چیف سیکرٹری خیبرپختونخوا / انسدادِ پولیو مہم کا آغاز

چیف سیکرٹری خیبرپختونخوا ندیم اسلم چوہدری نے پولیس سروسز ہسپتال پشاور میں علی الصبح بچوں کو انسدادِ پولیو کے قطرے پلا کر سات روزہ انسدادِ پولیو مہم کا باقاعدہ آغاز کیا۔ اس موقع پر سیکرٹری صحت خیبرپختونخوا عادل شاہ، کمشنر پشاور ڈویژن ریاض محسود، ڈپٹی کمشنر پشاور سرمد سلیم اکرم اور دیگر حکام بھی موجود تھے۔ میڈیا سے گفتگو کرتے ہوئے چیف سیکرٹری نے کہا کہ بدقسمتی سے خیبرپختونخوا میں اب تک پولیو کے 18 کیسز رپورٹ ہو چکے ہیں۔ مختلف وجوہات کی بناء پر کافی تعداد میں بچے حفاظتی ویکسین سے محروم رہ جاتے ہیں، جس کے نتیجے میں مزید کیسز سامنے آ رہے ہیں۔ ان وجوہات میں ایک بنیادی مسئلہ بعض والدین کی جانب سے اپنے بچوں کو انسدادِ پولیو کے قطرے نہ پلانا ہے۔ انہوں نے مزید کہا کہ والدین کی سہولت کے لئے گھر گھر مہم کے ساتھ ساتھ تمام ہسپتالوں میں انسدادِ پولیو ویکسین کی دستیابی یقینی بنائی گئی ہے تاکہ والدین اس سہولت سے فائدہ اٹھا سکیں۔ چیف سیکرٹری خیبرپختونخوا نے والدین سے اپیل کی کہ وہ سات روزہ مہم کے دوران پولیو ٹیموں کے ساتھ بھرپور تعاون کریں اور تمام بچوں کو پولیو سے بچاؤ کے قطرے پلانے میں اپنا قومی فریضہ ادا کریں۔ انہوں نے کہا کہ ملک سے پولیو وائرس کا خاتمہ صرف مشترکہ اور بھرپور کوششوں سے ہی ممکن بنایا جا سکتا ہے۔ دریں اثناء چیف سیکرٹری خیبرپختونخوا آفس میں ایک اجلاس منعقد ہوا جس کی صدارت چیف سیکرٹری ندیم اسلم چوہدری اور وفاقی سیکرٹری صحت ندیم محبوب نے کی. اس اجلاس میں خیبرپختونخوا میں انسداد پولیو اقدامات کا مفصل جائزہ لیا گیا۔