وزیر اعلی خیبر پختونخوا کے معاون خصوصی برائے صنعت وحرفت اور فنی تعلیم عبدالکریم تورڈھیر کی زیر صدارت محکمہ صنعت کے کمیٹی روم میں بدھ کے روز ”نمک منڈی جیمز پروسیسنگ اینڈ ایکسپورٹ سنٹر” کے نئے منصوبے کے قیام کے حوالے سے متعلقہ محکموں اور اداروں کو دئیے گئے اہداف پر اب تک کی پیش رفت کے حوالے سے جائزہ اجلاس منعقد ہوا۔اجلاس میں سپیشل سیکریٹری صنعت محمد انور خان،ایڈیشنل سیکریٹریز شمع نعمت اور شہاناکے علاؤہ سینئر پلاننگ آفیسر باسط خلیل، ڈپٹی پوسٹ ماسٹر جنرل زرغام عباس،کے پی ایزڈمک،بورڈ آف انوسٹمنٹ اینڈ ٹریڈ و دیگر اداروں کے افسران،آل پاکستان کمرشل ایکسپورٹر ایسوسی ایشن کے عہدیدار سرتاج احمد خان و دیگر نے شرکت کی۔اجلاس میں اس اہم منصوبے کو عملی جامہ پہنانے کیلئے اب تک کی گئی کوششوں اور حاصل کردہ اہداف سے فورم کو آگاہ کیا گیا۔اس موقع پر بتایا گیا کہ بی آر ٹی کے چمکنی کے مقام پر واقع پلازے میں مذکورہ منصوبے کے قیام پر تمام سٹیک ہولڈرز کا اتفاق ہوا ہے اس حوالے سے متعلقہ محکمہ سے تحریری درخواست کی گئی ہے۔اس طرح مذکورہ عمارت میں عالمی معیار کے مطابق تمام داخلی سہولیات فراہم کرنے کیلئے کنسلٹنٹ کو ڈیزائن مرتب کرنے کی ذمہ داریاں سونپی گئیں ہیں۔اجلاس میں اس منصوبے کے جلد از جلد قیام کے حوالے سے تمام اداروں نے اپنی متعین ذمہ داریوں میں اب تکی کی گئی پیش رفت سے فورم کو آگاہ کیا۔اس موقع پر معاون خصوصی نے ہدایت کی کہ محکمہ صنعت اور تمام اداروں کو حوالہ کی گئی ذمہ داریوں پر کام کی رفتار کو تیز کیا جائے اور اس منصوبے کو جلد از جلد عملی جامہ پہنانا ہے لہذا اس کو غیر ضروری طوالت سے بچا کر مختصر وقت میں تمام درکار مراحل کو طے کیا جائے۔انھوں نے کہا کہ مجوزہ عمارت میں عالمی معیارات کے تحت تمام سہولیات کی دستیابی کیلئے متعلقہ کنسلٹنٹ ایک بہترین ڈیزائن تیار کریں جبکہ تمام ملحقہ اداروں سے جڑے معاملات کو تیزی کیساتھ نمٹایا جائے تاکہ معاشی ترقی کا یہ اہم منصوبہ ممکنہ طور پر جلد از جلد مکمل ہو سکے۔

