مینجنگ ڈائریکٹر مرجڈ ایریاز ایجوکیشن فاؤنڈیشن عین اللہ نے کہا ہے کہ قبائلی اضلاع میں شرح خواندگی بڑھانے، بچوں کو کوالٹی ایجوکیشن کی فراہمی اور سکولوں سے باہر بچوں کو سکولوں میں واپس لانے کے لیے فاؤنڈیشن نے انقلابی اقدامات اٹھائے ہیں۔ ہمارے کمیونٹی بیسڈ ایجوکیشن سینٹرز میں ہزاروں کی تعداد میں موجود طلبہ و طالبات کو مفت تعلیم اور دیگر تمام سہولیات مل رہی ہیں۔ انہوں نے کہا کہ فاؤنڈیشن کے نئے پروگرامز میں مڈل اور ہائی لیول پر تعلیمی ادارے قائم کر رہے ہیں تاکہ بچوں کو اپنے ہی علاقوں میں اعلیٰ تعلیم کی سہولیات میسر آسکیں۔ ان خیالات کا اظہار انہوں نے مرجڈ ایریا ایجوکیشن فاؤنڈیشن کے جاری و نئے پروگرامز اور کارکردگی کے حوالے سے منعقدہ بریفنگ کے موقع پر کیا۔ ڈپٹی مینجنگ ڈائریکٹر ڈاکٹر شوکت حیات اور فاؤنڈیشن کے دیگر اہلکار بھی اس موقع پر موجود تھے۔ نو تعینات مینجنگ ڈائریکٹر کو مرجڈ ایریاز ایجوکیشن فاؤنڈیشن کے مختلف پروگرامز، کارکردگی، بجٹ اور دیگر مختلف سیکشنز پر تفصیلی بریفنگ دی گئی۔مینجنگ ڈائریکٹر عین اللہ نے حکام کو ہدایت کی کہ نئے مالی سال کے لیے قبائلی اضلاع میں تعلیمی بہتری، شرح خواندگی بڑھانے اور آؤٹ آف سکول بچوں پر قابو پانے کے لیے نئے پروگرامز شامل کیے جائیں اور تمام قبائلی اضلاع میں ضرورت کے مطابق نئے تعلیمی ادارے کھولنے اور پہلے سے قائم سکولوں کو اپگریڈ کرنے کے لیے اقدامات کئے جائیں۔ انہوں نے کہا کہ تعلیم ترقی کا واحد ذریعہ ہے اور بذریعہ تعلیم ہم ترقی کا خواب شرمندہ تعبیر کر سکتے ہیں انہوں نے کہا کہ قبائلی اضلاع میں اپنے مینڈیٹ کے مطابق اے ایل پی پروگرامز، سیکنڈ شفٹ سکولز پروگرام، سکالرشپس کی فراہمی اور اساتذہ کو دور جدید کے تقاضوں سے ہم آہنگ تربیت فراہم کرنے کے لیے نئے پروگرامز شروع کیے جائیں گے۔ اور جاری پروگرامز کو دیگر تمام اضلا ح تک توسیح دی جائے گی۔ بریفنگ کے موقع پر انہیں بتایا گیا کہ جاری پروگرامز میں لٹریسی فار آل، بیسک ایجوکیشن کمیونٹی سکولز اور این سی ایچ ڈی سنٹرز کے علاوہ سباون سکولز، مڈل کمیونٹیز سکولز اور اساتذہ کی تربیت کے دیگر پروگرام شامل ہیں لٹریسی فار آل پروگرام کے سینٹرز میں 17 ہزار 625 طلبہ و طالبہ تعلیم حاصل کر رہے ہیں جبکہ 267 اساتذہ بھی شامل ہیں۔ اسی طرح کمیونٹی سکولوں کی کل تعداد 337 ہیں۔ کل 639 اساتذہ ہیں اور 27 ہزار 293 طلبہ و طالبات زیر تعلیم ہیں اور سباون پروگرام کے تحت مزید 25 سکول بھی قائم کئے جا رہے ہیں۔ جن میں بچوں کو وظائف فراہم کیے جائیں گے۔اس موقع پر مینجنگ ڈائریکٹر عین اللہ نے مرجڈ ایریا ایجوکیشن فاؤنڈیشن کی کارکردگی کو سراہا اور مسائل حل کرنے کی یقین دہانی کرائی۔

