خیبر پختونخوا کے وزیر تعلیم فیصل خان ترکئی نے کہا ہے کہ ایلیمنٹری اینڈ سیکنڈری ایجوکیشن فاؤنڈیشن کا پروگرام پوھہ دور جدید کے تقاضوں سے ہم آہنگ ہے اور پروگرام کے بہترین نتائج آرہے ہیں۔ طلباء و اساتذہ کی آن لائن حاضری، آن لائن کلاسز اور تدریس کا سارا عمل ڈیجیٹائزڈ ہے طلبہ کو آن لائن لیکچرز تک رسائی ہے اور امتحانی نظام بھی آن لائن ہے۔ انہوں نے فاؤنڈیشن حکام کو ہدایت کی کہ اس پروگرام کو تمام اضلاع تک توسیع دی جائے اورطلباء و طالبات کی آسانی کے لئے سسٹم میں مزید اصلاحات متعارف کی جائیں۔ یہ ہدایات انہوں نے ایلیمنٹری اینڈ سیکنڈری ایجوکیشن فاؤنڈیشن کے جائزہ اجلاس کی صدارت کرتے وقت جاری کیں۔ اجلاس میں ایلیمنٹری اینڈ سیکنڈری ایجوکیشن فاؤنڈیشن کے مینجنگ ڈائریکٹر عطاء الرحمان، ڈپٹی مینجنگ ڈائریکٹر جاوید اقبال، ڈپٹی ڈائریکٹر،ای گورننس نور شیر آفریدی اور دیگر حکام نے شرکت کی۔ وزیر تعلیم نے مزید ہدایات کی کہ صوبے کے ہر ضلع میں پوہہ سنٹر کے قیام کے ساتھ ساتھ وہاں آف لائن سہولیات بھی فراہم کی جائیں تاکہ وہ علاقے جہاں پر انٹرنیٹ کے مسائل ہو ں وہاں آف لائن درس و تدریس کا عمل جاری رہے۔بریفنگ دیتے ہوئے وزیر تعلیم کو بتایا گیا کہ فاؤنڈیشن کے کل 2 لاکھ 76ہزار 900 طلباء و طالبات اور 3576 سینٹرز ہیں جبکہ پانچ ہزار 705 تدریسی عملہ ہے ایجوکیشن سپورٹ پروگرام میں 55 پارٹنر سکول اور کل 7191 طلباء و طالبات کو داخلہ دیا گیا ہے۔ انہیں بتایا گیا کہ نئے سکول پروگرام کے تحت پرائمری لیول پر 10 ہزار، مڈل لیول پر 1500 ہائی لیول پر 2500 اور ہائڈر سیکنڈری لیول پر 3500 روپے فی طالب علم فیس پارٹنر سکولوں کو دی جاتی ہے۔ اسی طرح گرلز کمیونٹی سکولز، ایجوکیشن سینٹرز، این سی ایچ ڈی ایجوکیشن سینٹرز اور دیگر پروگراموں میں لاکھوں طلبہ و طالبات پڑھ رہے ہیں۔ وزیر تعلیم فیصل خان ترکئی نے کہا کہ ہماری اولین ترجیح طلبہ و طالبات کو مفت معیاری تعلیم کی فراہمی ہے انہوں نے کہا کہ بندوبستی اضلاع کے سکولوں سے باہر طلبہ کے لیے عملی اقدامات کئے جائیں اور ایک جامع پروپوزل اگلے اجلاس میں انہیں پیش کی جائے۔ انہوں نے کہا کہ ایک ایس ایف کے اساتذہ کی تنخواہوں کے مسائل حل ہو رہے ہیں اور ہماری کوشش ہوگی کہ بقایا جات بھی جلد از جلد ریلیز کر دیئے جائیں۔ اسی طرح اساتذہ کو کم سے کم اجرت کے مطابق تنخواہوں کے اجراء کے لئے بھی اقدامات کر رہے ہیں وزیر تعلیم نے مزید کہا کہ فاؤنڈیشن کی امسال داخلہ مہم قابل تعریف ہے اور کوشش کرہے کہ مزید طلبہ کو بھی مختلف پروگراموں میں داخل کروایا جا سکے۔

غیر قانونی عمل میں ملوث افراد کے خلاف سخت کارروائی کی جائے گی،صوبائی وزیر بہبود آبادی

