وزیراعلیٰ خیبرپختونخوا کے معاون خصوصی برائے اطلاعات و تعلقات عامہ شفیع جان نے کہا ہے کہ وفاق پر مسلط کرپٹ ٹولے نے ایک ہارے ہوئے شخص کو پاکستان تحریک انصاف کے خلاف بہتان تراشی کے لئے رکھا ہوا ہے۔ اختیارولی خود ایک جعلی کوآرڈینیٹر ہے جسے عوام کسی صورت سنجیدہ لینے کو تیار نہیں،اختیارولی ایک غیر سنجیدہ اور ناکام سیاسی کردار ہے، جو روزانہ ایک منتخب صوبائی وزیراعلیٰ کے خلاف بے بنیاد اور من گھڑت پروپیگنڈا کرتا ہے، اختیارولی اور اس کی جماعت خود انتشاری اور منفی سیاست کی علامت ہیں، پاکستان تحریک انصاف اور وزیر اعلی محمد سہیل آفریدی کے خلاف اختیارولی کی پریس کانفرنس پر ردعمل دیتے ہوئے شفیع جان نے کہا کہ نوشہرہ کے باشعور عوام نے جعلی کوآرڈینیٹر کو مسترد کر کے اس کی سیاسی حیثیت واضح کر دی ہے۔ عوام کی جانب سے مسترد ہونے کے بعد اب وہ پاکستان تحریک انصاف کے خلاف الزام تراشیوں میں مصروف ہے،انھوں نے اختیار ولی کو مشورہ دیا کہ کی ٹی آئی کے خلاف زہر اگلنے کے بجائے امیر مقام کا مقابلہ کریں کیونکہ امیر مقام نے انھیں اپنے ویلج کونسل میں پارٹی کا صدر بھی بننے نہیں دیا،مسلم لیگ (ن) کی پالیسیوں پر شدید تنقید کرتے ہوئے شفیع جان نے کہا کہ ن لیگ کی غلط معاشی پالیسیوں نے ملک کو شدید معاشی عدم استحکام سے دوچار کر دیا ہے۔ دہائیوں تک اقتدار میں رہنے کے باوجود ن لیگ ہر بار آئی ایم ایف کے سامنے ہاتھ پھیلانے پر مجبور نظر آتی ہے۔ ملک کو ترقی اور معاشی استحکام کی راہ پر گامزن کرنے کے لیے وفاقی حکومت کے پاس نہ کوئی واضح وژن ہے اور نہ ہی کوئی مربوط حکمت عملی،انہوں نے کہا کہ وفاقی حکومت کی تمام تر توجہ عوامی فلاح اور معیشت کی بہتری کے بجائے اپنی کرپشن چھپانے پر مرکوز ہے۔ پاکستانی عوام باشعور ہیں اور روزانہ کی جھوٹی اور من گھڑت پریس کانفرنسوں کے ذریعے قوم کو گمراہ نہیں کیا جا سکتا،شفیع جان نے کہا کہ بانی چیئرمین عمران خان اور وزیراعلیٰ خیبرپختونخوا محمد سہیل آفریدی نے مسلم لیگ (ن) کی نیندیں حرام کر دی ہیں۔ ملک پر قابض سیاسی ٹولے نے پی ٹی آئی کے خلاف ظلم، جبر اور فسطائیت کی تمام حدیں پار کر دی ہیں۔ گزشتہ رات اڈیالہ جیل کے باہر شدید سردی میں علیمہ خان، پارٹی کارکنان اور پارلیمنٹرینز پر واٹر کینن کا استعمال اس فسطائی طرز عمل کا واضح ثبوت ہے،انہوں نے دوٹوک الفاظ میں کہا کہ ہم مسلم لیگ (ن) کے اوچھے ہتھکنڈوں سے ڈرنے والے نہیں۔ وفاقی حکومت کی ناکام پالیسیوں کے باعث عوام دن بدن غریب سے غریب تر جبکہ وفاق اور پنجاب پر مسلط جعلی حکمران مزید امیر ہوتے جا رہے ہیں، جو اس بات کا کھلا ثبوت ہے کہ مسلم لیگ (ن) کا کرپٹ ٹولہ قومی خزانے کو گدھ کی طرح نوچ رہا ہے۔

