پاکستان تحریک انصاف ملاکنڈ ڈویژن کے صدر و خیبر پختونخوا کے وزیر برائے لائیو سٹاک، فشریز و کوآپریٹیو فضل حکیم خان یوسفزئی نے قائد عمران خان کی کال پر آج اسلام آباد میں ہونے والے عظیم الشان جلسے میں ملاکنڈ ڈویژن کے کارکنوں کو بھر پور شرکت کی ہدایت کرتے ہوئے کہا ہے کہ انشاء اللہ آج اسلام آباد میں ہونے والا جلسہ بانی پی ٹی آئی عمران خان کی رہائی کیلئے سنگ میل ثابت ہوگا، پی ٹی آئی ٹائیگرز اس جلسہ میں اپنی بھر پور شرکت کو یقینی بنائیں تاکہ فارم 47 کے تحت بننے والی وفاقی حکومت جان سکے کہ عوام اب بھی بانی پی ٹی آئی عمران خان کے ساتھ ہیں، کارکنان دوپہر 1 بجے میلہ ڈاگ مینگورہ پہنچیں جہاں سے مینگورہ کا قافلہ روانہ ہوگا اس سلسلے میں پورے ملاکنڈ ڈویژن کے تمام ممبران اسمبلی کو بھی مطلع کیا جاتا ہے کہ وہ 2 بجے تک اپنے اپنے قافلوں کے ہمراہ چکدرہ انٹر چینج پہنچ جائے جبکہ 3بجے صوابی انٹر چینج سے وزیراعلیٰ خیبر پختونخوا سردار علی امین گنڈاپور کی قیادت میں جلسہ میں شرکت کیلئے روانگی ہوگی ان خیالات کا اظہار پاکستان تحریک انصاف ملاکنڈ ڈویژن کے صدر و صوبائی وزیر لائیو سٹاک، فشریز و کوآپریٹو فضل حکیم خان یوسفزئی نے ایک اجلاس کی صدارت کرتے ہوئے کیا اجلاس اسلام آباد جلسے کی تیاریوں کے سلسلے میں منعقد ہوا تھا جس میں چیئرمین ڈیڈیک سوات ایم پی اے اختر خان ایڈوکیٹ، ایم این اے سلیم الرحمان، ایم پی اے سلطان روم، پی ٹی آئی مینگورہ سٹی صدر حیدر علی، خلیل احمد اور دیگر بھی موجود تھے اجلاس سے خطاب کرتے ہوئے فضل حکیم خان یوسفزئی نے کہا کہ آج کا جلسہ پاکستان کا تاریخی جلسہ ثابت ہوگا اس ملک کو عمران خان کی ضرورت ہے عمران خان ہی اس ملک کی تقدیر بدلے گا انہوں نے کہا پاکستانی عوام عمران خان کو جلد از جلد جیل سے رہائی کے منتظر ہیں ملاکنڈ ڈویژن کے کارکنان صوابی پہنچ کر وزیراعلی خیبرپختونخوا سردار علی امین گنڈاپور کی قیادت میں اسلام آباد روانہ ہونگے۔

وزیراعلیٰ خیبرپختونخوا کے مشیر برائے کھیل اور امور نوجوانان سید فخر جہان نے بدھ کو پیراپلیجک سنٹر حیات آباد پشاور میں منعقدہ تقریب میں بحیثیت مہمان خصوصی شرکت کی جہاں پر انھوں نے ”اپنا روزگار پروگرام” کے تحت باہم معذور ہنرمند افراد میں کاروبار کیلئے امدادی چیک تقسیم کئے جس کا اہتمام فرینڈز آف پیراپلیجکس، امریکی امدادی ادارے ایکولی ایبل اور پیراپلیجک سنٹر نے باہمی اشتراک سے کیا تھا۔ اس موقع پر صوبہ کے تمام اضلاع سے میرٹ کی بنیاد پر کوالیفائی کرنے والے 16 افراد باہم معذوری کو فی کس ایک لاکھ چالیس ہزار روپے کے چیک دیئے گئے جن میں ایک معذور خاتون بزنس ویمن بھی شامل ہے۔ پیراپلیجک سنٹر کے چیف ایگزیکٹیو ڈاکٹر سید محمد الیاس، ڈائریکٹر ری ہیب امیر زیب، سینئر فزیوتھراپسٹ گوہر رحمان، فرینڈز آف پیراپلیجکس کے چیئرمین ثناء اللہ، وائس چیئرمین احسان اللہ، جنرل سیکرٹری عرفان اللہ اور اسسٹنٹ کمشنر پشاور حسینہ کامران بھی اس موقع پر موجود تھے۔ سید فخر جہان نے تقریب سے خطاب میں وسائل کی قلت کے باوجود افراد باہم معذوری کے علاج اور مکمل بحالی، انکی ضروریات کے مطابق وہیل چیئرز اور مصنوعی سہارا جات کی تیاری، پیدائشی ٹیڑھے پاؤں والے بچوں (کلب فٹ)، پولیو اور آٹزم کے شکار بچوں کے مکمل علاج کی سہولیات پر پیراپلیجک سنٹر کی انتظامیہ بالخصوص چیف ایگزیکٹیو ڈاکٹر محمد الیاس کو خراج تحسین پیش کیا اور کہا کہ آج سے وہ خود بھی پیراپلیجک سنٹر اور فرینڈز آف پیراپلیجکس کے رضاکار کے طور پر کام کرینگے۔ انہوں نے پیراپلیجک سنٹر کے سپورٹس ایرینا کیلئے فوری کھیلوں کا سامان مہیا کرنے جبکہ وزیراعلی سے رابطہ کرکے صوبائی حکومت کی جانب سے سنٹر کے انڈومنٹ فنڈ کیلئے کم از کم ایک ارب روپے سیڈ منی رکھنے کی یقین دہائی بھی کی۔ انہوں نے کہا کہ صوبائی حکومت اگلے مہینے محکمہ یوتھ افئیرز کے ذریعے نوجوانوں کیلئے پانچ پانچ لاکھ روپے کے بلاسود جبکہ احساس کلسٹر پروگرام کے تحت ایک ایک کروڑ روپے قرضے کی سکیم متعارف کر رہی ہے جس میں پیراپلیجک سنٹر کی سفارش پر افراد باہم معذوری کیلئے الگ کوٹہ مختص کیا جائے گا۔ مشیر کھیل نے سنٹر کے دیگر مسائل کے حل کیلئے گاہے بگاہے یہاں کا دورہ کرنے کی یقین دہانی بھی کی۔ چیف ایگزیکٹیو ڈاکٹر محمد الیاس نے اختتامی کلمات میں ادارے کی کارکردگی پر تفصیلی روشنی ڈالی اور سنٹر سے مخلصانہ تعاون پر مشیر کھیل اور صوبائی حکومت کا شکریہ ادا کیا۔

وزیر اعلیٰ خیبر پختونخوا کے مشیر برائے اطلاعات و تعلقات عامہ بیرسٹر ڈاکٹر سیف نے کہا کہ مینڈیٹ چور مریم نواز غلط فہمی میں مبتلا ہے کہ وہ پنجاب کی اصلی وزیر اعلیٰ ہیں۔ ٹاک ٹاکر وزیر اعلیٰ نے پولیس کے ڈی پی اوز کو انٹرویو کے لیے جاتی امرا طلب کیا۔ فارم 47 کی وزیر اعلیٰ افسران کو جاتی امرا بلا کر ان کی تعیناتی کے فیصلے کرتی ہیں، بعد میں ان افسران کو سیاسی مخالفین کے خلاف استعمال کرتی ہیں، سرکاری افسران کو جاتی امرا بلاکر تعیناتی کرنا شریف خاندان کا پرانا وطیرہ ہے۔ ان خیالات کا اظہار انہوں نے یہاں سے جاری اپنے ایک بیان میں کیا۔ بیرسٹر سیف کا کہنا تھا کہ مینڈیٹ چور شریف خاندان پرانے پٹواری ذہنیت کیساتھ حکومت چلا رہا ہے، پولیس حکام کی تعیناتی کا واحد میرٹ پی ٹی ورکرز کو دبانا ہے، جو پولیس افسر پی ٹی آئی ورکرز کے خلاف ظلم وبربریت کرے تو اس کو ترقی دی جاتی ہے۔ مریم نواز فسطائیت کے نئے ریکارڈ بنارہی ہے۔ تاہم انہوں نے واضح کیا کہ مینڈیٹ چور ٹولہ کچھ بھی کرلے عمران خان اور انکے ورکرز کو نہیں توڑواسکتے۔ عمران خان کے خلاف جاہل ٹولے نے ہر حربہ استعمال کیا مگر وہ ناکام رہا،انہوں نے کہا کہ مینڈیٹ چوروں سے تمام مظالم کا بدلہ لیا جائے گا۔

