وزیر اعلیٰ خیبر پختونخوا کی خصوصی ہدایت پر محکمہ معدنیات نے صوبے کی تاریخ میں پہلی دفعہ گولڈ پلیسر کی نیلامی نشتر ہال پشاور میں منعقد کی جس میں پاکستان سے مختلف کمپنیوں نے حصہ لیا نیلامی کے لئے گولڈ پلیسر کو چار بلاک میں تقسیم کیا گیا تھا۔، جس میں بلاک اے کی بولی گلوبہ کور پرائیویت لمیٹد نے ایک ارب 25 کروڑ روپے میں سب سے زیادہ بولی دے کر حاصل کی جبکہ بلاک بی بیجکو پرائیوٹ لمیٹڈ کمپنی نے ایک ارب 26 کروڑ 10 لاکھ روپے بولی دے کر حاصل کیا۔ اس طرح بلاک سی ہمالیہ ارتھ ایکسپلوریشن پرائیویٹ لمیٹڈ نے ایک ارب 30 کروڑ 50 لاکھ روپے کی سب سے زیادہ بولی دے کر حاصل کیا جبکہ بلاک ڈی شکر درہ منرلز پرائیویٹ لمیٹڈ نے ایک ارب 11 کروڑ 11 لاکھ روپے میں حاصل کیا، اس موقع پر ڈائریکٹر جنرل معدنیات یعقوب نواز، چیئرمین نیلامی کمیٹی کا ایڈیشنل ڈائریکٹر جنرل معدنیات ہدایت الرحمان اور کمیٹی کے دیگر ارکان بھی موجود تھے، محکمہ معدنیات کی جانب سے مختلف گولڈ پلیسر کو 4 ارب 92 کروڑ 71 لاکھ روپے میں نیلام کیا، نیلامی میں پاکستان کی مختلف پرائیویٹ کمپنیوں نے حصہ لیا اور براہ راست کھلے عام شفاف نیلامی میں حصہ لے کر موقع پر زیادہ سے زیادہ بولی دے کر ٹھیکے اپنی کمپنیوں کے لئے حاصل کئے۔

تمام سرکاری افسران عوام کو سرکاری خدمات بروقت مہیا کرنے کے پابند ہیں،کمشنر آر ٹی ایس کمیشن ذاکر حسین آفریدی

رائٹ ٹو سروسز کمیشن ذاکر حسین آفریدی نے جمعرات کے روز ضلع مالاکنڈ کا دورہ کیا۔ اپنے ایک روزہ دورے کے دوران انہوں نے ڈپٹی کمشنر آفس میں ضلع مالاکنڈ میں متعلقہ ذمہ دار افسران کو آر ٹی ایس قانون کے بارے میں تفصیلات سے آگاہ کیا اور اس بات پر زور دیا کہ تمام سرکاری افسران عوام کو سرکاری خدمات بروقت فراہم کرنے کے پابند ہیں جس کے متعلق کسی بھی قسم کی کوتاہی برداشت نہیں کی جائے گی۔ کمشنر آر ٹی ایس نے اس بات پر مزید بھی زور دیا کہ سرکاری ملازمین عوام کو سرکاری خدمات بروقت فراہم کرنے کے پابند ہیں۔ خدمات تک عوام کی بروقت رسائی سرکاری اہلکاروں کی زمہ داری ہے، افسران کو عوام کی ضروریات کو مؤثر طریقے سے پورا کرنے اور خدمات کی فراہمی کے عمل کو بہتر بنانے کے لیے ضروری ہدایات دی گئی ہیں۔ بنیادی خدمات کا حصول عوام کا حق ہے نہ کہ ان پر حکومت کا احسان۔انہوں نے سرکاری افسران کو آر ٹی ایس قانون کے بارے میں پریزنٹیشن بھی دی اور ہدایت کی کہ ہر سرکاری دفتر کے سامنے نوٹیفائیڈ پبلک سروسز کی فہرست واضح طور پر آویزاں کی جائے تاکہ عوام کو کسی بھی قسم کی تکلیف کا سامنا نہ کرنا پڑے۔ انہوں نے مزید کہا کہ گڈ گورننس صوبائی حکومت کا اہم ایجنڈا ہے اور اس حوالے سے واضح احکامات بھی جاری کیے جا چکے ہیں۔