سپیکر خیبرپختونخوا اسمبلی بابر سلیم سواتی سے سیکرٹری کامرس اینڈ انڈسٹری کی ملاقات اسمبلی سیکرٹریٹ پشاور میں منعقد ہوئی، جس میں محکمہ صنعت، تجارت اور فنی تربیتی اداروں کے مختلف امور پر تفصیلی تبادلہ خیال کیا گیا۔ اس موقع پر ایم پی اے اکرام اللہ غازی اور ڈائریکٹر ٹیوٹابھی موجود تھے۔ملاقات میں ٹیوٹا کے ملازمین کی ممکنہ بحالی کا معاملہ خصوصی طور پر زیرِ غور آیا۔سپیکر بابر سلیم سواتی نے اس سلسلے میں ہدایت کی کہ متعلقہ ملازمین کے معاملات کو انسانی بنیادوں پر دیکھا جائے، اور قواعد کے مطابق ان کی بحالی کے لیے مناسب اقدامات تجویز کیے جائیں۔ اس کے علاوہ اجلاس میں حطار اور مانسہرہ انڈسٹریل زون کی بہتری اور اپ لفٹنگ پر بھی تفصیلی گفتگو ہوئی۔سپیکر نے کہا کہ دونوں زونز میں گنجائش موجود ہے، اور ہم چاہتے ہیں کہ اس پوٹنشل کے مطابق جدید سہولیات اور صنعتی سہارا فراہم کر کے انہیں مزید فعال اور مضبوط بنایا جائے۔مزید برآں، حکومت کی جانب سے حاصل کردہ اراضی کے مالکان کو ادائیگیوں کے مسائل بھی زیرِ بحث آئے۔ اسپیکر نے متعلقہ حکام کو ہدایت کی کہ زمین مالکان کے مسائل کے حل کے لیے بہتر کوآرڈینیشن اور تیز اقدامات کو یقینی بنایا جائے۔آخر میں اسپیکر بابر سلیم سواتی نے کہا کہ صوبے کی معاشی ترقی کے لیے صنعتی زونز کی بہتری، تربیتی اداروں کی مضبوطی اور عوامی مسائل کے حل کو حکومت خصوصی ترجیح دے رہی ہے۔

موسم سرما میں ممکنہ موسمی حالات کے پیشِ نظر خطرات سے نمٹنے کے لئے صوبائی ونٹر کنٹنجنسی پلان سے متعلق اجلاس منعقد ہوا۔ اجلاس کی صدارت چیف سیکرٹری خیبر پختونخوا شہاب علی شاہ نے کی۔اجلاس میں ڈویژنل کمشنرز، سیکرٹری ریلیف، سیکرٹری زراعت اور دیگر حکام شریک ہوئے۔اجلاس میں متعلقہ محکموں اور اضلاع میں انتظامیہ کی جانب سے سردیوں میں ممکنہ موسمی سختیوں سے جڑے مسائل سے نمٹنے کی تیاریوں کا جائزہ لیا گیا۔اجلاس کو ونٹر کنٹنجنسی پلان پر تفصیلی بریفنگ دی گئی، جس میں وسائل کی دستیابی، انتظامی و لاجسٹک انتظامات اور برف باری، سلائیڈنگ اور سڑکوں کی بندش جیسے مسائل سے نمٹنے کے اقدامات پر روشنی ڈالی گئی۔چیف سیکرٹری نے کہا کہ سردیوں میں کسی بھی ہنگامی صورتحال سے بروقت نمٹنے کے لئے پیشگی منصوبہ بندی، محکموں کے درمیان بہتر رابطہ کاری اور ڈیزاسٹر مینجمنٹ اداروں کے ساتھ تعاون نہایت اہم ہے۔ انہوں نے کمشنرز کو ہدایت کی کہ سخت موسمی حالات کے حساس علاقوں پر خصوصی توجہ دی جائے اور مشینری، ایندھن اور ریلیف سامان کی دستیابی ہر صورت یقینی بنائی جائے۔

