خیبر پختونخوا کے وزیر صحت سید قاسم علی شاہ کی طرف سے کینٹ جنرل ہسپتال پشاور کو ادویات کا عطیہ دیا گیا ہے، ادویات کا عطیہ ممبر کینٹ بورڈ محمداُسید سیٹھی اور ایگزیکٹیو آفیسر کینٹ بورڈ پشاور کی درخواست پر فراہم کیا گیا۔ وزیر صحت کا اس موقع پر کہنا تھا کہ کینٹ بورڈ ہسپتال نوتھیہ، سواتی پھاٹک، گلبرگ، لال کرتی، کالا باڑی اور لنڈی ارباب سمیت دیگر ملحقہ علاقوں کے عوام کو صحت کی بہتر خدمات فراہم کررہا ہے۔ انہوں نے مزید بتایا کہ ان ادویات میں گولیاں، شربت وائل و دیگر ضروری ادویات شامل ہیں۔ وزیر صحت سید قاسم علی شاہ نے یہ بھی بتایا کہ اس اقدام سے ملحقہ علاقوں کے عوام کو صحت کی بہترین سہولیات مہیا ہونگیں جبکہ ادویات کی بلا تعطل فراہمی بھی یقینی ہو جائے۔ ادویات کی فراہمی پر کینٹ بورڈ کے وائس پریزیڈنٹ ید اللہ بنگش، ممبر محمد اسید سیٹھی، نعیم بخش نعمان فاروق اور علی جان نے عوام کی جانب سے وزیر صحت کا شکریہ ادا کیا ہے۔

وزیر اعلی خیبر پختونخوا کے معاون خصوصی برائے صنعت وحرفت اور فنی تعلیم عبدالکریم تورڈھیر نے حیات آباد پشاور میں پاکستان انجینئرنگ کونسل کے تعاون سے انجینئرنگ یونیورسٹیوں کے ساتویں فائنل ائیر انجینئرنگ ڈیزائن پراجیکٹس ایکسپو 2024 کا باقاعدہ افتتاح کردیا۔ مذکورہ نمائش میں صوبہ بھر کی مختلف انجینئرنگ یونیورسٹیوں کے طلبہ کی جانب سے تیار کردہ مختلف انجینئرنگ پراجیکٹس کے ماڈلز رکھے گئے تھے۔نمائش کی منعقدہ تقریب میں پاکستان انجینئرنگ کونسل کے ایڈوائزر انجینئر میر مسعود رشید، ایڈیشنل رجسٹرار انجینئر جہانزیب خان اور متعدد یونیورسٹیوں کے وائس چانسلرز و دیگر حکام نے شرکت کی۔ معاون خصوصی نے نمائش میں یونیورسٹیوں کے طلبہ کی جانب سے بنایے گئے انجینئرنگ ماڈلز کا معائنہ بھی کیا اور ان میں گہری دلچسپی ظاہر کی جبکہ طلبہ کی تخلیقی کوششوں پر انکی حوصلہ افزائی کی۔انھوں نے اس موقع پر پاکستان انجینئرنگ کونسل کے تعاون سے چھ مہینے پر محیط فیلڈ انٹرنشپ مکمل کرنے والے انجینئرنگ طلبہ میں سرٹیفیکیٹس بھی تقسیم کیئے۔معاون خصوصی نے منعقدہ تقریب سے خطاب کرتے ہوئے کہا کہ مختلف انڈسٹریز میں تیکنیکی تربیت کیلئے 5 فیصد طلبہ کو انٹرنشپ پر رکھنے کیلئے ایکٹ بن گیا ہے اور اب اس کے لئے رولز بنیں گے تاکہ بلاکسی مالی مشکلات طلبہ پریکٹیکل ہنر سیکھیں۔انھوں نے کہا کہ ہماری یہ سوچ ہے کہ یونیورسٹیوں اور فنی تعلیمی اداروں کے سلیبس میں انٹرپرینیورشپ کا جز ہونا چاہیئے کیونکہ عملی زندگی میں کامیاب لوگوں نے اپنی کیرئر کا آغاز ہی انٹرپرینیورشپ سے کیا ہے۔