وزیراعلی خیبر پختونخوا کے مشیر برائے اطلاعات وتعلقات عامہ بیرسٹر ڈاکٹرسیف نے کہا ہے کہ ضمنی انتخاب میں مسلم لیگ (ن) جیتنے کے باوجود مایوس، جبکہ تحریک انصاف ہار کر بھی مطمئن ہے،آر اوز کے دفاتر کے باہر ”عمران خان زندہ باد” کے نعرے گونج رہے تھے، جبکہ اندر نتائج میں تبدیلی کی جا رہی تھی.اپنے دفتر سے جاری بیان میں بیرسٹر ڈاکٹرسیف نے کہا کہ شریف خاندان نے پرانی روش اختیار کرکے دھاندلی نہیں بلکہ کھلم کھلا ”دھاندلا” کیا ہے، جعلی حکومت کب تک انتخابی نتائج تبدیل کرتی رہے گی؟ سچ زیادہ دیر چھپ نہیں سکتا، انہوں نے کہا کہ جعلی حکومت اوچھے ہتھکنڈوں سے عمران خان کی مقبولیت کو ختم نہیں کرسکتی۔ انہوں نے مزید بتایا کی یہ انتخابی نتائج نہ صرف مریم نواز کی کارکردگی پر سوالیہ نشان ہیں بلکہ ایک زناٹے دار طمانچہ بھی ہیں، مریم نواز کا ترقیاتی سفر صرف ٹک ٹاک ویڈیوز تک محدود ہے عوام نے انتخابات میں ٹک ٹاک منصوبوں کو منہ توڑ جواب دیا ہے، بیرسٹر ڈاکٹرسیف نے کہا کہ جعلی حکومت نے سیالکوٹ انتخابات میں 8 فروری الیکشن کے ریکارڈ بھی توڑ ڈالے۔ ریٹرننگ افسران نے تاریخ کی بدترین دھاندلی کرکے ہارے ہوئے امیدوار کو جتوایا۔ انہوں نے کہا کہ ضمنی انتخابات جعلی حکومت کے خلاف ریفرنڈم تھا اس لئے رات کو نتائج تبدیل کردیئے۔ انہوں نے کہا کہ نتائج تبدیل کرنے سے عمران خان کی مقبولیت کم نہیں کی جاسکتی ہے عمران خان اب بھی عوام کے دلوں کی دھڑکن ہے۔ دھونس دھاندلی سے عمران خان کی مقبولیت نہ کم کی جاسکتی ہے اور نہ ہی عوام کے دلوں سے نکال سکتے ہیں۔ انہوں نے کہا کہ خیبر سے کراچی تک عوام عمران خان کے ساتھ ہیں شریف خاندان صرف دھاندلی سے انتخابات جیت سکتے ہیں ورنہ حقیقت میں وہ انتخابی مہم کے لئے بھی نہیں نکل سکتے ہیں کیونکہ عوام کارکردگی پر ووٹ دیتے ہیں اور انکے پلے کارکردگی نہیں ہے۔

مینگورہ میں مختلف علاقوں سے آئے ہوئے وفود، پاکستان تحریک انصاف کے کارکنان، عہدیداران اور معززین علاقہ سے ملاقاتیں کیں۔ ان ملاقاتوں کا مقصد عوامی مسائل کا براہ راست جائزہ لینا اور ان کے فوری حل کے لیے اقدامات کرنا تھا۔ وفود نے صوبائی وزیر کو مسائل سے آگاہ کیا، صوبائی وزیر نے عوامی مسائل کو غور سے سنا کئی مسائل کے حل کے لیے موقع پر ہی متعلقہ محکموں کو ہدایات جاری کیں، جبکہ بعض معاملات کو ترجیحی بنیادوں پر نمٹانے کے لیے متعلقہ اداروں کو احکامات جاری کر دیے گئے۔ فضل حکیم خان نے اس موقع پر کہا کہ ہم عوامی خدمت کو عبادت سمجھتے ہیں اور ہر ممکن کوشش کر رہے ہیں کہ عوام کو ان کی دہلیز پر بنیادی سہولیات فراہم کی جائیں۔ صوبائی حکومت کا وژن ہے کہ ہر شہری کو اس کا جائز حق ملے اور اس مقصد کے حصول کے لیے دن رات کوشاں ہیں۔ انہوں نے مزید کہا کہ عوامی مسائل کا بروقت اور منصفانہ حل ہماری اولین ترجیح ہے اور اس مقصد کے حصول میں کوئی کوتاہی یا غفلت برداشت نہیں کی جائے گی۔ ہم عوام سے براہ راست رابطے کو اپنی ذمہ داری سمجھتے ہیں تاکہ ان کے مسائل کا فوری ادراک اور حل ممکن بنایا جا سکے۔ صوبائی وزیر نے پاکستان تحریک انصاف کے کارکنان کی خدمات کو سراہتے ہوئے کہا کہ پارٹی کارکنان ہماری طاقت ہیں اور ان کی محنت اور قربانیاں قابل تحسین ہیں ہم ان کے ساتھ شانہ بشانہ کھڑے ہیں اور ان کی ہر ممکن مدد کریں گے۔ ان ملاقاتوں کے دوران عوامی نمائندوں اور کارکنان نے صوبائی وزیر کی عوامی خدمت کے جذبے کو سراہا اور ان کی قیادت پر اعتماد کا اظہار کیا۔