لائیو سٹاک فارمز ایسوسی ایشن کے زیراہتمام محکمہ لائیوسٹاک، فشریز و کوآپریٹیو سوسائٹیز کی تعاون سے کامیابی سے اختتام پذیر، عوام کی کثیر تعداد میں شرکت، محکمہ لائیو اسٹاک کے اقدام کو سراہا

محکمہ لائیوسٹاک، فیشریز و کوآپریٹیو سوسائٹیز، لائیو سٹاک فارمز ایسوسی ایشن، کوآپریٹیو سوسائٹیز اور انبکس پاکستان کے تعاون سے پشاور میں منعقدہ دوسری میگا انٹرنیشنل لائیو سٹاک زرعی فشریز ایکسپو کامیابی سے اختتام پزیر ہو گئی۔ اختتامی تقریب میں ڈائریکٹر جنرل لائیو سٹاک توسیع ڈاکٹر اصل خان نے بطور مہمان خصوصی شرکت کی۔ ڈائریکٹر جنرل لائیو سٹاک توسیع ڈاکٹر اصل نے کامیابی سے دوسری میگا انٹرنیشنل لائیو سٹاک ایگری فشریز ایکسپو کے انعقاد پر منتظمین، محکمہ لائیوسٹاک کے افسران اور معاون تنظیموں کو مبارکباد پیش کرتے ہوئے کہا کہ دوسری بار منعقد ہونے والے اس بین الاقوامی ایکسپو میں کسانوں، زمینداروں اور شعبہ لائیو سٹاک سے وابستہ افراد نے کثیر تعداد میں شرکت کی اور اس میں گہری دلچسپی لی۔دوسری میگا انٹرنیشنل لائیو سٹاک زرعی فشریز ایکسپو میں مختلف سٹالوں میں سرکاری، غیر سرکاری تنظیموں اور پرائیویٹ کمپنیوں کے نمائندوں نے سٹالوں کا دورہ کرنے والے کسانوں اور زمینداروں کی خوب رہنمائی کی۔ دو روزہ انٹرنیشنل ایکسپو لائیو سٹاک، فارمر ویلفیئر ایسوسی ایشن، لائیو سٹاک کواپریٹو سوسائٹی، انباکس پاکستان انٹرنیشنل ایکسپو کے تعاون سے منعقد ہوئی۔ دو روزہ ایکسپو میں تقریبا 60 سے زائد مختلف سٹال لگائے گئے ہیں جن میں زرعی مشینری، زرعی کھاد، بیج، ڈیری مشینری، مویشیوں اور فصلوں کی بیماروں کی روک تھام کے ادویات اور ویکسین جدید فارمنگ ٹیکنالوجیز، ڈیری، لائیو سٹاک ایکوافیڈ، میڈیسن, سیمن اور دیگر شامل ہے ایکسپو کا بنیادی مقصد کسانوں میں لائیو سٹاک اور زراعت کی پیداوار اور ماحولیاتی تبدیلی کے حوالے سے آگاہی پیدا کرنا ہے جبکہ فصلی پیداوار کی ترقی اور صوبے کو گوشت، دودھ اور انڈوں کی پیداوار میں خود کفیل بنانا ہے خیبر پختونخوا کی دوسری میگا انٹرنیشنل لائیو سٹاک ایگری فشریز ایکسپو میں قومی و بین الاقوامی کمپنیوں کی بہترین پروڈکٹس اور ٹیکنالوجیز ایک چھت تلے نمائش کیلئے رکھی گئی تھیں جن سے فارمرز اور سرمایہ کار اور کاروباری افراد اپنے کاروبار کی وسعت یا نئے کاروبار سے متعلق معلومات اور رہنمائی حاصل کر سکیں گے۔ دوسری میگا انٹرنیشنل لائیو سٹاک زرعی فشریز ایکسپو کے اختتامی تقریب میں ڈائریکٹر جنرل لائیو اسٹاک توسیع ڈاکٹر اصل خان نے اپکسپو میں حصہ لینے والی تنظیموں اور منتظمین میں شیلڈ تقسیم کیں۔ اس موقع پر لائیوسٹاک فارمرز ایسوسی ایشن کے صدر آصف اعوان اور دیگر بھی موجود تھے