انھوں نے کہا کہ صوبائی حکومت سٹارٹ آپس اور کلسٹر ڈویلپمنٹ کیلئے 5 ارب روپے تک کے مفت قرضہ جات کا بڑا منصوبہ شروع کررہی ہے جس سے طلبہ استفادہ اٹھا سکتے ہیں۔معاون خصوصی نے طلبہ سے کہا کہ ہماری نسل میں کسی بھی چیز کی کمی نہیں اور وہ انتہائی ذہین اور باصلاحیت ہیں لہذا وہ اپنی تخلیقات اور برانڈز کو کارامد بنانے کیلئے ان کی مارکیٹنگ کریں جبک بورڈ آف انوسٹمنٹ کے ذریعے بھی وہ مدد لے سکتے ہیں۔انھوں نے کہا کہ طلبہ اپنی ان تخلیقات کو پھیلائیں کیونکہ ہم نے ہر پہلو سے اس صوبے کو اٹھانا ہے۔انھوں نے اس موقع پر ایکسپو کے انعقاد پر پاکستان انجینئرنگ کونسل کا شکریہ ادا کیا اور طلبہ کو حکومت کی جانب سے ہر ممکن تعاون کا یقین دلایا۔تقریب کے آخر میں معاون خصوصی کو پی ای سی کی جانب سے شیلڈ بھی پیش کی گئی۔

خیبر پختونخوا کے وزیر برائے مال نذیر احمد عباسی نے کہا ہے کہ ضلع ایبٹ آباد میں سکولوں کی خستہ حالی، بنیادی ضروریات اور اساتذہ کی کمی کو پورا کرنے کیلئے ترجیحی بنیادوں پر اقدامات اٹھائے جارہے ہیں۔ اسی سلسلے میں صوبائی وزیر مال کے ساتھ ڈائریکٹریس ایلیمنٹری اینڈ سیکنڈری ایجوکیشن ثمینہ الطاف کی منگل کے روز پشاور میں ملاقات ہوئی۔ ملاقات میں ضلع ایبٹ آباد کے تعلیمی اخراجات، مسائل اور دیگر آمور پر تفصیلی تبادلہ خیال کیا گیا۔صوبائی وزیر مال نے ہدایت کی کہ ضلع ایبٹ آباد کے بچے اور بچیوں کو معیاری تعلیم دلوانے، دور جدید کے تقاضوں کے مطابق تعلیم کے حصول کو ممکن بنانے اور بہترین تعلیمی ماحول فراہم کرنے کیلئے محکمہ تعلیم کی تمام تر صلاحیتیں اور وسائل کو بروئے کار لایا جائے اور اس زمرے میں کسی قسم کی کوتاہی کو برداشت نہیں کیا جائے گا۔ انہوں مزید ہدایت کی کہ پہاڑی علاقے ہونے کے ناطے اکثر دور دراز کے سکولوں میں اساتذہ کی کمی اور غیر حاضری کی شکایات موصول ہوتی ہیں جن کا فوراً حل نکلوایا جائے اور سکولوں میں اساتذہ کی کمی کو پورا کرنے کے ساتھ ساتھ ان کی حاضری کو بھی یقینی بنوانے کیلئے ٹھوس اقدامات اٹھائے جائیں۔ڈائریکٹریس ایلیمنٹری اینڈ سیکنڈری ایجوکیشن ثمینہ الطاف نے صوبائی وزیر مال کو ضلع ایبٹ آباد کے تعلیمی نظام کو بہتر بنانے اور سکولوں کو جدید تعلیمی سہولیات سے آراستہ کرنے کے حوالے سے یقین دہانی کروائی اور کہا کہ تعلیمی ایمرجنسی کے نام سے ضلع ایبٹ آباد کے لیے ایک جامع پلان تیار کروایا جائے گا جس کے تحت ضلع کے تمام تعلیمی مسائل کو ہنگامی بنیادوں پر جلد از جلد حل کروانے میں مدد ملے گی۔

> مشیر کھیل سید فخر جہان کی تقریب میں بطور مہمان خصوصی شرکت