قواعدِ کار، مراعات, استحقاقات اور حکومتی یقین دہانیوں کے نفاذ سے متعلق قائمہ کمیٹی کا اجلاس بدھ کے روز خیبر پختونخوا اسمبلی کے کانفرنس روم میں منعقد ہوا۔ اجلاس کی صدارت ڈپٹی اسپیکر صوبائی اسمبلی و چیئرپرسن قائمہ کمیٹی ثریا بی بی نے کی۔ اجلاس میں اراکین صوبائی اسمبلی و ممبران قائمہ کمیٹی خالد خان، اکرام غازی، منیر لغمانی, سجاد اللہ، مصور خان، صوبیہ شاہد، مشتاق غنی، شفیع جان، جلال خان، عبدالسلام افریدی، شازیہ جدون ، رشادخان اور تاج محمد ترند نے شرکت کی۔ اس کے علاوہ محکمہ قانون، پولیس، صحت، موٹروے پولیس، ایلیمنٹری اینڈ سیکنڈری ایجوکیشن, لوکل گورنمنٹ سمیت متعلقہ محکموں کے وہ افسران بھی اجلاس میں شریک ہوئے ۔اجلاس کے دوران مختلف تحاریکِ استحقاق کا تفصیلی جائزہ لیا گیا۔ شفیع جان کی جانب سے لوکل گورنمنٹ کے خلاف جمع کرائی گئی تحریکِ استحقاق پر کمیٹی نے فیصلہ دیا کہ متعلقہ افسر آئندہ اجلاس میں اپنا تحریری وضاحت پیش کریں۔ شازیہ جدون کی جانب سے محکمہ صحت کے خلاف تحریکِ استحقاق پر بحث کے بعد کمیٹی نے باقاعدہ انکوائری کا حکم دیتے ہوئے رپورٹ اگلے اجلاس میں پیش کرنے کی ہدایت کی۔مشتاق احمد غنی کی جانب سے جمع کرائی گئی تحریکِ استحقاق پر سیکرٹری ایلیمنٹری اینڈ سیکنڈری ایجوکیشن نے وضاحت پیش کی، جسے کمیٹی نے تسلی بخش قرار دیتے ہوئے قبول کر لیا۔ جلال خان کی پولیس ڈیپارٹمنٹ کے خلاف تحریکِ استحقاق پر کمیٹی نے متعلقہ افسر کے خلاف انکوائری کے احکامات جاری کیے اور رپورٹ آئندہ اجلاس میں جمع کرانے کی ہدایت دی۔ عبدالسلام افریدی کی پولیس کے خلاف تحریکِ استحقاق پر بھی کمیٹی نے انکوائری کا حکم جاری کرتے ہوئے رپورٹ طلب کر لی۔ پیر مصور خان کی موٹروے پولیس کے خلاف تحریکِ استحقاق پر کمیٹی نے متعلقہ افسران کے خلاف انکوائری کی ہدایات دیتے ہوئے رپورٹ آئندہ اجلاس میں پیش کرنے کا حکم دیا۔اجلاس کے اختتام پر ڈپٹی سپیکر و چیئرپرسن قائمہ کمیٹی محترمہ ثریا بی بی نے کہا کہ اراکینِ اسمبلی اور عوامی نمائندوں کا احترام اور وقار مقدم ہے، اس لیے محکموں کے درمیان تعاون، ذمہ داری اور خوش اخلاقی کا مظاہرہ ضروری ہے۔ انہوں نے کہا کہ قوانین اسمبلی میں بنائے جاتے ہیں اور ان پر مؤثر عمل درآمد کرنا محکموں کی بنیادی ذمہ داری ہے۔ انہوں نے مزید کہا کہ قائمہ کمیٹیوں کا مقصد سرکاری پالیسیوں پر عمل درآمد کی مؤثر نگرانی اور عوامی مسائل کے حل کے لیے مضبوط نظام کو فعال رکھنا ہے۔

