خیبرپختونخوا کے وزیرخزانہ اور قانون آفتاب عالم آفریدی ایڈوکیٹ نے کہاہے کہ کوہاٹ کے وکلاء نے ہمیشہ قانون کی بالادستی کیلئے بھر پور کردار ادا کیاہے اورکسی طاقتور کالحاظ کئے بغیر ان کے خلاف موثر آواز اٹھائی ہے۔ ان خیالات کا اظہار انہوں نے پیر کے روز کوہاٹ بار ایسوسی ایشن کے نو منتخب کابینہ کے تقریب حلف برداری سے بحیثیت مہمان خصوصی خطاب کرتے ہوئے کیا۔ اراکین قومی اسمبلی شہر یار آفریدی اور شاندانہ گلزار، اراکین خیبرپختونخوا اسمبلی داؤد شاہ آفریدی اورشفیع جان اور بار کے صدر نے بھی تقریب سے خطاب کیا۔ قبل ازیں وزیر قانون آفتاب عالم نیڈسٹرکٹ اٹارنی کوہاٹ کے آفس میں لاء لائبریری کا بھی افتتاح کیا جہاں انہیں ڈسٹرکٹ اٹارنی اکبر علی نے انہیں تفصیلی بریفنگ دی. صوبائی وزیر نے کہا کہ جب تک ملک میں قانون کی بالادستی قائم نہ ہوگی اورطاقتوروں کو قانون کے نیچے نہیں لایا جاتا اس وقت تک کسی بھی ملک کے ترقی کا خواب شرمندہ تعبیر نہیں ہو سکتا۔ انہوں نے بانی پی ٹی آئی کا حوالہ دیتے ہوئے کہا کہ آج اگرعمران خان پابند سلاسل ہیں تو اس کی وجہ یہی ہے کہ وہ ملک میں قانون کی حکمرانی چاہتے ہیں۔ وزیر قانون نے نومنتخب کابینہ کو مبارکباد دیتے ہوئے کہا کہ نئی کابینہ وکلاء برادری کی فلاح وبہبود اورقانون کی بالادستی کیلئے اپنا بھرپور کردار ادا کرے گی اور لوگوں کو جلد اور سستے انصاف کے فراہمی اورقانون کی بالادستی میں کوئی دقیقہ فروگذاشت نہیں کرے گی۔انہوں نے کہا کہ رول آف لاء اورفوری انصاف کی فراہمی پاکستان تحریک انصاف کا منشور ہے۔ صوبائی وزیر نے مشکل وقت میں پارٹی کا بھرپور ساتھ دینے پر انصاف لائیرز فوم اورکوہاٹ بارایسو سی ایشن کوخراج تحسین پیش کیا۔ بار کی طرف سے مسائل ومطالبات کا حوالہ دیتے ہوئے صوبائی وزیر نے کہا کہ وہ اب بھی کوہاٹ بار کا حصہ ہیں لہٰذا بارکے جملہ مسائل کے حل کیلئے وہ ہر ممکن کوششیں کریں گے۔ انہوں نے بار کے فلاح وبہبود کیلئے 25 لاکھ جبکہ رکن قومی اسمبلی شہریار آفریدی نے بھی 25 لاکھ روپے اورکوہاٹ بار کے ہال کے توسیع کیلئے ایک کروڑ روپے تک دینے کا اعلان کیا۔ اسی طرح داؤد شاہ آفریدی ایم پی اے نے بار ہال کی سولرائزیشن کا اعلان کیا۔

پاکستان تحریک انصاف کے سینیئر رہنما اور وزیرِ اعلیٰ خیبر پختونخوا کے معاون خصوصی برائے پاپولیشن ویلفیئر ملک لیاقت علی خان نے کہا ہے کہ اپنے علاقے کے وسائل کی منصفانہ تقسیم و استعمال اور ترقی کے لیے تمام موجود وسائل کو بروئے کار لانے کے لیے آخری سانس تک جہدوجہد جاری رکھوں گا۔ ملاکنڈ ڈویژن کے عوام اور بالخصوص دیر کے لوگوں نے جس مقصد کے لیے اسمبلی بھیجا ہے ان کی آواز اٹھانے اور مسائل کے حل کے لیے جان کی پرواہ نا پہلے کی ہے اور نا پھر کبھی کروں گا۔ ان خیالات کا اظہار انہوں نے گزشتہ روز اپنے دفتر میں مختلف علاقوں سے آئے ہوئے وفود اور عمائدین سے ملاقات میں کیا۔ وفود اور علاقہ عمائدین نے معاون خصوصی ملک لیاقت علی خان سے علاقے کے مسائل، جاری ترقیاتی کاموں پر رائے اور ان کے حل کے لیے اٹھائے گئے اقدامات پر تبادلہ خیال کیا۔ملک لیاقت علی خان نے کہا کہ علاقے میں تعلیم اور صحت کی حالت بہتر بنانے کیلئے ترجیحی بنیادوں پر اقدامات کر رہا ہوں،انہوں نے کہا کہ فرد واحد کی بجائے عوامی مفادات کو ملحوظ خاطر رکھ رہا ہوں پورے صوبہ اور بالخصوص دیر کے عوام کی فلاح وبہبود کے لیے بانی پی ٹی آئی عمران خان کے دلیر سپاہی کی طرح لڑتا رہوں گا۔