خیبر پختونخوا رائٹرز ایسوسی ایشن نے پاکستان سپورٹس رائٹرز فیڈریشن اور سپورٹس جرنلسٹس کی عالمی تنظیم اے آئی پی ایس کے تعاون سے ورلڈ جرنلسٹس ڈے منایا جبکہ اس موقع پر اے آئی پی ایس کے سو سال مکمل ہونے پر سالگرہ کیک بھی کاٹا گیا۔ وزیر اعلیٰ خیبر پختونخوا کے مشیر برائے کھیل اور امور نوجوانان سید فخر جہان اس حوالے سے صوبائی اسمبلی سیکرٹریٹ میں منعقدہ پر وقار تقریب میں مہمان خصوصی تھے۔ تقریب میں کرکٹر محمد رضوان، سکواش کے سابق عالمی چیمپئن شپ قمر زمان، اے آئی پی ایس ایشیا کے سیکرٹری امجد عزیز ملک، پشاور پریس کلب کے سابق صدر ایم ریاض، سپورٹس رائٹرز ایسوسی خیبر پختونخوا کے صدر عاصم شیراز، سابق اولمپئن رحیم خان، پاکستان سائیکلنگ فیڈریشن کے صدر سید اظہر علی شاہ، پشاور ڈسٹرکٹ کرکٹ ایسوسی ایشن کے سابق صدر اصغر علی خان، سابق ایم پی اے ڈاکٹر ذاکر شاہ، کھلاڑیوں، آرگنائزرز، خصوصی کھلاڑیوں، سپورٹس جرنلسٹس اور زندگی کے دیگر شعبوں سے تعلق رکھنے والے افراد نے شرکت کی۔ عالمی یوم اس عزم کے ساتھ منایا گیا کہ سوشل میڈیا کے عروج میں فیک نیوز کی روک تھام کے لئے سپورٹس جرنلسٹس کی استعداد کار بڑھائی جائے گی جس کے لئے ورکشاپس اور سیمینار کا انعقاد کیا جائے گا۔ وزیر اعلیٰ کے مشیر سید فخر جہان نے عالمی یوم کے موقع پر سپورٹس جرنلسٹس اور اے آئی پی ایس کو مبارکباد دی اور کہا کہ کھیلوں کے فروغ اور کھلاڑیوں کی فلاح وبہبود میں سپورٹس جرنلسٹس کا بڑا کردار ہے۔انھوں نے کہا کہ صحافی مثبت انداز میں کام کر کے صوبے اور کھلاڑیوں کو قومی اور عالمی سطح پر روشناس کرا رہے ہیں۔ انہوں نے کہا کہ انٹرپراونشل گیمز اور ٹیلنٹ ہنٹ پروگرام کا انعقاد کیا جائے گا۔ ہارس شو بھی ہوگا جبکہ رائیڈنگ کلب اور کھیلوں کے میدان بنا رہے ہیں۔انھوں نے کہا کہ حیات آباد سپورٹس کمپلیکس کو مکمل کرلیا ہے اورقیوم سپورٹس کمپلیکس میں چھوٹے چھوٹے کام جلد مکمل کئے جائیں گے۔مشیر کھیل کا مزید کہنا تھا کہ ضم اضلاع میں چار سپورٹس کمپلیکس تکمیل کے مراحل میں ہیں اور کوشش کر رہے ہیں کہ ستمبر میں ان کا افتتاح کیا جائے۔انھوں نے کہا کہ سکول سطح پر کرکٹ ٹیلنٹ ہنٹ پروگرام کرایا جائے گا اورملک اور بیرون ملک کھیلنے جانے والے کھلاڑیوں کے ساتھ تعاون کر رہے ہیں۔اسی طرح کھلاڑیوں کو ماہانہ اعزازیہ دیا جائے گا اورٹیلنٹ کو سامنے لاکر نکھارا جائے گا۔ان کا کہنا تھا کہ اراکین اسمبلی اور محکموں کے افسران و دیگر شعبوں کے کرکٹ میچز کرائے جائیں گے۔ تقریب میں کرکٹر محمد رضوان، امجد عزیز ملک، رحیم خان اور عاصم شیراز نے بھی خطاب کیا۔

