وزیر اعلیٰ خیبر پختونخوا کے مشیر کھیل اور امور نوجوانان سید فخر جہان نے ہدایت کی ہے کہ ارباب نیاز سٹیڈیم پشاور کی بہتری کے تعمیراتی منصوبے کا کام ہنگامی بنیادوں پر تیز کیا جائے تاکہ سال رواں یہ اہم منصوبہ ہر حالت میں پایہ تکمیل تک پہنچ سکے۔ان خیالات کا اظہار انہوں نے منگل کے روز پشاور میں ”فیزیبلٹی اینڈ امپروومنٹ آف ارباب نیاز سٹیڈیم پشاور” کے ترقیاتی منصوبے کے تعمیراتی کام کے حوالے سے جائزہ اجلاس کی صدارت کرتے ہوئے کیا۔اجلاس میں ڈائریکٹر جنرل سپورٹس عبدالناصر خان،چیف پلاننگ آفیسر سپورٹس حامد نوید، محکمہ مواصلات و تعمیرات کے چیف میگا پراجیکٹس اعجاز خان،سپرنٹنڈنگ انجینئر قدرت اللہ مروت،ایکسین ریاض بنگش اور دیگر متعلقہ حکام نے شرکت کی۔اجلاس میں مشیر کھیل کو مذکورہ منصوبے پر کام کی رفتار اور اس سلسلے میں حائل روکاوٹوں کے حوالے سے بریف کیا گیا۔اس موقع پر مشیر کھیل نے ہدایت کی کہ صوبے کے اس اہم کھیل کے میدان کا تعمیراتی کام تیز کیا جائے اور اس سال جون تک اس کا سول ورک ہر حالت میں مکمل کیا جائے۔انھوں نے کہا کہ یہ گرانڈ صوبے میں عالمی کرکٹ کی بحالی کیلئے ایک اہم منصوبہ ہے اور ہماری کوشش ہے کہ ہم اس کو جلد از جلد انٹرنیشنل کرکٹ اور دیگر لیگ میچز کیلئے تیار کریں۔ اس حوالے سے محکمہ واپڈا سے بجلی کے سلسلے میں جڑے مسائل کے حل کیلئے اگلے اجلاس میں انھوں نے واپڈا کے متعلقہ حکام کو بھی طلب کرنے کی ہدایت کی۔

وزیراعلیٰ خیبرپختونخوا کی مشیر برائے زکوٰۃ و عشر، سماجی بہبود و ترقی نسواں مشال اعظم یوسفزئی نے کہا ہے کہ ہر افسر و اہلکار کی ایک جگہ پر تین سال سے زیادہ عرصہ تک پوسٹنگ نہیں ہوگی۔ تین سال سے زیادہ عرصے گزارنے والے افسران و اہلکاروں کے تبادلے کیے جائیں گے۔ٹیم ورک کے ساتھ تیز رفتاری سے آگے بڑھنا ہے۔ رمضان دستر خوان کے اعدادوشمار سے روزانہ کی بنیاد پر آگاہ کیا جائے۔ رمضان دستر خوان میں کسی قسم کی غفلت و کوتاہی برداشت نہیں کی جائے گی۔ غریب بیواؤں کو رمضان ریلیف پیکج میں شامل کرنے کیلئے حصوصی اقدامات کریں تاکہ کوئی غریب بیوہ اس پیکج سے محروم نہ رہے۔ دارلامان میں سہولیات کو بہتر بنایا جائے۔ جہاں جہاں زمونگ کور منصوبے کی ضرورت ہو وہاں کی نشاندھی کریں تاکہ اس حوالے سے اقدامات اٹھائے جائیں۔منشیات کی روک تھام کیلئے پولیس اور دوسرے محکموں کے ساتھ ملکر بھرپور مہم چلائیں تاکہ اس ناسور کو معاشرے سے ختم کیا جا سکے۔ان خیالات کا اظہار انہوں نے محکمہ سماجی بہبود کے افسران و ضلعی ڈائریکٹرز کے تعارفی اجلاس کی صدارت کے دوران کیا۔ اجلاس مشیر وزیراعلیٰ مشال اعظم یوسفزئی کو محکمے کے جاری منصوبوں اور مختلف اضلاع میں محکمے کو درپیش مسائل و چیلنجز سے آگاہ کیا۔ اجلاس کے دوران اظہار خیال کرتے ہوئے مشیر وزیراعلیٰ مشال اعظم یوسفزئی نے ہدایت کی کہ اسپیشل ایجوکیشن انسٹیٹیوٹ میں بچوں کے ٹرانسپورٹ کیلئے اقدامات اٹھائیں جہاں ضرورت ہو وہاں کرائے پر گاڑیوں کا انتظام کیا جائے۔ مشیر وزیراعلی مشال اعظم یوسفزئی نے مزید ہدایت کی کہ جہاں بھی خواتین کو کوئی مسئلہ درپیش ہو اس کے حل کیلئے ضلعی ڈائریکٹرز ترجیحی بنیادوں پر اقدامات اٹھایا کریں۔جبکہ غریب بیواؤں کو رمضان ریلیف پیکج میں ترجیحی بنیادوں پر شامل کریں جو کسی وجہ سے احساس پروگرام سے باہر ہیں۔ انہوں نے مزید کہا کہ ڈسٹرکٹ ڈائریکٹرز اپنے اپنے اضلاع میں سروے کرکے اسپیشل بچوں کی صحیح تعداد معلوم کریں۔تاکہ ضرورت کے مطابق اسپیشل ایجوکیشن کے نئے ادارے بنائے جا سکیں۔ زمونگ کور پشاور گرلز کیمپس کو کسی دوسری بلڈنگ شفٹ کرنے کیلئے ضروری اقدامات اٹھائے جائیں۔ مشیر وزیراعلیٰ مشال اعظم یوسفزئی نے ضلعی ڈائریکٹرز کو ہر قسم کے تعاون کی یقین دہانی کروائی اور صوبے کی خدمت ملکر کرنے کا عزم کا اظہار کیا۔

خیبر پختونخوا کے وزیر برائے ابتدائی و ثانوی تعلیم فیصل خان ترکئی نے کہاہے کہ محکمہ تعلیم کے جاری منصوبے بروقت مکمل کئے جائیں تاکہ طلباؤطالبات کے مسائل بروقت حل ہوسکیں۔ انہوں نے پلاننگ حکام کو ہدایات کی ہے کہ جتنے منصوبے پائپ لائن میں ہیں ان کے پی سی ون اوردیگرضروریات بروقت مکمل کریں تاکہ وہ منصوبے بھی متعلقہ فورمز سے منظور کئے جاسکیں۔ انہوں نے کہاکہ منصوبوں پر کام کی رفتار میں بہتری لانے کیساتھ ساتھ ان کی درجہ بندی کریں اور اولین ضرورت کے منصوبے جن سے زیادہ ثمرات مل رہے ہیں ان پر کام پہلے شروع کریں اوردرجہ وائز منصوبوں کی تکمیل کیلئے ٹائم لائن مکمل کریں۔ ان خیالات کا اظہار انہوں نے محکمہ تعلیم کے ترقیاتی بجٹ اجلاس کی صدارت کرتے ہوئے کیا۔ اجلاس میں سیکرٹری ایجوکیشن مسعود احمد اورمحکمہ تعلیم کے دیگرحکام نے شرکت کی۔ بریفنگ کے دوران وزیرتعلیم کو بتایاگیاکہ محکمہ تعلیم کے اس وقت کل 107 منصوبوں پر کام جاری ہیں جن میں بندوبستی اضلاع کے 58، ضم شدہ اضلاع کے 19 اور اے آئی پی کے 30 منصوبے شامل ہیں جن کی بروقت تکمیل ہرصورت یقینی بنائی جائیگی۔ انہیں بتایاگیا کہ ان منصوبوں میں آئی ٹی لیبز، ای سی ای رومز، امتحانی ہالز، سائنس لیبز، سکولوں کی تعمیرو اپ گریڈیشن، سولرائزیشن، کیڈٹ کالجز کا قیام، کمیونٹی سکولز کے قیام اور عوامی فلاح کے دیگر کثیرالمقاصد منصوبے شامل ہیں۔وزیرتعلیم فیصل خان ترکئی نے کہاکہ سابقہ دور حکومت میں بھی تعلیم اولین ترجیح تھی اور سکولوں میں سہولیات کی فراہمی اور دیگر ضروری کاموں پراربوں روپے خرچ کئے جاچکے ہیں اور ترقی کا یہ سفر موجودہ دور حکومت میں بھی جاری رہے گا۔ صوبے میں تعلیم کواولین ترجیح دیکر زیادہ وسائل اس پر خرچ کئے جائیں گے۔جو ترقی کا واحد ذریعہ ہے۔ وزیرتعلیم نے کہاکہ ہمارا بنیادی مسئلہ سکولوں سے باہر بچوں کو لاناہے اور ڈراپ آوٹ شرح کوکم کرنا ہے جبکہ سکولوں میں موجود بچوں کو کوالٹی ایجوکیشن فراہم کرناہے۔انہوں نے حکام کو مزید ہدایات جاری کرتے ہوئے کہاکہ ترقیاتی منصوبوں میں خواتین کی تعلیم اور نئے ضم اضلاع میں تعلیم کی ترقی پرخصوصی توجہ دی جائے تاکہ وہ پسماندہ علاقے بھی ترقی کے سفر میں شامل ہوسکیں۔

