وزیر اعلیٰ خیبر پختونخوا کے معاون خصوصی برائے صنعت وحرفت اور فنی تعلیم عبدالکریم تورڈھیر نے پیر کے دن صوبے میں کرش پلانٹس کے امور کے حوالے سے منعقدہ ایک جائزہ اجلاس کی صدارت کی جس میں محکمہ صنعت ا ور دیگر اداروں کے تحت سٹون کرشرز کے حوالے سے متعلقہ قوانین اور قواعد وضوابط کا جائزہ لیا گیا۔اجلاس میں ادارہ برائے تحفظ ماحولیات،محکمہ صنعت،معدنیات،قانون اور دیگر متعلقہ محکموں کے حکام نے شرکت کی۔اس موقع پر اظہار خیال کرتے ہوئے معاون خصوصی نے ہدایت کی کہ بطور صنعت کرش پلانٹس کے لئیے محکمے اپنے قوانین اور قواعد وضوابط میں آسانیاں فراہم کریں تاکہ یہ صنعت صوبے کے مخصوص زمینی حقائق کو مدنظر رکھتے ہوئے ترقی سے ہمکنار ہو سکے۔انھوں نے ہدایت کی کہ کرش پلانٹس کے حوالے سے مختلف محکموں کے موجودہ قانون، پلانٹس کی تنصیب اور مقامی آبادی پر اثرات کے حوالے سے تفصیلی جائزہ لیا جائے۔

وزیر اعلیٰ کے معاون خصوصی برائے جیل خانہ جات کا ڈسٹرکٹ جیل ایبٹ آباد کا تفصیلی دورہ
وزیر اعلیٰ خیبرپختونخوا کے معاون خصوصی برائے جیل خانہ جات، ہمایون خان نے ایم پی اے افتخار جدون اور ایم پی اے و ڈیڈک چیئرمین لائق محمد خان کے ہمراہ ڈسٹرکٹ جیل ایبٹ آباد کا دورہ کیا۔ اس موقع پر ڈی آئی جی جیل خانہ جات ہزارہ ریجن، عمیر خان بھی موجود تھے۔
دورے کے دوران ڈپٹی سپرنٹنڈنٹ جیل نے معاون خصوصی اور دیگر نمائندگان کو جیل کی انتظامی صورتحال، قیدیوں کے مسائل، اور جیل میں فراہم کردہ سہولیات پر تفصیلی بریفنگ دی۔ معاون خصوصی ہمایون خان نے جیل کے مختلف حصوں کا معائنہ کرتے ہوئے قیدیوں سے براہ راست ملاقات کی اور ان کے مسائل کے بارے میں دریافت کیا۔وزیر اعلیٰ کے معاون خصوصی نے بانی چیئرمین عمران خان اور وزیر اعلیٰ علی آمین گنڈاپور کی ہدایات کی روشنی میں قیدیوں کے مسائل کا فوری حل نکالنے کے احکامات جاری کیے۔ قیدیوں نے معاون خصوصی کو جیل میں علاج معالجے، ادویات، اور دیگر بنیادی سہولیات کی کے حوالے سے آگاہ کیا، جس پر ہمایون خان نے فوری اقدامات لینے اور ادویات کی بروقت فراہمی یقینی بنانے کی ہدایت دی۔جیل میں موجود کمی و بیشی اور تعمیراتی کاموں میں درکار اصلاحات کے لیے پی سی ون تیار کرنے کا حکم دیا گیا تاکہ جیل میں سہولیات کو بہتر کیا جا سکے۔ معاون خصوصی نے کہا کہ جیلوں میں قیدیوں کو انسانی حقوق فراہم کرنا حکومت کی اولین ترجیح ہے، اور اس سلسلے میں کسی قسم کی کوتاہی ناقابل قبول ہوگی۔ڈسٹرکٹ جیل ایبٹ آباد میں اعلیٰ معیار کے پولیتھین بیگز اور دیگر اشیاء تیار کی جاتی ہیں، جنہیں قومی مارکیٹ سے منسلک کرنے کے لیے جیل انڈسٹری کو مزید فعال بنانے کے احکامات دیے گئے۔ معاون خصوصی نے اس بات پر زور دیا کہ جیل کی مصنوعات کو مارکیٹ تک پہنچایا جائے تاکہ جیل انڈسٹری سے تیار ہونے والی اشیاء کو عام عوام تک رسائی دی جا سکے اور قیدیوں کو ایک مثبت معاشی سرگرمی میں شامل کیا جا سکے۔معاون خصوصی نے جیل سپرنٹنڈنٹ کو ہدایت دی کہ قیدیوں کی صحت، علاج معالجہ، اور دیگر انسانی حقوق کے معاملات میں مزید بہتری لائی جائے اور ہر ممکن سہولت فراہم کی جائے۔

