خیبر پختونخوا کے وزیر برائے اعلیٰ تعلیم مینا خان آفریدی کی زیر صدارت یونیورسٹی آف انجینئرنگ اینڈ ٹیکنالوجی مردان کے بجٹ کے مسائل کے حوالے سے اجلاس محکمہ اعلیٰ تعلیم کے کمیٹی روم سول سیکرٹریٹ پشاور میں منعقد ہوا، اجلاس میں صوبائی وزیر خوراک ظاہر شاہ طورو ضلع مردان سے منتخب اراکین خیبر پختونخوا اسمبلی افتخار علی مشوانی، عبدالسلام، طفیل انجم محکمہ اعلی تعلیم کے افسران یو ای ٹی مردان کے وائس چانسلر اور دیگر عملے نے شرکت کی، اجلاس میں صوبائی وزیر برائے اعلیٰ تعلیم کو یونیورسٹی کے وائس چانسلر نے یو ای ٹی مردان پر تفصیلی بریفنگ دی، صوبائی وزیر کو بریفنگ میں ہائیر ایجوکیشن کمیشن اور خیبر پختونخوا حکومت کی طرف سے ملنے والے گرانٹ کے بارے میں بتایاگیا، بریفنگ میں مذید بتایا گیا کہ ایچ ای سی نے یو ای ٹی مردان کو نئے یونیورسٹی کے لسٹ میں ڈالا ہے اور صرف 18ملین روپے ریلیز کی ہے، مذید بتایاگیا کہ مذکورہ انجینئرنگ یونیورسٹی کو تنخواہوں کی مد میں بھی فنڈ ریلیز نہیں ہوا ہے اس کے علاوہ صوبائی وزیر کو یو ای ٹی مردان کی تمام بجٹ اور اخراجات کے بارے میں تفصیلی بریفنگ دی، اس موقع پر صوبائی وزیر میناخان آفریدی نے یقین دلاتے ہوئے کہا کہ تمام یونیورسٹیوں کو تنخواہوں کی مد میں فنڈز ریلیز ہوچکے ہیں اور یو ای ٹی مردان کو بھی بہت جلد فنڈ جاری ہوجائیگا، انہوں نے کہا کہ صوبے کی مالی طور پر مشکلات کا سامنا کرنے والے جامعات کو مالی بحران سے نکالنے کیلیے ضروری اقدامات اٹھارہے ہیں اور اس مسئلے کی پائیدار حل کیلیے وزیر اعلیٰ خیبر پختونخوا علی امین گنڈا پور کی خصوصی ہدایت پر ایک ٹاسک فورس بھی تشکیل دی گئی ہے جو مالی بحران سے دوچار ہونے والے جامعات کی مالی مشکلات کی وجوہات کی جانچ پڑتال کرے گی اور انہیں مالی مشکلات سے نکالنے کیلیے تجاویز دیگی، انہوں نے مذید کہا کہ جامعات کا کام معیاری ریسرچ کو عام کرنا اور فروغ دینا ہے۔

وزیر اعلیٰ خیبر پختونخوا کے مشیر برائے خزانہ مزمل اسلم و بین الصوبائی رابطہ نے وفاقی بجٹ 2024-25 پر ردعمل دیتے ہوئے کہا ہے کہ وفاقی بجٹ 2024-25 حکومت اور آئی ایم ایف کا ایک ہائبرڈ بجٹ ہے جس میں ٹیکسز کا چناؤ آئی ایم ایف نے اور اخراجات کا حکومت نے کیا ہے۔ ان خیالات کا اظہار مزمل اسلم نے اپنے دفتر سے جاری ہونے والے بیان میں کیا۔ مشیر خزانہ خیبرپختونخوا نے کہا کہ ٹیکس کا بوجھ عام عوام پر آئی ایم ایف کا اور اشرافیہ کے لئے ٹیکس چھوٹ حکومت کا فیصلہ ہے اسی طرح دودھ اور ادویات پر ٹیکسز آئی ایم ایف کا جبکہ مقامی کارساز ٹیکس چھوٹ حکومت کا سکرپٹ ہے۔ انہوں نے کہا کہ بجلی گیس پیٹرول قیمت میں اضافہ آئی ایم ایف کا جبکہ سرکاری مراعات اور تنخواہوں میں اضافہ حکومت کا فیصلہ ہے۔ مزمل اسلم نے کہا کہ تعلیم صحت اور زراعت پر کٹوتی آئی ایم ایف کا فیصلہ ہے جبکہ ترقیاتی اخراجات میں ایم این ایز کیلئے 75 ارب مختص کرنا حکومت کا فیصلہ ہے بجٹ صرف آئی ایم ایف کا ہے اور حکومت مکمل شراکت دار ہے۔ مشیر خزانہ و محکمہ بین الصوبائی رابطہ خیبرپختونخوا مزمل اسلم نے ایک دوسرے بیان بجلی کے نئے نرخوں پر ردعمل دیتے ہوئے کہا ہے کہ بجلی کی نئی قیمت کم اور زیادہ یونٹ صارفین کیلئے ناقابل برداشت ہو جائے گی جبکہ استطاعت رکھنے والے شمسی یا دیگر توانائی پر منتقل ہو جائیں گے۔ مشیر خزانہ خیبرپختونخوا نے کہا کہ پیداواری قیمت کے مقابلے میں نئے نرخ واضح طور پر غیر منصفانہ اور ظلم پر مبنی ہیں۔ انہوں نے کہا کہ پاکستان میں بجلی کی پیداواری قیمت 0.04/ KWH فی ڈالر جبکہ فروخت کی قیمت 0.3/KWH فی ڈالر ہے جو پیداوری قیمت سے آٹھ گنا زیادہ ہے۔ مشیر خزانہ خیبرپختونخوا نے کہا کہ اخراجات آمدنی کے تناسب سے پاکستان رہنے کیلئے سب سے مہنگا ملک ہے اور ان سب کا ذمہ دار کون ہے اور پاکستان کے لوگ کیوں متاثر ہو رہے ہیں۔

وزیر اعلی خیبر پختونخوا کے مشیر برائے کھیل اور امور نوجوانان سید فخر جہان نے ضلع بونیر کا دورہ کرکے سواڑی میں ہاکی گراؤنڈ اور کھیلوں کے زیر تعمیر جمنیزیم کا اچانک دورہ کیا اور وہاں پر زیر تعمیر کام کا جائزہ لیا۔انھوں نے دورے کے دوران بونیر میں نوجوانوں کیلئے قائم کیئے جانے والے ضلعی سطح کے جوان مرکز کیلئے مجوزہ اراضی سائٹ کا بھی معائنہ کیا۔اس موقع پر ڈپٹی ڈائریکٹر یوتھ افیرز،ڈسٹرکٹ سپورٹس آفیسر، دیگر متعلقہ افسران و ریونیو اہلکار بھی موجود تھے۔مشیر کھیل نے دورے کے دوران سپورٹس جمنیزیم پر کام تیز کرنے کی ہدایت کی اور کہا کہ تعمیراتی کام کو درکار اعلی معیار کے مطابق پایہ تکمیل تک پہنچایا جائے۔انھوں نے کہا کہ سپورٹس کے ان ترقیاتی منصوبوں کو بلا تعطل تیزی کیساتھ مکمل کیا جائے تاکہ مقامی نوجوانوں کو کھیل وتفریح کے مواقع جلد از جلد دستیاب ہوسکیں۔انھوں نے ضلع بونیر میں جوان مرکز کے قیام کیلئے تجویز کردہ سائٹ کا دورہ کرنے کے موقع پر اس منصوبے کیلئے جس اراضی کی نشاندہی کی گئی ہے کا جائزہ لیا۔مذکورہ مرکز محکمہ سپورٹس کی ملکیتی اراضی پر قائم کیا جائے گا اور اسکے لئے موزوں قطع اراضی کی باقاعدہ ڈیمارکیشن بھی کی گئی ہے۔ انھوں نے اس ترقیاتی منصوبے کو جلد شروع کرنے کیلئے متعلقہ حکام کو آئندہ مراحل جلد طے کرنے کیلئے ہدایات جاری کئے۔واضح رہے کہ جوان مرکز کے قیام کا مقصد بندو بستی اور ضم اضلاع میں نوجوانوں کو درپیش چیلنجز اور مواقع کو مد نظر رکھتے ہوئے انھیں تعاون فراہم کرنا ہے اور ان مراکز میں ضروری انفراسٹرکچر،تعلیمی سہولیات،انٹرپرینیورشپ انکیوبیشن سینٹرز،ائی ٹی لیبز،سٹارٹ آپ کیلئے اجتماعی ورکنگ سپیس،یوتھ اسمبلیز اور تفریحی سہولیات جیسے مواقع ایک ہی جگہ پر دستیاب ہونگے۔ یہ سہولیات نوجوانوں کو آگے بڑھنے،سیکھنے اور ایک دوسرے کیساتھ مربوط کرنے کیلئے ڈیزائین کیے گئے ہیں۔