وزیر اعلیٰ خیبر پختونخوا علی امین خان گنڈاپور وزارت اعلیٰ کا منصب سنبھالنے کے بعد اپنے پہلے دورے پر ڈیرہ اسماعیل خان پہنچ گئے ہیں۔ ڈیرہ اسماعیل خان آمد پر عوام اور پارٹی کارکنوں نے وزیر اعلیٰ کا پرتپاک استقبال کیا۔ وزیر اعلیٰ علی امین گنڈاپور نے اس موقع پر میڈیا کے نمائندوں سے گفتگو کرتے ہوئے کہا کہ وہ پورے صوبے کے وزیر اعلیٰ ہیں اور پورے صوبے کا امن و امان، ترقی اور عوام کی فلاح و بہبود انکی ذمہ داری ہے۔ صوبے میں جو بھی ترقیاتی کام نہیں ہوئے وہ ترجیحی بنیادوں پر کیے جائیں گے۔ موجودہ صوبائی حکومت کی پہلی ترجیح صوبے میں امن و امان کا قیام ہے جبکہ امن و امان کے حوالے سے مکمل ایک پلان بنایا گیا ہےجس پر جلد عملدرآمد شروع ہوگا۔ انہوں نے مزید کہا کہ پچھلے سال ڈیڑھ سے معطل شدہ صحت کارڈ دوبارہ بحال کر دیا ہے،سرکاری ہسپتالوں کو بہتر کرنا ہے، وہ وقت دور نہیں کہ لوگوں کو پرائیویٹ ہسپتالوں کی ضرورت نہیں ہوگی۔ علی امین نے مزید کہا کہ عمران خان کی حکومت کو ہٹانے کے بعد ملک میں مہنگائی کا طوفان آیا ہے،ملک میں روزگار ہے نہ کاروبار، لوگ مہنگائی کی چکی میں پس رہے ہیں۔ وزیر اعلیٰ کا کہنا تھا کہ ساڑھے آٹھ لاکھ خاندانوں کو باعزت طریقے سے رمضان پیکج دیا جائے گا، لوگوں کو انکا حق دہلیز پر پہنچائیں گے اور تذلیل نہیں کریں گے۔پناہ گائیں دوبارہ کھول دی ہیں اور وہاں پر لوگوں کو تمام سہولیات میسر ہیں۔ وزیر اعلیٰ کا کہنا تھا کہ صوبے کو معاشی لحاظ سے اپنے پاو¿ں پر کھڑا کرنا انکی حکو مت کی ترجیح ہے جبکہ فوڈ سیکیورٹی کے لیے ٹھوس اقدامات وقت کی اہم ضرورت ہے۔سی آر بی سی لفٹ کنال منصوبے پر جلد کام شروع کیا جائیگا جبکہ ٹانک زام اور دیگر چھوٹے ڈیموں پر بھی کام کیا جائے گا۔صوبے کے نوجوانوں کو خود روزگاری کے مواقع فراہم کئے جائیں گے،خواتین کو گھروں میں روزگار اور نوجوانوں کو جدید سکلز ٹریننگز دی جائیں گی۔زراعت اور لائیو اسٹاک کو ترقی دے کر لوگوں کو خود روزگاری کے مواقع فراہم کئے جائیں گے۔ڈی آئی خان کے لوگوں کو کاروبار پر لگانے کے لیے اقدامات کیے جائیں گے۔ اس کے علاوہ صوبے کا ریونیو بڑھانے کے لئے اقدامات کئے جائیں گے، ایسے انقلابی اقدامات کریں گے جن سے خیبر پختونخوا ماڈل صوبہ بن جائے گا۔وزیر اعلیٰ نے ایک سوال کے جواب میں کہا کہ وفاق کے ذمے صوبے کے بقایا جات کی ادائیگی کے لئے وزیر اعظم سے بات ہوئی ہے،یہ بقایا جات صوبے کے عوام کا حق ہے، وفاق نے یہ حق صوبے کو دینا ہوگا۔ہمارا صوبہ سستی بجلی پیدا کر رہا ہے، وہی بجلی ہمیں مہنگے داموں مل رہی ہے، وزیر اعلیٰ کی کرسی پر بیٹھ کر مجھے عوام کا حق ادا کرنا ہے۔اگر میں عوام کا حق ادا نہیں کر سکتا تو پھر اس کرسی پر بیٹھنے کا کوئی فائدہ نہیں، صوبے کے عوام کے حقوق کی جنگ لڑتا رہوں گا۔جس طریقے سے ہمارا مینڈیٹ چوری کیا گیا وہ سب کے سامنے ہے، عوام کا مینڈیٹ چوری ہوا ہے عوام اس پر آواز اٹھائیں۔عمران خان کو ایک چیز کی فکر ہے کہ ملک میں جو حالات چل رہے ہیں ایسا نہ ہو کہ ہم اس جگہ پر چلے جائیں کہ واپسی کا راستہ نہ ہو۔ عمران خان کے دور حکومت میں ملک درست سمت میں چل رہا تھا۔ دو سال کی حکومت نے عوام پر مہنگائی کا طوفان لا کھڑا کیا ہے۔