سٹی یونیورسٹی آف سائنس اینڈ انفارمیشن ٹیکنالوجی کی تیرویں کانووکیشن تقریب، چیف سیکرٹری خیبرپختونخوا ندیم اسلم چوہدری کی بطور مہمان خصوصی شرکت، تقریب سے خطاب کیا اور فارغ التحصیل طلباء میں گولڈ میڈل تقسیم کئے

سٹی یونیورسٹی آف سائنس اینڈ انفارمیشن ٹیکنالوجی، پشاور میں تیرویں کانووکیشن تقریبِ منعقد ہوئی جس میں آرکیٹیکچر، سوِل انجینئرنگ، الیکٹریکل انجینئرنگ، کمپیوٹر، انگلش،مینیجمنٹ سائنسز،میڈیکل اور دیگر شعبہ جات کے 1158 فارغ التحصیل طلباء و طالبات میں اسناد تقسیم کی گئیں، تقریب میں 29 طلبہ و طالبات نے اپنے اپنے شعبہ جات میں نمایاں کارکردگی کی بنیاد پر گولڈ میڈلز حاصل کئے۔کانووکیشن تقریب میں چیف سیکرٹری خیبرپختونخوا ندیم اسلم چوہدری نے بطور مہمانِ خصوصی شرکت کی، تقریب سے خطاب کیا اور طلبہ و طالبات میں ڈگریاں اور گولڈ میڈل تقسیم کئے۔چیف سیکرٹری نے فارغ التحصیل طلبہ و طالبات اور والدین کو مبارک باد دیتے ہوئے کہا کہ فارغ التحصیل طلباء معاشرے میں بھلائی کو عام کریں۔ انہوں نے کہا کہ سٹی یونیورسٹی نے قلیل عرصے میں عمدہ ترقی کی اور اعلٰی تعلیم کے شعبہ میں تحقیق کو مضبوط بنیاد مہیا کرنے میں اہم کردار ادا کررہی ہے. چیف سیکرٹری نے کہا کہ سٹی یونیورسٹی کے معتمد اساتذہ? کرام کی محنت اور کیمپس میں بہترین تعلیمی ماحول قابل ستائش ہے. چیف سیکرٹری نے کہا کہ بہتر تعلیمی ماحول کی فراہمی صوبائی حکومت کی ترجیحات میں سر فہرست ہے اور ترقی کا راستہ بہتر تعلیمی ماحول سے ہوکر گزرتا ہے. انہوں نے کہا کہ تحقیق کے شعبے میں مزید کوششوں کی ضرورت ہے جس کے لئے انہوں نے محققین کو صوبائی حکومت کے مکمل تعاون کی یقین دہانی کرائی۔ تقریب سے صدر سٹی یونیورسٹی محمد صبور سیٹھی اور وائس چانسلر انجینئر ڈاکٹر نصراللہ خان نے بھی خطاب کیا۔

صوبائی وزیر لائیو سٹاک، فشریز و کوآپریٹیو فضل حکیم خان یوسفزئی اور صوبائی وزیر پبلک ہیلتھ انجینئرنگ پختون یار خان نے خوازہ خیلہ میں مینگورہ گریویٹی واٹر سپلائی اسکیم کے واٹر ٹریٹمنٹ پلانٹ کا جائزہ لیا اس موقع پر تقریب کا انعقاد کیا گیا تھا تقریب میں ممبران قومی و صوبائی اسمبلی سلیم الرحمان، سہیل سلطان ایڈوکیٹ، چیئرمین ڈیڈیک سوات آختر خان ایڈوکیٹ، علی شاہ خان ایڈوکیٹ، ڈبلیو ایس ایس سی سوات کے چیف ایگزیکٹیو آفیسر تنویر الرحمان اور اسکیم سے متعلق متعلقہ اعلیٰ افسران نے شرکت کی اس موقع ڈبلیو ایس ایس سی سوات کے جی ایم آپریشنز ذیشان پرویز نے صوبائی وزراء کو اسکیم سے متعلق تفصیلی بریفنگ دی بریفنگ میں بتایا گیا کہ مینگورہ گریویٹی واٹر سپلائی اسکیم سے مینگورہ سٹی کے 25 ویلج کونسلز کے رہائشی پینے کے صاف پانی سے مستفید ہونگے اور پانی سے متعلق دیرینہ مسئلہ مستقل بنیادوں پر حل ہو جائے گا جو مینگورہ کے رہائشیوں کے لئے ایک اہم سنگِ میل ہے، منصوبے پر باقاعدہ کام کا آغاز ہو چکا ہے جو تیزی سے جاری ہے، منصوبہ مینگورہ شہر اور ارد گرد آبادیوں کو اگلے تین دہائیوں تک صاف پانی فراہم کرے گا، صاف پانی کی فراہمی سے صحت کے مسائل کا بھی خاتمہ ہوگا، اس موقع پر صوبائی وزیر فضل حکیم خان یوسفزئی کا کہنا تھا کہ منصوبے پر 28 ارب سے زائد مجموعی لاگت آئے گی، منصوبے میں واٹر ڈسٹریبیوشن سسٹم اور واٹر ٹریٹمنٹ پلانٹ شامل ہیں۔ ان کا کہنا تھا کہ منصوبہ 55000 واٹر کنکشنز فراہم کرے گا، منصوبے میں مجموعی طور پر 472 کلومیٹر ڈسٹریبیوشن نیٹورک اور 18 نئے واٹر ٹینک شامل ہیں، 136 کینال پر بننے والے واٹر ٹریٹمنٹ پلانٹ میں 30 ایم جی ڈی ٹریٹمنٹ صلاحیت ہوگی۔ منصوبے کے تحت 48 انچ پائپ لائن بچھائی جائے گی اور فضا گٹ میں پلانٹ لگایا جائے گا جس سے شہری آبادیوں کو پانی فراہم کی جائے گی۔ صوبائی وزیر فضل حکیم خان یوسفزئی کا کہنا ہے کہ جدید تقاضوں کو مدنظر رکھتے ہوئے ریپڈ گریویٹی فلٹرز ٹیکنالوجی، سولر انرجی اور واٹر میٹرنگ متعارف کی جارہی ہے جس سے صاف شفاف پانی بغیر کسی اضافی سپورٹ کے گھروں اور بالائی منزلوں تک پہنچ سکے گا جس سے گھروں میں بجلی کی بچت ہوگی اور لوڈ شیڈنگ کے باوجود آبادیوں کو پانی کی فراہمی بلا تعطل جاری رہے گی۔ انہوں نے کہا کہ آج اللہ کے کرم سے منصوبے پر عملی کام تیزی سے جاری ہے اور یہ واٹر گریویٹی منصوبہ مینگورہ کے لئے سب سے اہم اور بڑا منصوبہ ثابت ہوگا۔

خیبر پختونخوا کے وزیر برائے پبلک ہیلتھ انجینئرنگ پختون یار خان نے کہا ہے کہ صوبائی حکومت سوات کی خوبصورتی کیلئے اقدامات اٹھارہی ہے سوات کی تعمیر و ترقی کیلئے عملی اقدامات اٹھائے جائیں گے سوات کے ترقیاتی کام ہنگامی بنیادوں پر پایہ تکمیل تک پہنچائیں گے ان خیالات کا اظہار انہوں نے ضلع سوات کے دورہ کے موقع پر کیا صوبائی وزیر نے پبلک ہیلتھ دفتر کا بھی دورہ کیا پبلک ہیلتھ انجینئرنگ کے عملے نے صوبائی وزیر کو بریفنگ دی صوبائی وزیر نے عملے کو ہدایت کی کہ سوات میں صاف پانی کی فراہمی اور نالیوں کی صفائی و دیگر عوامی مشکلات کے حل کیلئے اقدمات اٹھائے جائیں تاکہ سوات کے عوام کو دشواری کا سامنا نہ ہو انہوں نے کہاکہ صوبائی حکومت کا مقصد خیبر پختونخوا کے عوام کو چھت کے نیچے