خیبر پختونخوا کے نگران وزیر برائے صنعت وحرفت،فنی تعلیم اور امور ضم شدہ اضلاع ڈاکٹر عامر عبداللہ نے کہا ہے کہ خصوصی اقتصادی زون رشکئی صوبائی حکومت کا صنعتی ترقی کی جانب سفر کا ایک اہم منصوبہ ہے جس کا قیام سی پیک کے تحت پاکستان اور چین کے باہمی تعاون کے ذریعے عمل میں لایا گیا ہے۔انھوں نے کہا کہ مزکورہ منصوبہ صوبے میں صنعتکاری کے فروغ اور معاشی ترقی کیلئے ایک اہم سنگ میل ثابت ہوگاجبکہ حکومت کی یہ کوشش ہے کہ یہاں پر صنعتیں لگانے والے کاروباری حضرات اور کمپنیوں کو تمام سہولیات دستیاب ہوں۔
ان خیالات کا اظہار انہوں نے بدھ کے روز خصوصی اقتصادی زون رشکئی کا دورہ کرنے کے بعد وہاں پر متعلقہ حکام سے بریفنگ لینے کے موقع پر کیا۔ خیبر پختونخوا اکنامک زونز ڈویلپمنٹ اینڈ منیجمنٹ کمپنی کے چیف ایگزیکٹیو آفیسر جاوید اقبال ودیگر افسران،سی پیک پراجیکٹ کے افسران اور مزکورہ زون کی تعمیراتی کام میں صوبائی حکومت کساتھ کام کرنے والی کمپنی “چائنہ روڈز اینڈ بلڈنگ کمپنی” (سی آر بی سی) کے عہدیدار اس موقع پر موجود تھے۔ نگران وزیر کو اس موقع پر سی پیک کے تحت قائم ہونے والے مزکورہ خصوصی اقتصادی زون کی صنعتی ترقی کیلئے اہمیت،اس کے منفرد خدوخال اور پہلے مرحلے میں اس کی تعمیراتی ڈھانچے کی تکمیل کا عمیق جائزہ پیش کیا گیا۔ اس طرح ان کو آئندہ مراحل میں زون میں فراہم کی جانے والی سہولیات سے بھی اگاہ کیا گیا۔نگران وزیر کو بتایاگیا کہ خصوصی زون کا قیام سی پیک منصوبے کے تحت ملک میں قائم ہونے والے بڑے منصوبوں میں شامل ہے جو خیبر پختونخوا اکنامک زونز ڈویلپمنٹ کمپنی اور چائنہ کی تعمیراتی کمپنی سی آر بی سی کے باہمی اشتراک سے تعمیر کیا جارہا ہے۔ ان کو بتایا گیا کہ زون کے پہلے مرحلے کا تعمیراتی کام تقریبا مکمل کیا جا چکا ہے جبکہ یہ خصوصی زون مجموعی طور پر 1000 ایکڑ رقبے پر مشتمل ہوگا۔ اسی طرح زون میں702 ایکڑ اراضی صنعتی پلاٹس اور 76 ایکڑ کمرشل پلاٹس کیلئے مختص کی گئی ہے۔ ان کو بتایا گیا کہ اقتصادی زون میں صنعتکاری کیلئے نہ صرف ملکی بلکہ غیر ملکی صنعت کاروں اور کاروباری حضرات بھی راغب ہو رہے ہیں جبکہ پہلے مرحلے میں اب تک 18 ملکی اور ایک چینی صنعت کیلئے یہاں پلاٹ فراہم کیئے گئے ہیں۔ان کو بتایا گیا کہ زون میں مطلوبہ معیار کے مطابق تمام سہولیات فراہم کی جارہی ہیں جبکہ اس موقع پر بجلی اور گیس سے متعلق بعض حل طلب امور کے بارے میں نگران وزیر کو آگاہ کیا گیا۔

نگران وزیر اطلاعات،ثقافت و سیاحت خیبر پختونخوا بیرسٹر فیروز جمال شاہ کاکاخیل نے کہا کہ صحافیوں کی فلاح و بہبود کے لئے جرنلسٹ ویلفیئر انڈوومنٹ فنڈ رولز میں ترامیم ضروری ہیں، اس مقصد کے لئے صحافیوں کی مالی مشکلات کو مدنظر رکھتے ہوئے ترامیم تجویز کی جائیں تاکہ صوبائی کابینہ سے اس کی منظوری لی جاسکے، فنڈ رولز میں مالی معاونت کے بعض پہلوؤں پر بات کرتے ہوئے انہوں نے کہا کہ بیروزگاری اور پینشن الاؤنس میں بہتری لانے کی ضرورت ہے تاکہ بیروزگار اور مالی مشکلات سے دوچار سینئر صحافیوں کی بہتر طریقے سے مدد ہو سکے، انہوں نے کہا کہ فنڈ سے متعلق اجلاس باقاعدگی کے ساتھ منعقد کئے جائیں تاکہ مالی معاونت کی درخواستیں تاخیر کا شکار نہ ہوں، یہ احکامات انہوں نے پشاور میں جرنلسٹ انڈوومنٹ فنڈ کمیٹی اجلاس کی صدارت کرتے ہوئے دئے، اجلاس میں سیکرٹری اطلاعات و تعلقات عامہ حکومت خیبرپختونخوا سید جبار شاہ، ڈائریکٹر جنرل اطلاعات و تعلقات عامہ محمد عمران خان، ڈائریکٹر پبلک ریلیشنز لیاقت آمین، پریس رجسٹرار انصاراللہ خلجی کے علاوہ کمیٹی ممبران بجٹ آفیسر محکمہ فنانس محمد ایوب، صدر پریس کلب پشاور ارشد عزیز ملک، صدر مردان پریس کلب بخت محمد اور سینئر صحافی ایم ریاض و دیگر نے شرکت کی. اجلاس کو مختلف صحافیوں کی جانب سے مالی معاونت کے لئے بھیجی گئی درخواستیں پیش کی گئیں جس کی جانچ پڑتال کے بعد مکمل درخواستوں پر مالی معاونت کی منظوری دی گئی جبکہ بعض درخواستیں دستاویزات نا مکمل ہونے پر آئندہ اجلاس میں پیش کرنے کا فیصلہ کیا گیا. اجلاس سے خطاب میں وزیر اطلاعات نے کہا کہ صحافی مشکل حالات میں فرائض انجام دیتے ہیں، خیبرپختونخوا نگران حکومت صحافیوں کی فلاح و بہبود کے لئے تمام وسائل بروئے کار لائے گی. انہوں نے کہا کہ حکومتی معاملات میں شفافیت لانے اور حکومتی اقدامات عوام تک پہنچانے میں صحافیوں کا کلیدی کردار ہے. صحافیوں کی فلاح و بہبود کے لئے قائم جرنلسٹ ویلفیئر انڈوومنٹ فنڈ کا بہتر طریقے سے استعمال یقینی بنانے کے لئے ترامیم لائی جائیں گی تاکہ مشکل وقت میں صحافیوں کو بہتر اور بروقت مدد مل سکے. انہوں نے احکامات دئے کہ مالی معاونت کے لئے درخواست دینے اور دیگر مراحل کو صحافیوں کے لئے آسان بنایا جائے.