وزیر اعلیٰ خیبر پختونخوا کی مشیر برائے سماجی بہبود و ترقی خواتین مشال اعظم یوسفزئی نے کہا ہے کہ خصوصی بچے معاشرے اور حکومت کی توجہ کے سب سے زیادہ مستحق ہیں۔ صوبائی حکومت خصوصی بچوں کی فلاح و بہبود کے لیے تمام ضروری اقدامات کرے گی۔ وہ سپیشل ایجوکیشن کمپلیکس مردان میں سالانہ تقریب تقسیم انعامات سے خطاب کر رہی تھیں۔ تقریب میں رکن صوبائی اسمبلی طفیل انجم، سابق رکن صوبائی اسمبلی ساجدہ حنیف، ڈائریکٹر سوشل ویلفیئر رفیق مہمند، ایڈیشنل اسسٹنٹ کمشنر ہیڈ کوارٹر جنید خالد نے شرکت کی۔ جبکہ تقریب سے ڈسٹرکٹ آفیسر سوشل ویلفئیر جمال شاہ اور ادارے کے ڈپٹی کے ڈپٹی ڈائریکٹر انیق احسن نے بھی خطاب کیا۔ اس موقع پر سماعت گویائی سے محروم، جسمانی معذوری کے شکار اور نابینا بچوں نے حمدونعت، ٹیبلوز اور ملی نغمے پیش کیے۔ انیق احسن نے بتایا کہ ادارے میں مختلف قسم کی معذوریوں کے شکار 421 بچے زیر تعلیم ہیں۔ انہوں نے ادارے کے مسائل پر بھی روشنی ڈالی۔ اپنے خطاب میں وزیر اعلیٰ کی مشیر مشال اعظم یوسفزئی نے خصوصی بچوں کی صلاحیتوں کو سراہا۔ انہوں نے ایسے بچوں کے والدین اور خاص طور پر ٹیچرز کو خراج تحسین پیش کیا جو ان بچوں کی تعلیم و تربیت کا مشکل فریضہ سر انجام دے رہے ہیں۔ انہوں نے کہا کہ ہمارے قائد عمران خان کا وژن غریب اور پسے ہوئے طبقات کی خدمت ہے۔دکھی انسانیت کی خدمت میرا بھی مشن ہے اور سماجی بہبود کا محکمہ میں نے اپنی خوشی سے چنا ہے تاکہ لوگوں کی خدمت کر سکوں۔ انہوں نے کہا کہ ادارے سے میٹرک کرنے والے 23 طلباء و طالبات کو حیات آباد میں خصوصی بچوں کے ادارے میں سال اول میں داخلہ اور ہاسٹل کی سہولت دیں گے۔ جبکہ ایک سال کے اندر مردان میں انٹرمیڈیٹ تک تعلیم کی سہولت مہیا کر دی جائے گی۔بہت سے اسپیشل بچے سکولوں سے باہر ہیں انکو سکولوں میں داخل کرنے کیلئے کرایہ پر بلڈنگ حاصل کریں گے جہاں پر انکو تعلیم کے زیور سے آراستہ کیا جائے گا۔ اسی طرح معذور افراد کے حوالے سے تفصیلی اعداد وشمار اکھٹا کررہے ہیں۔ جس سے پالیسی سازی میں مدد ملے گی۔مشیر وزیراعلیٰ نے اپنی کلاس میں پہلی پوزیشن حاصل کرنے والی دونوں ہاتھوں اور پیروں سے محروم بچی کی بطور خاص حوصلہ افزائی کی اور ڈائریکٹر سوشل ویلفیئر کو اس بچی کو الیکٹرانک وہیل چیئر کی فراہمی کی ہدایت کی۔ مشال اعظم یوسفزئی نے خصوصی بچوں کے لیے ٹرانسپورٹ کی سہولت رستم تک بڑھانے کی ہدایت کی جبکہ سوشل ویلفیئر کے ڈسٹرکٹ آفیسر کو مردان میں موجود بس فوری طور پر سپیشل بچوں کی آمد و رفت کے لیے سپیشل ایجوکیشن کمپلیکس کو دینے اور اسپیشل ایجوکیشن کیمپلکس کی بسوں میں خواتین اٹڈینٹ بھرتی کرنے کی ہدایت کی۔ اس موقع پر وزیر اعلیٰ کی مشیر مشال اعظم یوسفزئی نے مختلف کلاسز میں نمایاں پوزیشن حاصل کرنے والے خصوصی بچوں میں انعامات اور شیلڈز تقسیم کیں جبکہ ادارے کی جانب سے مشیر وزیر اعلیٰ، ڈائریکٹر سوشل ویلفیئر اور دیگر مہمانوں کو بھی شیلڈز دی گئیں۔