خیبر پختونخوا کے وزیرایکسائز اینڈ ٹیکسیشن خلیق الرحمن نے رکن صوبائی اسمبلی اشفاق خان کے ہمرہ نوشہرہ پبی کے عوام کے لیے بی آر ٹی بس سروس کا افتتاح کیا۔اس موقع پر متعلقہ افسران اور معززین علاقہ بھی موجود تھے۔ افتتاح کے بعد اظہار خیال کرتے ہوئے وزیر ایکسائز خلیق الرحمن نے کہا کہ پبی نوشہرہ کے عوام کو آمدورفت کی سہولیات دینے اور ان کی سفری مشکلات کو کم کرنے کے لئے حکومت خیبر پختونخوا کا پشاور سے پبی تک بی آر ٹی بس چلانے کا اقدام ایک بہت اہم فیصلہ اور ضلع نوشہرہ کے لوگوں کے لیے ایک بہترین تحفہ ہے۔ انہوں نے کہا کہ بی آر ٹی بس سروس کے ذریعے سینکڑوں لوگ روزانہ کی بنیاد پر پشاور سے پبی اور پبی سے پشاور ایک انتہائی ارام دہ اور پرسکون طور پر محفوظ سفر کی سہولت سے مستفید ہونگے۔ صوبائی وزیرنے کہا کہ وہ دن رات اپنے حلقے کے عوام کی خدمت کے لیے کوشاں ہیں اور محدود وسائل کے باوجود اس طرح کے مزید منصوبوں کا آغاز کرنے کے لئے ان کے بھر پور اقدامات جاری ہیں۔ انہوں نے مذکورہ منصوبے کے افتتاح پر خوشی کا اظہار کیا کہ اس کی بدولت ضلع نوشہرہ کے عوام بہتر سہولت سے مستفید ہوں گے۔ انہوں نے یقین دلایا کہ وہ اپنے حلقے کے عوام سے کیے گئے تمام وعدوں کو پورا کرنے کی مکمل کوشش کریں گے۔

چیف سیکرٹری خیبرپختونخوا ندیم اسلم چوہدری سے منگل کے روز ہوٹل اینڈ ریسٹورنٹ اور بیکرز ایسوسی ایشن کے نمائندہ وفد کی ملاقات ہوئی۔ ملاقات میں متعلقہ انتظامی سیکرٹریز، حلال فوڈ اتھارٹی، خیبر پختونخوا ریو نیو اتھارٹی، ضلعی انتظامیہ کے نمائندوں سمیت دیگر متعلقہ حکام نے شرکت کی جبکہ کمشنرز نے بذریعہ ویڈیو لنک اجلاس میں شرکت کی۔ اجلاس میں ہوٹل اینڈ ریسٹورنٹ اور بیکرز ایسوسی ایشن کے نمائندہ وفد نے چیف سیکرٹری خیبر پختونخوا کو ہوٹلوں اور بیکریوں سے متعلق کو درپیش مسائل سے آگاہ کیا اور مختلف تجاویز بھی پیش کیں۔ اس موقع پر چیف سیکرٹری خیبرپختونخوا ندیم اسلم چوہدری نے ہوٹلوں اور بیکریوں کے مالکان کو درپیش مسائل کو توجہ سے سنتے ہوئے انھیں حل کرنے کے لیے ہر ممکنہ تعاون کا یقین دلایا۔انہوں نے کہاکہ کاروباری طبقے کو کاروبار کیلئے سازگار ماحول کی فراہمی حکومت کی ترجیحات میں شامل ہے اور حکومت مستحکم معیشت کیلئے سازگار کاروباری ماحول فراہم کرنے کیلئے پرعزم ہے کیونکہ ان کاروباروں سے ہزاروں افراد کا روزگار وابستہ ہے۔ چیف سیکرٹری کا کہنا تھا کہ کاروباری حضرات کیلئے آسانیاں پیدا کرنی ہیں اور ا سی طرح ہوٹلوں اوربیکریز کے مالکان اپنے ہوٹلوں اور دیگر عوامی مراکز پر صحت و صفائی اور عوام کے لئے معیاری خوردونوش کی اشیاء کی دستیابی کو یقینی بنائینگے۔ انہوں نے مزید کہا کہ ٹیکسوں کے معاملات پرکاروباری طبقے کے لیے آسانیاں پیدا کرنے اور حکومتی سطح پر شفافیت کا عنصر برقرار رکھنے کے لیے ٹیکنالوجی کا استعمال ناگزیر ہے۔اسی طرح انہوں نے ضلعی انتظامیہ اور متعلقہ محکموں کا تاجران کے ساتھ روابط بڑھانے پر بھی زور دیا۔