وزیراعلیٰ خیبر پختونخوا کے معاونِ خصوصی برائے مواصلات و تعمیرات محمد سہیل آفریدی کی زیرِ صدارت ایک اہم تعارفی اجلاس گذشتہ روز پشاور میں منعقد ہوا، جس میں محکمہ مواصلات و تعمیرات میں حال ہی میں تعینات کیے گئے سب ڈویژنل آفیسرز نے شرکت کی۔ محمد سہیل آفریدی نے نو تعینات افسران کو خوش آمدید کہا اور ان کی تعیناتی پر دلی مبارکباد پیش کی۔ انہوں نے اس امید کا اظہار کیا کہ ان کی شمولیت سے محکمہ مواصلات و تعمیرات کی کارکردگی میں بہتری آئے گی اور عوام کو بروقت خدمات میسر آئیں گی۔معاونِ خصوصی نے کہا کہ تمام افسران اپنی پیشہ ورانہ ذمہ داریوں کو دیانتداری، خلوص اور تندہی سے ادا کریں۔ انہوں نے مزید کہا کہ محکمانہ ترقی، شفافیت اور سروس ڈلیوری میں بہتری ہم سب کی اولین ترجیح ہونی چاہیے۔ انہوں نے افسران کو یقین دہانی کرائی کہ کسی بھی پیشہ ورانہ مسئلے کی صورت میں وہ ہر ممکن تعاون فراہم کریں گے۔اجلاس کے دوران تمام سب ڈویژنل آفیسرز نے اپنا تعارف پیش کیا اور اپنے فرائض کی ادائیگی میں بھرپور عزم کا اظہار کیا۔ معاون خصوصی نے مزید کہا کہ محکمہ مواصلات و تعمیرات صوبے کی ترقی میں ریڑھ کی ہڈی کی حیثیت رکھتا ہے، اور اس شعبے میں شفافیت، دیانتداری اور محنت کو فروغ دینا وقت کی اہم ضرورت ہے۔

سیاحتی مقام مکھنیال کے معروف ہوٹلز پر چھاپے، زائد المیعاد اشیاء، ناقص صفائی اور غیر تربیت یافتہ عملہ کی موجودگی پر کارروائی
خیبرپختونخوا فوڈ سیفٹی اینڈ حلال فوڈ اتھارٹی نے ہری پور کے سیاحتی مقام مکھنیال میں بڑی کارروائیاں کرتے ہوئے گذشتہ روز معروف ہوٹلوں پر چھاپے مارے، جہاں سے فوڈ سیفٹی کے اصولوں کی سنگین خلاف ورزیاں سامنے آئیں۔ترجمان فوڈ اتھارٹی نے تفصیلات جاری کرتے ہوئے بتایا کہ ہری پور فوڈ سیفٹی ٹیم نے مکھنیال کے علاقے میں معروف ہوٹلوں کے معائنے کئے۔ ایک ہوٹل سے زائدالمیعاد سموسہ رولز برآمد ہوئے جبکہ اشیائے خوردونوش کی پیکنگ میں اخباری کاغذ کا استعمال اور بغیر میڈیکل سرٹیفکیٹ ملازمین کی موجودگی بھی پائی گئی، جس پر بھاری جرمانے عائد کیے گئے۔اسی طرح ایک اور بڑے ہوٹل سے زائدالمیعاد روٹیاں، بنز، گوشت، جوس اور شربت پکڑے گئے۔ کچن میں حشرات کی بھرمار پر حفظانِ صحت کے اصولوں کی شدید خلاف ورزی پر کچن کو فوری طور پر سیل کر دیا گیا۔ کارروائیوں کا مقصد سیاحتی مقامات پر خوراک کے معیار کو یقینی بنانا اور عوام کو صحت بخش اشیائے خورد و نوش فراہم کرنا ہے۔ ڈائریکٹر جنرل فوڈ اتھارٹی نے انسپکشن ٹیم کی کارکردگی کو سراہا اور کہا کہ سیاحتی مقامات پر ہوٹلوں کی مسلسل نگرانی کی جا رہی ہے تاکہ عوام کو محفوظ اور معیاری خوراک فراہم کیاجا سکے۔وزیر خوراک خیبرپختونخوا ظاہر شاہ طورو نے کہا ہے کہ سیاحوں اور مقامی افراد کو معیاری اور صحت بخش خوراک کی فراہمی حکومت کی اولین ترجیح ہے اور اس سلسلے میں تمام وسائل بروئے کار لائے جا رہے ہیں۔

