تعلیمی سال 2025-26 میں خیبر پختونخوا کے ضم شدہ اضلاع کے طلباء و طالبات کے لیے میڈیکل و ڈینٹل کالجز میں مختص کوٹے کی پالیسی کے حوالے سے اسٹینڈنگ کمیٹی آف دی کیبنٹ کا اہم اجلاس صوبائی وزیر قانون، پارلیمانی امور و انسانی حقوق آفتاب عالم ایڈووکیٹ کی زیر صدارت محکمہ داخلہ کے کمیٹی روم میں منعقد ہوا۔ اجلاس ایم این اے اپر اورکزئی، ایم پی اے لوئر جنوبی وزیرستان، ایم پی اے اپر جنوبی وزیرستان اور محکمہ ہوم اینڈ ٹرائبل افیئرز کے اعلیٰ حکام نے شرکت کی۔اجلاس میں میڈیکل و ڈینٹل کالجز میں ضم اضلاع کے امیدوار طلباء کے موجودہ کوٹہ پالیسی کے پس منظر اور اس کے عملی اثرات پر تفصیلی غور و خوض کیا گیا۔اجلاس کو بریفنگ دیتے ہوئے بتایا گیا کہ سابقہ فاٹا کے خیبر پختونخوا میں انضمام سے قبل میڈیکل و ڈینٹل کالجز میں مختص نشستوں کی نامزدگی وفاقی سطح پر عمل میں آتی تھی جبکہ انضمام کے بعد یہ اختیار صوبائی حکومت کو منتقل ہوا۔ اس ضمن میں کوٹہ پالیسی کو دو ہزار اٹھائیس تک توسیع دی جا چکی ہے۔اجلاس میں نئے اضلاع کی قیام کے بعد میڈیکل و ڈینٹل کالجز میں ضم شدہ اضلاع کے امیدواروں کے لیے نشستوں کی تقسیم کی پالیسی پر تفصیلی غور خوض کیا گیا۔وزیر قانون آفتاب عالم ایڈووکیٹ نے اجلاس سے خطاب کرتے ہوئے کہا کہ ضم شدہ اضلاع کے نوجوان انتہائی باصلاحیت ہیں اور حکومت ان کو میڈیکل و ڈینٹل تعلیم میں مساوی مواقع فراہم کرنے کے لیے پرعزم ہے۔ انہوں نے کہا کہ کوٹہ پالیسی کی تشکیل میں آئینی تقاضوں، عدالتی احکامات، قانونی پہلوؤں اور زمینی حقائق کو ملحوظ خاطر رکھا جائے گا تاکہ شفافیت اور میرٹ پر کوئی سمجھوتہ نہ ہو۔ انہوں نے اس بات پر زور دیا کہ ضم شدہ اضلاع کو قومی دھارے میں لانے کے لیے تعلیم بالخصوص پیشہ ورانہ تعلیم کلیدی حیثیت رکھتی ہے۔اجلاس میں فیصلہ کیا گیا کہ کمیٹی کی سفارشات کو حتمی شکل دے کر کابینہ کے سامنے پیش کیا جائے گا تاکہ تعلیمی سال دو ہزار پچیس چھبیس کے داخلہ عمل کو بروقت اور بغیر کسی ابہام کے مکمل کیا جا سکے۔ وزیر قانون نے اس عزم کا اعادہ کیا کہ صوبائی حکومت ضم شدہ اضلاع کے عوام اور نوجوانوں کی تعلیمی ترقی اور فلاح و بہبود کے لیے ہر ممکن اقدامات جاری رکھے گی۔

رائٹ ٹو پبلک سروسز کمیشن میں چھ عوامی شکایات کی شنوائی ہوئی۔ چیف کمشنر محمد علی شہزادہ اور کمشنر ذاکر حسین آفریدی نے شہریوں کی درخواستوں پر سماعت کی۔ ارشد اقبال نے بنوں سے ایف آئی آر کے اندراج کے لیے کمیشن کو درخواست دی تھی۔ کمیشن نے اس حوالے سے رپورٹ طلب کی تھی۔ مقررہ وقت میں تحریری جواب نہ دینے پر متعلقہ افسران سے رپورٹ طلب کر لی گئی۔ ایبٹ آباد سے بلال خان نے عمارتی نقشے کی منظوری کے لیے کمیشن سے رجوع کیا ہے۔ کمیشن نے ٹی ایم او سے رپورٹ طلب کر لی۔ جنوبی وزیرستان سے نوشاد نے پولیس تصدیق سرٹیفکیٹ کے لیے کمیشن کو درخواست دی ہے۔ مقررہ وقت گزرنے کے باوجود سرٹیفیکٹ کا اجراء نہ کرنے پر رپورٹ طلب کرلی گئی۔ بونیر سے محمد عارف نے تعلیمی دستاویزات میں تاریخ پیدائش اور نام کی تبدیلی کے لیے کمیشن کو درخواست دی ہے۔ شہری نے بتایا کہ عدالتی ڈگری ہونے کے باوجود انکا کا مسئلہ نہیں کیا جا رہا۔ کمیشن نے بورڈ آف انٹر میڈیٹ اینڈ سیکنڈری ایجوکیشن کے افسران سے تفصیلی
رپورٹ طلب کرلی۔ نوشہرہ سے شاہ فہد نے ایف آئی آر کے اندراج کے لیے کمیشن کو درخواست دی تھی۔ کمیشن نے ڈی پی او کو شہری کی ایف آئی آر درج کرنے کے احکامات جاری کیے تھے۔ کمیشن نے ڈی پی او کو یاد دہانی نوٹس جاری کرتے ہوئے لکھا کہ احکامات پر عمل کر کے کمیشن کو آگاہ کیا جائے۔ مانسہرہ سے علی خان نے ڈاکٹر کے خلاف غفلت برتنے پر ایف آئی آر کے اندراج کے لیے کمیشن سے رجوع کیا تھا۔ ڈی پی او نے کمیشن کو لکھا کہ چونکہ کیس ہیلتھ کیئر کمیشن کے زمرے میں اتا ہے، جو کہ اس بارے میں انکوائری کر رہا ہے۔ کمیشن نے شہری کو ہیلتھ کیئر کمیشن کے رپورٹ تک انتظار کرنے کا مشورہ دیا۔ کمیشن نے ڈی پی او کی رپورٹ سے اتفاق کرتے ہوئے فیصلہ سنا دیا۔ کمیشن نے سرکاری افسران کو عوام کی ضروریات کو مؤثر طریقے سے پورا کرنے اور خدمات کی فراہمی کے عمل کو بہتر بنانے پر زور دیا۔ بنیادی خدمات کا حصول عوام کا حق ہے نا کہ ان پر حکومت کا احسان۔

خیبر پختونخوا اسمبلی کی قائمہ کمیٹی برائے اوقاف، حج، مذہبی اور اقلیتی امور کا اجلاس بروز پیر صوبائی اسمبلی کے رحمان بابا ھال سیکرٹریٹ پشاور میں منعقد ہوا۔ اجلاس کی صدارت کمیٹی کے چیئرمین و رکن صوبائی اسمبلی جناب اعجاز محمد نے کی۔ اجلاس میں ”پختونخوا انڈومنٹ فنڈ (کالاش کمیونٹی) بل، 2025“ کا تفصیلی جائزہ لیا گیا، جسے ایوان نے 8 دسمبر 2025 کے اجلاس میں قائمہ کمیٹی کے سپرد کیا تھا۔اجلاس میں کمیٹی کے اراکین صوبائی اسمبلی اور وزیر قانون آفتاب عالم، عدنان خان، گرپال سنگھ، شازیہ تہماس خان، ریحانہ اسماعیل، عسکر پرویز، سریش کمار اور بیری لال نے شرکت کی۔ اجلاس کا بنیادی مقصد مجوزہ قانون سازی کا باریک بینی سے جائزہ لیتے ہوئے اقلیتی برادری، بالخصوص کالاش کمیونٹی کی فلاح و بہبود کے لیے مؤثر اور موزوں سفارشات مرتب کرنا تھا۔ اس موقع پر متعلقہ محکموں کے افسران نے کمیٹی کو بل کے مختلف انتظامی اور قانونی پہلوؤں پر تفصیلی بریفنگ دی۔خصوصی دعوت پر سابق فوکل پرسن برائے اقلیتی امور وزیرزادہ نے بھی اجلاس میں شرکت کی اور کالاش کمیونٹی کی ضروریات اور دیرپا فلاحی اقدامات سے متعلق اپنی تجاویز پیش کیں، جنہیں کمیٹی نے سراہا۔ اجلاس کے دوران کمیٹی کو آگاہ کیا گیا کہ انڈومنٹ فنڈ کی رقم 50 ملین روپے سے بڑھا کر 100 ملین روپے کر دی گئی ہے۔ وزیر قانون نے تجویز دی کہ انڈومنٹ فنڈ سے خرچ ہونے والی رقم کی تفصیلات ششماہی بنیادوں پر قائمہ کمیٹی کے سامنے پیش کی جانی چاہیے- کمیٹی نے اس امید کا اظہار کیا کہ بل کی منظوری سے اقلیتی برادری کے تحفظ کو یقینی بنایا جا سکے گا اور ان کی سماجی، ثقافتی اور معاشرتی ترقی کے لیے ٹھوس اقدامات ممکن ہوں گے۔ قائمہ کمیٹی اپنی سفارشات مرتب کرنے کے بعد بل کا حتمی مسودہ ایوان میں پیش کرے گی۔

محکمہ ایکسائز و ٹیکسیشن اور نارکوٹکس کنٹرول خیبرپختونخوا کی جانب سے خیبر اور پشاور کے اضلاع میں مختلف کارروائیوں کے دوران بھاری مقدار میں منشیات، نشہ آور گولیاں اور جعلی کرنسی برآمد کر لی گئی۔ کارروائیوں میں مرکزی ملزم سمیت متعدد افراد کو گرفتار کر کے متعلقہ تھانوں میں مقدمات درج کر لیے گئے۔انسداد منشیات کے حوالے سیصوبائی حکومت کی زیروٹالرنس پالیسی اور وزیر ایکسائز و ٹیکسیشن اور نارکوٹکس کنٹرول سید فخرجہان کے ہدایات کی روشنی میں محکمہ کی جانب سے جاری کاروائیوں کے تسلسل میں تھانہ ایکسائز پشاور کے ایس ایچ او ڈاکٹر حمیداللہ خان کی نگرانی میں سید شیر شاہ انسپکٹر اور دیگر اہلکاروں نے باڑہ روڈ پر ناکہ بندی کے دوران ایک موٹر سائیکل سوار کو روک کر تلاشی لی، جس کے نتیجے میں 3600 گرام چرس برآمد ہوئی۔ایکسائز پولیس کے مطابق ملزم نے فرار ہونے کی کوشش کی تاہم اسے موقع پر قابو کر لیا گیا۔ واقعے کا مقدمہ تھانہ ایکسائز پشاور میں درج کر کے مزید تفتیش شروع کر دی گئی ہے۔دوسری کارروائی میں تھانہ ایکسائز خیبر کی ٹیم نے کارخانوں چیک پوسٹ کے قریب منشیات سمگلنگ کی کوشش ناکام بناتے ہوئے 2400 گرام چرس برآمد کر لی۔ محکمہ کے مطابق ملزم کو گرفتار کر کے قانونی کارروائی کا آغاز کر دیا گیا ہے۔اسی طرح تھانہ ایکسائز خیبر میں درج علت نمبر 25/23 میں مزید پیش رفت سامنے آئی ہے۔ محکمہ ایکسائز کے مطابق مورخہ 6 دسمبر 2025 کو فیصل خان سرکل آفیسر کی سربراہی اور ماجد حسین ایس ایچ او تھانہ ایکسائز خیبر کی قیادت میں کارخانوں مارکیٹ پشاور میں ایک دکان پر چھاپہ مارا گیا تھا، جہاں سے 208 عدد نشہ آور گولیاں (187 گرام) برآمد کر کے ایک سہولت کار کو گرفتار کیا گیا تھا۔ بعد ازاں تفتیش کے دوران اس مقدمے میں مطلوب مرکزی ملزم آصف ولد عبدالکریم کو بھی گرفتار کر لیا گیا ہے۔کارخانوں پھاٹک، خیبر کے حدود میں بیورو آف انٹیلیجنس اینڈ انویسٹیگیشن کے پراوینشل انچارج سعود خان گنڈاپور کی نگرانی میں فخر عالم خان انسپکٹر نے خفیہ اطلاع پر کارروائی کرتے ہوئے لاہور کے رہائشی نوجوان حمزہ شریف ولد شریف کو گرفتار کیا جس کے قبضے سے 240 عدد نشہ آور ایچ ٹی سی گولیاں (153 گرام) برآمد ہوئیں۔ ملزم کے خلاف مقدمہ درج کر لیا گیا ہے۔اسی طرح ایک اور کارروائی میں تھانہ ایکسائز خیبر کے ایس ایچ او ماجد حسین کی قیادت میں ٹیم نے دوران ناکہ بندی ایک مشتبہ شخص کو حراست میں لے کر تلاشی لی، جس کے دوران ایک لاکھ روپے کی جعلی کرنسی برآمد ہوئی۔ بعد ازاں ملزم کو مزید قانونی کارروائی کیلئے جمرود کے متعلقہ پولیس اسٹیشن کے حوالے کر
دیاگیا۔

وزیراعلیٰ خیبر پختونخوا کے معاونِ خصوصی برائے اطلاعات و تعلقات عامہ شفیع جان نے کہا ہے کہ جیل میں ناحق قید اپنے قائد عمران خان کو آئینی، قانونی اور پرامن سیاسی جدوجہد کے ذریعے رہا کر کے عوام کے ووٹ کی طاقت سے ایک بار پھر وزیراعظم بنائینگے، اگر پاکستان تحریک انصاف پر پابندی لگائی گئی یا مسلم امہ کے مقبول لیڈر عمران خان پر غداری کے مقدمات قائم کرنے کی کوشش کی گئی تو خیبرپختونخوا سمیت پوری قوم عمران خان کی شانہ بشانہ ڈٹ کر کھڑی ہوگی۔ معاون خصوصی نے کہا کہ پاکستان تحریک انصاف ایک سیاسی جماعت ہے جو جمہوری اقدار پر یقین رکھتی ہے، ملک کی سب سے بڑی سیاسی پارٹی کو دیوار سے نہ لگایا جائے، انہوں نے کہا کہ آج کوہاٹ نے اپنا اختیار وزیراعلیٰ محمد سہیل آفریدی کو دے دیا ہے، ایک کامیاب عوامی جلسے نے ایک بار پھر ثابت کیا ہے کہ کوہاٹ پاکستان تحریک انصاف کا مضبوط گڑھ ہے اور کامیاب جلسہ عوام کا پی ٹی آئی پر بھرپور اعتماد اور مقبولیت کا مظہر ہے۔ کوہاٹ جلسے سے خطاب او بعد ازاں میڈیا سے بات چیت میں انہوں نے کہا کہ خیبر پختونخوا کے عوام نوجوان وزیراعلیٰ محمد سہیل آفریدی کے ساتھ کھڑے ہیں جبکہ پوری قوم کی نظریں بانی چیئرمین عمران خان پر مرکوز ہیں، انہوں نے کہا کہ کوہاٹ کے غیور عوام نے ایک بار پھر یہ ثابت کر دیا ہے کہ عمران خان کا جلسہ ہو یا وزیراعلیٰ محمد سہیل آفریدی کا، کوہاٹ پاکستان تحریک انصاف کا گڑھ تھا، ہے اور رہے گا۔ شفیع جان نے پنجاب اور وفاق میں مسلم لیگ (ن) کی حکومتوں کو تنقید کا نشانہ بناتے ہوئے کہا ہے کہ مینڈیٹ چور پنجاب حکومت نے ملک کے سب سے مقبول سیاسی لیڈر عمران خان کو قید میں ‘تنہائی’ میں رکھا ہوا ہے،مسلم لیگ ن کی کٹھ پتلی حکومت عوامی مینڈیٹ چوری کر کے عوام کے فیصلے کا احترام کرنا نہیں جانتی، مسلم لیگ ن کی حکومت نے عوام کو مہنگائی، بیروزگاری اور بدحالی کے سوا کچھ نہیں دیا، نااہل وفاقی حکومت عوامی مسائل حل کرنے میں مکمل طور پر ناکام ہوچکی ہے۔ نوجوان وزیراعلی محمد سہیل آفریدی کی گورننس دیگر صوبوں کے لئے قابل تقلید ہے، شفیع جان نے جلسے میں بھرپور شرکت پر کوہاٹ کے عوام کے جذبے اور جوش و خروش کو سراہا اور انکا شکریہ ادا کیا ہے۔

خیبرپختونخوا کے وزیر ایکسائز و ٹیکسیشن اور نارکوٹکس کنٹرول سید فخرجہان نے کہا ہے کہ عوام کو درپیش بنیادی مسائل کا ازالہ کرنا اور انھیں سہولیات و ریلیف فراہم کرنا صوبائی حکومت کی اولین ترجیح ہے۔ انہوں نے کہا کہ بانی چیئرمین عمران خان کے ویژن کے تحت وزیر اعلیٰ خیبرپختونخوا محمد سہیل آفریدی کی متحرک قیادت میں صوبائی حکومت عوامی خوشحالی، شفاف طرزِ حکمرانی اور پائیدار ترقی کے ایجنڈے پر عمل پیرا ہے جسکا مقصد عوامی بنیادی ضروریات اور مسائل کو ترجیحی بنیادوں پر حل کرنا ہے۔وہ حلقہ نیابت پی کے 26 بونیر کا دورہ کرنے کے سلسلے میں اتوار کے روز پبلک ڈے کے موقع پر اپنی رہائش گاہ پر عوامی وفود سے ملاقاتیں کر رہے تھے۔ اس موقع پر پی کے 26 اور ضلع بونیر کے دیگر علاقوں سے تعلق رکھنے والے مختلف وفود نے صوبائی وزیر سے ملاقاتیں کیں اور انہیں درپیش مسائل کے حوالے سے اپنے معروضات پیش کیئے۔صوبائی وزیر نے عوام کی باتیں نہایت توجہ سے سنیں اور متعدد مسائل کے فوری حل کے لیے متعلقہ محکموں اور افسران کو موقع پر ہی واضح احکامات جاری کیے۔ سید فخرجہان نے کہا کہ عوامی مسائل میں تاخیر یا غفلت کسی صورت برداشت نہیں کی جائے گی اور تمام متعلقہ ادارے عوامی خدمت کے جذبے کے تحت اپنی ذمہ داریاں نبھائیں۔انہوں نے کہا کہ پبلک ڈے کا مقصد عوام اور حکومت کے درمیان براہِ راست رابطے کو فروغ دینا ہے تاکہ لوگوں کے مسائل بلاواسطہ سن کر فوری اور مؤثر اقدامات کیے جا سکیں۔انھوں نے متعلقہ حکام کو ہدایت کی کہ عوامی مسائل کے حل میں تیزی لائی جائے۔سید فخرجہان نے اس عزم کا اعادہ کیا کہ صوبائی حکومت عوامی خدمت اور ترقیاتی عمل کو مزید مؤثر بنانے کے لیے ہر ممکن اقدامات جاری رکھے گی اور اس سلسلے میں کسی بھی پہلو سے محکموں کی جانب سے تاخیر نہیں ہونی چاہیئے۔انھوں نے کہا کہ صوبے اور بونیر کے عوام کی خدمت ان کی ذمہ داری ہے اور بطور عوامی نمائندہ وہ اپنے عوام کی ترقی اور خوشحالی کیلئے ہر ممکن قدم اٹھائیں گے۔