ملاقاتوں پر پابندی کے باعث غیر یقینی صورتحال پیدا ہو رہی ہے، بیرسٹر سیف

غیر قانونی طور پر حراست میں سرکاری اہلکاروں و پی ٹی آئی ورکرز پر تشدد کی خبریں موصول ہو رہی ہیں، خیبرپختونخوا اسمبلی کے اراکین انور زیب خان اور صوبائی کابینہ کے رکن ملک لیاقت کو غیر قانونی طور پر پابند سلاسل رکھا گیا ہے،بیرسٹر ڈاکٹر سیف

وزیراعلیٰ خیبرپختونخوا کے مشیر برائے اطلاعات و تعلقات عامہ بیرسٹر ڈاکٹر سیف نے کہا ہے کہ پاکستان تحریک انصاف (پی ٹی آئی) کے بانی عمران خان کی صحت سے متعلق پریشان کن خبریں سامنے آ رہی ہیں، جس کی وجہ سے ان کے اہل خانہ اور کارکنان شدید اضطراب میں مبتلا ہیں۔ انہوں نے کہا کہ عمران خان سے ملاقاتوں پر عائد پابندی کارکنان میں مزید تشویش پیدا کر رہی ہے، اور سمجھ سے بالاتر ہے کہ کیوں حراست میں لیے گئے شخص پر ملاقاتوں کی پابندی لگائی گئی ہے۔ بیرسٹر ڈاکٹر سیف نے بتایا کہ عمران خان پر وکلاء، اہل خانہ اور دیگر تمام افراد کی ملاقاتوں پر پابندی عائد کی گئی ہے جسکی وجہ سے ایک غیر یقینی صورتحال جنم لے رہی ہے۔ انہوں نے مزید کہا کہ ہمارے ریسکیو اور پولیس اہلکاروں کو بھی غیر قانونی طور پر حراست میں رکھا جا رہا ہے، اور اطلاعات موصول ہو رہی ہیں کہ سرکاری اہلکاروں اور پی ٹی آئی کارکنوں پر تشدد بھی کیا جا رہا ہے۔ اگر تشدد کے واقعات کی تصدیق ہوئی تو ذمہ دار اہلکاروں کو نشانِ عبرت بنایا جائے گا۔ بیرسٹر ڈاکٹر سیف نے کہا کہ خیبرپختونخوا اسمبلی کے رکن انور زیب خان اور صوبائی کابینہ کے رکن ملک لیاقت کو بھی غیر قانونی طور پر پابند سلاسل رکھا گیا ہے، جو جعلی حکومت کی طرف سے ہمارے منتخب نمائندوں کے ساتھ فسطائیت کی انتہا ہے۔ انہوں نے وفاقی حکومت پر الزام عائد کیا کہ وہ انسانی حقوق کی سنگین خلاف ورزیاں کر رہی جس کی مثال نہیں ملتی۔ اپنی ناجائز اقتدار کو بچانے کے لیے شریف خاندان نے جمہوریت اور فیڈریشن کے بنیادی اصولوں پر حملہ کیا ہے۔ تاہم وہ اپنے مذموم مقاصد میں کبھی کامیاب نہیں ہونگے۔ انہوں نے واضح کیا کہ خیبرپختونخوا ہاؤس اسلام آباد میں وفاقی حکومت کی جانب سے توڑ پھوڑ کی گئی، جو ناقابل برداشت اور فیڈریشن پر حملہ ہے۔ اس قسم کے غیر قانونی اختیارات کے استعمال کرنے والے اہلکاروں کو ہرگز معاف نہیں کیا جائے گا۔ اگر ہمارے صوبے کے لوگوں پر تشدد کیا گیا تو ہم بھی اینٹ کا جواب پتھر سے دیں گے اور اس ظلم کے خلاف قانونی اور سیاسی جنگ ہر محاذ پر جاری رکھیں گے۔

وزیر اعظم اور انکے مشیران روزانہ اسٹاک مارکیٹ کی کارکردگی بتا کر معیشت بہتری کی یقین دلاتے ہیں مشیر خزانہ خیبرپختونخوا مزمل اسلم

دراصل اسٹاک مارکیٹ کی حقیقت سب کے سامنے ہیں پوری اسٹاک مارکیٹ کی مالیت 40 ارب ڈالر ہے جو 2017 میں 100 ارب ڈالر تھی مشیر خزانہ خیبرپختونخوا مزمل اسلم