معاون خصوصی برائے بہبود آبادی ملک لیاقت علی خان کا پیپل منڈی پشاور مارکیٹ کا دورہ، سرکاری مانع حمل ادویات کی غیر قانونی فروخت پر برہمی کا اظہار

عوام کی جانب سے سرکاری ادویات اور مانع حمل اشیاء مارکیٹ میں فروخت ہونے کی شکایت پر جائزہ لینے کے لیے وزیر اعلیٰخیبر پختونخوا کے معاون خصوصی برائے بہبود آبادی ملک لیاقت علی خان نے پشاورمیں پیپل منڈی اور دیگر مارکیٹس کے دورے کئے۔ اس موقع پر متعلقہ حکام بھی ان کے ہمراہ تھے۔اچانک معائنوں کے دوران ملک لیاقت علی خان نے کاسمیٹکس کی دکانوں کا تفصیلی جائزہ بھی لیا۔ اس موقع پر بعض دکانوں سے تولیدی صحت کے لیے سرکاری طور پر فراہم کی جانے والی مفت مانع حمل ادویات وغیرہ بھی برآمد ہوئیں۔ معاون خصوصی نے مانع حمل سے متعلق سرکاری اشیاء کی مارکیٹ میں کھلے عام فروخت پر سخت برہمی کا اظہار کیا۔ملک لیاقت علی خان نے حکام کو ہدایت دی کہ ایسے دکانداروں کے خلاف سخت کارروائی عمل میں لائی جائے اور برآمد ہونے والی ادویات اور مواد کو سرکاری تحویل میں لیا جائے۔ انہوں نے واضح کیا کہ سرکاری ادویات اور مواد کی مارکیٹ میں فروخت کی اجازت نہیں ہے اور اس غیر قانونی عمل میں ملوث افراد کے خلاف سخت کارروائی کی جائے گی۔ اس موقع پر بعض دکانوں سے برآمد ہونے والی سرکاری مانع حمل سے متعلق ادویات اور اشیاء کو تحویل میں لے کر ملوث دکانداروں کو پولیس کے حوالے بھی کیا گیا ہے۔

خیبر پختونخوا کے وزیر تعلیم فیصل خان ترکئی نے کہا ہے کہ پورے صوبے اور خصوصاََ ضم اصلاع میں خواتین کی شرح خواندگی بڑھانے اور ان کو تعلیمی سہولیات کی فراہمی کے لیئے انقلابی اقدامات کر رہے ہیں۔ انہوں نے کہا کہ ضم اضلاع میں تعلیمی سہولیات کی بروقت فراہمی کے لیئے صوبائی محکمہ تعلیم نے کئی اہم منصوبے شروع کر رکھے ہیں جن کی تکمیل سے ضم اضلاع میں شرح خواندگی میں اضافہ ہو سکے گا۔ انہوں نے کہا کہ فوری طور پر سکولوں سے باہر طلباء کو سکولوں میں لانے اور ڈراپ آؤٹ ریشو کو کنٹرول کرنے کے لیئے مرجڈ ایریاز ایجوکیشن فاؤنڈیشن کے تحت کمیونٹی بیسڈ ایجوکیشن سینٹرز سباؤن سکولز پروگرام اور مڈل سکول پروگرام شروع کر رہے ہیں جس کے تحت فوری طور پر کم لاگت اور ہنگامی صورتحال کے پیش نظر سکول قائم کیے جائیں گے۔ ان خیالات کا اظہار انہوں نے مرجڈ ایریاز ایجوکیشن فاؤنڈیشن کے بریفنگ لیتے وقت کیا۔ بریفنگ اجلاس میں مینیجنگ ڈائریکٹر مرجڈ ایریاز ایجوکیشن فاؤنڈیشن میاں عین اللہ، ایڈیشنل سیکرٹری محکمہ تعلیم عبدالاکرم، ڈپٹی مینجنگ ڈائریکٹر مرجڈ ایریاز ایجوکیشن فاؤنڈیشن ڈاکٹر شوکت حیات اور دیگر اعلیٰ حکام نے شرکت کی۔ مینجنگ ڈائریکٹر مرجڈ ایریاز ایجوکیشن فاؤنڈیشن میاں عین اللہ نے بریفنگ دیتے ہوئے فورم کو بتایا کہ ہمارے کل 207 کمیونٹی بیسڈ ایجوکیشن سینٹر ہیں جن میں 17625 طلباء و طالبات ہیں کل 267 اساتذہ اور 267 سیکیورٹی گارڈز ان سینٹرز میں خدمات سرانجام دے رہے ہیں۔ کمیونٹی بیسڈ سکولوں کی تعداد 337 ہے کل 639 اساتذہ ہیں اور طلبہ کی تعداد 27 ہزار 293 ہیں۔ فاؤنڈیشن کے نئے پروگرام سبان کے تحت کل 25 سکولزضم اضلاع اور قبائلی سب ڈویژنز میں قائم کیے جائیں گے۔ اس پبلک پرائیویٹ پارٹنرشپ پروگرام کے تحت گریڈ ایک سے گریڈ پانچ تک فی طالب علم ایک ہزار روپے جبکہ چھٹی گریڈ سے اٹھویں گریڈ تک فی طالب علم 1500 روپے دیے جائیں گے۔ اس کے علاوہ اساتذہ کی تربیت کے پروگرام میں 1538 اساتذہ کو تربیت دی گئی ہے اور 80 ماسٹر ٹرینرز کو بھی تربیت فراہم کی گئی ہے۔ اسی طرح نئے منصوبوں میں مڈل کمیونٹی بیسڈ سکول منصوبہ بھی شامل ہے جس کے تحت 25 مڈل سکول قائم کیے جائیں گے وزیر تعلیم کو بتایا گیا کہ قبائلی اضلاع میں شرحِ خواندگی کم ہے اور فاؤنڈیشن تعلیمی شرح بڑھانے اور معیاری تعلیم کی فراہمی کے لیے شبانہ روز محنت کر رہی ہے جبکہ ابھی بھی تقریبا ایک ملین بچے قبائلی اضلاع میں تعلیمی سہولیات سے محروم ہیں۔ وزیر تعلیم فیصل خان ترکئی نے کہا کہ فاؤنڈیشن کی ہر ممکن مدد کی جائے گی۔ اور ضمن میں محکمہ تعلیم کے نئے منصوبوں کے علاوہ ڈونرز کو بھی دعوت دی جائے گی تاکہ قبائلی اضلاع میں شرحِ خواندگی بڑھانے کے لیے نئے منصوبے شروع کئے جا سکیں۔ انہوں نے مرجڈ ایریاز ایجوکیشن فاؤنڈیشن کے جاری اور نئے منصوبوں کی تعریف کرتے ہوئے کہا کہ فاؤنڈیشن محدود وسائل میں بہترین کام کر رہا ہے۔ اور ان کے بورڈ اف ڈائریکٹرز، فاؤنڈیشن ایکٹ، ملازمین کے جملہ مسائل اور پروموشن کمیٹیز بمع دیگر چیلنجز پر قابو پانے کے لیے عملی اقدامات کیے جائیں گے۔ اور بہت جلد فاؤنڈیشن کے مسائل حل کرنے کے لیے اگلا اجلاس طلب کیا جائے گا۔ وزیر تعلیم نے کہا کہ فاؤنڈیشن کے اساتذہ کی تنخواہوں کے لیے بھی وزارت خزانہ سے بات چیت کی جائے گی اور ہماری کوششوں سے سابقہ بقایا جات بھی اساتذہ کو مل چکے ہیں۔ تاہم ان اساتذہ کی سہولت کے لیے کم سے کم اجرت فارمولے کے تحت ان کی تنخواہیں بڑھانے کے لیئے بھی اقدامات کیے جائیں گے۔ انہوں نے ہدایت دی کہ نئے سکول میرٹ اور ضرورت کے تحت قائم کیے جائیں اور کوشش کریں کہ کوئی بھی بچہ تعلیم کی عظیم نعمت سے محروم نہ رہے۔

مشیر سیاحت زاہد چن زیب کی زیرصدارت اجلاس میں دنیا کے سب سے بلند پولو گراؤنڈ پر اس شاندار میلے کے انتظامات کو حتمی شکل دی گئی

