے لیے 25.180 ملین روپے مختص کئے گئے ہیں۔پشاور ہائی کورٹ کے تحت مختلف جوڈیشل کمپلیکسز کی تعمیر اور مرمت بھی ان منصوبوں کا حصہ ہے۔ اسی طرح، مختلف اضلاع میں جوڈیشل کمپلیکسز اور رہائش گاہوں کی تعمیر، ہائی کورٹ کی استعداد کار میں اضافہ، اور قانونی ڈھانچے کی بہتری کے لیے خطیر فنڈز مختص کیے گئے ہیں۔ ایکسلریٹڈ امپلیمینٹیشن پروگرام (AIP) کے تحت بھی اہم جاری منصوبے شامل ہیں، جن میں 07 ڈسٹرکٹ جوڈیشل کمپلیکسزاور25 تحصیل جوڈیشل کمپلیکسزکی تعمیر شامل ہے۔نئے منصوبوں میں خیبر پختونخوا میں مصالحتی کونسلز کے آپریشنز کو فعال کرنے کے علاوہ خیبر پختونخوا کے 03 نئے اضلاع میں عدلیہ اور عدالتی عملے کے لیے رہائش کی فراہمی کے منصوبے بھی شامل ہیں۔ مربوط قانونی اور انسانی حقوق امدادی پروگرام (ILHRSP) کے لیے 100.000 ملین روپے جبکہ قانون و انصاف کے شعبے میں اختراعی اقدامات کے لیے 1.000 ملین روپے مختص کیے گئے ہیں۔ ایکسلریٹڈ امپلیمینیشن پروگرام کے تحت نیا منصوبہ نو ضم شدہ اضلاع میں ضلعی سطح پر وسائل کے مراکز کا قیام بھی شامل ہے جس کے لیے 10.500 ملین روپے مختص کیے گئے ہیں۔وزیر قانون آفتاب عالم ایڈوکیٹ کا کہنا تھا کہ ان منصوبوں سے نہ صرف انصاف کی بروقت فراہمی ممکن ہوگی بلکہ عدالتی انفراسٹرکچر کو جدید بنانے اور قانونی محکموں کی استعداد کار میں اضافے میں بھی کلیدی کردار ادا کرے گا۔ انہوں نے یقین دلایا کہ ان فنڈز کا شفاف اور موثر استعمال یقینی بنایا جائے گا تاکہ خیبر پختونخوا کے عوام کو انصاف کے بہترین ثمرات حاصل ہو سکیں۔

سیاحت اور ثقافت کے شعبے میں انقلابی ترقیاتی منصوبے شروع کئے جا رہے ہیں: مشیرسیاحت و ثقافت زاہد چن زیب
وزیر اعلیٰ خیبر پختونخوا کے مشیر برائے سیاحت و ثقافت، زاہد چن زیب کی قیادت میں سیاحت اور ثقافت کے شعبے میں نمایاں ترقیاتی منصوبوں کا آغاز کر دیا گیا ہے۔ مالی سال 2025-26 کے بجٹ میں ان منصوبوں کے لیے کثیر فنڈز مختص کیے گئے ہیں، جس پرزاہد چن زیب نے اطمینان کا اظہار کرتے ہوئے اسے سیاحت اور ثقافت کے فروغ کے لیے ایک اہم قدم قرار دیا ہے۔ثقافتی سرگرمیوں کو فروغ دینے کے لیے 120 ملین روپے کی لاگت سے کمیونٹی سرگرمیاں شروع کی جائیں گی، جبکہ صوبے کے قیمتی ثقافتی ورثے کے تحفظ اور اسے عالمی سطح پر اجاگر کرنے کے لیے نشتر ہال کے بنیادی ڈھانچے پر 75 ملین روپے خرچ کیے جائیں گے۔ سیاحوں کو بہترین سہولیات فراہم کرنے کے لیے متعدد منصوبے شروع کیے گئے ہیں جن میں ڈیم سائٹس پر تفریحی سہولیات کی فراہمی کے لیے 250 ملین روپے مختص کیے گئے ہیں، جن میں سے تین ڈیمز پر جلد ہی کام کا آغاز ہو جائے گا۔ سیاحوں کی سہولت کے لیے 9 مقامات پر خدمات کی فراہمی کے لیے 450 ملین روپے رکھے گئے ہیں۔ صوبے کی خوبصورتی کو اجاگر کرنے کے لیے 6 آبشاروں کے قریب بیٹھنے کی جگہوں، واش رومز اور ٹک شاپس کی تعمیر کے لیے 300 ملین روپے مختص کیے گئے ہیں۔ مختلف اضلاع میں پکنک سپاٹ منصوبوں کے لیے 288 ملین روپے رکھے گئے ہیں، جبکہ مشاورت، فزیبلٹی اور ماسٹر پلاننگ کے لیے 400 ملین روپے مختص کیے گئے ہیں۔کاغان، ناران، کالام اور ٹھنڈیانی جیسے معروف سیاحتی مقامات پر واش رومز اور پبلک سینیٹیشن انفراسٹرکچر کی بہتری کے لیے 100 ملین روپے رکھے گئے ہیں۔ ایکو ٹورازم کو فروغ دینے اور سیاحتی مقامات پر کوڑا کرکٹ کے انتظام کے لیے پبلک پرائیویٹ پارٹنرشپ (PPP) کے تحت 500 ملین روپے کا منصوبہ شروع کیا جائے گا۔ ٹھنڈیانی میں سیاحتی ترقی کے حوالے سے نمایاں پیش رفت ہوئی ہے، جہاں 30 مئی 2025 کو اظہار دلچسپی (EOI) کا آغاز ہوا تھا اور اب RFP جاری کیے جا چکے ہیں۔ امید ہے کہ ستمبر تک ایک سرمایہ کار وہاں ایک ITG (Integrated Tourism Zone) تیار کرے گا۔ گنول میں بھی کام جاری ہے۔ PPP کے تحت ہنڈ صوابی میں ایک پارک، گبین جبہ ناران میں کیمپنگ ولیج، اور خیشگی میں واٹر پارک کی تعمیر تجویز کی گئی ہے۔ اس کے علاوہ، کاغان میں ایڈونچر پارک، چارسدہ میں سردریاب کے قریب ایک ریزورٹ، اور پشاور میں مامو خٹکے کے مقام پر ایک تھیم پارک بنانے کا منصوبہ بھی شامل ہے۔حکومت ضم شدہ اضلاع کی ترقی کے لیے بھی پرعزم ہے۔ ان اضلاع میں آثار قدیمہ کے مقامات کے تحفظ کے لیے 150 ملین روپے مختص کیے گئے ہیں۔ سیاحت کے شعبے میں نئے ریزورٹس کے لیے بھی فنڈز رکھے گئے ہیں، اور ضم اضلاع میں ثقافتی سرگرمیوں کے فروغ کے لیے 100 ملین روپے مختص کیے گئے ہیں۔ ان اضلاع میں جلد ہی کیمپنگ پوڈز بھی نصب کیے جائیں گے۔ ضم شدہ اضلاع کے لوگوں کو سیاحت کے شعبے میں شامل کرنے کے لیے فیسٹیولز کا انعقاد کیا جائے گا، جس کے لیے 426 ملین روپے مختص کیے گئے ہیں۔ مزید برآں، UNDP کے ذریعے ضم اضلاع میں کیمپنگ پوڈز نصب کیے جائیں گے، جس کے لیے 1.5 بلین روپے مختص کیے گئے ہیں۔ ان تمام منصوبوں کا مقصد خیبر پختونخوا میں سیاحت اور ثقافت کو فروغ دینا، مقامی لوگوں کے لیے روزگار کے مواقع پیدا کرنا اور صوبے کو ایک پرکشش اور مستحکم سیاحتی مقام بنانا ہے۔

خیبر پختونخوا کا بجٹ 2025-26 عوام دوست اور سرپلس ہے: سید قاسم علی شاہ
خیبر پختونخوا کے وزیر سماجی بہبود، عشر و زکوٰۃ اور خصوصی تعلیم، سید قاسم علی شاہ نے صوبائی بجٹ 2025-26 کو عوام دوست اور سرپلس قرار دیتے ہوئے کہا ہے کہ اس بجٹ میں عام آدمی کو سہولیات کی فراہمی کو اولین ترجیح دی گئی ہے۔ انہوں نے کہا کہ یہ ایک متوازن اور ترقیاتی بجٹ ہے جس میں تمام شعبہ جات کی بہتری کے لیے جامع اقدامات تجویز کیے گئے ہیں۔ ان خیالات کا اظہار انہوں نے جاری ہونے والے ایک بیان میں کیا۔انہوں نے مزید کہا کہ محکمہ زکوٰۃ، عشر، سماجی بہبود اور خصوصی تعلیم کے لیے مختص بجٹ میں نمایاں اضافہ کیا گیا ہے۔ گذشتہ سال اس مد میں 8 ارب روپے رکھے گئے تھے جبکہ رواں سال اس میں 135 فیصد اضافہ کرتے ہوئے 19.11 ارب روپے مختص کئے گئے ہیں۔خصوصی بچوں کے لیے بھی حکومت نے بڑے منصوبے ترتیب دیے ہیں۔ ایک اہم منصوبے کے تحت 1.2 ارب روپے کی لاگت سے ڈویژن سطح پر آٹزم سے متاثرہ بچوں کے لیے مراکز قائم کیے جائیں گے۔ اسی طرح بے سہارا اور نادار بچوں کی نگہداشت و تربیت کے لیے ادارہ ”زمونگ کور” کے پانچ نئے کیمپس قائم کیے جا رہے ہیں، جن کے لیے 600 ملین روپے مختص کیے گئے ہیں۔علاوہ ازیں شمالی وزیرستان اور باجوڑ کے علاقوں میں مستحق اور بے سہارا افراد کو عارضی رہائش کی سہولیات فراہم کرنے کے لیے پناہ گاہوں کے قیام کا منصوبہ بھی بجٹ میں شامل کیا گیا ہے۔صوبائی وزیرنے کہا کہ یہ تمام اقدامات صوبے کے عوام کی فلاح و بہبود اور محروم طبقات کی بحالی کے لیے حکومت کے عزم کا مظہر ہیں۔