ملاوٹ مافیا کے خلاف خیبر پختونخوا فوڈ اتھارٹی کی مردان،لوئر دیر اور ڈی آئی خان میں کارروائیاں، سیکنڑوں کلوگرام غیر معیاری کیچپ، جعلی شہد،ممنوعہ چائنہ سالٹ برآمد، جرمانے عائد
خیبر پختونخوا فوڈ سیفٹی اینڈ حلال فوڈ اتھارٹی نے ملاوٹ مافیا کے خلاف صوبہ بھر میں کارروائیاں جاری رکھتے ہوئے مردان، دیر لوئر اور ڈیرہ اسماعیل خان میں چھاپے مارے اور سینکڑوں کلوگرام غیر معیاری کیچپ، ممنوعہ چائنا سالٹ اور جعلی شہد پکڑ کر ضبط کر لیا گیا
اس سلسلے میں ترجمان فوڈ اتھارٹی نے تفصیلات جاری کرتے ہوئے کہا کہ گزشتہ روز فوڈ سیفٹی ٹیم مردان نے خواجہ گنج بازار اور طورو چوک میں واقع گوداموں پر چھاپے مار کر 2 ہزار کلو گرام غیر معیاری کیچپ برآمد کر لیا۔ ترجمان فوڈ اتھارٹی کے مطابق برآمد شدہ غیر معیاری خوراک میں 25 کلو چائنہ سالٹ اور 15 کلو کھلا رنگ بھی شامل تھا۔ تمام مضر صحت خوراک کو سرکاری تحویل میں لے لیا گیا جبکہ مالک پر بھاری جرمانہ بھی عائد کیا گیا ہے۔اسی طرح لوئر دیر ٹیم نے تیمرگرہ اڈہ میں واقع ایک ہوٹل سے 55 کلو سے زائد جعلی شہد ضبط کر لیا اور ہوٹل کے مالک پر جرمانہ عائد کر دیا گیا۔ مزید براں، ڈی آئی خان میں فوڈ سیفٹی ٹیم نے ایک بریانی دکان کے کچن کا معائنہ کرتے ہوئے وہاں سے ممنوعہ چائنہ نمک برآمد کر کے کچن کو سیل کر دیا۔ ترجمان کے مطابق قانون کی خلاف ورزی پر ملوث مالکان کے خلاف فوڈ سیفٹی ایکٹ کے تحت مزید قانونی کارروائی کا آغاز بھی کر دیا گیا ڈائریکٹر جنرل فوڈ اتھارٹی واصف سعید نے انسپکشن ٹیموں کی کاروائیوں کو سراہا اور اس عزم کا اعادہ کیا کہ ملاوٹ شدہ اور مضر صحت خوراک کے خلاف کارروائیوں کا سلسلہ جاری رہے گا۔صوبائی وزیر خوراک ظاہر شاہ طورو نے کہا کہ ملاوٹ شدہ خوراک کی سپلائی اور فروخت کسی صورت برداشت نہیں کی جائے گی اور متعلقہ حکام کو ہدایت کی کہ ایسے عناصر کیخلاف کاروائی میں مزید تیزی لائی جائے اور ملاوٹ جیسے گھناؤنے کاروباروں کیخلاف سخت قانونی کارروائی بھی عمل میں لائی جائے۔

