کمشنر بنوں ڈویژن پرویز ثبت خیل نے کہا ہے کہ بجلی چوری اور کنڈا مافیا کے خلاف ایک جامع و مربوط حکمت عملی تیار کی گئی ہے، جس کا بنیادی مقصد بجلی چوری میں ملوث، اداروں، فیکٹریوں اور افراد کے خلاف کریک ڈاؤن کرنا ہے۔ تاکہ بجلی بل ادا کرنے والے صارفین کو ریلیف مہیا کیا جا سکے۔ اور بجلی چوری کے رواج کو ختم کیا جا سکے۔انہوں نے کہا کہ بنوں ڈویژن میں ساٹھ فیصد سے زائد بجلی چوری ہوتی ہے۔ جس کی روک تھام کیلئے بجلی فراہمی کے نظام کی جدید تقاضوں کے مطابق فیڈر کی سطح پرمکمل اعداد و شمار پیش کرنے کی ضرورت ہے تاکہ ضلع بنوں اور لکی مروت میں اصل بجلی چوروں کے خلاف کارروائی ممکن ہو سکے۔ اور صحیح بلوں کی صحیح ادائیگی کرنے والے صارفین پر بوجھ کم ہو اور انھیں ریلیف بھی ملے۔کمشنر بنوں ڈویژن نے مزید کہا کہ بجلی چوری ٹاسک فورس کو ایک بہتر و موثر نظام کے تحت لانے سے مخصوص فیڈرز میں اصل بجلی چوری کو تلاش کیا جا سکتا ہے۔جن کے خلاف کارروائی کرنے سے کافی حد تک بجلی صارفین کے مسائل و مشکلات پر قابو پا یا جا سکے۔اس لئے واپڈا کے حکام فیڈر کے حساب سے حقیقی اعداد و شمار پیش کریں۔تاکہ بنائی گئی حکمت عملی کے تحت آگے کا لائحہ عمل تیار کرنے میں مدد ملے۔ان خیالات کا اظہار انہوں نے آج اپنے دفتر میں بنوں ڈویژن کے پیسکو حکام کے ساتھ منعقدہ اجلاس میں کیا۔ اس موقع پر ڈپٹی کمشنر بنوں منظور آفریدی،سیکرٹری ٹو کمشنر نور الامین خان،ایڈیشنل ڈپٹی کمشنر شمالی وزیرستان بشیر احمد، اسسٹنٹ کمشنر بیٹنی نجم اللّٰہ داوڑ، اسسٹنٹ کمشنر ڈیویلپمنٹ گل نواز خان سپرنٹینڈنٹ انجنئیر پیسکو بنوں نادرزمان، ایکسیئن بنوں ملک عبد الحفیظ، ایکسیئن شمالی وزیرستان ولایت خان اور ایس ڈی او لکی مروت رفیع اللّٰہ موجود تھے۔ کمشنر بنوں ڈویژن نے اجلاس کو اہم ہدایات و تجاویز جاری کرتے ہوئے کہا کہ بجلی چوری ہو نے کی اصل جگہیں تلاش کرنی ہوگی تاکہ ان کے خلاف بلا تفریق عملی کارروائیاں عمل میں لائی جائیں، جس سے بل ادا کرنے والے صارفین پریشانی سے بچے رہیں گے اور بجلی فراہمی کے نظام کو شفاف بنایا جا سکے گا۔ انہوں نے کہا کہ واپڈا حکام کو اوور بلنگ کرنے میں احتیاط سے کام لینا چاہیے۔ تاکہ صارفین بجلی کے بل کی بروقت ادائیگی یقینی بنائیں اور بجلی لوڈ شیڈنگ میں بھی کافی حد تک کمی ممکن ہو سکے۔اس موقع پر ڈپٹی کمشنر بنوں منظور آفریدی نے بھی مسائل کا ادراک کرتے ہوئے کہا کہ ضلعی انتظامیہ بجلی چوری کے خلاف کارروائی کرنے کیلئے ہمہ وقت تیار ہے۔ تاہم واپڈا حکام بھی اپنی مکمل تیاری کرلیں۔ جس سے انتظامیہ کو کارروائی کرنے میں آسانی ہو۔آخر میں سپرنٹینڈنٹ انجینیئر پیسکو بنوں نادرزمان نے کمشنر بنوں ڈویژن کی تجاویز کا خیر مقدم کرتے ہوئے لگ الگ فیڈروں کے حساب سے حقیقی اعداد و شمار تیار کرنے کا یقین دلایا تاکہ اصل بجلی چوروں کے خلاف کارروائی ہو سکے۔اور بل ادا کرنے والوں کو ریلیف مل سکے۔جس سے ملکی محصولات میں اضافے کے ساتھ ساتھ صارفین کو لوڈ شیڈنگ سے بھی نجات دلائی جا سکے گی۔