وزیر قانون آفتاب عالم ایڈووکیٹ کی زیر صدارت خیبر پختونخوا کابینہ کی تشکیل کردہ کمیٹی کا اجلاس پشاور میں منعقد ہوا جس میں مجوزہ خیبر پختونخوا پوسٹنگ اور ٹرانسفر پالیسی کا جائزہ لیا گیا۔اجلاس میںوزیر برائے پبلک ہیلتھ انجینئرنگ ، وزیر ابتدائی و ثانوی تعلیم ارشد ایوب ،سیکرٹری محکمہ قانون اختر سعید ترک ،محکمہ اسٹیبلشمنٹ ، محکمہ قانون کے حکام ، ایڈوکیٹ جنرل آفس کے حکام اور دیگر متعلقہ محکموں کے حکام نے شرکت کی ۔کمیٹی کواس پالیسی پر مفصل بریفنگ دی گئی اور بتایا گیا کہ موجودہ پوسٹنگ اور ٹرانسفر پالیسی اسٹیبلشمنٹ ڈیپارٹمنٹ کی طرف سے وقتاً فوقتاً جاری کردہ 17 نوٹیفکیشنز، ہدایات اور وضاحتی نوٹس پر مشتمل ہے ۔ اجلاس کو بتایا گیا کہ موجودہ پالیسی میں مختلف آسامیوں پر تعیناتی کی مدت ، پوسٹنگ اور ٹرانسفر آرڈرز کے خلاف اپیلوں، انتظامی افسران کی تعیناتی، پے سکیل میں تعیناتی، قبل از وقت تبادلے، پلیسمنٹ کمیٹیوں، افسران کی پروفائل، اور چارج ہینڈلنگ سے متعلق دفعات کی کمی تھی۔ اسی بنا پر ایک مفصل پوسٹنگ ٹرانسفر پالیسی کی ضرورت تھی۔نئی پالیسی چیف سیکرٹری، خیبر پختونخوا کی جانب سے گڈ گورننس روڈ میپ کے تحت اسٹیبلشمنٹ ڈیپارٹمنٹ کو سونپے گئے ٹاسک کے بعد وضع کی گئی ہے۔ اسٹیبلشمنٹ ڈیپارٹمنٹ نے تمام انتظامی محکموں سے مشاورت کے بعد “خیبر پختونخوا پوسٹنگ اور ٹرانسفر پالیسی، 2025” کو مرتب کیا۔اجلاس میں نئی پالیسی کے مختلف پہلوئوں جیسے پلیسمنٹ کمیٹیوںکے قیام ،انتظامی آسامیوں کے لیے اہلیت کے معیار ، اور صوبے بھر میں روٹیشن اور محکموں اور دیگر اداروں پر پالیسی کے اطلاق جیسے امور کا جائزہ لیا گیا۔ ایک دوسرے اجلاس میں رنگ روڈ (بائی پاس)، مردان کے منصوبے سے متعلق اراضی کے حصول کے کیسز میں ڈکریٹل رقم کی فراہمی پر تبادلہ خیال کیا گیا۔ کمیٹی نے ڈکریٹل رقم کی ادائیگی کے لیے ضروری اقدامات اور مالی انتظام کو یقینی بنانے کے لیے ایک لائحہ عمل مرتب کیا۔