مشیر خزانہ خیبرپختونخوا مزمل اسلم نے 2025 کے اختتام کے ساتھ ملکی معیشت سے متعلق اہم بیان جاری کرتے ہوئے کہا ہے کہ شہباز شریف پچھلے 22 ماہ میں 38 بیرونی دورے کر چکے ہیں اور آج کل بھی ترکمانستان میں ہیں اسی طرح شہباز شریف نے اوسطاً ایک ماہ میں دو بیرونی دورے کیے ہیں۔ ان خیالات کا اظہار مشیر خزانہ خیبرپختونخوا مزمل اسلم نے ویڈیو بیان جاری کرتے ہوئے کیا۔ مزمل اسلم نے کہا کہ شہباز شریف نے وعدہ کیا تھا کہ 100 ارب ڈالر کی سرمایہ کاری لائیں گے لیکن بیرونی سرمایہ کاری صفر ہے۔ مشیر خزانہ خیبرپختونخوا نے کہا کہ 2025 کے اختتام کے ساتھ پاکستان دنیا سے مزید پیچھے ہو گیا ہے اور ملکی معاشی حالت وینٹیلیٹر سے بھی نازک صورتحال میں ہے۔ مشیر خزانہ خیبرپختونخوا نے کہا کہ رواں سال 21 سالوں میں ملک میں سب سے زیادہ بے روزگاری کے ساتھ اختتام پزیر ہو رہا ہے رواں سال 78 سالوں کی سب سے زیادہ غربت کے ساتھ حتم ہو رہا ہے۔ مزمل اسلم نے کہا کہ پاکستان کی شرح نمو مسلسل کم ہو رہی ہے۔ پی ڈی ایم حکومت مسلسل 5 سے 6 فیصد جی ڈی پی کے دعوے کرتی رہی۔ مزمل اسلم نے کہا کہ حکومت بیچ میں اڑان پاکستان جیسے شوشے چھوڑتی ہے جبکہ کارکردگی صفر ہے اور نواز شریف کہہ رہے ہیں کہ پاکستان اڑان اڑ چکا ہے بلکل پاکستان غربت، بے روزگاری کی اڑان اڑ چکا ہے۔ مزمل اسلم نے کہا کہ ملک کی برآمدات کم ہو رہی ہے نومبر کی برآمدات صرف 2.4 ارب ڈالر ہے۔ مزمل اسلم نے کہا جون میں مہنگائی مزید زیادہ 8.9 فیصد ہو جائے گی اور حکومت کو ٹیکس کلیکشن میں ابھی تک 422 ارب روپے کا شارٹ فال ہے کم ٹیکس کلیکشن کی وجہ سے مزید ٹیکس لگائے جائیں گے۔ مزمل اسلم نے کہا کہ حکومت کی ناقص پالیسیوں کی سزا ایک دفعہ پھر عوام کو دی جا رہی ہے اور ملک میں تمام اشیاء پر سیلز ٹیکس 18 فیصد تک کیا جائے گا۔ سیلز ٹیکس ابھی ملک میں مختلف اشیاء پر مختلف ہے کسی چیز پر 8 فیصد ہے کسی پر 15 اور 25 بھی ہے ان تمام اشیاء پر سیلز ٹیکس اب 18 فیصد کر دیا جائے گا۔ مزمل اسلم نے کہا کہ حکومت کے بقول انہوں نے ملک کو ڈیفالٹ سے بچایا ہے جبکہ انہوں نے عوام کو ڈیفالٹ کردیا ہے۔ مزمل اسلم نے کہا کہ آئی ایم ایف 64 شرائط پہلے ہی لگا چکے ہیں اب مزید 11 شرائط لگائیں جائیں گے۔ حکومت نے پچھلے دنوں بجلی کی گردشی قرضے ختم کرنے کیلئے 1250 ارب کا قرض لیا ہے جس کی وجہ سے عوام پر فی یونٹ 3.25 روپے سر چارج لگا دیا ہے۔ مزمل اسلم نے کہا کہ گیس کا نیا گردشی قرضہ آگیا ہے جو جی ڈی پی کا 3.2 فیصد ہے جو تین ہزار دو سو ارب روپے ہیں۔ جس ملک کا گیس کا گردشی قرضہ 3.2 فیصد ہو اسکی کیا حالت ہوگی۔ مزمل اسلم نے کہا کہ گیس کا سارا کاروبار پی ایم ایل این کا ہے پاکستان کا ائل اینڈ گیس سیکٹر انہوں نے بلکل بیٹھا دیا ہے۔ مشیر خزانہ خیبرپختونخوا نے کہا کہ ملک میں باہر سے سرمایہ کاری تو نہیں رہی اور ایس آئی ایف سی نے بھی ہاتھ کھڑے کر دئیے اور ایک دوسرے پر الزامات عائد کر رہے ہیں۔ مزمل اسلم نے کہا کہ وفاقی وزیر خزانہ کب سے پانڈا بانڈا کی اصطلاح استعمال کر رہی ہے اور ابھی تک شروع نہیں کیا گیا اگر پانڈا بانڈا شروع بھی ہو جائے تو 70 سے 80 ارب روپے ہیں جبکہ حکومت سالانہ 7 سے 8 ہزار ارب روپے قرض لے رہی ہے اور پھر بھی حکومت معاشی کارکردگی بہتری کی دعوے کر رہی ہے۔ مشیر خزانہ خیبرپختونخوا مزمل اسلم نے کہا کہ حکومت کی غلط پالیسیوں کی وجہ سے اگلا سال 2026 مزید مہنگائی، غربت اور بے روزگاری لیکر آئے گا۔

مشیر خزانہ خیبرپختونخوا مزمل اسلم نے پیٹرولیم لیوی و ٹیکسز سے متعلق اہم بیان جاری کرتے ہوئے کہا ہے کہ حکومت اپنی غلطیوں کی سزا عوام کو پٹرول کی قیمتوں میں دے رہی ہے۔ اطلاع ہے کہ حکومت پیٹرولیم لیوی میں مزید پانچ روپے اضافہ کرکے 85 کر رہے ہیں۔ ان خیالات کا اظہار مشیر خزانہ خیبرپختونخوا مزمل اسلم نے گزشتہ روز اپنے دفتر سے جاری ہونے ایک بیان میں کیا۔ مزمل اسلم نے کہا کہ جس سے اب گیس کا گردشی قرضہ پانچ سالوں میں کم کیا جائے گا یاد رہے عمران خان حکومت کے آخری دونوں میں پیٹرولیم لیوی کبھی 20 روپے فی لیٹر سے اوپر نہیں گئی۔ مزمل اسلم نے کہا کہ موجودہ حکومت نے بجلی کا گردشی قرضہ کم کرنے کے لئے 1250 ارب قرض لیا اور عوام پر 3.25 روپے فی یونٹ بجلی کے بل میں ڈیٹ سرچارج لگا دیا۔ مشیر خزانہ خیبرپختونخوا نے کہا کہ اگر ٹیکس ہدف پورا نہیں کیا گیا تو حکومت کے مطابق مزید 5 فیصد کھاد اور کیڑے مار ادویات پر ایکسائز ڈیوٹی عائد کی جائیگی۔ مزمل اسلم نے کہا کہ حکومت کا میٹھے اشیاء خوردونوش پر بھی ٹیکس عائد کرنے کا ارادہ ہے۔ مشیر خزانہ خیبرپختونخوا نے کہا کہ تمام چیزیں جس پر سیلز ٹیکس 18 فیصد سے کم ہے اسے 18 فیصد پر لے کر جا رہے ہیں۔ موجودہ شہباز شریف حکومت کے ہاتھوں عوام مزید قربانی کیلئے تیار ہے؟