خیبر پختو خواکے وزیر مواصلات و تعمیرات شکیل احمد نے کہا ہے کہ موجودہ حکومت کی اولین توجہ شعبہ تعلیم پر مرکوز ہے اور اس کی ترقی کے لیے سالانہ بجٹ2024-25 میں خطیر رقوم مختص کی گئی ہیں جن کی بدولت صوبے کے طلبہ و طالبات جدید اور عصری علوم سے مستفید ہوں گے۔ ان خیالات کا اظہار انہوں نے گورنمنٹ گرل ڈگری کالج نحقی پشاور کی نئی تعمیر شدہ عمارت کی افتتاحی تقریب سے بحیثیت مہمان خصوصی خطاب کرتے ہوئے کیا اس موقع پر سابق رکن صوبائی اسمبلی ارباب جہانداد خان محکمہ تعلیم اور محکمہ مواصلات و تعمیرات کے افسران بھی موجود تھے۔ صوبائی وزیر نے کہا کہ دنیا میں ترقی تعلیم کے بل بوتے پر ہو رہی ہے جن اقوام نے تعلیم کے میدان مین محنت کی ترقی بھی انہیں ہی نصیب ہوئی ہے۔ انہوں نے کہا کہ بچوں کی تعلیم کے ساتھ ساتھ معاشرے میں بچیوں کی تعلیم کے زیور سے آراستہ کرنا نہایت اہم ہے اور والدین کو چاہیے کہ اپنی بچیوں کی تعلیم پر خاص توجہ دیں تاکہ وہ معاشرے اور ملک کی تعمیر و معاشی ترقی میں اپنا کردار ادا کر سکیں۔صوبائی وزیر نے اس موقع پر نئی تعمیر شدہ گورنمنٹ گرل ڈگری کالج نحقی پشاور کا باقاعدہ افتتاح کیا اور منصوبے کے مختلف حصوں کا جائزہ لیا۔بعد ازاں صوبائی وزیر نے پشاور اور چار سدہ کو ملانے والے رابطہ پل جالہ بیلا کا بھی معائنہ کیا اور پل کو بھاری گاڑیوں کی آمد و رفت سے پہنچنے والے نقصان کا جائزہ لیتے ہوئے متعلقہ حکام کو ہدایت کی کہ اس پل کی فوری ضروری تعمیر مرمت کی جائے اور محکمہ مواصلات و تعمیرات فوری طور پر ایسے اقدامات اٹھائے تاکہ کسی جانی و مالی نقصان کا احتمال نہ ہو۔انہوں نے محکمہ کو پل پربھاری گاڑیوں کی آمد رفت کو قانونی ضوابط کے تحت روکنے کی بھی ہدایت کی تاکہ اس مسئلے کومستقل طورپر حل کیا جا سکے

> انٹی کرپشن اسٹیبلشمنٹ کی پہلی کھلی کچہری بروز منگل 2جولائی 2024کومنعقد ہوگی

> وزیراعلیٰ خیبرپختونخوا کے معاون خصوصی برائے انسدادِ بدعنوانی برگیڈیئر (ر) محمد مصدق عباسی صدارت کریں گے