اپر چترال میں تین روزہ سالانہ شندور پولو فیسٹیول جمعہ 28 جون کو شروع ہوگا جس میں وزیراعلی علی امین گنڈاپور بحیثیت مہمان خصوصی شریک ہوں گے جبکہ بارہ ہزار اونچے دنیا کے سب سے بلند شندور پولو گراؤنڈ پر چترال اور گلگت بلتستان کی پولو ٹیموں کے مابین کھیلے جانیوالے اس عظیم الشان سپورٹس گالا میں دونوں صوبوں کے علاؤہ وفاقی حکومت کی نمائندگی اور غیر ملکی سیاحوں کی بھرپور شرکت بھی متوقع ہے۔ اس ضمن میں تیاریوں کا جائزہ لینے کیلئے پشاور میں وزیراعلی خیبر پختونخوا کے مشیر برائے سیاحت و ثقافت زاہد چن زیب کی زیرصدارت اہم اجلاس منعقد ہوا جس میں سیکرٹری سیاحت محمد بختیار خان، ڈائریکٹر جنرل کلچر اینڈ ٹورازم اتھارٹی برکت اللہ مروت اور دیگر متعلقہ حکام کے علاؤہ کمشنر مالاکنڈ ڈویژن اور چترال اپر و لوئیر اور دیر بالا کے ڈپٹی کمشنروں، گلگت بلتستان کے ایڈیشنل چیف سیکرٹری، مقامی انتظامی افسران اور سپورٹس حکام نے ان لائن حصہ لیا اور انتظامات کے مختلف پہلوؤں اور تجاویز و سفارشات کا جائزہ لینے کے بعد ضروری فیصلے کئے گئے۔ زاہد چن زیب نے واضح کیا کہ پی ٹی آئی کی موجودہ حکومت عمران خان کے ویژن کے مطابق سیاحت کی ترقی پر خصوصی توجہ دے رہی ہے اور شندور پولو فیسٹیول کا بہترین اور کامیابی سے انعقاد نہ صرف محکمہ سیاحت بلکہ پوری صوبائی حکومت اور انتظامیہ کیلئے ٹیسٹ کیس ہے۔ انہوں نے کہا کہ اس شاندار میلے کے آغاز سے پہلے ہی متعلقہ تمام شاہراہوں کی کلیئرنس، سیکورٹی، اشیائے خوردونوش اور پٹرول پمپس پر فیول کی معیاری اور وافر مقدار میں دستیابی متعلقہ حکام اور اداروں کا اولین فرض ہے جس میں ذرہ بھر کوتاہی برداشت نہیں کی جائے گی۔ مشیر سیاحت نے متعلقہ ڈپٹی کمشنرز کو یہ بھی ہدایت کی کہ پولو ٹورنامنٹ میں حصہ لینے والی ٹیموں کے کھلاڑیوں اور مقامی لوگوں و زعماء سے الگ الگ ملاقاتیں کرکے انہیں انتہائی خوشگوار ماحول کے ساتھ اعتماد میں لیں تاکہ وہ سب فیسٹیول کو ہر لحاظ سے کامیاب بنانے میں عملی طور پر شریک ہوں۔ انہوں نے کھلاڑیوں کیلئے شرٹس پر بہترین لوگو لگانے کی ہدایت بھی کی تاکہ محکمہ سیاحت و ثقافت کی عمدگی سے برانڈنگ ہو اور صوبے میں سیاحت خوب پھلے پھولے اور ملکی و غیر ملکی سیاحوں میں اضافے کے سبب صوبہ کی آمدن بالخصوص زرمبادلہ کمانے کے وسائل بھی مسلسل بڑھنا شروع ہوں۔ اسی طرح فیسٹول کے اطراف میں واش رومز، ابنوشی اور صحت و صفائی کے بہترین انتظامات بھی ناگزیر ہیں۔ اس موقع پر حکام نے مشیر سیاحت کو شندور پولو فیسٹیول کے کامیابی سے انعقاد کیلئے آپنی بھرپور صلاحیتوں کے ساتھ دن رات محنت کرنے کا یقین دلایا اور واضح کیا کہ وہ کسی بھی مرحلے پر صوبائی حکومت کو مایوس نہیں کریں گے کیونکہ سیاحت کی ترقی سے صوبہ کی خوشحالی بھی جڑی ہے۔

