بیرسٹر ڈاکٹر سیف کا عطا تارڑ کے بیان پر ردعمل

وزیر اعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے کہا ہے کہ وفاقی وزیرعطا تارڑ ہر روز کوئی نہ کوئی ایسی بات کرجاتے ہیں جس سے انکی نااہلی عیاں ہوجاتی ہیں گزشتہ روز خیبر پختونخوا کی معیشت پر بات کرکے بڑے بڑے معیشت دانوں کی انہوں نے ہنسی نکال دی۔ عطا تارڑ نے وفاقی حکومت کا وائٹ پیپر کاپی کرکے خیبر پختونخوا کے کھاتے میں ڈال دیاہے۔ خیبر پختونخوا کے قرضے وفاق کے مقابلے میں اونٹ کے منہ میں زیرے کے برابر بھی نہیں ہیں۔ بیرسٹر ڈاکٹر سیف نے کہا کہ خیبر پختونخوا کا کل قرضہ 725 ارب روپے ہے جبکہ وفاقی حکومت ہر مہینے اتنا ہی قرض لیتی ہے شہباز شریف کے صرف دو سالہ اقتدار میں پاکستان کا قرضہ 27 ہزار ارب روپے بڑھا ہے خیبر پختونخوا کا قرض بھی وفاقی حکومت کی نااہلی کی وجہ سے بڑھا ہے۔ انہوں نے کہا کہ جعلی حکومت کے دور حکومت میں روپے کی قدر کم ہوئی ہے اور فارن کرنسی کی بڑھی ہے اس وجہ سے تقریبا ساڑھے تین سو ارب روپے قرضہ بڑھا ہے ورنہ صوبے کا ٹوٹل قرضہ آج 400 ارب روپے ہوتا۔ بیرسٹر ڈاکٹر سیف نے مزید کہا کہ عطا تارڑ بیک وقت دو نوکریاں کر رہے ہیں اور وہ شہباز اور مریم نواز دونوں کی نااہلیاں چھپاتے پھر رہے ہیں۔ بیرسٹر ڈاکٹر سیف نے مزید کہا کہ خیبر پختونخوا میں صحافیوں کے خلاف کاروائی کی بات بھی مضحکہ خیز ہے، صحافی تو اسلام آباد میں محفوظ نہیں ہیں مطیع اللہ جان کی مثال سب کے سامنے ہے جعلی حکومت کی فسطائیت کیوجہ سے صحافی باہر ممالک میں مقیم ہیں۔گزشتہ نو مہینوں میں صحت کارڈ پر 7 لاکھ 80 ہزار سے زائد مریضوں کا علاج ہوچکا ہے۔انہوں نے کہا کہ یونیورسٹیوں کے چانسلر وزیر اعلیٰ کو اس لئے بنایا گیاہے کہ گورنر وائس چانسلرز کی تعیناتی میں روڑے اٹکا رہے تھے۔سوشل میڈیا پر اربوں خرچ کرنے والی بات مریم نواز کی حد تک ٹھیک ہوسکتی ہے خیبر پختونخوا میں ایسا کچھ نہیں ہے۔ گزشتہ نگراں حکومت نے سوشل میڈیا کے حوالے سے بہت کوشش کی مگر کچھ ہاتھ نہیں آیا تھا۔