گورنر خیبر پختونخوا فیصل کریم کنڈی نے کہا ہے کہ اعلیٰ معیاری تعلیم ہمیں ترقیافتہ اقوام کی صف میں کھڑا کرے گی، صوبہ میں معیاری تعلیم کی فراہمی میں نجی شعبہ اچھا حصہ ڈال رہا ہے اور صوبے کی نوجوان نسل کو معیاری تعلیم اور بہتر مستقبل دے رہے ہیں.  ان خیالات کا اظہار گورنر نے جمعرات کے روز دورہ ایبٹ آباد کے دوران دی میلینئم یونیورسل کالج ایبٹ آباد کیمپس کے افتتاحی تقریب سے بحیثیت مہمان خصوصی خطاب کرتے ہوئے کیا. گورنر نے اس موقع پر دی میلینئم یونیورسل کالج ایبٹ آباد کا باقاعدہ افتتاح کیا. تقریب میں ایمبیسیڈر مسعود خان، ڈاکٹر طاہر عرفان وائس چانسلر ایبٹ آباد یونیورسٹی، بانی چیف ایگزیکٹو ڈاکٹر فیصل مشتاق ، سابق صوبائی وزیر شجاع خانزادہ، ہیڈ اف پروگرام ثمن شمیم ، ڈین آمنہ سالک، طلبہ، والدین، وکلاء تنظیموں کے نمائندے اور سول سوسائٹی کے اراکین موجود تھے۔ تقریب میں سابق سفیر مسعود خان اور بانی چیف ایگزیکٹو ڈاکٹر فیصل مشتاق نے گورنر فیصل کریم کنڈی کو میلینئم یونیورسل کالج کی ملک بھر میں تعلیمی خدمات سے متعلق آگاہ کیا. ایمبیسڈر مسعود خان اور ڈاکٹر فیصل مشتاق نے اپنے خطاب کرتے ہوئے گورنر کا شکریہ ادا کیا اور کہا کہ ایبٹ آباد کیمپس کے بعد رواں سال ڈیرہ اسماعیل خان میں بھی روٹس سکول قائم کرینگے، پشاور میں ایک لاکھ مربع فٹ پر محیط نیا کیمپس قائم کیا جارہا ہے ۔ انہوں نے تعلیم کے فروغ میں گورنر کے کردار کو سراہا اور کہا کہ آپ ایک مثالی گورنر ہیں ،نہ صرف وویمن امپاورمنٹ ، یوتھ انگیجمنٹ بلکہ صوبہ کا سافٹ امیج بلند کرنے میں بھی گورنر کا کردار مثالی رہا ہے.
تقریب سے خطاب کرتے ہوئے گورنر نے کہا کہ آج علم اور ترقی کے نئے راستے کا آغاز ہوا ہے، دی میلینئم یونیورسل کالج ایبٹ آباد کے عوام کے لیے تحفہ ہے۔موجودہ دور میں بین الاقوامی تعلیم کی اہمیت پہلے سے بڑھ چکی ہے۔ گورنر نے کہا کہ اب طلبہ پاکستان میں رہ کر عالمی اداروں سے تعلیم حاصل کر سکتے ہیں، یہ ادارہ طلبہ کے لئے دنیا کے دورازے کھول دے گا، گورنر نے طلبہ پر زور دیا کہ وہ اپنی اقدار سے جڑے رہیں اور علم کی شمع روشن رکھیں۔نوجوان نسل ملک کے نظام کی باگ ڈور سنبھالنے کا سوچے، گورنر نے کہا کہ ایبٹ آباد شہر کاکول اکیڈمی اور تعلیمی اداروں کے لیے مشہور ہے۔ریڈ کریسنٹ کے تعاون سے ایبٹ آباد میں بھی فری ایمبولینس سروس شروع کریں گے، انہوں نے کہا کہ سوات میں بچے اور بچیوں کو ہاسپٹلیلٹی کی فری ٹریننگ دے رہے ہیں۔ پشاور میں فری ایمبولینس سروس شروع کی ہے۔گورنر خیبرپختونخوا نے نجی کالج میں طلبہ کے ساتھ ملاقات کی اور سنوکر بھی کھیلی۔

