چیف سیکرٹری خیبرپختونخوا شہاب علی شاہ کی زیرِ صدارت گورننس سے متعلق ہفتہ وار جائزہ اجلاس منعقد ہوا جس میں محکموں کے سیکرٹریز، متعلقہ حکام نے شرکت کی جبکہ ڈپٹی کمشنرز نے ویڈیو لنک کے ذریعے اجلاس میں شریک ہوئے۔ اجلاس میں صوبائی محکموں کی کارکردگی اور جاری ترقیاتی منصوبوں کا تفصیلی جائزہ لیا گیا۔اجلاس کو بتایا گیا کہ صوبے بھر میں غیر قانونی تجاوزات کے خلاف جاری مہم کے دوران اب تک 1270 کنال سے زائد سرکاری اراضی واگزار کرائی جاچکی ہے جبکہ گزشتہ ایک ہفتے کے دوران مزید 76 کنال اراضی کو تجاوزات سے پاک کیا گیا۔ سوات کے علاقے کالام میں آبی گذرگاہوں پر قائم غیر قانونی تعمیرات کے خلاف بڑے پیمانے پر کارروائی کی گئی ہے اور واگزار کرائی گئی جگہوں کو محفوظ بنانے کے لیے برجیاں نصب کر دی گئی ہیں تاکہ دوبارہ تجاوزات نہ ہو سکیں۔حکومت خیبرپختونخوا نے واضح کیا کہ تجاوزات کی روک تھام اور این او سیز و بلڈنگ پلانز کی منظوری میں غفلت برتنے والے متعلقہ افسران و اہلکاروں کے خلاف سخت کارروائی عمل میں لائی جائے گی۔اجلاس میں بتایا گیا کہ پی ڈی اے کے حیات آباد ماڈل سیکٹر پر ترقیاتی کام تیزی سے جاری ہے جبکہ 16 نومبر سے پشاور رنگ روڈ اور جی ٹی روڈ کی اپ لفٹ پر کام کا آغاز کیا جائے گا۔سرمایہ کاری کے فروغ کے لیے پبلک پرائیویٹ پارٹنرشپ اتھارٹی کے قیام کے فریم ورک پر کام تیز کیا جا رہا ہے۔ اسی طرح سیاحت کے فروغ کے لیے کالام میں بوئیوں اسکائی ریزارٹ سے متعلق تجاویز پر پیش رفت جاری ہے جبکہ درابن اکنامک زون میں سرمایہ کاروں کی شمولیت کے لیے اسٹیک ہولڈرز روڈ شو منعقد کیا جا رہا ہے۔اجلاس کو آگاہ کیا گیا کہ صوبے میں ماحول دوست ٹرانسپورٹ کے فروغ کے لیے الیکٹرک رکشوں اور الیکٹرک بسوں کے حوالے سے جامع لائحہ عمل تشکیل دیا جا رہا ہے۔ محکمہ مواصلات و تعمیرات نے کم لاگت اور کم وقت میں مکمل ہونے والی لائٹ گیج اسٹرکچر ٹیکنالوجی پر بھی تفصیلی بریفنگ دی۔مزید بتایا گیا کہ داسو ہائیڈرو پاور پراجیکٹ پر عمل درآمد تیز کرنے اور ترقیاتی کام کی موثر مانیٹرنگ کے لیے ایکشن پلان وضع کر دیا گیا ہے۔چیف سیکرٹری نے تمام متعلقہ محکموں کو ہدایت کی کہ ترقیاتی اقدامات کی رفتار مزید تیز کی جائے اور عوامی فلاح سے متعلق منصوبوں کی شفاف و بروقت تکمیل یقینی بنائی جائے۔

خیبرپختونخوا کے وزیر بلدیات مینا خان آفریدی کی زیر صدارت واٹر اینڈ سینیٹیشن سروسز کمپنی پشاور (WSSP) کا ایک اہم جائزہ اجلاس منعقد ہوا، جس میں کمپنی کی کارکردگی، مالی امور اور سروس ڈلیوری کے مختلف پہلوؤں کا تفصیلی جائزہ لیا گیا۔