ایڈیشنل اسسٹنٹ کمشنر نورنگ گوہر علی نے شہر میں مختلف گوداموں پر چھاپے مارے اور ہزاروں بوری چینی برآمد کر کے متعدد گوداموں کو سیل کردیا گیا۔اس موقع پر ایڈیشنل اسسٹنٹ کمشنر کاکہنا تھا کہ ملک میں چینی کی بڑھتی ہوئی قیمتوں کی اصل وجہ ذخیرہ اندوزی ہے اس لئے ذخیرہ اندوزی کو کسی صورت برداشت نہیں کیا جائے گا۔ انہوں نے کہا کہ اسلام میں بھی ذخیرہ اندوزی جیسا قبیح فعل سے منع کیا گیا ہے۔ گوہر علی نے کہا کہ مصنوعی مہنگائی پیدا کرنے والے عناصر اور ذخیرہ اندوزوں سے آہنی ہاتھوں سے نمٹا جائیگا۔

ڈپٹی کمشنر بنوں کی ہدایت پرریڈیو پاکستان اور پاکستان ٹیلی وژن کے زیر اہتمام آل پاکستان ربیع الاؤل نعت خوانی مقابلے کیلئے ضلع بنوں میں ٹرائلز شرائط و ضوابط کے مطابق ہونگے جس کے مطابق نعت اردو میں ہوگی اورملی نغموں کی طرز پر نعت ناقابل قبول ہوگی، اسی طرح مقابلے میں حصہ لینے کیلئے فارم ب یا شناختی کارڈ ضرور لانا لازمی ہوگا۔ نعت خواں معروف کلام کا انتخاب کریں اور صرف نعت پڑیں جس میں نبی رحمت علیہ سلام کی تعریف و توصیف ہو.
ہر نعت خواں کو صرف تین اشعار پڑھنے کی اجازت ہوگی۔

اسسٹنٹ کمشنر بنوں سید ابرار علی شاہ نے ایس ڈی او پیسکو کے ہمراہ نیو سبزی منڈی میں بجلی چوری کے خلاف اپریشن جاری کیا۔آپریشن کے دوران متعدد غیر قانونی بجلی کے کنڈے ہٹائے گئے جبکہ بجلی چوری میں ملوث8 افراد کے خلاف ایف آئی آر کا اندراج بھی کیا۔اس موقع پر اے سی نے کہا کہ بجلی کی مسلسل فراہمی اور لوڈشیڈنگ سے نجات کا واحد حل بجلی میٹرز کی تنصیب، کنڈا کلچر کا خاتمہ اور بقایا جات کی ادائیگیاں ہیں اس لئے بجلی چوری سے اجتناب کر کے صحیح طریقے سے بجلی کا استعمال کیا جائے۔ انہوں نے کہا کہ ملک میں بجلی چوری کی وجہ سے لوڈ شیڈنگ کی جارہی ہے اور عوام پر اس کا اثر پڑتا ہے اس لئے اس فعل سے توبہ کر کے ملک کو ترقی پر گامزن کرنے کا عہد کر کے ذمہ داری شہری ہونے کا ثبوت دیں۔

ڈپٹی کمشنر سوات عرفان اللہ خان وزیر کی زیر صدارت ضلعی امن و بین المذاہب ہم آہنگی کمیٹی برائے اقلیتی برادری کے مختلف مسائل کے حوالے سے اجلاس منعقد ہوا۔اجلاس میں بذریعہ ویڈیو لنک اسسٹنٹ کمشنر بحرین سکندر خان، اسسٹنٹ کمشنر مٹہ،خوازہ خیلہ،چارباغ،اقلیتی برادری (سکھ، ہندو، عیسائی/مسیح) اورتحصیل خطیب بابوزئی نے بھی شرکت کی۔اجلاس میں اقلیتی برادری (سکھ، ہندو، عیسائی/مسیح) کمیونٹی کے بنیادی مسائل، سرکاری محکموں کے خالی اسامیوں میں اقلیتی برادری کے 5 فیصد کوٹہ اور دیگر بنیادی ضروریات کے متعلق تبادلہ خیال کیا گیا۔ اجلاس سے خطاب کرتے ہوئے ڈپٹی کمشنر سوات عرفان اللہ خان وزیر نے کہا کہ صوبائی حکومت کے احکامات کی روشنی میں اقلیتی برادری کے مسائل کے حوالے سے ماہانہ بنیادوں پر ایڈوائزری کمیٹی کے اجلاس کا انعقاد کیا جارہا ہے تاکہ محکمہ جات اور انتظامی افسران کی موجودگی میں ان کے مسائل کو متعلقہ فورم کے ذ ریعے ترجیحی بنیادوں پر حل کیا جاسکیں۔اجلاس کے آخر میں تمام اقلیتی کمیٹی کے ممبران نے ڈپٹی کمشنر سوات عرفان اللہ خان وزیر کا شکریہ ادا کیااور کہا کہ پاکستان میں اقلیتی
برادری کو اپنا پورا حق حاصل ہے اور پرامن اپنی زندگی گزار رہے ہیں۔