مشیر خزانہ خیبرپختونخوا مزمل اسلم کا پاکستان اسٹاک مارکیٹ پر ردعمل دیتے ہوئے کہا ہے کہ وزیر اعظم اور انکے مشیران روزانہ اسٹاک مارکیٹ کی کارکردگی بتا کر معیشت بہتری کی یقین دلاتے ہیں دراصل اسٹاک مارکیٹ کی حقیقت سب کے سامنے ہیں پوری اسٹاک مارکیٹ کی مالیت 40 ارب ڈالر ہے جو 2017 میں 100 ارب ڈالر تھی۔ ان خیالات کا اظہار مشیر خزانہ و بین الصوبائی رابطہ خیبرپختونخوا مزمل اسلم نے اپنے دفتر سے جاری ہونے والے بیان میں کیا۔ مزمل اسلم نے کہا کہ یاد رکھیں اس وقت اسٹاک مارکیٹ کا انڈکس 51,000 تھا اور آج 86,000 ہے اسی لئے تو خان صاحب کہتے ہیں ایک تو پڑھے لکھے نہیں اوپر سے سیکھتے بھی نہیں۔ مشیر خزانہ خیبرپختونخوا نے کہا کہ اس وقت اسٹاک مارکیٹ 2017 چھوڑیں 2007 سے بھی نیچے ہے بلکہ جب 1999 میں ایٹمی دھماکوں سے پہلے بھی پاکستانی مارکیٹ کی قیمت آج سے بہتر تھی۔ مزمل اسلم نے کہا کہ یہ ہی وجہ ہے پاکستان کو دنیا کی سستی ترین مارکیٹ کہا جاتا ہے۔ اپنے ایک دوسرے بیان میں مشیر خزانہ خیبرپختونخوا مزمل اسلم نے پنجاب حکومت کے منصوبوں بارے ردعمل دیتے ہوئے کہا ہے کہ خیبرپختونخوا کے جاری سولر پروگرام کے حوالے سے کمپنی حکام سے ملاقات میں پنجاب کا زکر آیا ہے تو پوچھا کہ مس ٹک ٹاک نے 700 ارب کا سولر باٹنے کا بولا ہے اور کمپنی حکام ہنس کر بولے کل 5 ارب کا بجٹ دیا ہے باقی آپ سمجھدار ہیں۔ مزمل اسلم نے کہا کہ ویسے ان کے چچا حضور نے بھی 1800 ارب روپے کا کسان پیکج کا اعلان کیا تھا مزمل اسلم نے کہا کہ اور آخر بجٹ میں کسانوں کیلئے پانچ ارب روپے مختص کئے۔ مزمل اسلم نے کہا کہ کچھ اسی طرح پانچ سو یونٹ کے بل والوں کے لئے 14 روپے فی یونٹ بچت کا اعلان کیا۔ مزمل اسلم نے کہا کہ پھر تبدیل کر کے 200 سے 500 یونٹ کیا اور پھر تبدیل کر کے سنگل فیز میٹر کیا پھر اسلام آباد کے صارفین سے واپس لیا اور اب دو مہینے ختم ہو گئے۔ مزمل اسلم نے کہا کہ اس کا مطلب ہے وہ ریلیف بھی اشتہارات تک محدود تھا۔

ڈی پی او ایبٹ آباد کو رپورٹ جمع کروانے کے احکامات جاری۔ شہری سنجیدگی کا مظاہرہ کریں، درخواست دے کر حاضر نہیں ہوتے، جج محمد عاصم امام