اجلاس میں سیکرٹری بلدیات اسلم ثاقب رضا، چیف ایگزیکٹیو آفیسر ڈبلیو ایس ایس پی یاسر سمیت دیگر اعلیٰ حکام نے شرکت کی۔ اجلاس کے دوران متعلقہ حکام نے وزیر بلدیات کو ادارے کی مجموعی کارکردگی پر تفصیلی بریفنگ دی۔بریفنگ کے مطابق 544 ٹیوب ویلز کے ذریعے ڈبلیو ایس ایس پی اپنے زیر انتظام علاقوں میں پینے کا صاف پانی فراہم کر رہی ہے، جبکہ 1400 کلومیٹر پر محیط پانی کی سپلائی لائنز ادارے کے زیر انتظام ہیں۔مزید بتایا گیا کہ ڈبلیو ایس ایس پی روزانہ کی بنیاد پر 1570 پوائنٹس سے تقریباً 500 ٹن کوڑا کرکٹ اٹھاتی ہے، جبکہ پشاور کے 42 یونین کونسلز میں 1860 کلومیٹر نالیوں کی صفائی کا کام بھی ادارہ انجام دے رہا ہے۔حکام نے آگاہ کیا کہ ٹیوب ویلز کے بجلی بل کی مد میں ماہانہ 13 کروڑ روپے ادا کیے جا رہے ہیں، اور کوڑا فروخت کرنے کے عمل کی منظوری کی سمری محکمہ پلاننگ اینڈ ڈیولپمنٹ کے پاس زیر غور ہے۔مزید بتایا گیا کہ خدمات کے نئے ٹیرف پر عمل درآمد سے کمپنی کی آمدنی 19 ملین سے بڑھ کر 28 ملین روپے ماہانہ تک پہنچ گئی ہے، جبکہ پشاور کی دو ملین آبادی کے لیے کمپنی کے پاس 484 فلیٹ گاڑیاں دستیاب ہیں۔ ڈبلیو ایس ایس پی نے شہر کے مختلف علاقوں میں 20 نئے ماڈل اسٹریٹس بھی بنائے ہیں۔وزیر بلدیات مینا خان آفریدی نے اجلاس کے دوران ہدایت کی کہ 69 مزید ٹیوب ویلز کو فوری طور پر ڈبلیو ایس ایس پی کے حوالے کرنے کا عمل تیز کیا جائے۔ انہوں نے کہا کہ کمپنی کی ریونیو میں اضافے کے لیے ایک ماہ کے اندر مؤثر اقدامات کیے جائیں۔مینا خان آفریدی نے ہدایت کی کہ کل سے پشاور کی تمام بڑی شاہراہوں کو ہر صورت صاف ستھرا رکھا جائے اور شہریوں کو صاف ماحول فراہم کرنے کے لیے عملی اقدامات میں تیزی لائی جائے۔انہوں نے کہا کہ وہ روزانہ کی بنیاد پر صفائی ستھرائی کے عمل کو عام آدمی کی نگاہ سے مانیٹر کروں گا تاکہ عوامی سطح پر بہتری کے اثرات واضح طور پر نظر آئیں۔

صوبائی وزیر تعلیم ارشَد ایوب خان نے محکمہ ابتدائی و ثانوی تعلیم میں نئے تعینات ہونے والے 156 اے ایس ڈی ای اوز کو فریش اپوائنٹمنٹ/ایڈجسٹمنٹ آرڈرز تقسیم کئے۔ اس موقع پر سیکرٹری ایجوکیشن محمد خالد خان اور ڈائریکٹر ایجوکیشن نغمانہ سردار بھی موجود تھے۔محکمہ تعلیم کے کمیٹی روم میں منعقدہ تقریب سے خطاب کرتے ہوئے وزیر تعلیم ارشد ایوب خان نے کہا کہ محکمہ تعلیم کی کارکردگی مزید بہتر بنانے،سکولوں کی سطح پر انتظامی امور میں شفافیت لانے اور ریفارمز کو عملی سطح پر مؤثر بنانے کے لئے یہ تعیناتیاں انتہائی اہمیت رکھتی ہیں۔ انہوں نے کہا کہ یہ تمام تقرریاں میرٹ اور شفاف طریقہ کار کے تحت عمل میں لائی گئی ہیں۔ جس کیلئے صوبائی پبلک سروس کمیشن کی خدمات حاصل کی گئی تھیں۔ انہوں نے کہا کہ انتظامی کیڈر کے یہ نو تعینات افسران محکمہ تعلیم میں جاری ریفارمز ایجنڈا پر من و عن عمل کریں گے اور ان کے آنے سے سسٹم میں مزید بہتری آئے گی اور انتظامی کیڈر آفسران کی کمی پوری ہو جائے گی۔ وزیر تعلیم نے ایجوکیشن حکام کو ہدایات جاری کیں کہ نئے تعینات ہونے والے اے ایس ڈی ای اوز کے لئے آئندہ ہفتے سے 6 ہفتوں پر مشتمل خصوصی تربیتی پروگرام شروع کیا جائے، جس میں تعلیمی نظم و نسق، سکول مانیٹرنگ، ریفارمز ایجنڈے کے نفاذ، اور سروس ڈیلیوری ماڈلز پر جامع تربیت دی جائے۔انہوں نے نو تعینات انتظامی کیڈر آفسران کو مبارکباد دیتے ہوئے کہا کہ محکمہ تعلیم میں میرٹ پر آپ لوگوں کے انتخاب کے بعد آپ لوگوں پر بھاری ذمہ داری عائد ہوتی ہے۔ تعلیم ایک مقدس پیشہ ہے اور آپ لوگوں نے ہی تعلیمی نظام میں مزید بہتری لانے کیلئے اقدامات کرنے ہوں گے۔ آخر میں وزیر تعلیم نے اس عزم کا اعادہ کیا کہ صوبائی حکومت وزیراعلیٰ خیبر پختونخوا کی ہدایات کی روشنی میں تعلیمی شعبے میں بہتری اور اصلاحات کے سفر کو مزید مؤثر اور نتیجہ خیز بنانے کے لیے عملی اقدامات جاری رکھے گی۔

خیبر پختونخوا وائلڈلائف ڈیپارٹمنٹ نے سیزن 2026-2025 کیلئے پارٹریج شوٹنگ پالیسی کا باقاعدہ اعلان کر دیا ہے۔ اس سلسلے میں چیف کنزرویٹر وائلڈلائف خیبر پختونخوا کی جانب سے جاری اعلامیہ کے مطابق سی سی، بلیک، گریے اور چکور پارٹریج کی شوٹنگ صرف اتوار کے روز 16 نومبر 2025 سے 11 جنوری 2026 تک صرف اُن پبلک، کمیونٹی اور نجی گیم ریزروز میں کی جا سکے گی جنہیں اس سیزن کے لئے“اوپن”یعنی کھلاقرار دیا گیا ہے۔ جبکہ اُن گیم ریزروز میں جنہیں“کلوزڈ” بندقرار دیا گیا ہے، شکار بالکل ممنوع ہو گا۔اس سلسلے میں خصوصی پرمٹس متعلقہ قوانین کے تحت جاری کئے جائیں گے اور کسی بھی پرمٹ ہولڈر کو مقرر کردہ بیگ لمٹ سے تجاوز کی ہرگز اجازت نہیں ہو گی۔ خلاف ورزی کرنے والے افراد کے خلاف سخت قانونی کارروائی کی جائے گی۔ کہ چیف کنزرویٹر نے کہا کہ جنگلی حیات کے تحفظ اور گیم انواع کے سائنسی و منظم طریقے سے انتظام کو اولین ترجیح حاصل ہے، لہٰذا تمام شکاری حضرات سے استدعا ہے کہ وہ اعلامیہ میں درج شرائط و ضوابط اور دیگر متعلقہ قوانین و قواعد کی مکمل پابندی کرتے ہوئے ذمہ دارانہ شکار کو یقینی بنائیں۔مزید معلومات اور پرمٹ کے حصول کیلئے شکار کی خواہش مند حضرات دفتر اوقات کار کے دوران متعلقہ کنزرویٹر وائلڈلائف دفاتر سے رابطہ کر سکتے ہیں۔

خسرہ و روبیلا ٹاسک فورس کاجائزہ اجلاس وزیر صحت خلیق الرحمن کی زیرِ صدارت پشاور میں منعقد ہوا، جس میں 17 سے 29 نومبر 2025 کے دوران جاری رہنے والی خسرہ و روبیلا ویکسینیشن مہم کی تیاریوں کا جائزہ لیا گیا۔ اس مہم کا مقصد خیبر پختونخوا کے 37 اضلاع میں 6 ماہ سے 5 سال تک کے بچوں کو حفاظتی ٹیکے لگانا ہے۔اجلاس میں ایڈیشنل چیف سیکرٹری (پلاننگ)، قانون نافذ کرنے والے اداروں کے نمائندے، اور دیگر متعلقہ حکام شریک ہوئے، جبکہ کمشنرز، ڈپٹی کمشنرز، اور ضلعی پولیس افسران نے آن لائن شرکت کی۔اجلاس میں مہم کی مجموعی تیاریوں، خاص کر انتظامی و رابطہ کاری کے امور، ویکسین کی ترسیل، عملے کی تربیت، اور مائیکرو پلاننگ پر غور کیا گیااور اب تک متعلقہ محکموں کی جانب سے پیش کردہ تیاریوں اور پیشرفت پروزیر صحت نے اطمینان کا اظہار کیا۔ وزیر صحت نے اجلاس سے خطاب کرتے ہوئے ویکسینیشن مہم کی اہمیت کو اجاگر کیا اور کہا کہ رواں سال خیبر پختونخوا میں خسرہ سے 25 اموات رپورٹ ہوئی ہیں۔ انہوں نے ہدایت کی کہ ان اضلاع میں جہاں اموات زیادہ رپورٹ ہوئی ہیں، وہاں مہم کے معیار اور مائیکرو پلاننگ پر خصوصی توجہ دی جائے۔