خیبر پختونخوا کابینہ کا پانچواں اجلاس وزیر اعلیٰ خیبر پختونخوا سردار علی امین گنڈا پور کی صدارت میں پیر کے روز اسلام آباد میں منعقد ہوا۔ اجلاس میں صوبائی وزراء، مشیروں اور معاونین خصوصی، چیف سیکرٹری خیبرپختونخوا، ایڈیشنل چیف سیکرٹری، انتظامی سیکرٹریز اور دیگر متعلقہ حکام نے شرکت کی۔کابینہ اجلاس کے فیصلو ں کی تفصیلات بتاتے ہوئے وزیر اعلیٰ کے مشیر برائے اطلاعات و تعلقات عامہ بیرسٹر ڈاکٹر سیف کا کہنا تھا کہ صوبائی کابینہ نے اپنے پانچویں اجلاس میں اہم فیصلے کئے ہیں۔ انہوں نے بتایا کہ صوبائی کابینہ نے فیصلہ کیا ہے کہ ایسے وزراء جن کا تعلق پشاور سے نہیں ہے اور نہ ہی ان کے پاس سرکاری رہائش گاہ ہے کو کرائے کی مد میں دو لاکھ روپے دئیے جائیں گے اور اگر وزراء پشاور میں دو لاکھ تک گھر لے لیں تواس کے کرائے کی ادائیگی حکومت کرے گی جبکہ گھر کے یوٹیلیٹی بلز کی ادائیگی بھی اسی دو لاکھ روپے میں شامل ہوگی۔ بیرسٹر ڈاکٹر سیف نے کہا کہ 2014 سے لیکر اب تک جن وزراء کے پاس سرکاری رہائش کی سہولت مو جود تھی ان کی تنخواہ سے 70 ہزار روپے کی کٹوتی ہوتی تھی اوروہ وزراء جن کے پاس سرکاری رہائش نہیں تھی انہیں انکی تنخواہ میں 70 ہزار روپے گھر کے کرائے کے لیے دئیے جاتے تھے، بیرسٹر ڈاکٹر سیف نے کہا کہ 2024 میں گھر کے کرایوں میں اضافہ ہوچکا ہے اور مناسب گھر ڈیڑھ لاکھ تک مل سکتاہے اور وزراء کے لیے دو لاکھ روپے کی کابینہ کی منظوری کے بعد وہ اپنے لیے پشاور میں مناسب گھر کرائے پر لے سکیں گے۔ بیرسٹر ڈاکٹر سیف نے بتایا کہ صوبائی کابینہ نے آئندہ تین سالوں کے لیے ضم اضلاع کے ڈپٹی کمشنرز کے لیے 503 ملین روپے کی منظوری بھی دی ہے اورضم اضلاع کے ڈپٹی کمشنرز کو دی جانے والی یہ رقم خفیہ نہیں ہے۔ڈپٹی کمشنرز کو یہ فنڈز بنک کے ذریعے جاری ہوں گے اور ان کا باقاعدہ آڈٹ بھی ہوگا۔ انہوں نے بتایا کہ2021 سے 24 20تک قبائلی اضلاع اور ایف آر میں 1303 ملین روپے ڈپٹی کمشنرز کے لیے مختص کیے گئے تھے۔خیبرپختونخوا کابینہ نے مئی کے مہینے کے لیے صوبے کے ضروری اخراجات کی منظوری دے دی جبکہ تمام محکموں کو آئندہ مالی سال کے لیے اپنی بجٹ تجاویز کو حتمی شکل دینے کی ہدایت کی۔ ضروری اخراجات کی منظوری اس لیے ضروری تھی کہ اسمبلی کی عدم موجودگی میں رواں مالی سال کے بجٹ کی نگران کابینہ نے مختلف وقفوں سے منظوری دی۔ اجلاس میں آئندہ مالی سال کے بجٹ کی منظوری کے لیے صوبائی اسمبلی کا بجٹ اجلاس بروقت بلانے کا بھی فیصلہ کیا گیا۔صوبائی کابینہ نے خیبرپختونخوا پبلک پروکیورمنٹ ریگولر اتھارٹی کی شق میں نرمی کرتے ہوئے مارکیٹ ویلیو کی ادائیگی پر دفتر و رہائشی رہائش کی تعمیر کے لیے ضلع جمرود میں تحصیل بلڈنگ کے اندر واقع 02 کنال سرکاری اراضی وفاقی حکومت کو الاٹ کرنے کی بھی منظوری دی۔

صوبائی وزیر صحت سید قاسم علی شاہ نے اپنے حلقہ پی کے 81 لنڈی ارباب کا دورہ کیا جہاں انہوں نے رباب نثار کی رہائش گاہ پر ناظمین، کونسلرز اور عہدیداروں سے ملاقات کی۔ خیبرپختونخوا کے وزیر صحت سید قاسم علی شاہ نے کہا کہ عام انتخابات میں آپ لوگوں نے منتخب کیا،2024-25 کے بجٹ کی منظوری کے بعد حلقہ پی کے 81 میں ترقیاتی منصوبے شروع کروں گا۔ خیبرپختونخوا کے وزیر صحت سید قاسم علی شاہ نے کہا کہ آپ لوگ میری ٹیم ہیں، ٹیم ورک سے حلقہ پی کے 81 میں ترقیاتی کاموں کا آغاز ہوگا۔وزیر صحت خیبرپختونخوا سید قاسم علی شاہ نے کہا کہ سڑکوں اور گلیوں کی تعمیر کو بھی جلد شروع کریں گے۔ وزیر صحت نے مزید کہا کہ میرا مقصد عوام کی خدمت کرنا ہے، آپ کو جو بھی مسائل ہوں مرحلہ وار تمام مسائل حل کریں گے۔ مساجد اور مدارس میں سولر سسٹم لگائے جائیں گے اور سرکاری سکولوں کو اپ گریڈ کیا جائے گا تاکہ ہمارے طلباء اچھے ماحول میں تعلیم حاصل کر سکیں۔ صحت سے متعلق حلقہ پی کے 81 میں مطلوبہ کام میری اولین ترجیح ہے۔وزیر صحت خیبرپختونخوا سید قاسم علی شاہ نے گیس سے متعلق کہا کہ مجھے علم ہے گیس کی لوڈشیڈنگ بھی کی جارہی ہے اس حوالے سے گیس کے اعلیٰ حکام سے بات چیت ہوگی، ہم اپنے حلقہ کا حق ہر صورت ان سے لیں گے۔خیبرپختونخوا کے وزیر صحت سید قاسم علی شاہ نے گیس کے حوالے سے کہا کہ گرمیوں میں گیس کی لوڈشیڈنگ کسی صورت قبول نہیں۔

وزیر اعلیٰ خیبر پختونخوا کے مشیر برائے کھیل اور امور نوجوانان سید فخر جہان نے کہا ہے کہ تعلیمی اداروں میں طلبہ کو نصابی سرگرمیوں کیساتھ ساتھ تفریحی مواقع کی فراہمی انتہائی ضروری ہے۔انھوں نے کہا کہ طلبہ میں کھیل اور ہم نصابی سرگرمیوں کا جذبہ ہونا ایک زندہ قوم کی نشانی ہے اور ذہنی نشونما کیلئے بچوں کو کھیلوں کے موقع فراہم کرنے چاہئیں۔ان خیالات کا اظہار انھوں نے لاہور گرائمر سکول پشاور میں منعقدہ کرکٹ ٹورنامنٹ کے فائنل میچ میں بطور مہمان خصوصی شرکت کے موقع پر اظہار خیال کرتے ہوئے کیا۔مشیر کھیل نے تعلیمی ادارے میں منعقدہ ٹورنامنٹ میں فائنل جیتے والی ٹیم اور رنر آپ ٹیم میں میڈلزاور انعامات تقسیم کئے اور انھیں انکی کامیابی پر حوصلہ افزائی کی۔