وزیراعلیٰ خیبرپختونخوا سردار علی امین گنڈا پور کی خصوصی ہدایات پر صوبے میں کرپشن کے خاتمے کیلئے اقدامات کا آغاز کرتے ہوئے ماہانہ بنیادوں پر باقاعدہ کھلی کچہری کے انعقاد کا فیصلہ کیا گیا ہے، اس سلسلے میں انٹی کرپشن اسٹیبلشمنٹ کی پہلی کھلی کچہری بروز منگل صبح 11بجے سے لیکر سہ پہر3 بجے تک انٹی کرپشن کے ہیڈ آفس واقع حیات آباد پشاور میں ہوگی جس کی صدارت وزیر اعلیٰ خیبر پختونخوا کے معاون خصوصی برائے انسدادِ بدعنوانی برگیڈیر (ر) محمد مصدق عباسی کریں گے۔عوام اپنی شکایات انٹی کرپشن کے ہیڈ آفس واقع حیات آباد پشاور کی کھلی کچہری میں برہ راست اور ریجنل دفاتر کے ذریعے جمع کر سکیں گے۔درج شکایات کو خصوصی ٹریکنگ نمبر جاری کیا جائے گا اور فوری کارروائی کا آغاز ہوگا۔

مشیر وزیراعلیٰ خیبرپختونخوا مشال اعظم یوسفزئی عوام تک خدمات فراہمی بہتر اور بروقت بنانے کے لیے مزید سرگرم ہو گئی ہیں،اس سلسلے میں انہوں نے نوشہرہ میں قائم ڈائریکٹوریٹ آف سوشل ویلفیئر نوشہرہ آفس، خصوصی افراد کے لیے قائم سکول اور بے سہارا بچوں کے لیے قائم پناہ گاہ سمیت ڈسٹرکٹ ایجوکیشن آفس کا خصوصی دورہ کیا۔اس موقع پر مشیر برائے عشر و زکوٰۃ، سماجی بہبود اور ترقی خواتین مشال اعظم یوسفزئی نے جملہ امور کا جائزہ لیتے ہوئے ڈائریکٹوریٹ آف سوشل ویلفیئر نوشہرہ آفس میں متعلقہ حکام سے بریفنگ لی، خدمات کی فراہمی کا جائزہ لیا، سٹاف حاضری چیک کی جبکہ انہوں نے ڈسٹرکٹ ایجوکیشن آفیسر نوشہرہ سے بھی ملاقات کی اور محکمہ سوشل ویلفیئر کے زیر انتظام تعلیمی اداروں کی کارکردگی اور دیگر متعلقہ امور کے حوالے سے بات چیت کی۔مشیر وزیراعلیٰ نے نوشہرہ میں خصوصی افراد کے لیے قائم سکول کا دورہ کیا جہاں پائے جانے والی سہولیات و خدمات کا جائزہ بھی لیا جبکہ وہ وہاں سہولیات کی عدم موجودگی پر مشیر وزیراعلیٰ مشال اعظم یوسفزئی نے موقع پر ہی حکام کو ہدایات جاری کر دئیے۔مشیر وزیراعلیٰ مشال اعظم یوسفزئی نے دورہ نوشہرہ کے موقع پر بچوں کے قائم ویلفیئر ہوم کا بھی دورہ کیا اور وہاں پر بچوں کو دی جانے والی سہولیات و خدمات کا جائزہ لیا۔
مشیر وزیراعلیٰ خیبرپختونخوا مشال اعظم یوسفزئی نے دورہ نوشہرہ کے موقع پر ریمارکس دیتے ہوئے کہا کہ اللہ کے فضل و کرم سے جب سے ذمہ داری سنبھالی ہے تواس وقت سے اب تک کئی اضلاع میں قائم سوشل ویلفیئر کے دفاتر کا دورہ کر چکی ہوں،صوبے میں خصوصی بچوں کے لیے قائم سکولوں، پناہ گاہ اور شیلٹر ہوم میں خدمات کی فراہمی مزید بہتر بنانے کے لیے کوشاں ہیں۔انہوں نے کہا کہ قائد عمران خان کے وژن کے مطابق کوشش ہے کہ خیبرپختونخوا میں نہ کوئی بھوکا سوئے اور نہ کوئی کھلے آسمان تلے، کیونکہ ہم ہر ممکن کوشش کررہے ہیں کہ عوامی خدمات کا سفر جاری رہے۔انہوں نے متعلقہ حکام کو ہدایات جاری کرتے ہوئے کہا کہ جن سیکشنز میں کوئی ٹیکنیکل کمی ہے یا کسی اور وجہ سے خدمات کی فراہمی بہتر نہیں ہو پا رہی، اس حوالے سے کارروائی فوری مکمل کرکے سمری بھیج دیں تاکہ اس پر جلد از جلد کارروائی کر سکیں۔