رائٹ ٹو پبلک سروسز کمیشن میں دو شہریوں کی شکایت کی شنوائی ہوئی۔جج محمد عاصم امام نے شہریوں کی شکایت سنیں۔ ایبٹ آباد سے ایاز سرور نے ایف آئی آر کے اندراج کے لیے کمیشن سے رجوع کیا تھا۔ شہری کمیشن کے سامنے حاضر ہوا اور تمام ریکارڈ بشمول تصاویر اور ویڈیوز کمیشن کو پیش کیں۔ شہری کا کہنا ہے کہ اس کی 74 کنال 14 مرلے زمین لیز پر لیکر، قانونی کاروائی پوری کیے بغیر، انکی مرضی کے خلاف قبضہ کر لیا گیا ہے اور زمین سے معدنیات نکالی جا رہی ہیں۔ انہوں نے مزید بتایا کہ غیر قانونی مایئنگ کی وجہ سے سرکار کو تقریباً ڈھائی کروڑ روپے روزانہ کا نقصان ہو رہا ہے۔ ڈپٹی کمشنر کی جانب سے کام بند کرنے کے احکامات جاری ہونے کے باوجود مسلسل کام ہو رہا ہے۔ ہر دروازہ کھٹکھٹایا لیکن لیز ہولڈر کسی بھی فورم پر حاضر نہیں ہوتا، قانونی طور پر یہ قبضہ تجاوزات کے ذمرے میں آتا ہے۔ پولیس کے پاس گیا وہ ایف آئی آر درج نہیں کروا رہی۔ کمیشن نے ڈی پی او ایبٹ آباد کو مکمل انکوائری رپورٹ ایک مہینے کے اندر کمیشن کو جمع کروانے کے احکامات جاری کر دیئے۔اسی طرح پشاور سے تعلق رکھنے والے ضیاء الدین نامی شہری نے بھی کمیشن کو ایف آئی آر کے اندراج کے لیے درخواست دی تھی۔ مسلسل تیسری بار غیر حاضری پر کمیشن نے انکی درخواست کو خارج کر دیا۔ جج محمد عاصم نے کہا کہ شہری کی مشکلات کے ازالے کے لئے آر ٹی ایس کمیشن بنا ہے۔ شہریوں کو شکایت ہوتی ہیں کہ انکو سننے والا کوئی نہیں لیکن شہری بھی سنجیدگی کا مظاہرہ نہیں کرتے، درخواست دے کر حاضر نہیں ہوتے۔ کمیشن بروقت خدمات کے فراہمی کے لیے کوشاں ہیں۔

نمائش میں سائنس، آئی ٹی، اور ای کامرس سے متعلق جدید تخلیقی منصوبے پیش کئے گئے

یونیورسٹی آف ٹیکنالوجی نوشہرہ میں مقامی ضلعی انتظامیہ کے تعاون سے SCIE-TECH 2024 ایکسپوکا انعقادکیا گیا جس میں سائنس، انفارمیشن ٹیکنالوجی، ای-کامرس، اور فنی تعلیم کے شعبوں میں جدید تخلیقی منصوبوں کی نمائش کی گئی۔مذکورہ ایکسپو کا مقصد طلباء، موجدین، اور صنعت کے ماہرین کو ان کے شعبوں میں کامیابیوں کو اجاگر کرنے کے حوالے سے ایک ہی جگہ پر اکھٹا کرنا تھا۔ایکسپو کا باضابطہ افتتاح وزیر اعلیٰ خیبر پختونخوا کے معاون خصوصی برائے فنی تعلیم اور صنعت وحرفت عبدالکریم تورڈھیر اورڈپٹی کمشنر نوشہرہ عرفان اللہ محسود نے کیا جبکہ وائس چانسلر نے افتتاحی تقریب میں خطبہ استقبالیہ پیش کرتے ہوئے مستقبل کے موجدین کی تشکیل میں تکنیکی تعلیم کے کردار پر روشنی ڈالی۔سائنس اور تیکنیکی علوم و مہارت کے امتزاج پر مبنی اس اہم ایکسپو میں طلباء نے سائنس، آئی ٹی، اور ای-کامرس میں جدید منصوبے پیش کیے اور ماہرین کے ایک پینل نے ان کا جائزہ لیا۔اسی طرح تخلیقی صلاحیتوں کے شاہکار اور اعلیٰ معیار پر پورا اترنے والے بہترین تین منصوبوں کو انعامات سے بھی نوازا گیا۔ایکسپو کے حوالے سے منعقدہ تقریب سے معاون خصوصی نے خطاب کرتے ہوئے طلبہ کی تخلیقی صلاحیتوں کو سراہا اور انکی سائنسی، تخلیقی اور تحقیقی سعی کو نکھارنے اور اجاگر کرنے کیلئے اس نمائش کو ایک اہم قدم قرار دیا۔انھوں نے کہا کہ فنی تعلیم کی اکڈیمیااور انڈسٹری کے مابین روابط انتہاء ضروری ہیں کیونکہ آج کی دنیا کی ضروریات اور انڈسٹری کی طلب کے مطابق ہی ہمیں اپنی نوجوان نسل کو تیار کرنا ہے۔انھوں نے کہا کہ تیکنیکی اداروں سے محض ڈگری ہولڈرز گریجویٹس کی فراغت ہمارا مطمع نظر نہیں بلکہ ہماری کوشش ہے کہ ٹیکنیکل ایجوکیشن کے طلبہ محض اسناد حاصل کرنے کی بجائے انڈسٹری کے معیار کے مطابق ہنر یافتہ ماہرین بھی ہوں اور وہ پریکٹیکل تربیت بھی حاصل کریں۔