خیبر پختونخوا کے صوبائی وزیر برائے پبلک ہیلتھ انجینئرنگ پختون یار خان نے عدالتی پیشی کے بعد مختصر گفتگو کرتے ہوئے کہاکہ عدالتوں سے ہمیں انصاف کی توقع ہے ہم عدالتوں سے ناامید نہیں بلکہ ہم پرامید ہیں مجھے قوی یقین ہے کہ عدالتوں سے سارے فیصلے ہمارے حق میں آئیں گے مرکزمیں بیٹھے نااہلوں کی وجہ سے خیبرپختونخوا کے عوام سزا بھگت رہے ہیں آج خیبر پختونخوا میں جو کچھ ہورہا ہے یہ ان تجربہ کار نااہلوں کا سوچا سمجھا منصوبہ ہے کبھی بجلی کی مد میں عوام کو ذلیل کیا جارہا ہے تو کبھی رائلٹی کی ادائیگی میں تاخیری خرابے استعمال کررہے ہیں لیکن اب عوام جان چکے ہیں اور ان کے اوچھے ہتھکنڈوں سے عوام کے حوصلے پست نہیں ہوں گے بلکہ مزید توانائی پیدا ہوگی اس موقع پر رکن قومی اسمبلی مولانا نسیم علی شاہ,سابق امیدوار صوبائی اسمبلی حاجی ملک محمد اللہ داؤڑ,ملک اقبال جدون, معصوم وزیر, آصف الرحمن,نذیر زمان و دیگر بھی موجود تھے اُنہوں نے کہاکہ مرکز نے ہمیشہ پختونوں کے ساتھ سوتیلی ماں جیسا برتاؤ کیا ہے اور ان کیلئے مختلف فورم پر مسائل پیدا کرنے کی کوشش کی ہے لیکن ان کو کیاپتہ کہ خیبر پختونخوا میں منجھے ہوئے لوگوں کی حکومت ہے ہم وفاق میں بیٹھے حکمرانوں کا ہر منصوبہ ناکام بناکر ان کے کندھوں پر ڈال دیں گے، اُنہوں نے کہاکہ نواز شریف کے خاندان نے ہمیشہ انتشا ر اور انتقام کی سیاست کی ہے اور انتقامی کارروائیوں کے علاوہ سیاست میں کچھ نہیں سیکھا اُنہوں نے کہاکہ خیبر پختونخوا میں سرمایہ کاری کو فروغ دینے اورعوام کو خوشحال بنانے کیلئے تمام تر وسائل کو بروئے کار لایا جارہا ہے عوام کی اُمیدوں پر پورا اُترنے کی بھرپورکوشش کی جائے گی کیونکہ عوام نے کٹھن حالات میں ہمارے قائد عمران خان اور پی ٹی آئی کے ساتھ محبت کا اظہار کرتے ہوئے ہمارا ساتھ دیا ہے زندگی رہی تو خیبر پختونخوا کی حکومت اس کا صلہ ضرور دے گی۔

خیبرپختونخوا کے وزیر برائے جنگلات و ماحولیات فضل حکیم خان یوسفزئی نے کہا ہے کہ ہماری ترجیح جنگلات اور ماحولیات کا تحفظ ہے جس پر کسی قسم کا سمجھوتہ نہیں کیا جائیگا سوات پریس کلب میرا دوسرا گھر ہے سوات کے صحافیوں نے ہر مشکل وقت میں سوات کے عوام کے حقوق کیلئے آواز اٹھائی ہے جس کی وجہ سے اس وقت سوات میں مثالی امن قائم ہے،ہماری حکومت کی کوشش ہوگی کہ سوات کے عوام اور صحافیوں کے مسائل حل کرنے کیلئے تمام تر حکومتی وسائل بروئے کار لائیں گے۔ ان خیالات کا اظہار صوبائی وزیرنے اپنے دفتر پشاور میں سوات پریس کلب کے صحافیوں سے ملاقات کے دوران گفتگو کرتے ہوئے کیا،ملاقات سوات پریس کلب کے چیئرمین شیرین زادہ کے قیادت میں ہوئی، اس موقع پر سیکرٹری اطلاعات و تعلقات عامہ خیبرپختونخوا ارشد خان، سینئر صحافی محبوب علی اور فضل رحیم خان بھی موجود تھے، وفد نے صوبائی وزیر فضل حکیم خان یوسفزئی اور سیکرٹری اطلاعات و تعلقات عامہ خیبرپختونخوا ارشد خان کو صحافی برادری کو درپیش مسائل سے آگاہ کیا، اس موقع پر صوبائی وزیر فضل حکیم خان یوسفزئی کا کہنا تھا کہ صحافیوں کے مسائل کو ترجیحی بنیادوں پر حل کریں گے، سوات کے صحافیوں نے ہر مشکل وقت میں صوبائی حکومت کے ساتھ مکمل تعاون کیا ہے، انہوں نے کہا کہ صحافیوں کیلئے ہمارے دفتر اور حجرے کے دروازے ہر وقت کھلے ہیں، انہوں نے کہا کہ لوگوں کو بنیادی حقوق کی فراہمی کے لئے حکومتی وژن کو پایہ تکمیل تک پہنچانے کیلئے صحافی برادری ایک اہم اور بنیادی کردار ادا کر رہی ہے۔ صحافی برادری،غیر قانونی سرگرمیوں کی اطلاع موصول ہونے پر میرے ساتھ بھی شئیر کرے آپ کی نشاندھی پر متعلقہ افراد کے خلاف سخت قانونی کاروائی عمل میں لائی جائے گی۔

یو ایس ایڈ کے ‘لینڈ رجسٹریشن پروگرام برائے ضم اضلاع کے تحت پشاور یونیورسٹی میں سپورٹس گالا کا انعقاد کیا گیا، جس میں اراضی کی ملکیت اور منتقلی کے حقوق کے بارے میں آگاہی بھی دی گئی۔ تفصیلات کے مطابق یو ایس ایجنسی فار انٹرنیشنل ڈویلپمنٹ (یو ایس ایڈ) نے ‘لینڈ رجسٹریشن پروگرام برائے ضم اضلاع’ کے ذریعے پشاور یونیورسٹی میں دوسرے سپورٹس گالا کا انعقاد کیا۔اس سپورٹس گالا کا مقصد نوجوانوں میں کھیلوں کی مہارت کو اجاگر کرنے کے ساتھ کھلاڑیوں اور تماشائیوں کو اراضی کی ملکیت اور منتقلی کے حقوق کے بارے میں بھی آگاہ کرنا تھا۔ اس موقع پرخیبر پختونخوا ریونیو بورڈ کے سیکرٹری حافظ عطاء المنعیم نے سپورٹس گالا کے انعقاد کے حوالے سے اپنے خیالات کا اظہار کرتے ہوئے کہا کہ اس پروگرام نے ضم شدہ اضلاع کے نوجوانوں تک رسائی کا بہتر موقع فراہم کیا اور موقع سے استفادہ کرتے ہوئے ان اضلاع کے نوجوانوں کو زمین کی رجسٹریشن کی اہمیت اور زمین کے ٹائیٹلز کی شفافیت سے متعلق آگاہی بھی دی گئی۔ان کا کہنا تھا کہ اکثر قابل تصدیق زمین کی رجسٹریشن کے نظام کی عدم موجودگی اور زمین کی غیر واضح ملکیت زمینی تنازعات اور قیمتی جانوں کے ضیاع کے واقعات کا باعث بنتی ہے۔پانچ روزہ ایونٹ میں درہ آدم خیل کے نوجوانوں نے فٹ بال، کرکٹ، والی بال، بیڈمنٹن اور ٹیبل ٹینس کے مقابلوں میں حصہ لیا جس میں حکومتی اداروں کے نمائندوں اور 200 سے زائد نوجوانوں، یونیورسٹی کے طلباء، ماہرین تعلیم اور میڈیا نے شرکت کی۔یو ایس ایڈ کے ‘لینڈ رجسٹریشن سرگرمی برائے ضم اضلاع’ پروگرام کے چیف آف پارٹی محمد شعیب کا اس موقع پر کہنا تھا کہ ریاست اور اس کے شہریوں کے مابین اعتماد پیدا کرنا، عمومی بیداری پیدا کرنا، اور تعاون کو فروغ دینا پائیدار لینڈ گورننس اور کمیونٹی ڈویلپمنٹ کے لیے نہایت اہم ہے۔انہوں نے مزید کہا کہ عوامی آگاہی کے لئے خیبرپختونخوا حکومت کی مدد کرنا ان کے لئے قابلِ فخر بات ہے. انہوں نے عندیہ دیا کہ ان کھیلوں کی تقریبات کے بعد 20 سے زیادہ آگاہی سیشنز ہوں گے تاکہ ضم اضلاع میں نوجوانوں اور کمیونٹی کے دیگر افراد کو اراضی کی رجسٹریشن کے فوائد اور طریقہ کار کے بارے میں آگاہ کیا جا سکے۔