وزیر اعلیٰ خیبر پختونخوا کے مشیر خزانہ مزمل اسلم نے کہا ہے کہ خیبرپختونخوا کا خزانہ مالی سال 2023-24 کے اختتام پر تاریخ کی بلند ترین سطح پر ہے جس کا کریڈیٹ وزیراعلیٰ خیبرپختونخوا، کابینہ و دیگر متعلقہ حکام کو جاتا ہے۔ان خیالات کا اظہار انہوں نے اپنی ایک بیان میں کیا۔مشیر خزانے نے کہا کہ ہمارے قائد عمران خان جیل میں ہونے کے باوجود بھی حکومت کی کارکردگی کی مسلسل نگرانی کر رہے ہیں اور وہیں سے ہی بانی پی ٹی آئی حکومتی اراکین کو مسلسل عوامی خدمت اور صوبے کی ترقی کیلئے تاکید اور رہنمائی فراہم کرتے ہیں۔ مزمل اسلم نے کہا کہ پاکستان اور دیگر صوبے مالی مشکلات کا شکار ہیں جبکہ خیبرپختونخوا کے مالی نتائج بہترین ہیں کیونکہ خیبر پختونخوا کی عوامی حکومت نے عوام کے پیسے کو نہ صرف ضائع ہونے سے بچایا ہے بلکہ بہترین حکمت عملی سے اسے ترقیاتی اور منافع بخش منصوبوں پر خرچ کر رہی ہے۔انہوں نے کہا کہ سمت اور ویژن درست ہو تو پاکستان بھی اپنے پیروں پر کھڑا ہو سکتا ہے۔ انہوں نے کہا کہ سستی بجلی،کارخانوں کا قیام اور روزگار فراہم کرنا مشن ہے،خیبر پختونخوا میں 180 میگاواٹ بجلی کے منصوبے تین ماہ تک مکمل ہو رہے ہیں۔ مشیر خزانہ مزمل اسلم نے کہا کہ واپڈا کے تعاون سے سستی بجلی چند ماہ میں کارخانوں تک پہنچا سکتے ہیں مگر افسوس نیپرا 27 روپے فی یونٹ ترسیل چارجز کا تقاضا کر رہا ہے جو سراسر نا انصافی ہے۔

6 سو پچاس لیٹرز غیر معیاری اور مضر صحت دودھ تلف جبکہ 2 ہزار جعلی وغیر معیاری مشروبات برآمد کرکے ضبط، ترجمان فوڈ اتھارٹی
خیبرپختونخوا فوڈ سیفٹی اینڈ حلال فوڈ اتھارٹی اور محکمہ لائیوسٹاک نے پشاور، ڈی آئی خان اور نوشہرہ میں مشترکہ کارروائیاں کرتے ہوئے پشاور موٹر وے ٹول پلازہ اور بکھر پل ڈی آئی خان پر ناکہ بندیاں قائم کیں اور سینکڑوں لیٹرز غیر معیاری دودھ اور مشروبات پکڑ کر ضبط کر لیا گیا۔ کاروائیوں کی تفصیلات جاری کرتے ہوئے فوڈ اتھارٹی کے ترجمان نے کہا کہ گزشتہ روز فوڈ سیفٹی ٹیموں نے لائیو سٹاک کے اہلکاروں نے پشاور موٹر وے ٹول پلازہ اور بکھر پل پر صبح سویرے ناکہ بندیاں کیں اور خوراکی اشیاء لے جانے والی گاڑیوں، خصوصاً دودھ بردار ٹینکرز کی چیکنگ کی گئی۔ترجمان نے بتایا کہ موبائل ٹیسٹنگ لیب کے ذریعے دودھ، آئس کریم اور دیگر خوراکی اشیاء سے نمونے لے کر چیک کیے گئے۔ مزید تفصیلات کے مطابق پشاور میں 650 لیٹر جبکہ ڈی آئی خان میں 400 لیٹر سے زائد دودھ غیر معیاری اور مضر صحت ثابت ہونے پر تلف کر دیا گیا۔مزید برآں، نوشہرہ کی ٹیم نے جی ٹی روڈ پر ناکہ بندی کے دوران ایک گاڑی سے 2000 لیٹر سے زائد جعلی اور غیر معیاری مختلف برانڈڈ کولڈرنکس برآمد کرکے ضبط کر لئے، حفظان صحت کے اصولوں کی خلاف ورزی پر مالکان پر بھاری جرمانے عائد کیے گئے اور فوڈ سیفٹی ایکٹ کے تحت مزید کارروائی کا آغاز کیا گیا ہے۔ڈائریکٹر جنرل فوڈ اتھارٹی واصف سعید نے کامیاب کاروائیوں پر انسپکشن کو سراہتے ہوئے کہا کہ شہریوں اور خصوصاً بچوں کی صحت سے کھلواڑ کرنے والوں کے خلاف آہنی ہاتھوں سے نمٹا جائے گا۔