خیبر پختونخوا کے وزیر مواصلات و تعمیرات شکیل احمد نے پشاور دلہ زاک روڈ کے تعمیراتی کام میں تاخیر اور سست روی کا سخت نوٹس لیا ہے۔اس حوالے سے انہوں نے دلہ زاک روڈ کا اچانک معائنہ کیا اور تعمیراتی کام کا خود تفصیلی جائزہ لیا۔ اس موقع پر محکمہ کے متعلقہ افسران بھی موجود تھے دورے کے دوران صوبائی وزیر نے علاقے کے معززین سے روڈ کے تعمیرارتی کام سے متعلق آگہی حاصل کی۔انہیں بتایا گیا کہ اس عوامی منصوبے پر کام کئی مہینوں سے بند ہے اور اس سے مقامی آبادی اور عوام کوسفر کرنے میں بڑی مشکلات کا سامنا ہے خاص طور پر سڑک کے درمیان موجود بجلی کے کھمبے آئے روزحادثات کا سبب بنتے ہیں۔ صوبائی وزیر مواصلات و تعمیرات نے ہدایت کی کہ محکمہ واپڈا سے اس منصوبے کے معاملہ کی اچھی طرح سے پیروی کریں۔ انہوں نے کہا کہ اس پرجیکٹ کے لئے فنڈز دستیاب ہیں اور واپڈا کو بھی مذکورہ مد میں رقوم فراہم کی گئی ہیں لیکن اس کے باوجود یہ پراجکیٹ پہلے ہی بڑی تاخیر کا شکار رہا ہے اور اس میں مزید تاخیر نہیں ہونی چاہئے۔صوبائی وزیرمواصلات و تعمیرات نے بعدازاں دو کروڑ روپے کی لاگت سے مکمل ہونے والی مشئی شریف سڑک کا بھی با ضابطہ افتتاح کیا اس موقع پر افتتاحی تقریب سے اپنے خطاب میں صوبائی وزیر نے کہا کہ موجودہ صوبائی حکومت کے ایجنڈے میں کرپشن کا خاتمہ سرفرست ہے اور ہم تمام اداروں کو کرپشن سے پاک اور بااختیار بنانا چاہتے ہیں تاکہ وہ عوام کی بہتر طریقے سے خدمات سرانجام دے سکیں۔انھوں نے متعلقہ حکام کو ہدایت کی ہے کہ صوبے میں تمام منصوبوں کی بروقت تکمیل کو یقینی بنایا جائے اور بہتر معیارکو ہر حال میں یقینی بنانا ہوگا جس پر ہرگز سمجھوتہ نہیں کیا جائے گا۔

وزیراعلیٰ خیبرپختونخوا کے معاون خصوصی برائے انسدادِ بدعنوانی بریگیڈیئر (ر) محمد مصدق عباسی کی زیر صدارت انٹی کرپشن اسٹیبلشمنٹ کی پہلی ماہانہ کھلی کچہری ڈائریکٹوریٹ آف انٹی کرپشن اسٹیبلشمنٹ پشاور میں منگل کے روز منعقد ہوئی جس میں ڈائریکٹر انٹی کرپشن رب نواز خان سمیت متعلقہ حکام نے شرکت کی اور سائلین کی شکایات تفصیل سے سنیں۔کھلی کچہری کا انعقاد پشاور کے علاوہ ڈائریکٹوریٹ آف انٹی کرپشن اسٹیبلشمنٹ کے ریجنل دفاترنوشہرہ، مردان، سوات، مالاکنڈ، آبیٹ آباد،کوہاٹ،بنوں، ڈی آئی خان اور مانسہرہ میں بھی کیا گیا اورانٹی کرپشن اسٹیبلشمنٹ کے اعداد و شمار کے مطابق 544 سے زائد افراد نے کھلی کچہری میں شرکت کی جبکہ 52 شکایات درج کی گئیں۔ کھلی کچہری میں گفتگو کرتے ہوئے معاون خصوصی برائے انسداد بدعنوانی بریگیڈیئر ر مصدق عباسی نے کہاکہ سرکاری اداروں میں بدعنوانی کا خاتمہ انٹی کرپشن اسٹیبلشمنٹ کا بنیادی مینڈیٹ ہے۔ انٹی کرپشن اسٹیبلشمنٹ شکایت کنندگان کا معاون ادارہ ہے۔کسی بھی محکمے میں اختیارات کا غلط استعمال ہرگز برداشت نہیں کیا جائے گا۔ جو بھی سرکاری خزانے کو نقصان پہنچانے یا غبن کرنے میں ملوث ہو اس سے سختی سے نمٹا جائے گا۔ بریگیڈیئر (ر) محمد مصدق عباسی نے غیر قانونی ہاؤسنگ سوسائٹیز کی تشہیر کی روک تھام کیلئے متعلقہ اداروں سے ملکر اقدامات اٹھانے کی ہدایت کرتے ہوئے کہا کہ تشہیری ادارے تشہیری مہم اجازت نامے اور دیگر لوازمات کی تصدیق کے بعد کریں۔ شہری ہاؤسنگ سوسائٹیز میں پلاٹ کی خریداری سے پہلے متعلقہ اجازت ناموں ا ور دستاویزات کی تصدیق لازمی کریں تاکہ بعد میں مسائل و پریشانی کا سامنا نہ کرنے پڑے اور قیمتی سرمایہ ضائع ہونے سے بچ جائے۔ کھلی کچہری میں شہریوں نے نجی ہاؤسنگ سوسائٹیز کے حوالے سے شکایات پیش کیں۔ اسی طرح مختلف سرکاری محکموں میں ٹھیکوں اور خریداری میں متعلقہ قوانین پر عمل نہ کرنے کی شکایت پر معاون حصوصی بریگیڈیئر (ر)مصدق عباسی نے ٹھیکوں اور خریداری کی تفصیل کیپرا سے حاصل کرنے کی ہدایت کی اور بے ضابطگی ثابت ہونے پر کاروائی کی ہدایت کی۔ اسی طرح محکمہ جنگلات مانسہرہ سے متعلق شہری کی شکایت پر ترجیحی بنیادوں پر کاروائی کی ہدایت کی گئی۔ کوآپریٹیو سوسائٹی تاروجبہ نوشہرہ میں بائی لاز کے عدم نافذ اوردکانوں کے غیر قانونی الاٹمنٹ کے حوالے سے شکایات پر معاون خصوصی نے شکایات کی تصدیق کی ہدایت کی۔ معاون خصوصی بریگیڈیئر (ر) مصدق عباسی نے درج شکایات کے حوالے سے انٹی کرپشن اسٹیبلشمنٹ حکام کو درج شکایات کو ٹریک کرتے ہوئے ان پرپیشرفت اور کارروائی سے آگاہ رکھنے کی ہدایت کی۔ شہریوں نے معاون خصوصی بریگیڈیئر (ر)مصدق عباسی کی جانب سے کھلی کچہری کی انعقاد کو سراہتے ہوئے کہا کہ کھلی کچہریوں کے انعقاد سے محکمے ا ور عوام میں فاصلے کم ہونگے۔ انٹی کرپشن کے ریجنل دفاتر میں بھی کھلی کچہریوں کا انعقاد کیا جہاں پر عوامی شکایات و مسائل سنے گئے۔

خیبر پختونخوا کے وزیر جنگلات و ماحولیات فضل حکیم خان یوسفزئی نے انار گلی مدین شاہ گرام جنگل میں 10ہزار سے زائد فٹ کی بلندی پرواقع پہاڑی کا خود دورہ کیا جہاں پر انہوں نے درختوں کی مارکنگ کے عمل کا جائزہ لیا، اس موقع پر ممبر قومی اسمبلی ڈاکٹر امجد، ممبران صوبائی اسمبلی میاں شرافت علی اور محمد نعیم بھی ان کے ہمراہ تھے، صوبائی وزیر نے دیگر علاقوں میں بھی جنگلات کا معائنہ کیا اس موقع پر صوبائی وزیر فضل حکیم خان یوسفزئی نے محکمہ جنگلات کیحکام سے بات چیت کرتے ہوئے انہیں واضح ہدایت کی کہ چونکہ صوبائی حکومت کی جانب سے جنگلات کی کٹائی پر مکمل پابندی عائد ہے، حکومت کے حکم کی پاسداری نہ کرنے والوں کو سخت سے سخت سزا دی جائے گی انہوں نے درختوں کی مارکنگ کو بھی شفاف طریقے سے مکمل کرنے کی ہدایت کی اور کہا کہ یہ جنگلات ہمارا قومی اثاثہ ہیں اور جنگلات کا دشمن ہمارا اور علاقے کا دشمن ہے لہذا وہ کسی بھی رو رعایت کے مستحق نہیں انہوں نے کہا کہ خیبر پختونخوا کی صوبائی حکومت جنگلات میں اضافے کیلئے ٹھوس اقدامات اُٹھا رہی ہے اور اس ضمن میں عام لوگوں پر بھی بھاری ذمہ داری عائد ہوتی ہیں کہ وہ کلائمیٹ چینج سے نمٹنے کیلئے اپنے گھروں اور علاقوں میں زیادہ سے زیادہ شجر کاری کریں تاکہ ہماری آنے والے نسلوں کو ایک محفوظ قدرتی ماحول میسرہوسکے۔

خیبر پختونخوا کے وزیر برائے ابتدائی وثانوی تعلیم فیصل خان ترکئی نے کہا ہے کہ ہیومن کیپیٹل انویسمنٹ پراجیکٹ کے تحت صوبے کے منتخب اضلاع میں تعلیمی ایمرجنسی کے تحت انقلابی اقدامات جاری ہیں۔ ڈبل شفٹ سکولز پروگرام کے تحت 150 سکول، 327 اے ایل پی سنٹرز اور 386 گرلز کمیونٹی سکول قائم کئے جا رہے ہیں۔ انہوں نے کہا کہ ان پروگرام سے کل 78 ہزار 375 طلباء و طالبات مستفید ہو رہے ہیں جبکہ پراجیکٹ کے لیے کل ٹارگٹ 3 لاکھ بچوں کا منتخب کیا گیا ہے۔ انہوں نے مزید کہا کہ اس پراجیکٹ میں 55 فیصد گرلز اور 45 فیصد بوائز کو سہولیات کی فراہمی کا ہدف مقرر کیا گیا ہے۔ جبکہ ابھی تک 500 سکولوں کے 977 اساتذہ کو تربیت فراہم کی گئی ہے اور سی پی ڈی پروگرام کا اجراء بھی عنقریب کیا جائے گا۔ جس کے لیے ایک لاکھ سے زائد اساتذہ کو تربیت کی فراہمی کا ہدف مقرر کیا گیا ہے۔ ان خیالات کا اظہار صوبائی وزیر تعلیم نے ہیومن کیپیٹل انویسمنٹ پراجیکٹ کے جائزہ اجلاس کی صدارت کرتے ہوئے کیا۔ اجلاس میں سیکرٹری ایجوکیشن مسعود احمد، سپیشل سیکرٹری اسفندیار خٹک اور ہیومن کیپیٹل انویسمنٹ پراجیکٹ ٹیم کے علاوہ محکمہ تعلیم کے دیگر اعلیٰ حکام کام نے شرکت کی۔ وزیر تعلیم نے مزید کہا کہ پراجیکٹ کے تحت 1500 سکول لیڈرز کو تربیت بھی فراہم کی جائے گی جس کے لیے کورس ماڈیول تیار کئے گئے ہیں اور اعلی چائلڈ ہڈ ایجوکیشن کے 2 ہزار اساتذہ کو تربیت بھی فراہم کی جائے گی۔ انہوں نے کہا کہ پراجیکٹ کے تحت 9 ہزار 514 اساتذہ کو انڈکشن پروگرام کے تحت تربیت فراہم کی گئی ہے اور مزید 25 ہزار اساتذہ کو بھی تربیت دی جائے گی۔ وزیر تعلیم کا مزید کہنا تھا کہ ڈیجیٹل کورس، ڈیجیٹائزڈ لیکچرز اور ان لائن کورسز کے لئے ڈیجیٹل سٹوڈیو کے قیام پر بھی کام جاری ہے جو کہ عنقریب ڈی پی ڈی میں قائم کی جائے گی۔ انہوں نے کہا کہ ہیومن کیپیٹل انویسمنٹ پراجیکٹ کے تحت 872 کلاس رومز کی تعمیر پر بھی کام جاری ہے جبکہ منتخب اضلاع میں 1400 کلاس رومز تعمیر کرنے کا ہدف مقرر کیا گیا ہے۔ اسی طرح 120 پرائمری سکولوں کو مڈل سکولز تک اپگریڈ کر نے 42 سکولوں کو مڈل سے ہائی لیول تک اپگریڈ کرنے پر بھی کام جاری ہے۔ وزیر تعلیم نے حکام کو ہدایت جاری کی کہ پراجیکٹ کے ہر سیگمنٹ کی تکمیل کے لیے ڈیڈ لائن مقرر کریں تاکہ کام لیٹ نہ ہو اور منصوبے بروقت مکمل ہو سکیں۔ انہوں نے کہا کہ اس پراجیکٹ کا ماہانہ جائزہ اجلاس منعقد ہوگا اور ہدایت کی کہ کام کی رفتار میں مزید تیزی لائی جائے۔ وزیر تعلیم کو بریفنگ کے دوران بتایا گیا کہ پراجیکٹ کے تحت سیلاب سے متاثرہ 532 سکولز بھی بنائے جائیں گے۔ وزیر تعلیم نے پراجیکٹ ٹیم کو ہدایت کی کہ تمام منصوبوں کو ٹائم لائن کے اندر مکمل کریں تاکہ اس پراجیکٹ کے فوائد طلباء و طالبات، اساتذہ اور منتخب اضلاع کے عوام تک منتقل ہو سکیں انہوں نے کہا کہ اس پراجیکٹ کی تکمیل سے منتخب اضلاع میں شرحِ خواندگی بڑھے گی، انرولمنٹ میں اضافہ ہوگا اور ڈراپ اؤٹ ریشو کو کنٹرول کیا جائے گا۔

صوبائی وزیر برائے پبلک ہیلتھ انجینئرنگ پختون یار خان نے کہا ہے کہ عدالتیں ہمارے لئے معززاور قابل احترام ادارے ہیں جو مظلوموں کا ساتھ دے رہے ہیں اور ان کو سستے انصاف کی فراہمی کیلئے ہمہ وقت کوشاں رہتے ہیں انٹی کرپشن عدالت میں میرے حق میں فیصلے نے ثابت کر دیا ہے کہ عمران خان کے سپاہیوں کا دامن صاف ہے جس طرح ہم باعزت بری ہوئے اسی طرح عمران خان بھی باعزت بری ہونگے۔ان خیالات کا اظہار انہوں نے انٹی کرپشن عدالت سے ان کے حق میں فیصلہ آنے پر میڈیا سے بات چیت کرتے ہوئے کیااُنہوں نے معززعداکت کا شکریہ ادا کرتے ہوئے کہا کہ آج انہیں انصاف ملا اور عدالت سے امید بھی یہی تھی کہ انصاف ضرور ملے گا کیونکہ میرے اوپر تمام کیسز جھوٹے تھے جس میں کوئی صداقت نہیں تھی اُنہوں نے کہاکہ ہمارے قائد عمران خان کے اوپر بھی بنائے گئے تمام کیسز سیاسی ہیں اور ہمیں یقین ہے کہ جلد ہی ان کو بھی انصاف ملے گا اور وہ تمام کیسوں سے بری ہوجائیں گے اُنہوں نے کہاکہ پی ٹی آئی عدالتوں سے انصاف کی امید اور توقع رکھتی ہے وہ کبھی بھی عدالت کے ساتھ ٹکراؤ نہیں چاہتی مخالفین چاہتے ہیں کہ پی ٹی آئی کے قائدین کو جھوٹے مقدمات میں پھنسا کر سیاست سے باہر کیا جائے لیکن ان کے ناپاک عزائم خاک میں مل جائیں گے اور تحریک انصاف ایک بار پھر سرخرو ہوگی۔