ُخیبر پختونخوا کے وزیر بلدیات ارشد ایوب خان نے کہا ہے کہ سرکاری زمینوں پر قبضہ کسی صورت برداشت نہیں کیا جائے گا۔ انہوں نے ہدایت کی کہ مقامی سیاسی نمائندوں کے ساتھ مل کر ان تجاوزات کو ختم کیا جائے۔ صوبائی وزیر نے مزید کہا کہ تمام ٹی ایم ایز کی جائیدادوں کو مارکیٹ ریٹ پر کرایا اور لیز پر دیا جائے، اور یہ بھی ہدایت کی کہ ٹی ایم ایز اپنی کارکردگی کو بہتر بناتے ہوئے اپنے آمدنی میں اضافہ کریں۔ان خیالات کا اظہار انہوں نے ضلع ایبٹ آباد میں محکمہ بلدیات کے زیر اہتمام مختلف اداروں کے اجلاس کی صدارت کرتے ہوئے کیا۔ اس موقع پر ایم این اے علی خان جدون، ایم این اے علی اصغر خان، سیکرٹری بلدیات داؤد خان، سیکرٹری ریجنل میونسپل آفیسر وحید الرحمان، محمد افضال، اور تحصیل چیئرمین ایبٹ آباد، لوئر تناول، لورہ اور حویلیاں سمیت دیگر اعلیٰ عہدیدار بھی موجود تھے۔اجلاس میں ٹی ایم او ایبٹ آباد، حویلیاں، لوئر تناول، لورہ، سی ای او واسا اور ڈائریکٹر یو اے ڈی اے نے صوبائی وزیر کو محکموں کی کارکردگی، اخراجات، آمدن اور پراپرٹی کی تفصیلات کے بارے میں بریفنگ دی۔ صوبائی وزیر نے اس موقع پر کہا کہ صوبائی حکومت ٹی ایم ایز کی پراپرٹی کے لیے نئی لیز اور کرایہ پالیسی لا رہی ہے، جو عوام اور اداروں دونوں کے لیے فائدہ مند ہوگی۔انہوں نے تمام ٹی ایم ایز کو ہدایت کی کہ کسی بھی تعمیرات کے لیے نقشے کی منظوری لازمی قرار دی جائے، اور غیر قانونی تعمیرات کی رپورٹ فوری طور پر پیش کی جائے۔ انہوں نے جناح پلازہ ایبٹ آباد کی لیز اور کرایہ کو مارکیٹ ریٹ پر مقرر کرنے کی ہدایت بھی کی، اور ٹی ایم ایز کی وہ پراپرٹی جس پر عدالت میں مقدمات زیر سماعت ہیں، ان کی تفصیلی رپورٹ فراہم کرنے کا حکم دیا۔اجلاس میں چونا واٹر پلانٹ اور کے پی سپ کے جاری منصوبوں پر بھی گفتگو ہوئی، جبکہ ٹی ایم اوز کو مشینری کی فراہمی کی یقین دہانی بھی کرائی گئی۔بعد ازاں صوبائی وزیر بلدیات نے اربن ایریاز ڈویلپمنٹ اتھارٹی کی زیر نگرانی ایبٹ آباد ٹاؤن شپ کا دورہ کیا۔ انہوں نے ٹاؤن شپ کی ترقی کو مزید بہتر بنانے کی ہدایت دیتے ہوئے سڑکوں کی بہتری کے لیے 10 ملین روپے کا اعلان کیا، تاکہ علاقے کے رہائشیوں کو بہتر سہولیات فراہم کی جا سکیں۔ اس کے علاوہ صوبائی وزیر نے ٹاؤن شپ میں تجاوزات کے خلاف فوری کارروائی کے احکامات بھی جاری کیے۔