خیبرپختونخوا کے وزیر برائے جنگلات، ماحولیات، موسمیاتی تبدیلی و جنگلی حیات فضل حکیم خان یوسفزئی نے کہا ہے کہ خیبرپختونخوا میں جنگلات کی کٹائی پر مکمل پابندی عائد کردی گئی ہے محکمہ جنگلات کے افسران کو سختی سے ہدایت جاری کی ہے کہ اس سلسلے میں شفاف طریقے سے نگرانی کریں اور اس عمل کو یقینی بنانے کیلئے تمام تر صلاحیتیں بروئے کار لائیں انہوں نے کہا کہ جنگلات کا تحفظ ہم سب کا قومی فریضہ ہے لہذا عوام درختوں کی کٹائی اور لکڑی کے نقل و حمل کی روک تھام کیلئے میرے دفتر میں قائم کمپلینٹ سیل سے بر وقت رابطہ کریں ملوث افراد کیخلاف سخت ایکشن لیا جائے گا۔ ان خیالات کا اظہار صوبائی وزیر نے سوات کی مقامی سول سوسائٹی کے نمائندہ وفد سے گفتگو کرتے ہوئے کیا، وفد میں ڈاکٹر عبداللہ، ڈاکٹر شہریار آفریدی، آذان کرم، عزیز الحق، محمد ہلال، عبد الرحیم، عابد علی جان، رحیم الدین، ماجد مسعود، وسیم الحق،اظہر الدین اور وسیم خان شامل تھے۔ملاقات میں محکمہ جنگلات کی مجموعی کارکردگی، کامیابیوں پر اب تک کی پیشرفت، درختوں کی کٹائی کی روک تھام کے لئے اقدامات، آئندہ کے لائحہ عمل سمیت موسمیاتی تبدیلی، جنگلی حیات، مینگورہ گریویٹی واٹر سپلائی سکیم، ڈمپنگ سائٹ اور دیگر مختلف امور پر تفصیلی گفتگو ہوئی، ملاقات میں سول سوسائٹی کے وفد نے صوبائی وزیر کو عوامی مطالبات و خدشات سے آگاہ کیا۔ فضل حکیم خان یوسفزئی نے یقین دہانی کرائی کہ عوامی مفاد کو مد نظر رکھتے ہوئے تمام قانونی مطالبات و خدشات دور کئے جائیں گے عوام کے مسائل کا حل موجودہ حکومت کی اہم ذمہ داری ہے ہم عوام کے سامنے جوابدہ ہیں۔اس موقع پر فضل حکیم خان یوسفزئی نے جنگلات کی حفاظت اور درختوں کی کٹائی کی مکمل روک تھام کواہم ترجیحات میں سے ایک قرار دیتے ہوئے کہا کہ جنگلات کی حفاظت اور درختوں کی کٹائی کی روک تھام کے لئے فارسٹ چیک پوسٹوں پر چیکنگ کا عمل سخت کردیا گیا ہے درختوں کی کٹائی میں ملوث عناصر کیخلاف سخت قانونی کاروائی کی جائے گی،عوامی خدمت میرا مشن ہے جس پر نہ پہلے کمپرومائز کیا اور نہ ہی آئندہ کیا جائیگا عوام کیلئے ہمارے دفتر اور حجرے کے دروازے ہر وقت کھلے ہیں،عوامی خدمت میں کوئی کمی نہیں آنے دینگے۔صوبائی وزیر نے کہا کہ سول سوسائٹی معاشرے کا وہ باشعور طبقہ ہے جن کی خدمات قابل ستائش ہیں جو سماجی معاملات پر اپنی رائے اور اپنا رد عمل دیتے ہیں،آپ کی رائے ہمارے لئے مقدم ہے ہم سب کی تجاویز کو قدر کی نگاہ سے دیکھتے ہیں۔