سہولیات پہنچانا ہے یہی منشور ہمارے قائد عمران خان, وزیر ا علیٰ خیبر پختونخوا علی آمین گنڈا پور اور ہم سب کا ہے ہماری صوبائی حکومت کا عزم عوام کی تکالیف اور مشکلات کو کم کرنا ہے جلد ہی نچلی سطح تک اختیارات منتقل کرواکر گھر کی دہلیز پر عوام کے مسائل کو حل کرائیں گے انہوں نے کہاکہ یہ وزارتیں عارضی ہیں اصل کام عوام کی خدمت اور ان کیلئے آسانیاں پیدا کرنا ہے خوش اخلاقی کے ساتھ عوام کی قدر کرنے کی ضرورت ہے ہماری حکومت خیبرپختونخوا کو ایک رول ماڈل صوبہ بنائے گی اور عوام حقیقی معنوں میں تبدیلی محسوس کریں گے عوام کو جلد ہی سہولیات مہیا کریں گے۔

وزیر اعلیٰ خیبر پختونخوا کے معاون خصوصی برائے ریلیف، بحالی و آباد کاری ملک نیک محمد خان داوڑ نے کہا ہے کہ شمالی وزیرستان میں ایشا سے لیکر اسد خیل تک جدید سڑک کی تعمیر کا کام جلد شروع کیا جائے گا۔ اس کے علاوہ ان کے ترقیاتی فنڈ سے ہمزونی چتون کی حفاظتی دیوار پر کام کا آغاز ہو چکا ہے، جسے جلد مکمل کیا جائے گا تاکہ قیمتی زرعی اراضی کو دریا کے پانی کے کٹاؤ سے محفوظ رکھا جا سکے۔یہ بات انہوں نے شمالی وزیرستان کے عمائدین کے نمائندہ وفد سے ملاقات کے دوران کہی۔ معاون خصوصی نے مزید کہا کہ ان کا مشن ہے کہ علاقے میں امن کے فروغ کے ساتھ ساتھ تعلیم اور ترقی کو یقینی بنایاجائے۔ملک نیک محمد خان داوڑ نے بتایا کہ گزشتہ ہفتے انہوں نے نصف درجن سے زائد ترقیاتی منصوبوں کا افتتاح کیا ہے، جنہیں ترجیحی بنیادوں پر مکمل کیا جائے گا۔ انہوں نے کہا کہ تمام ترقیاتی منصوبوں میں شفافیت کو یقینی بنایا جائے گا اور کسی بھی قسم کی بدعنوانی کو ہرگز برداشت نہیں کیا جائے گا۔معاون خصوصی نے عوام کو یقین دلایا کہ حکومت ان کے مسائل کے حل کے لیے بھرپور اقدامات کر رہی ہے اور علاقے کی ترقی کے لیے تمام وسائل بروئے کار لائے جا رہے ہیں۔

خیبرپختونخوا فوڈ سیفٹی اینڈ حلال فوڈ اتھارٹی کے تحت صوبہ بھر میں ملاوٹ مافیا کیخلاف کریک ڈاؤن جاری ہے اس حوالے سے فوڈ سیفٹی ٹیم پشاور نے پھندوں روڈ پر کارروائی کی اور جعلی چائے کی پتی تیار کرنے والے یونٹ سے سینکڑوں کلوگرام چائے کی پتی پکڑ کر یونٹ سیل کر دیا۔ اس حوالے سے ترجمان فوڈ اتھارٹی نے آپریشن کے حوالے حوالے تفصیلات جاری کرتے ہوئے بتایا کہ گزشتہ روز فوڈ سیفٹی ٹیم ٹاؤن-1 نے ڈائریکٹر آپریشنز اختر نواز کی نگرانی میں پشاور کے علاقے پھندوں میں جعلی پتی تیار کرنے والے یونٹ پر چھاپہ مارا اورانسپکشن کے دوران یونٹ سے 2300 کلو گرام مضر صحت اور ملاوٹی چائے کی پتی برآمد کی، جبکہ مزید تحقیقات میں یونٹ سے 1000 کلوگرام انیمل فیڈ، 500 کلوگرام برادہ، 100 کلوگرام کلر، 20 کلوگرام کیمیکل اور 700 کلوگرام استعمال شدہ چائے کی پتی بھی ضبط کی گئی، جو انسانی صحت کے لیے انتہائی نقصان دہ ہیں۔ تفصیلات کیمطابق کارروائی کے دوران یونٹ میں موجود مشینری کو سرکاری تحویل میں لے کر فیکٹری کو فوری طور پر سیل کر دیا گیا، جبکہ مالکان کے خلاف مقدمہ درج کر کے مزید کارروائی شروع کر دی گئی ہے۔صوبائی وزیر خوراک ظاہر شاہ طورو نے فوڈ سیفٹی ٹیم کو کامیاب کاروائی پر داد دیتے ہوئے کہا کہ شہریوں کی صحت کے ساتھ کھیلنے والوں کے خلاف سخت کارروائیاں جاری رہیں گی۔ انہوں نے متعلقہ حکام کو ہدایت کی کہ ملاوٹ مافیا کے خلاف اقدامات مزید تیز کیے جائیں اور عوام کو معیاری اور محفوظ خوراک کی فراہمی یقینی بنائی جائے۔صوبائی وزیر نے عوام سے اپیل کرتے ہوئے کہا کہ وہ فوڈ سیفٹی اتھارٹی کے ساتھ تعاون کریں اور ایسے دشمن عناصر سے فوڈ اتھارٹی حکام کو آگاہ کریں تاکہ مضر صحت اشیاء کی روک تھام کی جا سکے۔

وزیراعلی خیبر پختونخوا کے معاون خصوصی برائے سی این ڈبلیو سہیل آفریدی نے سی این ڈبلیو کی ڈیجیٹلائزیشن، ایسٹ مینجمنٹ اور ہیومن ریسورس انفارمیشن مینجمنٹ سسٹم کا افتتاح کیا۔ سہیل آفریدی کا کہنا تھا کہ ایسٹ مینجمنٹ اور ہیومن ریسورس انفارمیشن سسٹم کا مقصد تمام ریکارڈ کو آن لائن کرنا ہے تاکہ کسی بھی قسم کے فراڈ سے بچا جا سکے۔ اس موقع پہ سیکرٹری سی این ڈبلیو اور چیف انجینیئرز سمیت سی این ڈبلیو کے اعلی حکام موجود تھے۔ وزیراعلی خیبرپختونخوا کے معاون خصوصی سہیل افریدی نے کہا کہ سی این ڈبلیو کے ایسٹ مینجمنٹ سسٹم سے تمام سی اینڈ ڈبلیو کی مشینری جو کہ صوبے میں موجود ہے اور اس کے علاوہ تمام ریکارڈ جو سی این ڈبلیو سے منسلک ہے، مالی حساب کتاب اور فنڈز تمام ان لائن موجود ہوں گے جس سے محکمے اور عوام کے لیے اسانی پیدا ہوگی۔ وزیراعلی خیبرپختونخوا کے معاون خصوصی سہیل افریدی نے مزید کہا کہ ہیومن ریسورس انفارمیشن مینجمنٹ سسٹم سے سی این ڈبلیو کے حکام کے تمام مسائل جیسے کہ پوسٹنگ ٹرانسفر، چھٹیاں، انکوائریز، سینیارٹی لیسٹ اور اے سی ار تمام آن لائن کر دیے جائیں گے جس کا مقصد ریکارڈ کو محفوظ بنانا اور سرکاری کاغذات میں ہیرا پھیری اور فراڈ کی روک تھام ہے۔

