خیبر پختونخوا میں سرکاری انتظامی ڈھانچے کے اندر شفافیت اور جوابدہی کے عمل کو مزید فروغ دینے کے حوالے سے ایک اعلیٰ سطحی اجلاس سول سیکرٹریٹ پشاور میں منعقد ہوا جس میں قومی احتساب بیورو (نیب) کے چیئرمین لیفٹیننٹ جنرل ریٹائرڈ نظیر احمد بٹ،چیف سیکرٹری خیبرپختونخوا ندیم اسلم چوہدری، آئی جی پولیس اختر حیات خان، ڈی جی نیب خیبرپختونخوا وقار احمد چوہان، انتظامی سیکرٹریز اور دیگر متعلقہ حکام شریک ہوئے۔اجلاس میں سرکاری انتظامی ڈھانچے کے اندر شفافیت اور جوابدہی کے عمل کو مزید فروغ دینے اور احتساب کے عمل کو تقویت دینے اور کرپشن کے خاتمے کیلئے نیب اور خیبر پختونخوا کے محکموں کے درمیان باہمی تعاون کی مربوط کوششوں کو مزید مضبوط کر نے پر زور دیا گیا۔قومی احتساب بیورو (نیب)کے چیئرمین نے اس موقع پر اظہار خیال کرتے ہوئے کہا ہے کہ بیوروکریسی ملک کیلئے ریڑھ کی ہڈی کی حیثیت رکھتی ہے، بیوروکریسی کا ملکی ترقی اور خوشحالی میں اہم کردار ہے،انہوں نے کہا ہمیں وطن عزیزپاکستان کی خدمات میں نمایاں فرائض ادا کرنے کا موقع ملا ہے اس لیئے یہ ہماری ذمہ داری ہے کہ ہم اپنی یہ خدمات پوری دیانت داری سے سر انجام دیتے ہوئے عوام کو ان کی امنگوں کے مطابق بہتر انداز میں شفاف طریقے سے سہولیات فراہم کریں۔ انہوں نے کہا کہ ملک نے جو کچھ ہمیں دیا ہے وہ ہم پر ایک قرض ہے اور ہمیں یہ قرض اپنی خدمات پیش کرتے ہوئے اتارنا ہے۔ ہمیں ملک کی ترقی اور بدعنوانی کے خاتمے کیلئے مل کر کام کرنا ہے۔ پاکستان کو کرپشن سے پاک بنانے کیلئے ہم سب کو مل کر کام کرنا ہوگا۔ بیوروکریسی حکومت کی مشینری ہے نیب کا کردار اس مشینری کو بہترین اور شفاف انداز سے چلانے میں مدد کرنا ہے۔ چیئرمین نیب کا کہنا تھا کہ بدنیتی اور بے نامی شکایات کا ازالہ کرنے کیلئے کام کررہے ہیں اور کسی کا بھی میڈیا ٹرائل نہیں ہونا چاہیے۔ افسران عوامی مسائل کیلئے کھلی کچہریوں کا انعقاد کریں۔ ان کا کہنا تھا کہ ملک میں معاشی سرگرمیوں کو فروغ دینے کی خاطرکاروباری طبقے کیلئے سازگار ماحول فراہم کرنا ہوگا تاکہ وہ ملکی معیشت کو مضبوط بنانے میں اپنا مثبت کردار ادا کرسکیں۔ نیب بطور ادارہ خود احتسابی کے اصول پر کاربند ہے اور ضرورت کے مطابق اصلاحات لائی جا رہی ہیں۔ اس موقع پر چیف سیکرٹری خیبرپختونخوا ندیم اسلم چوہدری نے خطاب کرتے ہوئے کہا کہ یہ اجلاس صوبے میں گڈ گورننس کو فروغ دینے، جوابدہی اور شفاف انتظامی ڈھانچہ بنانے کی جانب ایک اہم قدم ہے۔انہوں نے کہا کہ بیوروکریسی آئین وقانون اور قواعد و ضوابط پر عمل کرتے ہوئے اپنے فرائض سر انجام دے رہی ہے اور اس طرح کے اجلاسوں کے انعقادکے بدولت افسران کو اپنی ذمہ داریاں خوش اسلوبی اور شفافیت سے انجام دینے میں مدد ملے گی اور انکا حوصلہ مزید بڑھے گا۔