خیبر پختونخوا کے وزیر آبپاشی عاقب اللہ خان نے محکمہ آبپاشی کے حکام کو ہدایت کی ہے کہ ضلع صوابی میں سالانہ ترقیاتی پروگرام کے تحت جاری مختلف کینال روڈز, سیلاب سے بچاو کے لئے پشتوں اور مختلف نالوں پر زیر تعمیر پلوں کی تعمیر کا کام مقررہ وقت میں مکمل کیا جائے اور تعمیراتی کام کے معیار کو ہر قیمت پر برقرار رکھا جائے۔ یہ احکامات انہوں نے گزشتہ روز محکمہ آبپاشی کے چیف انجنیئر نارتھ غلام اسحاق اور دیگر حکام کے ہمراہ ضلع صوابی میں جاری مختلف منصوبوں کے معائنے کے موقع پر متعلقہ حکام کو جاری کیے۔ صوبائی وزیر آبپاشی نے کلابٹ، مرغز، بام خیل، ٹھنڈکوئی، شگئی خوڑ دوبیان میں ڈرینیج سسٹم کی بحالی و فلڈ پروٹیکشن، صوابی خاص میں بدری نالہ برج اور صوابی بائی پاس کینال پیٹرول روڈ کے تعمیراتی کام کا جائزہ لیا. دوبیان میں وزیر اعلیٰ خیبرپختونخوا کی مشیر برائے سماجی بہبود مشال اعظم بھی صوبائی وزیر آبپاشی کے ہمراہ تھی۔انہوں نے دوبیان اور گردونواح میں برسات میں سیلابی پانی سے ہونے والے نقصانات سے آگاہ کیا۔ عاقب اللہ خان نے مشیر سماجی بہبود کی اقامت گاہ پر ایک اجتماع سے بھی خطاب کیا۔ انہوں نے کہا کہ صوابی میں سیلابی پانی سے بچاؤ کے مختلف منصوبوں پر کام جاری ہے۔ انہوں نے کہا کہ دوبیان میں ڈرینیج کا نظام بہتر بنایا جائے گا۔ انہوں نے موقع پر موجود محکمہ ایریگیشن کے انجنیئرز کو اس حوالے احکامات جاری کیے۔ صوبائی وزیر نے محکمے کے حکام کو ہدایت دی کہ مون سون بارشوں سے پہلے حفاظتی انتظامات مکمل کیے جائیں اور تمام زیر تعمیر منصوبوں کو جلد از جلد پایہ تکمیل تک پہنچایا جائے۔ عاقب اللہ خان نے کہا کہ پاکستان تحریک انصاف کی حکومت عوام کو درپیش مسائل کے حل پر یقین رکھتی ہے۔ انہوں نے متعلقہ حکام کو تعمیراتی کام کے مختلف مراحل میں مقامی کمیونٹی اور منتخب نمائندوں کی رائے ضرور شامل کرنے کے لیے کہا۔ صوبائی وزیر آبپاشی نے مقامی لوگوں سے بھی ملاقات کی اور ترقیاتی کاموں کے بارے میں ان کی رائے لی اور ان کو یقین دلایا کہ حکومت عوامی رائے کو بھرپور اہمیت دیتی ہے تاہم عوام بھی ترقیاتی منصوبوں پر عمل درآمد میں سرکاری محکموں کے ساتھ تعاون کریں اور جہاں ان کو تعمیراتی کام کے معیار کے حوالے سے کوئی شکایت ہو تو انکے نوٹس میں لائیں تاکہ اس کا بروقت ازالہ ہو سکے۔

خیبر پختونخوا کے وزیر بلدیات ارشد ایوب خان نے لوکل کونسل بورڈ حیات آباد کے دفتر کا دورہ کیا جہاں پر انہیں مختلف سیکشنز کے بارے میں آگاہی دی گئی۔اچانک دورے کے دوران صوبائی وزیر نے عملے کی حاضری کا جائزہ لیا اور اسے یقینی بنانے کے احکامات جاری کئے۔ صوبائی وزیر بلدیات نے کہا کہ ہماری جماعت کا منشور ہے کہ ہر کام میرٹ پر ہونا چاہیے، آپ کسی سیاسی یا سرکاری دباؤ میں آئے بغیر اپنا کام سرانجام دیں۔ان خیالات کا اظہار انہوں نے پشاور اور مردان ڈویژنز کے ٹی ایم اوز کے اجلاس کی صدارت کرتے ہوئے کیا۔ اس موقع پہ سیکرٹری لوکل گورنمنٹ داؤد خان بھی موجود تھے۔ صوبائی وزیر ارشد ایوب نے کہا کہ اپنے پیٹرول کے اخراجات کو کم سے کم کیا جائے چھوٹی ٹی ایم اوز کا بھی 10 لاکھ روپے ماہانہ پٹرول بل آ رہا ہے جو کہ قابل قبول نہیں ہے۔ اس نظام کو ہمیں جلد از جلد ٹھیک کرنا ہوگا تاکہ عوام اس سے مستفید ہو سکیں، اگر ایسا نہ ہوا تو ہم مزید مالی خسارے میں چلے جائیں گے۔ جو ٹی ایم اوز کام کریں گی ان کے کام کو سراہا جائے گا اس لئے کسی کے کہنے پر کوئی غلط کام نہ کیا جائے اگر کوئی پوسٹنگ ٹرانسفر کی دھمکی دیتا ہے تو ہم آپ کے ساتھ کھڑے ہوں گے۔ ہمیں اپنے ٹی ایم ایز کے نظام کو خود مختار بنانا چاہیے تاکہ حکومت پر کوئی مالی بوجھ نہ پڑے۔اگلے ہفتے سے تمام سینیٹیشن گاڑیوں میں ٹریکنگ سسٹم لگا دیا جائے گا تاکہ پیٹرول کا بے دریغ اور غلط استعمال نہ ہو سکے۔

خیبر پختونخوا کے وزیر صحت سید قاسم علی شاہ کی طرف سے کینٹ جنرل ہسپتال پشاور کو ادویات کا عطیہ دیا گیا ہے، ادویات کا عطیہ ممبر کینٹ بورڈ محمداُسید سیٹھی اور ایگزیکٹیو آفیسر کینٹ بورڈ پشاور کی درخواست پر فراہم کیا گیا۔ وزیر صحت کا اس موقع پر کہنا تھا کہ کینٹ بورڈ ہسپتال نوتھیہ، سواتی پھاٹک، گلبرگ، لال کرتی، کالا باڑی اور لنڈی ارباب سمیت دیگر ملحقہ علاقوں کے عوام کو صحت کی بہتر خدمات فراہم کررہا ہے۔ انہوں نے مزید بتایا کہ ان ادویات میں گولیاں، شربت وائل و دیگر ضروری ادویات شامل ہیں۔ وزیر صحت سید قاسم علی شاہ نے یہ بھی بتایا کہ اس اقدام سے ملحقہ علاقوں کے عوام کو صحت کی بہترین سہولیات مہیا ہونگیں جبکہ ادویات کی بلا تعطل فراہمی بھی یقینی ہو جائے۔ ادویات کی فراہمی پر کینٹ بورڈ کے وائس پریزیڈنٹ ید اللہ بنگش، ممبر محمد اسید سیٹھی، نعیم بخش نعمان فاروق اور علی جان نے عوام کی جانب سے وزیر صحت کا شکریہ ادا کیا ہے۔

وزیر اعلی خیبر پختونخوا کے معاون خصوصی برائے صنعت وحرفت اور فنی تعلیم عبدالکریم تورڈھیر نے حیات آباد پشاور میں پاکستان انجینئرنگ کونسل کے تعاون سے انجینئرنگ یونیورسٹیوں کے ساتویں فائنل ائیر انجینئرنگ ڈیزائن پراجیکٹس ایکسپو 2024 کا باقاعدہ افتتاح کردیا۔ مذکورہ نمائش میں صوبہ بھر کی مختلف انجینئرنگ یونیورسٹیوں کے طلبہ کی جانب سے تیار کردہ مختلف انجینئرنگ پراجیکٹس کے ماڈلز رکھے گئے تھے۔نمائش کی منعقدہ تقریب میں پاکستان انجینئرنگ کونسل کے ایڈوائزر انجینئر میر مسعود رشید، ایڈیشنل رجسٹرار انجینئر جہانزیب خان اور متعدد یونیورسٹیوں کے وائس چانسلرز و دیگر حکام نے شرکت کی۔ معاون خصوصی نے نمائش میں یونیورسٹیوں کے طلبہ کی جانب سے بنایے گئے انجینئرنگ ماڈلز کا معائنہ بھی کیا اور ان میں گہری دلچسپی ظاہر کی جبکہ طلبہ کی تخلیقی کوششوں پر انکی حوصلہ افزائی کی۔انھوں نے اس موقع پر پاکستان انجینئرنگ کونسل کے تعاون سے چھ مہینے پر محیط فیلڈ انٹرنشپ مکمل کرنے والے انجینئرنگ طلبہ میں سرٹیفیکیٹس بھی تقسیم کیئے۔