خیبر پختونخوا کے وزیر صحت سید قاسم علی شاہ ایم پاکس کیلئے مسافروں کی سکریننگ کا جائزہ لینے باچا خان انٹرنیشنل ائیرپورٹ پہنچ گئے۔ وزیر صحت نے ایم این اے ارباب شیرعلی اور ڈائریکٹر پبلک ہیلتھ ڈاکٹر ارشاد روغانی کے ہمراہ باچا خان انٹرنیشنل ائیرپورٹ کا دورہ کیا۔ انچارج بارڈر ہیلتھ سروسز باچا خان انٹرنیشنل ائیرپورٹ ڈاکٹر فریض الدین نے وزیر صحت کو فلائٹ سے آنے والے مسافروں کی سکریننگ بارے بریفنگ دی۔وزیر صحت نے فلائیٹ سے آنے والے مسافروں کی سکریننگ کا خود معائنہ کیا۔ انہوں نے ہدایت کی وبا کو ریسپانڈ کرنے سے بہترہے ہم احتیاط بھرتیں اور سکریننگ پر زیادہ توجہ دیں۔ ان کے مطابق ایم پاکس کے ممکنہ پھیلاو سے بچنے کیلئے سکریینگ پر زور دے رہے ہیں۔ بارڈر اور ائیرپورٹ سے آنے والے مسافر سکریننگ میں عملے کیساتھ تعاون کریں۔ پختونخوا کوویڈ جیسے دوسرے وبا کا متحمل نہیں ہوسکتا۔ وزیر صحت نے اس موقع پر بتایا کہ ایم ٹی آئیز کو خصوصی ہدایات جاری کی گئی ہیں کہ او پی ڈی کے دوران ایم پاکس کے علامات رکھنے والے مشتبیہ مریضوں کو فوری آئسولیٹ کرکے انہیں آئسولیشن وارڈ ریفر کریں جہاں سے ان کے نمونے پبلک ہیلتھ ریفرنس لیب بھجوائے جائینگے تاکہ اس کا تجزیہ ہوسکے کہ مریض کو ایم پاکس لاحق ہوگیا ہے یا نہیں۔ انہوں نے مزید بتایا کہ اب تک کلیڈون کا کوئی کیس سامنے نہیں جبکہ کلیڈ ٹو اتنا خطرناک اور جان لیوا نہیں۔

خیبرپختونخوا کے وزیر برائے صحت سید قاسم علی شاہ نے پختونخوا میں ڈیڑلاکھ آٹیزم کے شکار بچوں کی ذہنی بحالی کیلئے صوبے میں پاکستان کے پہلیا اٹیزم تھراپیوٹڑک کلینکس قائم کرنے کا فیصلہ کیا ہے۔ تفصیلات کے مطابق ان کلینکس میں آٹیزم کا شکار بچوں کا علاج نو پروفیٹ نو لاس کی بنیاد پر ہوگا، اور یہ کلینکس پشاور، ہری پور، مردان، چارسدہ، مانسہرہ، صوابی، چترال ڈیرہ اسماعیل خان، سوات، دیر میں قائم کئے جائینگے۔ آٹیزم سوسائٹی آف پاکستان کے 2023 کے اعداد و شمار مطابق پختونخوا میں ایک لاکھ پچاس ہزار بچے آٹیزم کا شکار ہیں اور ان بچوں کی ذہنی بحالی کیلئے سرکاری سطح پر کوئی کلینک یا علاج کا انتظام میسر نہیں ہے۔ ان میں سے زیادہ تر بچے دور افتاد علاقوں سے تعلق رکھتے جن کے علاج معالجے اور ذہنی بحالی کے لئے کوئی مرکز موجود نہیں۔ وزیر صحت سید قاسم علی شاہ کے مطابق نارمل زندگی گزارنا ہر بچے کا بنیادی حق ہے اور کسی بھی بچے کو اس کی ذہنی کیفیت یا سماجی پس منظر کی بنیاد پر معاشرے سے علیٰحدہ کرنا پسماندہ ہونے کا ثبوت ہے۔ اگر ان بچوں کی ذہنی بحالی کو مقدم رکھا جائے تو یہ بچے ہماری ترقی میں اہم کردار ادا کرسکتے ہیں۔ اس بابت محکمہ صحت اور آٹیزم اینڈ لرننگ ڈسیبیلیٹیز آرگنائزیشن کے درمیان مفاہمتی یادداشت پر دستخط ہوئے۔ مفاہمتی یادداشت کے تحت آٹیزم کا شکار بچوں کی ذہنی بحالی کیلئے ضلعی ہسپتالوں میں کلینکس قائم کئے جائینگے۔ مفاہمتی یادداشت کے مطابق آئندہ پانچ سالوں کیلئے صوبے کے دس اضلاع میں آٹیزم کلینکس قائم کئے جائینگے۔ محکمہ صحت ضلعی ہسپتالوں میں آٹیزم کلینکس کیلئے جگہ و وسائل فراہم کرے گا،ان کیلینکس میں نفسیاتی ماہرین پر مشتمل عملہ تعینات ہوگا جو کہ آٹزم کے شکار بچوں کی ذہنی بحالی کیلئے خدمات انجام دیگا۔