شرکاء اجلاس نے چیئرمین نیب سے مختلف امور کے بارے میں آگہی بھی حاصل کی اور اوربدعنوانی کے خاتمے اور شفاف نظام کے قیام کے لئے اپنی آرا ء و تجاویز بھی پیش کیں اور شرکاء نے دیانتداری کے اعلیٰ ترین معیار کو برقرار رکھنے کے اپنے عزم کا اظہار کرتے ہوئے بدعنوانی کے خاتمے کے لیے اجتماعی کوششوں کو مزید تیز تر کرنے پر اتفاق کیا۔چیئرمین نیب لیفٹیننٹ جنرل ریٹائرڈ نظیر احمد بٹ نے بعد ازاں چیف سیکرٹری خیبرپختونخوا کو 904.34 ملین ریکوری کاچیک بھی پیش کیا

نگران وزیر اعلیٰ خیبر پختونخوا جسٹس ریٹائرڈ سید ارشد حسین شاہ نے اپنے دورہ ایبٹ آباد کے دوران کمشنر ہزارہ ڈویژن کے دفتر میں ایک اجلاس کی صدارت کی جس میں وزیر اعلیٰ کو ہزارہ ڈویژن کے امن و امان کی مجموعی صورتحال، انتظامی امور اور عوامی مفاد کے جاری ترقیاتی منصوبوں کے بارے میں تفصیلی بریفنگ دی گئی ۔ نگران وزیر اعلیٰ کے مشیر برائے پلاننگ و ڈویلپمنٹ ڈاکٹر سید سرفراز علی شاہ، کمشنر ہزارہ ڈویژن ظہیر الاسلام، ریجنل پولیس آفیسر اعجاز خان کے علاؤہ ضلعی محکموں کے سربراہان نے اجلاس میں شرکت کی۔ وزیر اعلیٰ ارشد حسین شاہ نے پولیس حکام کو ہزارہ ڈویژن میں امن و امان کی صورتحال کو مزید بہتر بنانے کی ہدایت کی ہے اور کہا ہے کہ پولیس فورس کی تمام ضروریات کو بروقت پورا کیا جائیگا۔ وزیر اعلیٰ نے ہزارہ ڈویژن میں جاری ترقیاتی منصوبوں کی سکیورٹی کو مزید بڑھانے جبکہ قراقرم ہائی وے پر مسافروں کے تحفظ کو یقینی بنانے کے لیے ٹھوس اقدامات کرنے کی ہدایت کی ہے اور کہا ہے کہ صوبے میں امن و امان کو بہتر بنانا حکومت کی ترجیحات میں سر فہرست ہے، نگران صوبائی حکومت اس مقصد کے لئے وسائل کی کمی کو کسی صورت آڑے نہیں آنے دے گی اور پولیس کو ہر لحاظ سے مستحکم کیا جائے گا۔
وزیر اعلیٰ نے ہزارہ ڈویژن میں منشیات کے خاتمے کے لیے نتیجہ خیز اقدامات کی بھی ہدایت کی ہے اور کہا ہے کہ منشیات فروش ہماری نوجوان نسل کے دشمن ہیں ان کے ساتھ آہنی ہاتھوں سے نمٹا جائے گا۔ منشیات تیار اور سپلائی کرنے والے بڑے مگر مچھوں کے خلاف کریک ڈاون کیا جائے اور انہیں عدالتوں سے سزا دلوانے کے لیے کیسز کی موثر پیروی کی جائے۔ اجلاس میں نگران وزیر اعلیٰ کو ہزارہ ڈویژن میں مختلف شعبہ جات میں جاری ترقیاتی منصوبوں پر اب تک پیشرفت پر بھی تفصیلی بریفنگ دی گئی ۔ ارشد حسین شاہ نے ہزارہ ڈویژن میں عوامی خدمات کی فراہمی کے عمل کو مزید آسان اور عوام دوست بنانے کی ہدایت کرتے ہوئے کہا کہ سرکاری افسران و اہلکار اس امر کو یقینی بنائیں کہ عوام کو خدمات کے حصول میں کسی قسم کی مشکل پیش نہ آئے، سرکاری دفاتر کے سربراہان خود فیلڈ وزٹ کریں اور صورتحال کا جائزہ لیں۔ وزیر اعلیٰ نے متعلقہ حکام کو ایبٹ آباد سٹی کے نکاس آب لیے بھی پلان مرتب کرنے کی ہدایت کی ہے ۔