یہ فیصلہ بھی کیا گیا کہ مہم سے قبل عوامی آگاہی مہمات کو مؤثر بنایا جائے تاکہ عوام میں خسرہ و روبیلا ویکسینیشن کی اہمیت کے بارے میں شعور پیدا ہو اور زیادہ سے زیادہ شرکت کو یقینی بنایا جا سکے۔ ڈپٹی کمشنرز کو ہدایت دی گئی کہ وہ اپنے اضلاع میں تیاریوں کا اندرونی جائزہ لیں۔ مہم کے حوالے سے عوامی آگاہی کو فروغ دینے کے لیے مختلف سٹیک ہولڈرز، سول سوسائٹی تنظیمیں، تعلیمی حکام، ماہرِ اطفال کی انجمنیں، صحافی، اور سوشل میڈیا ہولڈر کے ساتھ تعارفی و آگاہی اجلاسوں کا سلسلہ تیز کر دیا گیا ہے۔وزیر صحت نے اس عزم کا اعادہ کیا کہ حکومت بچوں کو بیماریوں سے محفوظ رکھنے کے لیے پرعزم ہے، اور تمام محکموں پر زور دیا کہ وہ خسرہ و روبیلا ویکسینیشن مہم کو کامیابی سے ہمکنار کرنے کے لیے اپنے اپنے طورپر بھرپور کوشش کریں۔

خیبرپختونخوا کے وزیر آبپاشی ر یاض خان نے کڑاکڑ ٹنل بونیر کا تفصیلی دورہ کیا اور منصوبے سے متعلق اب تک کی پیش رفت کا جائزہ لیا۔ اس موقع پر پاکستان تحریک انصاف کے چیئرمین بیرسٹر گوہر علی خان کے بھائی احمد خان، محکمہ پی کے ایچ اے، محکمہ آبپاشی اور متعلقہ اداروں کے افسران بھی موجود تھے۔ دورے کے دوران صوبائی وزیر کو متعلقہ افسران نے کڑاکڑ ٹنل بونیر سے متعلق تفصیلی بریفنگ دی اور اب تک کی پیش رفت سے انہیں آگاہ کیا۔ اس موقع پر صوبائی وزیر ریاض خان نے میڈیا سے گفتگو کرتے ہوئے کہا کہ کڑاکڑ ٹنل کی تکمیل سے سوات اور بونیر کے درمیان سفر میں نمایاں آسانی پیدا ہوگی جس سے نہ صرف مقامی عوام کو آمدورفت میں سہولت ملے گی بلکہ سیاحت اور تجارتی سرگرمیوں کو بھی فروغ حاصل ہوگا۔ انہوں نے کہا کہ وزیراعلیٰ خیبرپختونخوا محمد سہیل آفریدی کی قیادت میں صوبائی حکومت صوبے میں مواصلات، سیاحت اور ترقیاتی منصوبوں پر خصوصی توجہ دے رہی ہے تاکہ عوام کو حقیقی معنوں میں ریلیف اور سہولت فراہم کی جا سکے۔ ریاض خان نے کہا کہ یہ منصوبہ قائد عمران خان کے وژن کے عین مطابق ہے جنہوں نے ہمیشہ صوبے کے پسماندہ علاقوں کی ترقی اور سیاحت کے فروغ کو ترجیح دی ہے۔صوبائی وزیر ریاض خان نے متعلقہ افسران کو ہدایت کی کہ اس اہم منصوبے پر جلد از جلد کام مکمل کیا جائے تاکہ عوام اس منصوبے کے ثمرات سے پوری طرح مستفید ہو سکیں۔اس موقع پر صوبائی وزیر آبپاشی ریاض خان نے محکمہ آبپاشی کے متعلقہ افسران کو ہدایت جاری کرتے ہوئے کہا کہ دریائے سوات سے کڑاکڑ ٹنل کے راستے بونیر تک پائپ لائن کے ذریعے پانی کی فراہمی کے منصوبے کی فیزیبلٹی رپورٹ تین دن کے اندر مکمل کی جائے تاکہ اس اہم منصوبے پر جلد از جلد عملی کام کا آغاز کیا جا سکے۔ صوبائی وزیر نے کہا کہ یہ منصوبہ علاقے کی زرعی ترقی اور عوامی فلاح و بہبود کے لیے نہایت اہمیت کا حامل ہے۔ اس منصوبے کی تکمیل سے بونیر کے عوام کو پانی کی فراہمی میں نمایاں بہتری آئے گی اور زرعی سرگرمیوں کو فروغ ملے گا۔ انہوں نے کہا کہ محکمہ آبپاشی چیف انجینئر کی نگرانی میں سروے ٹیم پوری لگن، دیانتداری اور شفافیت کے ساتھ اپنی ذمہ داریاں نبھائیں۔