پی ٹی آئی کے خلاف واویلا کرنے والی حکومت پہلے اپنی جماعت کے صدر سے مودی کے خلاف بیان دلوائے۔ بیرسٹر ڈاکٹرسیف

وزیر اعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے وفاقی حکومت میں حکمران جماعت سے کہا ہے کہ وہ پی ٹی آئی کے خلاف واویلا کرنے کی بجائے پہلے اپنی جماعت کے صدر نوازشریف سے مودی کے خلاف بیان دلوائے اپنے ایک بیان میں بیرسٹر ڈاکٹر سیف نے کہا کہ نوازشریف وضاحت کریں کہ مودی ان کی کمزوری ہے یا مجبوری، جاتی عمرا میں دعوت کھانے والے کشمیریوں کے قاتل مودی کے خلاف نواز شریف بیان دینے سے کترا رہے ہیں۔مشیر اطلاعات نے مزید کہا کہ عوام اور فوج بھارت کے خلاف متحد اور ایک پیج پر ہیں جبکہ موجودہ صورتحال میں مودی کے خلاف نوازشریف کی خاموشی اس بات کا ثبوت ہے کہ نواز شریف اور مودی ایک پیج پر ہیں اور مودی کے خلاف نہ بولنے کا مطلب یہ ہے کہ بھارت کے خلاف متحد پاکستانی قوم کی نوازشریف اور اس کے طرف دار حوصلہ شکنی کی کوشش کر رہے ہیں۔ انہوں نے واضح کیا کہ پی ٹی آئی اور فوج مودی کے خلاف ایک پیج پر ہیں۔