وزیر اعلیٰ خیبر پختونخوا کے مشیر برائے اطلاعات و تعلقات عامہ بیرسٹر ڈاکٹر سیف نے کہا کہ الیکشن ایکٹ میں ترمیم سپریم کورٹ کے فیصلے کی کھلم کھلا خلاف ورزی ہے۔سپریم کورٹ فیصلے کے بعد الیکشن ایکٹ میں ترمیم کرنے سے مینڈیٹ چور توہین عدالت کی مرتکب ہوئی۔ سپریم کورٹ سے ازخود نوٹس لینے کی اپیل ہے۔ یہ قانون بدنیتی پر مبنی ہے اور مفاد عامہ کے خلاف ہے۔ ان خیالات کا اظہار انہوں نے یہاں سے جاری اپنے ایک بیان میں کیا۔ بیرسٹر سیف نے واضح کیا کہ ایسے ہی اقدامات کے نتیجے میں حسینہ واجد کا دھڑن تختہ ہو گیا۔ الیکشن ایکٹ میں ترمیم کرکے جعلی حکومت اداروں کو لڑانے کی کوشش کررہی ہے۔ قومی اسمبلی اور سینٹ سے ایک دن میں قانون پاس کرنا آئین وقانون کے ساتھ مذاق ہے۔ شریف خاندان نے ملک کو بنانا ریپبلک بنایا ہوا ہے۔ شریف خاندان شیخ حسینہ کی روش پر چل رہی ہے انجام بھی وہی ہوگا۔ فسطائیت کا انجام شریف خاندان کے لئے خوفناک ثابت ہوگا۔ ملک بچانے والی پارٹی اس وقت صرف تحریک انصاف ہے۔ عمران خان کی سربراہی میں پی ٹی آئی ملک کو موجودہ دلدل سے نکال سکتی ہے۔ مینڈیٹ چور وفاقی حکومت پی ٹی آئی کی مخصوص نشستوں سے بوکھلاہٹ کا شکار ہے۔ الیکشن ترمیمی ایکٹ کا مقصد پی ٹی آئی کو مخصوص نشستوں سے محروم رکھنے کی ناکام کوشش ہے۔ مینڈیٹ چور سرکار کو علم ہونا چاہیے کہ مخصوص نشتوں پر سپریم کورٹ کا فیصلہ موجود ہے۔ سپریم کورٹ فیصلے کے مطابق پی ٹی آئی خواتین اور اقلیتوں کی مخصوص نشستیں لینے کی حقدار ہے۔ پی ٹی آئی مخصوص نشستیں حاصل کرنے کی قانونی و آئینی حقدارجماعت ہے۔ سپریم کورٹ فیصلے کے بعد پی ٹی آئی پارلیمنٹ میں اکثریتی جماعت بن چکی ہے اور مینڈیٹ چور سرکار عدم اعتماد تحریک سے خائف ہے۔

وزیر اعلیٰ خیبر پختونخوا کے مشیر برائے کھیل اورامور نوجوانان سید فخر جہان نے یوم استحصال کشمیر کے موقع پر جاری کردہ اپنے پیغام میں کہا ہے کہ بھارت نے 5 اگست 2019 کو جموں و کشمیر کی خصوصی حیثیت کو ختم کرکے کشمیریوں کی شناخت،ثقافت اور بنیادی حقوق پر حملہ کیا ہے جو بین الاقوامی قوانین کی کھلم کھلا خلاف ورزی ہے۔انھوں نے کہا کہ یہ دنیا کی تاریخ کا سیاہ ترین دن ہے اور اقوام عالم کو ہندوستان کی اس ظلم و بربریت اور انسانی حقوق کی سنگین خلاف ورزی کا نوٹس لینا ہوگا۔مشیر وزیر اعلیٰ نے کہا کہ ہندوستان چاہے جتنا بھی اپنا محاصرہ جاری رکھے وہ کبھی بھی کشمیر پر اپنے ناجائز اور غیر قانونی قبضے و تسلط کو برقرار نہیں رکھ سکتا۔کشمیر پر ایک دن آزادی کا سورج طلوع ہوگا اور شہیدوں کی قربانیاں رنگ لائیں گی۔انھوں نے کہا کہ اپنے آپ کو نام نہاد بڑا جمہوریہ کہنے والے ہندوستان میں جمہوری اقدار کی قطعی کوئی پاسداری نہیں ہے۔استصواب رائے کشمیری بھائیوں کا دیرینہ اور قانونی حق ہے اور ہندوستان دیر تک اپنے اس ناجائز قبضے کو کشمیریوں کے اوپر برقرار نہیں رکھ سکے گا۔انھوں نے کہا کہ ہم اپنے کشمیری بھائیوں،بہنوں،بچوں،نوجوانوں اور بزرگوں کی حریت کی خاطر قربانیوں کو سلام پیش کرتے ہیں اور دنیا کے مختلف فورمز پر انکی مذہبی،اخلاقی اور سیاسی سپورٹ جاری رکھیں گے۔