مشیر کھیل نے اس موقع پر اپنے خطاب میں کہا کہ یہ امر انتہائی خوش آئند ہے کہ ہمارے بچوں میں کھیلوں اور دیگر ہم نصابی سرگرمیوں کا جزبہ بدرجہ اتم موجود ہے جو زندہ قوموں کی نشانی ہے۔انھوں نے کہا کہ کھیلوں میں حصہ لینا ذہنی نشونما اور تندرستی کیلئے انتہائی ضروری ہوتا ہے اسلئے ہمارے تعلیمی اداروں میں اس طرح کے مقابلوں کا انعقاد ایک خوش آئند بات ہے۔انھوں نے طلبہ سے کہا کہ تعلیمی اداروں میں کھیلوں کی سرگرمیوں میں شرکت ہی آگے نیشنل اور انٹرنیشنل سطح پر مقام حاصل کرنے کیلئے پہلی سیڑھی ہے لہذا وہ اپنی کوششیں جاری رکھیں، انکا مستقل انتہائی شاندار ہوگا۔انھوں نے کہا کہ صوبائی حکومت صوبے میں کھیلوں کے فروغ کو انتہائی اہمیت دیتی ہے تاکہ یہاں ہمارے کھلاڑی آگے آئیں اور صوبے کے نوجوانوں کو تفریحی سرگرمیوں کے موقع میسر آسکیں۔دریں اثنا مشیر کھیل نے لاہور گرائمر سکول کے مختلف حصوں کامعائنہ بھی کیا اور وہاں پر تدریسی سرگرمیوں کا جائزہ لیا۔

خیبرپختونخوا کے وزیرجنگلات وماحولیات فضل حکیم خان یوسفزئی نے کہا ہے کہ عمران خان کے وژن کے مطابق لوگوں کی خدمت کرنااولین ترجیح ہے کیونکہ عمران خان کے وژن میں عوام الناس کی بلاتفریق خدمت، ترقی اورحقیقی خوشحالی کاراز پوشیدہ ہے، تحریک انصاف پر لوگوں نے جس بھرپور اعتماد کااظہارکیاہے ان کے اعتماد کوٹھیس نہیں پہنچائیں گے اورہم سمجھتے ہیں کہ عوامی اعتماد ہی ہمارے لئے باعث اطمینان ہے، عوام کاپیسہ عوام پر خرچ کرناہی عوامی اعتماد پر پورااُترناہے، ان خیالات کااظہارانہوں نے میڈیا کے نمائندوں اورلوگوں سے باتیں کرتے ہوئے کیا۔انہوں نے کہاکہ ترقی اورخوشحالی کی راہ میں کوئی رکاوٹ برداشت نہیں کریں گے، ترقی وخوشحالی کے لئے ٹھوس حکمت عملی ترتیب دی ہے، انشاء اللہ علاقائی خوشحالی اور عام لوگوں کی حالت بہتر بنائی جائیگی اورجن مقاصد کے لئے عوام نے تحریک انصاف پر اعتماد کیاہے ان مقاصد کے حصول کو یقینی بنائیں گے، انہوں نے کہا کہ عوام نے تحریک انصاف سے کافی توقعات وابستہ کررکھی ہیں انشاء اللہ لوگوں کے اعتماد کے مطابق اقدامات اٹھائیں گے، انہوں نے کہا کہ پارٹی کارکنوں اوراہل علاقہ کو عزت واحترام دیناہماری ترجیحات میں شامل ہے،ہم حاکم نہیں بلکہ خادم بن کر لوگوں کی خدمت میں کوئی دقیقہ فروگذاشت نہیں کریں گے، خودکو عوام کی خدمت کیلئے وقف کررکھا ہے اورلوگوں کی خدمت کومدنظر رکھتے ہوئے تمام تروسائل عوام کے بہتر مفادکیلئے بروئے کار لائیں گے۔ انہوں نے کہا کہ وقت کاتقاضہ ہے کہ عوام موجودہ حکومت کا دست وبازو بن کر فلاح وبہبود کیلئے اٹھائے گئے اقدامات میں اپناکرداراداکریں۔