خیبر پختونخوا اسمبلی سیکریٹریٹ میں آج مجوزہ بجٹ 2025 کے حوالے سے ایک اہم مشاورتی اجلاس منعقد ہوا، جس کی صدارت سپیکر خیبر پختونخوا اسمبلی بابر سلیم سواتی نے کی۔ اجلاس میں وزیراعلیٰ خیبر پختونخوا کے معاونِ خصوصی برائے خزانہ مزمل اسلم، سکریٹری خزانہ، اراکینِ صوبائی اسمبلی اور دیگر اعلیٰ حکام نے شرکت کی۔اجلاس کا بنیادی مقصد تمام متعلقہ اسٹیک ہولڈرز کی قیمتی آراء اور تجاویز کو بجٹ سازی کے عمل میں شامل کرنا تھا تاکہ آئندہ مالی سال کا بجٹ عوام دوست، شفاف اور ترقیاتی ترجیحات پر مبنی ہو۔سپیکر بابر سلیم سواتی نے اس موقع پر زور دیا کہ بجٹ میں مالی نظم و ضبط، عوامی فلاح و بہبود اور واضح ترقیاتی اہداف کی عکاسی ہونی چاہیے۔ انہوں نے بجٹ سازی کے عمل میں اراکین اسمبلی کی شمولیت کو سراہتے ہوئے کہا کہ اس نوعیت کی مشاورت جمہوری اقدار کو فروغ دیتی ہے۔معاونِ خصوصی برائے خزانہ مزمل اسلم نے بجٹ کی تیاری میں شفافیت اور مشاورت کی اہمیت پر زور دیتے ہوئے اس عزم کا اظہار کیا کہ خیبر پختونخوا حکومت ایک حقیقت پسند، عوامی ضروریات سے ہم آہنگ اور قابلِ عمل بجٹ پیش کرنے کے لیے پرعزم ہے۔

چیئرمین ڈیڈک سوات ایم پی اے اخترخان ایڈوکیٹ نے کہا ہے کہ سوات میں حقیقی ترقیاتی انقلاب برپاکرنے کے لئے جامع منصوبہ بندی ترتیب دی گئی ہے، سوات میں ترقی اورخوشحالی کے سفرکاآغاز ہوچکاہے، ترقیاتی منصوبوں پر اربوں روپے خرچ کئے جائینگے سوات کے لئے منظور کردہ ترقیاتی فنڈز ختم کرنے اورفنڈز کی واپسی کے حوالے سے اطلاعات غلط اور بے بنیا دہے وزیراعلیٰ امین گنڈاپور علاقائی ترقی اورخوشحالی پرخصوصی توجہ دے رہے ہیں ان خیالات کااظہار انہوں نے اپنے دفترسیدوشریف میں سینئرصحافیوں سے گفتگوکرتے ہوئے کیاانہوں نے کہا کہ سوات کی تعمیروترقی کے لئے اربوں روپے منظورہوچکے ہیں اوران منصوبوں کی تعمیرمیں میٹریل کاخاص خیال رکھاجارہاہے اورعوام کاپیسہ عوام پر ہی خرچ کیاجارہاہے لوگوں کی مسائل اورمشکلات کومدنظررکھتے ہوئے سوات میں مسائل کے حل کے لئے مرتب حکمت عملی ترتیب دی گئی ہے۔ انہوں نے کہا کہ صوبائی حکومت نے تمام صوبائی حلقوں کے لئے اربوں روپے منظورکی ہے جو متعلقہ ایم پی اے اپنے حلقہ میں ان منصوبوں پرخرچ کریں گے جس سے عوام کو فائدہ ہو، انہوں نے کہا کہ سوات کی ترقی اورخوشحالی پرتوجہ مرکوز کی گئی ہے اورمیرے حلقہ میں سڑکوں اورتعلیم کے حوالے سے مسائل ہیں جس کو توجہ کامرکز بناتے ہوئے سڑکوں اور سکولوں کی تعمیر کیلئے کوششیں جاری ہے، علاقے میں سیاحت کے بہترین مقامات موجود ہے، ان سیاحتی مقامات کو متعارف کرانے کے لئے میرے حلقہ میں سڑکوں کی تعمیراولین ترجیح ہے تاکہ سیاح ان علاقوں تک پہنچ سکے انہوں نے کہا کہ علاقے کے تعمیروترقی اورلوگوں کی خوشحالی کیلئے خطیرفنڈ خرچ کی جارہی ہے۔