معاون خصوصی نے منعقدہ تقریب سے خطاب کرتے ہوئے کہا کہ مختلف انڈسٹریز میں تیکنیکی تربیت کیلئے 5 فیصد طلبہ کو انٹرنشپ پر رکھنے کیلئے ایکٹ بن گیا ہے اور اب اس کے لئے رولز بنیں گے تاکہ بلاکسی مالی مشکلات طلبہ پریکٹیکل ہنر سیکھیں۔انھوں نے کہا کہ ہماری یہ سوچ ہے کہ یونیورسٹیوں اور فنی تعلیمی اداروں کے سلیبس میں انٹرپرینیورشپ کا جز ہونا چاہیئے کیونکہ عملی زندگی میں کامیاب لوگوں نے اپنی کیرئر کا آغاز ہی انٹرپرینیورشپ سے کیا ہے۔انھوں نے کہا کہ صوبائی حکومت سٹارٹ آپس اور کلسٹر ڈویلپمنٹ کیلئے 5 ارب روپے تک کے مفت قرضہ جات کا بڑا منصوبہ شروع کررہی ہے جس سے طلبہ استفادہ اٹھا سکتے ہیں۔معاون خصوصی نے طلبہ سے کہا کہ ہماری نسل میں کسی بھی چیز کی کمی نہیں اور وہ انتہائی ذہین اور باصلاحیت ہیں لہذا وہ اپنی تخلیقات اور برانڈز کو کارامد بنانے کیلئے ان کی مارکیٹنگ کریں جبک بورڈ آف انوسٹمنٹ کے ذریعے بھی وہ مدد لے سکتے ہیں۔انھوں نے کہا کہ طلبہ اپنی ان تخلیقات کو پھیلائیں کیونکہ ہم نے ہر پہلو سے اس صوبے کو اٹھانا ہے۔انھوں نے اس موقع پر ایکسپو کے انعقاد پر پاکستان انجینئرنگ کونسل کا شکریہ ادا کیا اور طلبہ کو حکومت کی جانب سے ہر ممکن تعاون کا یقین دلایا۔تقریب کے آخر میں معاون خصوصی کو پی ای سی کی جانب سے شیلڈ بھی پیش کی گئی۔

خیبر پختونخوا کے وزیر برائے مال نذیر احمد عباسی نے کہا ہے کہ ضلع ایبٹ آباد میں سکولوں کی خستہ حالی، بنیادی ضروریات اور اساتذہ کی کمی کو پورا کرنے کیلئے ترجیحی بنیادوں پر اقدامات اٹھائے جارہے ہیں۔ اسی سلسلے میں صوبائی وزیر مال کے ساتھ ڈائریکٹریس ایلیمنٹری اینڈ سیکنڈری ایجوکیشن ثمینہ الطاف کی منگل کے روز پشاور میں ملاقات ہوئی۔ ملاقات میں ضلع ایبٹ آباد کے تعلیمی اخراجات، مسائل اور دیگر آمور پر تفصیلی تبادلہ خیال کیا گیا۔صوبائی وزیر مال نے ہدایت کی کہ ضلع ایبٹ آباد کے بچے اور بچیوں کو معیاری تعلیم دلوانے، دور جدید کے تقاضوں کے مطابق تعلیم کے حصول کو ممکن بنانے اور بہترین تعلیمی ماحول فراہم کرنے کیلئے محکمہ تعلیم کی تمام تر صلاحیتیں اور وسائل کو بروئے کار لایا جائے اور اس زمرے میں کسی قسم کی کوتاہی کو برداشت نہیں کیا جائے گا۔ انہوں مزید ہدایت کی کہ پہاڑی علاقے ہونے کے ناطے اکثر دور دراز کے سکولوں میں اساتذہ کی کمی اور غیر حاضری کی شکایات موصول ہوتی ہیں جن کا فوراً حل نکلوایا جائے اور سکولوں میں اساتذہ کی کمی کو پورا کرنے کے ساتھ ساتھ ان کی حاضری کو بھی یقینی بنوانے کیلئے ٹھوس اقدامات اٹھائے جائیں۔ڈائریکٹریس ایلیمنٹری اینڈ سیکنڈری ایجوکیشن ثمینہ الطاف نے صوبائی وزیر مال کو ضلع ایبٹ آباد کے تعلیمی نظام کو بہتر بنانے اور سکولوں کو جدید تعلیمی سہولیات سے آراستہ کرنے کے حوالے سے یقین دہانی کروائی اور کہا کہ تعلیمی ایمرجنسی کے نام سے ضلع ایبٹ آباد کے لیے ایک جامع پلان تیار کروایا جائے گا جس کے تحت ضلع کے تمام تعلیمی مسائل کو ہنگامی بنیادوں پر جلد از جلد حل کروانے میں مدد ملے گی۔