خیبرپختونخوا کے نگران وزیر برائے قانون و انسانی حقوق جسٹس ریٹائرڈ سید ارشد حسین شاہ نے کہا ہے کہ بار کونسل میرا گھر ہے۔یہیں سے ہم آگے گئے ہیں اس بات کی خوشی ہوئی کہ وکلاء برداری کی خدمت کا موقع ملا۔آپ کے جو بھی مسائل ہے وہ میرے مسائل ہیں۔بار کونسل ا ور وکلاء کے مسائل ترجیحی بنیادوں پر حل ہونگے۔ انہوں نے ان خیالات کا اظہار سی سی پی او پشاور اشفاق انور کے ہمراہ پختونخوا بارکونسل پشاور میں پولیس پوسٹ کے افتتاح کے موقع پر کیا۔اس موقع پر سی سی پی او اشفاق انور نے گفتگو کرتے ہوئے کہا کہ وکلاء کے ساتھ ہمیشہ سے دوستانہ تعلقات قائم کیے ہیں۔ پولیس اور وکلاء عوام کے مفاد کیلئے کام کرتے ہیں۔وکلاء سے مختلف امور پر رہنمائی لی گئی ہے۔انہوں نے بار کونسل میں پولیس پوسٹ کے قیام کو سراہا۔ نگران صوبائی وزیر جسٹس ریٹائرڈ سید ارشد حسین شاہ نے اظہار خیال کرتے ہوئے مزید کہا کہ بار کونسل کی حفاظت ہم سب کی ذمہ داری ہے۔بیرونی قوتیں ملک میں انتشار پھیلانے کیلئے سازشوں میں مصروف عمل ہیں۔وکلاء ملکی حالات کی بہتر اور ان بیرونی سازشوں کی روک تھام میں اپنا کردار ادا کریں۔ وائس چیئرمین بار کونسل زربادشاہ اور ایگزیکٹو کمیٹی کے ممبران نے صوبائی وزیر قانون کو بار کونسل کے تاریخی پس منظر اور وکلاء برداری کی بہبود کے لیے اٹھائے گئے اقدامات سے آگاہ کیا۔ نیز انہوں نے نگران صوبائی وزیر کی جانب سے بارکونسل و وکلاء برداری کے مسائل میں دلچسپی لینے اور اُن کی بارکونسل آمد کو سراہتے ہوئے ان کا شکریہ ادا کیا، اس موقع پر ملکی سلامتی کیلئے دعا کی گئی۔قبل ازیں نگران صوبائی وزیر برائے قانون و انسانی حقوق جسٹس ریٹائرڈ سید ارشد حسین شاہ کی بار کونسل آمد پر وائس چیئرمین بار کونسل زربادشاہ اور ایگزیکٹو کمیٹی کے ممبران نے انکا استقبال کیا اور انھیں پھولوں کے گلدستے پیش کیے۔بعد ازیں صوبائی وزیر برائے قانون و انسانی حقوق جسٹس ریٹائرڈ سید ارشد حسین شاہ نے بار کونسل کے ریکارڈ روم، سی سی ٹی وی کنٹرول روم، کانفرنس روم، انرولمنٹ روم اور مختلف سیکشنز و دفاتر کا تفصیلی معائنہ کیا۔ وائس چیئرمین بار کونسل نے صوبائی وزیر قانون کو سیکشن کے امور کے بارے میں بریف کیا۔صوبائی وزیر جسٹس ریٹائرڈ سید ارشد حسین شاہ نے بار کونسل کی مجموعی کارکردگی اور وکلاء برداری کے لئے اقدامات کو سراہا۔