دیر بالا میں چینی ذخیرہ کرنیوالوں کیخلاف کارروائیاں جاری ہیں۔ ضلعی انتظامیہ نے تازہ کاروائی کے دوران مختلف گوداموں سے 14 ہزار چینی کے تھیلے برآمد کرکے ضبط کرلئے جبکہ 7 گودام سیل کردئیے۔ اس کے علاؤہ تین افراد کیخلاف ایف آئی آر درج کرلی گئی۔ ڈپٹی کمشنر دیر بالا گوہر زمان کے ہدایات کی روشنی میں اسسٹنٹ کمشنر ہیڈ کوارٹر نے کاروائی کرتے ہوئے دیر شہر میں 10 ہزار چینی کے تھیلے بر آمد کرکے ضبط کرلئے جبکہ ایک تاجر کیخلاف ایف آئی آر درج کیا گیا۔انہوں نے چار گوداموں کو سیل کردیا۔ اس کے علاوہ اسسٹنٹ کمشنر واڑی نے مختلف گوداموں پر چھاپے مارے ، اس موقع پر چار ہزار چینی کے تھیلے برآمد کرکے دو تاجروں کیخلاف ایف آئی آر درج کردی اور تین گوداموں کو سیل کردیا۔

ضلعی انتظامیہ باجوڑ اور محکمہ کھیل کے زیر اہتمام باجوڑ سپورٹس کمپلیکس میں باجوڑ کرکٹ لیگ ”BCL” کی ٹرافی رونمائی اور افتتاحی تقریب کا انعقاد کیا گیا۔ تقریب میں باجوڑ کرکٹ لیگ کے چیئرمین ڈپٹی کمشنر محمد انوار الحق نے بطورِ مہمان خصوصی شرکت کی۔ افتتاحی تقریب میں انتظامی افسران، پولیس،ضلعی عمائدین، سیاسی وسماجی مشران، ڈسٹرکٹ سپورٹس ایسوسی ایشن ضلع باجوڑ کے مختلف علاقوں سے تعلق رکھنے والے کھلاڑیوں اور مقامی لوگوں نے کثیر تعداد میں شرکت کی۔ تقریب سے خطاب کرتے ہوئے ڈپٹی کمشنر نے کہا کہ کھیل کود صحت مند معاشرے کی علامت ہے اور تمام شہریوں کو کھیلوں کی سرگرمیوں میں بڑھ چڑھ کر حصہ لینا چاہئے اورکھیلوں کے میدان میں ملک اور قوم کا نام روشن کرنا چاہیے۔ باجوڑ کرکٹ لیگ کے چیئرمین ڈپٹی کمشنر نے باجوڑ کرکٹ لیگ کے کامیاب تقریب کے انعقاد پر سپورٹس ایسوسی ایشن اور مینجمنٹ اور تمام منتظمین کا شکریہ ادا کیا۔تقریب کے اختتام پر ڈپٹی کمشنر باجوڑ محمد انوار الحق، اسسٹنٹ کمشنر خار محب اللہ خان یوسفزئی، ڈسٹرکٹ سپورٹس آفیسر نے ونر ٹیم اور کھلاڑیوں میں شرٹ تقیسم کئے۔دریں اثناء سپورٹس کمپلیکس باجوڑ میں کھیلے گئے فائنل میچ میں اتمانخیل ایگل نے سالارزئی ایلون کو ایک شاندار مقابلے میں شکست دے کر پہلی بار اتمانخیل ایگل نے فائنل میچ اپنے نام کرلی۔ میچ کے اختتام پر مہمان خصوصی ڈپٹی کمشنر باجوڑ محمد انور الحق نے کھلاڑیوں میں انعامات تقسیم کئے۔ اس موقع پر ڈسٹرکٹ سپورٹس آفیسر تاج محمد وزیر، اسسٹنٹ کمشنر خار محب اللہ، اسسٹنٹ کمشنر ریونیو فیض محمد، مختلف لائن ڈیپارٹمنٹس کے سربراہان، علاقائی اور سیاسی جماعتوں کے مشران بھی موجود تھے۔ ڈپٹی کمشنر نے میچ میں بہترین کارکردگی پر ڈاکٹر سبحان الدین کو مین آف دی میچ اور محمد خان کو مین آف دی سیریز ٹرافی اور نقد انعامات سے نوازا۔ ڈپٹی کمشنر نے فائنل میچ میں بہترین کارکردگی پر اتمانخیل ایگل کو مبارکباد دی اور ونر کپتان ڈاکٹر سبحان الدین کو ٹرافی سے نوازا