وزیر اعلیٰ خیبر پختونخوا کے معاون خصوصی برائے صنعت وحرفت اور فنی تعلیم عبدالکریم تورڈھیر نے کہا ہے کہ یوم استحصال کشمیر منانے کا مقصد کشمیری مسلمانوں کے خلاف ہندوستان کی بربریت اور انکی خصوصی جغرافیائی حیثیت کو ختم کرنے و کشمیر میں طویل محاصرے کے خلاف بھرپور آواز اٹھانا اور دنیا کے سامنے ہندوستان کے داغدار چہرے کو آشکارا کرنا ہے۔انھوں نے 5 اگست یوم استحصال کشمیر کے موقع پر اپنے ایک بیان میں کہا کہ کشمیر میں ہندوستان کی جانب سے دنیا کا طویل ترین کرفیو نافذ ہے اور 2019 میں کشمیر کی خصوصی حیثیت کو ختم کرکے نہ صرف ہندوستان نے انسانی حقوق اور عالمی قوانین کی بدترین خلاف ورزی کی ہے بلکہ اس دن سے آج تک کشمیریوں کے قتل عام کا سلسلہ بھی جاری ہے۔انھوں نے کہا کہ ہندوستان نے زبردستی کشمیر کو اپنے ناجائز قبضے میں رکھا ہوا ہے تاہم ان کا یہ تسلط دیر تک قائم نہیں رہ سکتا۔ہندوستان نے یکطرفہ طور پر کشمیروں سے تو خصوصی خودمختاری کی حیثیت چھینی ہے تاہم اس نام نہاد اقدام سے وہ کشمیروں کے دلوں سے حریت کا جذبہ نہیں نکال سکتے۔انھوں نے کہا کہ کشمیری اپنے کاز میں ایک دن کامیاب ہوں گے۔انکی قربانیاں رنگ لائیں گی اور وہ ہندوستان کے تسلط سے آزاد ہوں گے۔

خیبر پختونخوا کے وزیر لائیو سٹاک، فشریز و کوآپریٹیو فضل حکیم خان یوسفزئی نے اتوار کے روز اپنے حجرہ مکان باغ مینگورہ میں کھلی کچہری کے دوران لوگوں سے ملاقاتیں کیں اور اُن کے مسائل سنے، کھلی کچہری میں مختلف علاقوں سے آئے ہوئے وفود نے انہیں اپنے علاقوں کے مسائل بیان کئے جن میں بعض مسائل کو موقع پر جبکہ باقی کو متعلقہ محکموں کے سربراہان کو حل کرنے کی ہدایات کیں، کھلی کچہری کے دوران صوبائی وزیر فضل حکیم خان یوسفزئی نے عوام سے گفتگو کرتے ہوئے کہا کہ خیبر پختونخوا کی حکومت نے عوام کے مسائل اُن کی دہلیز پر حل کرنے کا عزم کر رکھا ہے ہم عوام کو ایک ایسا نظام ڈیلیور کر رہے ہیں جس میں وہ حقیقی معنوں میں تبدیلی محسوس کریں گے ہماری حکومت نے روایتی خود غرضی کی سیاست کو دفن کردیا ہے انہوں نے کہا کہ موجودہ صوبائی حکومت کرپشن اور بدعنوانی کے خلاف عملی جنگ لڑرہی ہے عوام جب بھی چاہیں تو پاکستان تحریک انصاف کے منتخب ممبران اسمبلی تک رسائی حاصل کرسکتے ہیں ہمارے دفتر اور حجرے کے دروازے عوام کیلئے ہر وقت کھلے ہیں انہوں نے کہا کہ ہم عوام کی ہر مشکل کو حل کرنے کیلئے اپنی بھرپور جدوجہد کررہے ہیں اور عوام کی خدمت میں کوئی کسر نہیں چھوڑینگے۔

شہداء پولیس کی قربانیوں کو خراج تحسین پیش کرتے ہیں۔ صوبائی وزیر اوقاف
صوبائی وزیر اوقاف و مذہبی امور صاحبزادہ محمد عدنان قادری نے یوم شہداء پولیس کے حوالے سے جاری اپنے بیان میں کہا ہے کہ خیبر پختونخوا کی پولیس نے امن و امان کے قیام کے لئے جس جوانمردی سے قربانیاں دیں ہیں اس کی مثال نہیں ملتی، ہمارے پرامن مستقبل کی خاطر ہماری دلیر پولیس کے افسران اور جوان اپنی جانیں نچھاور کرکے شہادت کے عظیم رتبے پر فائز ہوئے ہیں، شہداء پولیس ہمارے ہیروز ہیں ان کی لازوال قربانیوں کو کبھی فراموش نہیں کیا جا سکتا، ہمیں بطور قوم پولیس کی قربانیوں پر فخر ہے اور شہداء کے خاندانوں کے ساتھ اظہار یکجہتی کرتے ہیں، قیام امن کی خاطر اپنے فرائض سرانجام دیتے جام شہادت نوش کرنے والے تمام سویلین اور قانون نافذ کرنے والے اداروں کے اہلکار خصوصاً پولیس کے افسران اور جوانوں کی عظیم الشان قربانیوں کو خراج تحسین پیش کرتا ہوں، آئیں ہم عہد کریں کہ وطن عزیز کی سلامتی اور خوشحالی کے لیے قانون نافذ کرنے والے اداروں کے شانہ بشانہ ہم بھی کسی قسم کی قربانی سے دریغ نہیں کریں گے۔