 خیبرپختونخوا کے وزیر آبپاشی ریاض خان کی زیر صدارت پشاور میں ڈی آئی خان سی آر بی سی(ایل سی جی) کے اہم اور بڑے آبی منصوبے سے متعلق اجلاس منعقد ہوا، جس میں سیکرٹری محکمہ آبپاشی خیبرپختونخوا عبدالباسط، واپڈا کے اعلیٰ حکام اور متعلقہ محکموں کے افسران نے شرکت کی۔ اجلاس میں متعلقہ افسران نے بریفنگ دیتے ہوئے بتایا گیا کہ آر بی سی(ایل سی جی) منصوبہ تقریباً 295774 ایکڑ رقبے پر محیط زرعی اراضی کو سیراب کرنے کی صلاحیت رکھتا ہے، جو ضلع ڈیرہ اسماعیل خان کے بالائی میدانی علاقوں سے لے کر خیبرپختونخوا صوبہ پنجاب سرحد تک پھیلا ہوا ہے۔ مزید بتایا گیا کہ منصوبے کی بنیادی ساخت میں اہم اجزا شامل ہیں جس پاور چینل سے انٹیک اسٹرکچر، فیڈر چینل، پمپنگ اسٹیشن جو پانی کو تقریباً 64 فٹ بلند اٹھا کر مرکزی نہر تک پہنچائے گا، آبپاشی نیٹ ورک اور فلڈ کیریئر چینلز شامل ہیں۔ صوبائی وزیر آبپاشی ریاض خان نے اجلاس سے خطاب کرتے ہوئے کہا کہ یہ منصوبہ جنوبی خیبرپختونخوا کے کسانوں کے لیے گیم چینجر ثابت ہوگا جس سے نہ صرف سیرابی کے وسیع مواقع پیدا ہوں گے بلکہ زرعی پیداوار میں بھی نمایاں اضافہ ہوگا۔ انہوں نے متعلقہ محکموں کے افسران کو ہدایات جاری کرتے ہوئے کہا کہ منصوبے کے ہر حصے کو تکنیکی بنیادوں پر شفافیت، رفتار اور معیار کے ساتھ مکمل کیا جائے۔ سیکرٹری آبپاشی عبدالباسط اور واپڈا حکام نے صوبائی وزیر کو یقین دلایا کہ منصوبے پر پیش رفت کو تیز کرنے کے لیے تمام ادارے مربوط انداز میں کام کر رہے ہیں۔ صوبائی وزیر نے اس امید کا اظہار کیا کہ آر بی سی(ایل سی جی) منصوبہ صوبے کی زرعی معیشت کی بحالی اور کسانوں کی خوشحالی میں اہم کردار ادا کرے گا۔ اس موقع پر صوبائی وزیر ریاض خان نے انسداد بدعنوانی کے عالمی دن کے حوالے سے کہا کہ بدعنوانی معاشرتی زوال، ادارہ جاتی کمزوری اور عوامی اعتماد کے کھو جانے کی سب سے بڑی وجہ ہے۔ اس ناسور کے خاتمے کے بغیر ترقی، انصاف اور شفاف طرز حکمرانی کا خواب پورا نہیں ہوسکتا۔ انہوں نے کہا کہ وزیراعلیٰ خیبرپختونخوا محمد سہیل آفریدی کی ہدایات کے مطابق صوبے میں کرپشن کے خلاف زیرو ٹالرنس پالیسی پر سختی سے عمل درآمد جاری ہے۔ کسی بھی سطح پر بدعنوانی برداشت نہیں کی جائے گی اور جو بھی اس لعنت میں ملوث پایا گیا اس کے خلاف قانون کے مطابق سخت سے سخت کاروائی یقینی بنائی جائے گی۔ ریاض خان نے مزید کہا کہ شہریوں کا فرض ہے کہ وہ بدعنوانی کی نشاندہی میں صوبائی حکومت کا ساتھ دیں کیونکہ صاف اور شفاف نظام کی تعمیر عوام اور حکومت دونوں کی مشترکہ ذمہ داری ہے۔