خیبر پختونخوا کے نگران وزیر برائے صنعت وحرفت،فنی تعلیم اور امور ضم اضلاع ڈاکٹر عامر عبداللہ نے کہا ہے کہ ہمارے صوبے میں کئی شعبوں میں سرمایہ کاری کرنے اور کاروبار کے وسیع مواقع موجود ہیں۔ ضرورت اس امر کی ہے کہ یہاں پر سرمایہ کاروں اور کاروباری حضرات کو ساز گار ماحول اور سہولیات میسر ہوں۔انھوں نے کہا کہ صوبے کی معاشی ترقی میں نجی سرمایہ کاری اور کاروبار کو تقویت دینے کا کلیدی کردار ہے کیونکہ دنیا کے اکثر ممالک نجی شعبے کو سہولت اور اہمیت دینے کے نتیجے میں ترقی سے ہمکنار ہوئے ہیں لہذا حکومت سرمایہ کاروں اور کاروباری حضرات کو ہر ممکن تعاون فراہم کرنے کی کوشش کرے گی۔ ان خیالات کا اظہار انھوں نے منگل کے روز پشاور کے مقامی ہوٹل میں خیبر پختونخوا میں چھوٹے ودرمیانی درجے کے کاروباری حضرات اور سرمایہ کاروں کی باہمی رابطہ کاری”خیبر پختونخوا ایس ایم ایز اینڈ انوسٹرز نٹ ورکنگ” کے حوالے منعقدہ تقریب سے بطور مہمان خصوصی خطاب کے دوران کیا۔ تقریب کا اہتمام خیبر پختونخوا بورڈ آف انوسٹمنٹ اینڈ ٹریڈ نے یو این ڈی پی کے اشتراک سے کیا تھا جس میں متعلقہ سرکاری اداروں کے حکام،سرمایہ کاروں،کاروباری حضرات،یو ین ڈی پی کے نمائندوں اور دیگر مکاتب فکر کے لوگوں نے شرکت کی۔اس موقع پر نگران وزیر کا کہنا تھا کہ کسی بھی ملک کی ترقی میں نجی شعبے کو تقویت دینے اور سرمایہ کاری کا بڑا عمل دخل ہوتا ہے۔انھوں نے کہا کہ دنیا کی تاریخ میں کچھ ممالک نے اپنے عوام کو غربت سے نکالنے کیلئے تو سرکاری شعبے کا استعمال کیا جبکہ چین جیسے ممالک نے نجی کاروبار اور سرمایہ کاری کیلئے سہولیات اور آسان مواقع دینے کے نتیجے میں ترقی کے منازل طے کئے اور اپنے عوام کو کامیابی کیساتھ غربت کی دلدل سے نکالا۔نگران وزیر کا مزید کہنا تھا کہ ماضی کی 25 سالہ تاریخ اس بات کی بین گواہ ہے کہ ترقی حاصل کرنے والے ممالک میں نجی شعبے کو اہمیت دینے اور سرمایہ کاری کیلئے راستے ہموار کرنے والوں کا تجربہ انتہائی کامیاب رہا۔ان کا مزید کہنا تھا کہ ہمیں صوبے میں ادنی اور درمیانے درجے کے کاروبار کو فروغ دینے اور سرمایہ کاری کیلئے سہولیات فراہم کرنے کیلئے کوششیں کرنی ہیں۔نگران وزیر نے کہا کہ قبائلی علاقوں کے انضمام کے بعد صوبے کی آبادی میں 55 لاکھ نفوس کا اضافہ ہوا ہے۔ان علاقوں کی پا ئیدار ترقی میں حکومتی وسائل پر انحصار نہیں کیا جا سکتا بلکہ انکے کیساتھ ساتھ نجی سرمایہ کاری اور وہاں پر کاروبار کو فروغ دینے کی ضرورت ہے۔ نگران وزیر نے کہا کہ خیبر پختونخوا بورڈ آف انوسٹمنٹ کا مشن صوبے میں سرمایہ کاری کو فروغ دینا اور سرمایہ کاری کے مواقع کو اجاگر کرنا ہے جو صوبے کی معاشی ترقی کیلئے اہم قدم ہے۔ان کا کہنا تھا کہ سرمایہ کاروں اور کاروباری حضرات کو منعقدہ نشست کے ذریعے ایک ہی پلیٹ فارم کے تحت کاروبار شروع کرنے کیلئے نت نئے مفید خیالات کا تبادلہ کرنے کیلئے موقع فراہم کرنا بورڈ کا احسن اقدام ہے جس میں یو این ڈی پی اور مالی معاونت فراہم کرنے والی ایجنسی کا تعاون قابل تعریف ہے۔