خیبر پختونخوا کے وزیر اطلاعات، ثقافت و سیاحت بیرسٹر فیروز جمال شاہ کاکاخیل نے کہا کہ ماحولیاتی و غذائی تحفظ باہم جڑے ہوئے ہیں، بہتر ماحولیاتی تحفظ سے غذائی قلت جیسے اہم مسئلے کو کم کیا جاسکتا ہے، 800 ملین افراد بھوکا سونے پر مجبور ہیں جبکہ 1.9 بلین افراد کئی گنا زیادہ غذا ضائع کرتے ہیں، ترقیافتہ اور ترقی پزیر ممالک کے درمیان عدم توازن ہے، ترقیافتہ ممالک میں تمام چیزوں کی بہتات ہے جبکہ غریب ممالک سہولیات کو ترس رہے ہیں، ماحولیاتی تبدیلیوں نے اس عدم توازن کو مزید بڑھا دیا ہے، ترقی پزیر ممالک کو ماحولیاتی تبدیلیوں کے منفی اثرات کا سامنا ہے جس سے غذائی قلت جیسے سنگین خطرات لاحق ہو گئے ہیں، صاف پانی ناپید ہوتا جارہا ہے، غریب و مالدار ممالک کے درمیان وسائل کے عدم توازن کو کم کرنا ہوگا، خیبرپختونخوا میں غذا و ماحول سے متعلق بھرپور اقدامات کے ساتھ ساتھ آگاہی کی بھی اشد ضرورت ہے، ان خیالات کا اظہار انہوں نے عالمی یوم خوراک کی مناسبت سے ماحولیاتی و غذائی تحفظ سے متعلق آگاہی تقریب، واک و انڈس ریور صفائی مہم کے افتتاح کے موقع پر شرکاء سے خطاب کرتے ہوئے کیا. تقریب میں ادارہ خوراک و زراعت اقوام متحدہ کی نمائندہ فلورنس رولے، انٹرنیشنل پروگرام آفیسر فرخ ٹائروو، خیبرپختونخوا ثقافت و سیاحت اتھارٹی کے حکام اور کالج و یونیورسٹی کے طلباء و طالبات نے بڑی تعداد میں شرکت کی. بیرسٹر فیروز جمال شاہ کاکاخیل نے کہا کہ ماحول دوست اقدامات کے لئے گڈ گورننس پر عمل پیرا ہونا ہوگا اور سب کو جانفشانی سے اپنے فرائض نبھانے ہوں گے، انہوں نے کہا کہ 1985 میں میرے مرحوم والد میاں جمال شاہ کاکاخیل نے بطورِ وفاقی وزیر اس کنڈ پارک کا افتتاح کیا تھا اور یہ اس وقت کا ایک بہترین پارک تھا جو آج زوال پزیر نظر آیا اس لئے کنڈ اور منگلوٹ نیشنل پارک کو بحال کرنے کے لئے اقدامات کریں گے، یہ خیبرپختونخوا کی خوبصورتی ہے جو عدم توجہ کی وجہ سے زوال پزیر ہیں، انہوں نے کہا کہ ہمیں ان اقدار کی طرف واپس جانا ہوگا جو ہمیں ماحول کا تحفظ و دیگر اسلوب سکھاتی ہیں، ہمارے آباو اجداد جو بہترین ماحول ہمیں دے کر گئے وہ ہمیں بہتر انداز میں اگلی نسلوں تک پہنچانا ہے. میڈیا سے گفتگو میں بیرسٹر فیروز جمال شاہ کاکاخیل نے کہا کہ خیبرپختونخوا میں ماحول دوست اور ذمہ دارانہ سیاحت کی ضرورت ہے اور کہا کہ قدرتی ماحول کا تحفظ اولین ترجیح ہونا چاہیے۔

خیبرپختونخوا نگران وزیر اطلاعات، ثقافت و سیاحت بیرسٹر فیروز جمال شاہ کاکاخیل نے کہا ہے کہ جب تک بچوں کی تربیت پر توجہ نہیں دی جائے گی معاشرہ آگے نہیں بڑھے گا، تربیت اور سہولیات سب کو یکساں طور پر مہیا کرنا ہوگا، یتیموں کا خصوصی خیال رکھنا ہوگا، قرآن مجید میں 22 جگہ یتیموں کے بارے میں احکامات موجود ہیں، حضور نبی اکرم ﷺ کی زندگی کو دیکھیں، ان کے احکامات کو دیکھیں، یتیموں کے ساتھ ان کے شفقت کو دیکھیں سب جگہ یتیموں سے حسن سلوک کا سبق ملتا ہے، تعلیم و تربیت کے بعد بچوں کو ان کے محنت کا صلہ ملنا چاہیے، ان کو یہ احساس بھی دینا ہے کہ کسی فورم پر بھی ان سے ناانصافی نہیں ہوگی ان کا حق نہیں مارا جائے گا تب ہی وہ اونرشپ لیں گے، اس ملک کی ذمہ داری لیں گے، حکومت خیبرپختونخوا گوڈ گورننس پر عمل پیرا ہے، مقصد میرٹ کی بالادستی اور شفافیت ہے، ان خیالات کا اظہار انہوں نے عالم آباد صوابی میں کشمیر آرفن ریلیف ٹرسٹ (کورٹ) کے تحت منعقدہ تقریب سے خطاب میں کیا. اس موقع پر اعلیٰ سول و ملٹری آفیسرز، کورٹ ادارے کے عہدیداروں سمیت بیرون ملک مقیم پاکستانیوں کی ایک بڑی تعداد موجود تھی، تقریب میں شرکت کیلئے آذاد کشمیر میں قائم کورٹ ادارے میں زیر تعلیم طلباء و طالبات نے بھی کثیر تعداد میں شرکت کی. کورٹ ادارے میں زیر تعلیم بچوں نے تقاریر، ٹیبلو، ڈرامہ، قوالی اور ملی نغموں کی صورت میں بہترین فن کا مظاہرہ کیا جس پر شرکاء نے طلباء و طالبات کو داد دی. شرکاء سے خطاب میں نگران وزیر اطلاعات خیبر پختونخوا نے کورٹ ادارے کی جانب سے صوابی میں ایجوکیشن کمپلیکس تعمیر کرنے پر شکریہ ادا کیا اور اس امر کو دوسروں کے لئے بھی قابل تقلید قرار دیا. انہوں نے کہا کہ صوابی کو شہید کیپٹن کرنل شیرخان کی وجہ سے منفرد حیثیت حاصل ہے، شہید کیپٹن کرنل شیرخان جیسے سپوت صدیوں میں پیدا ہوتے ہیں، مقامی افراد نے زمین بلا معاوضہ فراہم کرکے ایک عمدہ مثال قائم کی. نگران وزیر نے یتیموں کی کفالت سے متعلق بیرون ملک مقیم پاکستانیوں کے کردار پر بھی بات کی اور کہا کہ وہ خود بھی تعلیم کے سلسلے میں لندن میں مقیم رہے اور بیرون ملک مقیم پاکستانیوں کے احساسات سے بخوبی آگاہ ہیں اور کہا کہ ملک کی تعمیر و ترقی میں وہ ہمیشہ پیش پیش رہتے ہیں، بیرسٹر فیروز جمال شاہ کاکاخیل نے کہا کہ جائز اور ناجائز میں فرق کے لئے شعور کی بیداری اہم ہے.خطاب میں انہوں نے صوبے اور ملک سے برین ڈرین کی وجوہات پر بھی روشنی ڈالی اور میرٹ کی پامالی کو اس کی بڑی وجہ قرار دیا. انہوں نے کہا کہ میرٹ اور نظام میں شفافیت سے نوجوانان اونرشپ لیں گے، اور ملک کے نظام کی بھاگ دوڑ سنبھالیں گے. تقریب سے خطاب میں بیرسٹر فیروز جمال شاہ کاکاخیل نے کہا کہ محکمہ سیاحت کو خصوصی بچوں کے لئے ٹوور منعقد کرنے کے احکامات دئے ہیں اور اس سلسلے میں بینائی سے محروم بچوں کو گلیات کا دورہ کرایا گیا اور یتیم بچوں کے لئے بھی خصوصی ٹوور سروس فراہم کریں گے تاکہ یہ بچے خیبرپختونخوا کی خوبصورتی دیکھیں اور محظوظ ہوں. تقریب سے پیر سلطان العارفین، کور ٹرسٹ کے سربراہ چوہدری اختر، لیفٹیننٹ جنرل (ر) نگار جوہر، ایئر چیف مارشل سہیل امان، ائیر کموڈور محمد شبیر، لاہور قلندر کے اونر عاطف رانا و دیگر نے بھی خطاب کیا۔

چیف سیکرٹری خیبرپختونخوا ندیم اسلم چوہدری نے ہدایت کی ہے کہ پانچ سال تک کے ہر بچے کو انسداد پولیو ویکسین پلائے جائیں۔ پولیو مہمات کی موثر نگرانی کو یقینی بنایا جائے تاکہ اس خطے سے پولیو وائرس کے مکمل خاتمے کو ممکن بنایا جاسکے۔ یہ ھدایات چیف سیکرٹری نے اتوار کے روز ڈپٹی کمشنر پشاور آفاق وزیر کے ہمراہ حیات آباد اور ریگی سمیت دیگر علاقوں میں جاری انسداد پولیو مہم کی نگرانی کرتے ہوئے دیں۔ چیف سیکرٹری نے پولیو سٹاف سے بھی ملاقات کی اور مہم کے دوران بہترین کارکردگی پر ان کی حوصلہ افزائی کی۔ انھوں نے والدین سے اپیل کی ہے کہ اپنے بچوں کو مستقل معذوری سے بچانے کے لیے پولیو سے بچاؤ کے قطرے ضرور پلائیں اور پولیو ٹیموں سے تعاون کریں تاکہ پولیو وائرس کا خاتمہ کیا جا سکے۔ انھوں نے کہا کہ ہمیں پولیو کے خاتمے کے لیے اپنا کردار ادا کر نا ہو گا اور ہماری مشترکہ کوششوں سے ہی پولیو کا خاتمہ ممکن ہو سکے گا۔واضح رہے کہ صوبائی دارلحکومت پشاورمیں ضلعی انتظامیہ کی زیر نگرانی سات روزہ انسداد پولیو مہم جاری ہے جس میں پشاور بھر میں 901985بچوں کو پولیو سے بچاؤ کے قطرے پلائیں جائیں گے جس کے لیے 2496ٹیمیں تشکیل دی گئی ہیں اور ان ٹیموں کی سیکیورٹی کا بھی خاطر خواہ بندوبست کیا گیا ہے۔