بانی چیئرمین عمران خان کے وژن اور وزیراعلیٰ خیبرپختونخوا کی ہدایت پر اینٹی کرپشن خیبرپختونخوا کی ماہانہ کھلی کچہریوں کے انعقاد کا سلسلہ جاری ہے۔ اس سلسلے میں وزیراعلیٰ خیبرپختونخوا کے مشیر برائے اینٹی کرپشن مصدق عباسی کی زیر صدارت 3 جون بروز منگل صبح 11 بجے ڈائریکٹریٹ اینٹی کرپشن اسٹیبلشمنٹ حیات آباد پشاور میں ماہانہ کھلی کچہری کا انعقاد کیا جارہاہے۔ اسی طرح تمام ریجنل اسسٹنٹ ڈائریکٹرز اپنے دفاتر میں کھلی کچہری کا انعقاد کریں گے۔ عوام اپنی شکایات ان کھلی کچہریوں میں اینٹی کرپشن خیبرپختونخوا کے حکام کے سامنے پیش کریں۔

نجینئرطارق سدوزئی کا سوات میں پن بجلی منصوبوں کے مقامات کا دورہ،جاری کام تیزکرنے پرزوردیا
وزیراعلیٰ خیبرپختونخواکے معاون خصوصی برائے توانائی انجینئرطارق سدوزئی نے عالمی بینک کے مالی تعاون سے ضلع سوات میں جاری88میگاواٹ گبرال کالام اور157میگاواٹ مدین پن بجلی منصوبوں کے مقامات کادورہ کیاجہاں انہوں نے منصوبے کے مختلف حصوں کا باریک بینی سے جائزہ لیا۔انہوں نے حکام پرزوردیا کہ عوامی مفاد کے جاری منصوبوں کی بروقت تکمیل صوبائی حکومت کی اولین ترجیح ہے۔ اس موقع پر پراجیکٹ ڈائریکٹر سمیت پی ایم اوکے سربراہ چیف انجینئر نے منصوبے پر ہونے والی پیش رفت کے بارے میں جامع بریفنگ دی۔معاون خصوصی نے منصوبوں کے لے آوٹ اورڈیزائن کے بارے میں پراجیکٹ حکام کو ضروری ہدایات جاری کیں اورآئندہ برفباری کے موسم شروع ہونے سے پہلے سول ورک پرکام تیز کرنے پر زوردیا۔بعدازاں انہوں نے گبرال کالام کی زیرتعمیر کالونی کا بھی معائنہ کیا اوروہاں پرجاری کام پر اطمینان کا اظہارکیا جبکہ باقی ماندہ کام جلدازجلد مکمل کرنے پرزوردیا۔