خیبر پختونخوا کے نگران وزیر برائے فنی تعلیم،صنعت وحرفت اور امور ضم اضلاع ڈاکٹر عامر عبداللہ نے عصری علوم کے طلبا کو دوران تعلیم مختلف تیکنیکی ہنر اور کورسز سے آراستہ کرنے کی تجویز کو قابل عمل قرار دیتے ہوئے ہیدایت کی ہے کہ اس سلسلے میں ایک تجرباتی منصوبے کاپروپوزل پیش کیا جائے جس میں اس منصوبے کے حوالے سے اعلی تعلیم اور فنی تعلیم کے شعبوں کی شراکت داری کے امکانات،اس منصوبے کی کامیابی اور افادیت واضح ہوں۔اس حوالے سے سول سیکریٹیریٹ پشاور میں نگران وزیر فنی تعلیم،صنعت وحرفت اور امور ضم اضلاع ڈاکٹر عامر عبداللہ کی زیر صدارت ایک اجلاس منعقد ہوا جس میں سیکرٹری اعلی تعلیم ارشد خان اور سیکریٹری صنعت وحرفت سید ذوالفقار علی شاہ کے علاؤہ ڈائریکٹر فنانس ٹیوٹا منیر گل اور چیف اکانومسٹ محکمہ صنعت باسط خلیل نے شرکت کی ۔اجلاس میں جدید دور میں فنی مہارت اور ہنرمندانہ تعلیم وتربیت کی اہمیت کو مدنظر رکھتے ہوئے جنرل ایجوکیشن کے اداروں میں طلبہ کیلئے عصری علوم کیساتھ فنی تربیتی کورسز کو نصاب کا حصہ بنانے اور اس سلسلے میں محکمہ فنی تعلیم اور اعلی تعلیم کے شعبوں کے مابین امکانی شراکت داری کے امور پر تبادلہ خیال ہوا اور اس سلسلے میں اس تجویز کو اہم قرار دیتے ہوئے شرکاہ نے مفید آرا دیں۔اجلاس میں سیکریٹری اعلی تعلیم ارشد خان نے بتایا کہ اس مجوزہ پلان کی کامیابی سے عصری علوم کے گریجویٹس اور ثانوی و اعلی ثانوی سرٹیفیکیٹس کے حصول کے ساتھ ساتھ ہنر حاصل کرنے والے طلبہ بے روزگار نہیں رہ سکیں گے جبکہ ایسے تعلیم یافتہ افراد مارکیٹ میں اپنے لئیے باعزت روزگار بھی حاصل کرسکیں گے۔اس موقع پر نگران وزیر نے مزکورہ تجویز کو مفید قرار دیتے ہوئے کہا کہ اس حوالے محکمہ اعلی تعلیم اور صنعت وحرفت باہمی طور پر ایک معقول اور بہتر پلان پیش کرے جس میں اس مشترکہ کوشش کے ہر پہلو سے فائدے،اس کی کامیابی اور دونوں محکموں کی زمہ دار یوں کا احاطہ واضح کیا گیا ہو۔انھوں نے کہا کہ اس سلسلے میں پائلٹ پراجیکٹ کیلئے مختص کردہ کالجز کا ایک کلسٹر بھی بنا دیا جائے۔

خیبر پختونخوا کے نگران وزیر اطلاعات و تعلقات عامہ،ثقافت و سیاحت بیرسٹر فیروز جمال شاہ کاکاخیل نے کہا ہے کہ حکومت خیبرپختونخوا، ہماری مسلح افواج اور ادارے صوبے میں سیاحت کے شعبے کو سہولیات فراہم کرنے کے لیے پوری طرح پرعزم ہیں، ضروری سہولیات کی فراہمی اولین ترجیح ہے، صوبے میں سیاحوں کی مدد کے لیے ٹورازم پولیسنگ، 24/7 ہیلپ لائن جیسے اقدامات کئے گئے ہیں، پبلک پرائیویٹ پارٹنرشپ کے تحت اقدامات کا خیر مقدم اور حوصلہ افزائی کی جارہی ہے، سیاحتی مقامات میں اضافہ کرتے ہوئے صوبے میں چار انٹگریٹڈ ٹورازم زون قائم کیے جا رہے ہیں جن میں سے ایک چترال میں قائم کیا جارہا ہے. چترال میں سیاحت کے فروغ کیلئے اقدامات کا مربوط سلسلہ بھی شروع کرنے جارہے ہیں، اس سلسلے میں تجاویز اکٹھی کرنے اور مسائل جاننے کے لئے چترال کے حوالے سے ‘چترال سمپوزیم’ کا کامیابی سے انعقاد کیا گیا. اس کامیاب سمپوزیم کے انعقاد میں بھرپور معاونت پر پاک آرمی کے مشکور ہیں. بہترین انتظامات پر محکمہ سیاحت اور کلچر وٹوورزم اتھارٹی کی ٹیم داد کی مستحق ہے، اس موقع پر چترال سے عمائدین، ماہرین، نوجوانوں، میڈیا پرسنز اور دیگر سٹیک ہولڈرز کا چترال سمپوزیم میں بھرپور شرکت پر بھی شکریہ ادا کرتے ہیں. ان خیالات کا اظہار انہوں نے پشاور میں چترال سمپوزیم کے شرکاء سے خطاب میں کیا. شرکاء سے خطاب میں چترال کے حوالے سے بیرسٹر فیروز جمال شاہ کاکاخیل نے کہا کہ چترال جیسے مقامات اپنی متنوع ثقافت، بھرپور روایات، ورثے، ماحول، خوبصورت مناظر اور جنگلی حیات کی وجہ سے خیبرپختونخوا میں منفرد مقام رکھتے ہیں. چترال محفوظ ترین خطہ ہے، یہاں کی ثقافت، خوبصورت مناظر اور قدرتی ماحول اسے منفرد بناتے ہیں۔ چترال کے مختلف تہوار، یہاں پر پولو کا کھیل اور یہاں کی دستکاریاں اسے سیاحوں کے لیے مزید پرکشش بناتی ہے۔ یہاں سیاحت کو فروغ دینے کی ضرورت ہے اور ساتھ ساتھ ماحول اور ثقافت کی حفاظت بھی کرنی ہے۔ یہاں کی فطری ماحول اور مقامات بہت نازک ہیں ہمیں ان کی دیکھ بھال کرنے کی ضرورت ہے۔ اگر ہم ان جگہوں خیال نہیں رکھیں گیتو ہمارے پاس آنے والی نسلوں کے لیے کچھ نہیں بچے گا. اجتماعی طور پر ہمیں کالاش جیسی مقامی ثقافت کا احترام کرنا ہوگا۔ نگران وزیر اطلاعات و تعلقات عامہ، ثقافت و سیاحت خیبرپختونخوا نے خیبرپختونخوا میں سیاحت کے مستقبل پر بات کرتے ہو ئے کہا کہ پاکستان خصوصاً خیبرپختونخوا سیاحت کے حوالے سے دنیا میں منفرد مقام رکھتا ہے۔ صدیوں پرانی تاریخ، قدرتی ماحول، یہاں کی مہمان نوازی اور منفرد ثقافت اسے دنیا میں منفرد بناتی ہیں۔ بدھ مت کے 90 فیصد مقامات خیبر پختونخوا میں ہیں، ملک میں 22000 ہیریٹیج سائٹس ہیں جن میں سے پانچ یونیسکو کی سائٹس ہیں۔ صوبے کے پاس 2000 قیمتی ارٹیکفٹس موجود ہیں جن میں سے صرف 50 فیصد پشاور میوزیم میں نمائش کے لئے رکھے گئے ہیں۔ انہوں نے کہا کہ ہمیں اسے مثبت انداز میں دنیا کے سامنے پیش کرنا ہے. نگران وزیر سیاحت خیبرپختونخوا نے کہا کہ سمپوزیم میں اہم تجاویز پیش کی گئیں ہیں، حکومت تمام اسٹیک ہولڈرز کے درمیان مضبوط ہم آہنگی اور مربوط طریقہ کار کے تحت موثر نفاذ کو یقینی بنائے گی۔ سال 2024 کو صوبے کے لیے سیاحت کے سال کے طور پر منانے کی تجویز پیش کی گئی ہے، جس پر کام ہوگا۔ غیر ملکی اور مقامی سیاحوں کو سیاحتی مقامات تک آسانی رسائی فراہم کرنے کے لیے بہتر سہولتیں فراہم کی جائیں گی۔ سیاحتی مقامات پر آنے والے کسی سیاح کے لیے این او سی کی ضرورت نہیں ہے.