پاکستان میں اقوام متحدہ کے ترقیاتی پروگرام (یو این ڈی پی) کے ریزیڈنٹ ریپرزنٹیٹیو سیموئل رزک نے ایک وفد کے ہمراہ پشاور میں خیبر پختونخوا کے چیف سیکرٹری ندیم اسلم چوہدری سے ملاقات کی۔ اس ملاقات میں صوبے میں یو این ڈی پی کے تعاون سے جاری ترقیاتی منصوبوں پر بات چیت ہوئی اور مستقبل میں تعاون کے لیے کلیدی ترجیحات پر غور کیا گیا۔ چیف سیکرٹری ندیم اسلم چوہدری نے یو این ڈی پی کی مسلسل حمایت کو سراہا اور جامع ترقی اور پراجیکٹ پر موثر عملدرآمد پر صوبائی حکومت کے عزم کا اعادہ کیا۔

مشیر صحت خیبرپختونخوا احتشام علی نے یونیسیف کے تعاون سے خیبرانسٹی ٹیوٹ آف چائلڈ ہیلتھ کئیر میں منعقدہ یونیورسل چلڈرن ڈے کی تقریب میں بطور مہمان خصوصی شرکت کی۔ تقریب کے شرکا میں پروجیکت ڈائریکٹر ڈاکٹرعنایت، پاکستان پیڈیاٹرک ایسوسی ایشن کے صدر ڈاکٹر باور شاہ، سابق ڈپٹی سپیکر صوبائی اسمبلی مہرتاج روغانی، یونیسیف پشاور آفس سے ڈاکٹر انعام و دیگر نے شرکت کی۔ تقریب سے خطاب کرتے ہوئے مشیر صحت احتشام علی نے بچوں کی صحت کے مسائل اور ان کے حل کے لیے حکومت کے اقدامات پر روشنی ڈالی۔انہوں نے کہا کہ ”ہمیں اس بات کا ادراک ہے کہ پاکستان نوزائدہ بچوں کی اموات میں پہلے نمبر پر ہے۔ پرائمری ہیلتھ کیئر کی بحالی اور فعالی ماں اور بچے کی صحت کو محفوظ بنانے کا واحد حل ہے۔”مشیر صحت نے مزید کہا کہ ماں اور بچے کی صحت سے متعلق سپیشلائزڈ ہسپتالوں میں اضافہ کیا جارہا ہے۔ ”خیبر انسٹی ٹیوٹ آف چائلڈ ہیلتھ اور مردان کے بینظیر چلڈرن ہسپتال کو جلد فعال کیا جائے گا۔ ان ہسپتالوں کے لیے علیحدہ بورڈ آف گورنرز کے قیام کی مکمل حمایت کرتا ہوں ”۔ انہوں نے انکشاف کیا کہ کچھ ڈاکٹرز دو سال سے اسی ہسپتال پر بغیر ڈیوٹی کے تنخواہیں لے رہے تھے، جنہیں ہسپتال فعال ہونے تک پوسٹ آؤٹ کردیا گیا ہے۔ ”جب ہسپتال فعال ہوں گے، تب ہی دوبارہ پوسٹنگ ہوگی۔ مشیر صحت نے اپنی عزم کا اظہار کرتے ہوئے کہا، ”میرا کوئی ذاتی دوست نہیں جسے کسی عہدے پر بٹھاؤں۔ میرٹ کی بنیاد پر ایک مضبوط ٹیم بناؤں گا جو کام کرے گی۔”یونیورسل چلڈرن ڈے کے موقع پر انہوں نے وعدہ کیا کہ تمام بچوں کو صحت کے یکساں حقوق فراہم کیے جائیں گے۔ انہوں نے پولیو کے خاتمے، بنیادی ویکسینیشن، ماں اور بچے کی صحت، اور دور دراز علاقوں میں صحت کے ڈھانچے کی بحالی کو اپنی ترجیحات قرار دیا۔انہوں نے والدین سے اپیل کی کہ وہ اپنے بچوں کی ویکسینیشن کا کورس مکمل کریں۔ انکاری والدین کو مخاطب کرتے ہوئے انہوں نے کہا، ”دقیانوسی تصورات کی وجہ سے اپنے بچوں کے مستقبل کا سودا نہ کریں۔ ان والدین کی حالت دیکھیں جن کے بچے ہمیشہ کے لیے معذور ہو جاتے ہیں۔”تقریب کا اختتام بچوں کی صحت کے تحفظ اور بہتر مستقبل کے عزم کے ساتھ ہوا۔