وزیراعلیٰ خیبرپختونخوا علی امین گنڈاپور کی جانب سے پاکستان کی میگا پولو فیسٹیول شندور2025 کی تاریخ 20 جون مقرر کردی گئی ہے۔ا سلسلے میں مشیر برائے سیاحت و ثقافت، آثار قدیمہ و عجائب گھر، زاہد چن زیب نے تمام تیاریوں کو حتمی شکل دینے کی ہدایت جاری کردی ہے۔ یہ فیسٹیول 20 سے 22 جون تک اپر چترال میں منعقد ہوگا۔زاہد چن زیب نے فیسٹیول کے کامیاب انعقاد کو یقینی بنانے پر زور دیا اور ڈی جی کلچر اینڈ ٹورازم اتھارٹی کو ہدایت کی کہ فیسٹیول میں آنے والے سیاحوں کو ہر ممکن سہولیات کی فراہمی یقینی بنائی جائے۔ انہوں نے فیسٹیول کی آگاہی مہم ابھی سے شروع کرنے کی اہمیت پر بھی زور دیا تاکہ ملکی اور غیر ملکی سیاحوں کو آگاہ کیا جا سکے۔مشیر سیاحت نے فیسٹیول کے حوالے سے اپنے خیالات کا اظہار کرتے ہوئے کہا کہ شندور پولو فیسٹیول نہ صرف ایک کھیل کا مقابلہ ہے بلکہ یہ علاقہ کی ثقافت اور روایات کا بھی عکاس ہے۔ اس فیسٹیول میں چترال لوئر اور چترال اپر کی ٹیمیں گلگت بلتستان کی ٹیموں کے ساتھ مدمقابل ہوں گی، جو کھیل اور بھائی چارے کا ایک شاندار منظر پیش کرے گا۔ڈی جی کلچر اینڈ ٹورازم اتھارٹی نے کہا کہ یہ فیسٹیول پاک فوج، کلچر اینڈ ٹورازم اتھارٹی، ضلعی انتظامیہ چترال لوئر و اپر، پولیس اور چترال سکاؤٹس کے باہمی اشتراک سے منعقد کیا جائے گا۔شندور پولو فیسٹیول، جو اپنی بلند ترین پولو گراؤنڈ کے لیے مشہور ہے، ہر سال ہزاروں سیاحوں کو اپنی جانب راغب کرتا ہے اور اس سال بھی اس میں اضافہ متوقع ہے۔ صوبائی حکومت اس فیسٹیول کو فروغ دینے اور صوبے میں سیاحت کو بڑھانے کے لیے پرعزم ہے

خیبرپختونخوا کے وزیر زراعت میجر (ر) محمد سجاد بارکوال اور چیئرمین ڈیڈاک کرک ایم پی اے خورشید خٹک نے ایک ارب روپے سے زائد لاگت کے کرک سیف سٹی پراجیکٹ کو آئندہ مالی سال کے اے ڈی پی کی سفارشات میں باقاعدہ طور پر شامل کرنے پر تمام خٹک زینہ کی جانب سے وزیر اعلیٰ سردار علی امین خان گنڈاپور کا تہہ دل سے شکریہ ادا کرتے ہوئے کہا ہے کہ اس اہم پراجیکٹ کی تکمیل سے امن و امان سمیت کرک سٹی کے ماحول اور دیگر اہم ایشوز پر اچھے اثرات مرتب ہوں گے۔منصوبے میں پورے کرک سٹی، تنگوڑی چوک، کے ڈی اے، نیا بننے والا بائی پاس اور کالج سمیت بنیادی اہمیت کے حامل تمام پاکٹس شامل ہوں گے۔انہوں نے کہا کہ اس اہم پراجیکٹ پر پوری قوم قائد عوام عمران خان اور وزیر اعلی خیبرپختونخوا کی بیحد مشکور ہے۔دریں اثناء وزیر زراعت نے عوام کو خوشخبری دی کہ وزیر اعلیٰ نے صحت و خزانہ کے محکموں کو بی ایچ یو منڈوہ اور بی ایچ یو شاہیدان کی باقاعدہ ایس این ای کی منظوری سمیت تمام لوازمات پورا کرنے اور فوری طور پر فعال کرنے کے احکامات بھی جاری کر دیئے ہیں۔اسی طرح چیئرمین ڈیڈاک و ایم پی اے خورشید خٹک اور ایم این اے شاہد خٹک کی خصوصی ہدایات پر صابر آباد اور مخ بانڈہ واٹر سپلائی سکیموں پرسولرائزیشن کا کام مکمل ہو چکا ہے اور بہت جلد ان سکیموں سے متعلقہ علاقوں کو پینے کے پانی کی فراہمی شروع ہو جائے گی جو یہاں کے عوام کا دیرینہ مطالبہ تھا۔