سیکرٹری لائیو سٹاک،ماہی پروری اور کو آپریٹو خیبرپختونخوا ڈاکٹر محمد اسرار نے اینیمل ہسبنڈری ان سروس ٹریننگ انسٹی ٹیوٹ (اے ایچ آئی ٹی آئی) پشاوع کا دورہ کیا اور سنٹر کے مختلف شعبوں کا معائنہ کیا۔اس موقع پر پرنسپل اے ایچ آئی ٹی آئی میاں احد اللہ اور دیگر متعلقہ افسران بھی ان کے ہمراہ تھے۔سیکرٹری لائیو سٹاک نے اپنے دورے کے دوران انسٹی ٹیوٹ کے ٹریننگ فیسیلٹی کلاس روم،زنانہ و مردانہ ہاسٹل سیمینار روم اور دیگر تربیتی حصوں میں کا م کی پیش رفت اور نوعیت کا تفصیل کے ساتھ جائزہ لیا جبکہ اس موقع پر انہیں انسٹی میں جانوروں کے پالنے کی تکنیکی تربیت،مشاورتی خدمات اور کورسز کی تکمیل کے اقدامات اور دیگر سر انجام دیئے جانے والے اہم امور کے بارے میں بریفنگ بھی دی گئی۔سیکرٹری لائیو سٹاک نے انسٹی ٹیوٹ کے جائزہ کے دوران اظہار خیال کرتے ہوئے میٹ ٹریننگ فیسیلیٹی سنٹر کے چلانے میں یونیڈو اور جیکاکے تعاون کو سراہتے ہوئے ان کی جانب سے پاکستان میں اس منصوبے کے لیئے خیبر پختونخوا کا انتخاب کرنے اور پھر اینیمل ہسبنڈری ان سروس ٹریننگ انسٹی ٹیوٹ کی فعالیت کو ترجیح دیتے ہوئے اس منصوبے میں سرمایہ کاری پر ان کا شکریہ ادا کیاجس میں قصابوں کو کچھ عرصہ کے دوران مویشیوں کے ذبح کرنے سمیت اہم امور کی تربیت دی جا ئے گی۔ انہوں نے پرنسپل اے ایچ آئی ٹی آئی کوہدایت کی کہ انسٹی ٹیوٹ کو مزید بہتر بنانے کے لیئے جدید ضروریات اور سہولیات پر مبنی منصوبہ سے متعلق انہیں رپورٹ بھیجیں تاکہ اس انسٹی ٹیوٹ کو مزید بہتر سے بہتر بنایا جاسکے جس سے مویشی پال زمیندار خاطر خواہ فوائد حاصل کر سکیں۔

نگران وزیر اعلیٰ خیبر پختونخوا جسٹس (ر) سید ارشد حسین شاہ نے کہا ہے کہ امن و امان کے قیام اور عوام کے جان و املاک کے تحفظ میں پولیس کا کردار کلیدی اہمیت کا حامل ہے،ملک دشمن عناصر کے خلاف پالیسی بڑی واضح ہے،اس سلسلے میں مرکزی و صوبائی حکومتیں، قانون نافذ کرنے والے ادارے اور عوام سب ایک پیج پر ہیں۔ پورے ملک کا استحکام ضم اضلاع میں امن و استحکام سے وابستہ ہے، سابقہ فاٹا کا انتظامی انضمام تو مکمل ہو چکا مگر مالی انضمام بدستور نامکمل ہے جو خصوصی توجہ کا متقاضی ہے، قومی سطح پر موجودہ مالی عدم استحکام کی وجہ سے ضم اضلاع میں بھی ترقی کا عمل سست روی کا شکار ہے۔ ضم اضلاع کی فنڈنگ کا مسئلہ وزیراعظم کے ساتھ اٹھا رکھا ہے، امید ہے جلد صورتحال بہتر ہو جائے گی۔ ان خیالات کا اظہار انہوں نے جمعرات کے روز وزیر اعلیٰ ہاؤس پشاور میں زیر تربیت اسسٹنٹ سپرٹینڈنٹس آف پولیس (اے ایس پیز) پر مشتمل مطالعاتی دورے کے شرکاء سے خطاب کرتے ہوئے کیا۔ چیف سیکریٹری خیبرپختونخوا ندیم اسلم چودھری، ایڈیشنل چیف سیکریٹری داخلہ عابد مجید اور دیگر متعلقہ حکام بھی اس موقع پر موجود تھے۔ زیر تربیت پولیس افسران کو اس موقع پر محکمہ داخلہ اور محکمہ منصوبہ بندی و ترقیات کے اعلی حکام کی جانب سے صوبے کی ڈیموگرافی، امن و امان کی صورتحال، صوبے میں امن کی بحالی کے لیے اٹھائے گئے اقدامات، ترقیاتی پورٹ فولیو، مجموعی معاشی صورتحال،ضم اضلاع کے مسائل اور دیگر اہم امور پر تفصیلی بریفنگ دی گئی۔ نگران وزیر اعلیٰ سید ارشد حسین شاہ نے مطالعاتی دورے پر آنے والے اے ایس پیز کو خوش آمدید کہتے ہوئے کہا کہ یقینی طور پر آپ لوگوں نے پولیس سروس میں شامل ہونے کے لیے بڑی محنت کی ہے اور ملک و قوم کی خدمت کے لیے خود کو پیش کیا ہے۔ انہوں نے زیر تربیت پولیس افسران سے کہا کہ وہ فرض شناسی، ایمانداری اور حق کی حمایت کو اپنا شعار بنائیں، ظلم اور برائی کے خلاف سینہ سپر رہیں اور مظلوم انسانیت کی حمایت کریں، ہماری زندگی، یہ عہدے اور مرتبے سب امانت ہیں، کوشش کرنی چاہیے کہ ان میں خیانت نہ ہو۔ انہوں نے واضح کیا کہ ملک و قوم کے محافظ ہونے کی وجہ سے پولیس اور دیگر سیکیورٹی فورسز پر بڑی بھاری ذمہ داری ہے،امن و امان کے قیام اور ملک و قوم کے تحفظ میں پولیس نے ہمیشہ کلیدی کردار ادا کیا ہے اور اس مقصد کے لیے بیش بہا قربانیاں دی ہیں۔ خیبرپختونخوا پولیس کے کردار کا تذکرہ کرتے ہوئے ارشد حسین شاہ نے کہا کہ ہمارے جوانوں نے صوبے میں دہشت گردی کا ہمیشہ ڈٹ کر مقابلہ کیا۔ہمارے اداروں کا مورال بلند یے، چیلنجز ضرور ہیں مگر حوصلے بلند ہیں۔ وزیر اعلیٰ نے اس موقع پر ایک سوال کا جواب دیتے ہوئے کہا کہ جو بھی ملک کے خلاف ہے وہ ہم سب کا دشمن ہے، جو ریاست کے آئین کو نہیں مانتا اس کے خلاف سختی سے نمٹا جائے گا۔ وزیر اعلی نے ضم اضلاع میں ترقیاتی و فلاحی عمل کے حوالے سے ایک سوال کے جواب میں کہا کہ ضم اضلاع کی فلاح و ترقی ترجیح یے، اس سلسلے میں باضابطہ منصوبہ بندی کی گئی ہے، تاہم قومی سطح پر مالی مسائل کی وجہ سے ضم اضلاع کی فلاح و ترقی متاثر ہو رہی ہے۔ انہوں نے کہا کہ انضمام کے وقت جو وعدے کیے گئے تھے، بدقسمتی سے ابھی تک پورے نہیں ہوئے، یہی وجہ ہے کہ ضم اضلاع میں ترقی کا عمل رکا ہوا ہے۔ ارشد حسین شاہ کہا کہنا تھا کہ وہ ضم اضلاع کے سلسلے میں نہایت سنجیدہ ہیں اور پر امید ہیں کہ نگران وزیراعظم کے تعاون مسائل پر جلد قابو پا لیں گے۔ انہوں نے کہا کہ نگران صوبائی حکومت ضم اضلاع کے عوام کو درپیش مسائل سے بخوبی واقف ہے اور فلاحی سرگرمیوں میں ان اضلاع کو ترجیح دی جا رہی ہے۔ ہم جلد خوشحال خیبرپختونخوا پروگرام کا اجراء کریں گے جس کے تحت نوجوانوں کو بین الاقوامی مارکیٹ کی ڈیمانڈ کے مطابق فنی تربیت دیکر روزگار کے لیے باہر بھیجیں گے، اس پروگرام کے تحت بھی ضم اضلاع کے نوجوانوں کو پہلی ترجیح دی جائے گی۔ ارشد حسین شاہ کا کہنا تھا کہ حتمی مقصد نوجوانوں کو زیادہ سے زیادہ روزگار کے مواقع فراہم کرکے انہیں منفی سرگرمیوں سے بچانا ہے، اس طرح وہ نا صرف وہ اپنے لیے کمانے کے قابل ہوں گے بلکہ ایک ذمہ دار فرد کے طور پر قومی ترقی و خوشحالی میں بھی کردار ادا کر سکیں گے۔