وزیر اعلیٰ خیبر پختونخوا کے معاون خصوصی برائے سی اینڈ ڈبلیو سہیل آفریدی نے کہا ہے کہ وہ اپنے حلقے کے اجتماعی بنیادی مسائل کے حل کے لیے تمام تر وسائل بروئے کار لا رہے ہیں اور تعلیم، صحت، پینے کے صاف پانی کی فراہمی، سڑکوں کی تعمیر اور عوام کے لیے روزگار کے مواقع پیدا کرنا بنیادی ترجیحات میں شامل ہے۔ ان خیالات کا اظہار انہوں نے اپنے حلقے کے اجتماعی مسائل کے حوالے سے اپنے دفتر باڑہ میں بلائے گئے حلقے کے مشران اور عمائدین پر مشتمل گرینڈ جرگے کے شرکاء سے خطاب کر تے ہوئے کیا کیا۔اس موقع پر حلقہ پی کے 70 سے تعلق رکھنے والے عمائدین اور تاجر یونین کے عہدیداران نے بھی شرکت کی۔جرگے میں قومی مسائل اور مشکلات کے حوالے سے عمائدین نے بات کرتے ہوئے کہا کہ قبیلہ شلوبر میں نہری پانی کا بڑا مسئلہ ہے جس کی وجہ سے سینکڑوں ایکڑ زمین بنجر ہو چکی ہے، دوسرا بڑا مسئلہ کرش انڈسٹری کی بندش ہے جس سے علاقے کے ہزاروں لوگ کا روزگار وابستہ تھا جو گزشتہ 17 سالوں سے بند پڑی ہیں جن کی بحالی کے لیے کئی احتجاج بھی ہوئے اور اگر کرش انڈسٹری بحال ہو تی ہیں تو علاقے کے ہزاروں گھرانوں کو دوبارہ روزگار مل جائے گا۔جرگے سے خطاب کرتے ہوئے وزیر اعلیٰ خیبر پختونخوا کے معاون خصوصی برائے سی اینڈ ڈبلیو سہیل آفریدی نے کہا کہ اپنے حلقے کے مسائل سے وہ بخوبی آگاہ ہیں اور باڑہ میں نہری نظام کی بحالی اور حائل رکاوٹوں کو دور کرنے کے لیے ایک کمیٹی تشکیل دی جائے گای جس میں تمام قبیلوں کی نمائندگی موجود ہوگی اور یہ کمیٹی باقی ماندہ مسائل کے حل کے لئے بھی اقدامات اٹھائے گی، سہیل آفریدی نے کہا کہ کرش انڈسٹری کی بندش بارود کے استعمال پر عائد پابندی کے سبب ہے اور اس پابندی کو ختم کرنے کے لیے صوبائی سطح پر کام جاری ہے جس کا جلد حل نکالا جائے گا۔ انہوں نے مزید کہا کہ باڑہ بائی پاس روڈ اور سراج الدین مدرسہ ٹو برقمبر خیل روڈ کی تعمیر کے لیے فنڈ منظور کردیا ہے جس پر جلد کام شروع کیا جائے گا۔سہیل آفریدی نے کہا کہ کوکی خیل، برقمبر خیل اور شلوبر میں لنکس روڈز کی تعمیر و مرمت اور پینے کے صاف پانی کی فراہمی پر کام کا آغاز ہو چکا ہے سہیل آفریدی نے کہا کہ تعلیمی نظام کی بہتری پر کام ان کی بنیادی ترجیحات میں شامل ہے۔ انہوں نے کہا کہ پرائمری سکولوں میں 54 ہزار طلباء زیر تعلیم ہوتے ہیں لیکن جب یہی طلباء میڈل سکولوں میں جاتے ہیں تو ان کی تعداد صرف 8 ہزار تک رہ جاتی ہے اور باقی 46 ہزار ہمارے بچے تعلیم سے محروم ہو جاتے ہیں جس میں محکمہ تعلیم کے ساتھ ساتھ والدین کی بھی کوتاہی ہے۔ انہوں نے کہا کہ وہ اپنے علاقے کو تاریکیوں سے نکال کر روشنیوں کی طرف لے جانا چاہتے ہیں۔

وزیر اعلیٰ خیبر پختونخوا کے معاون خصوصی برائے صنعت و حرفت اور فنی تعلیم عبدالکریم تورڈھیر نے خیبرپختونخوا اکنامک زون ڈویلپمنٹ اینڈ منیجمنٹ کمپنی کے قائم مقام چیف ایگزیکٹیو آفیسر عادل صلاح الدین اور زون منیجر ساجد نواز کے ہمراہ حیات آباد صنعتی زون میں آگ لگنے سے متاثرہ ہونے والی فیکٹری کا دورہ کیا اور وہاں پر ہونے والے نقصانات کا جائزہ لیا۔ انھوں نے آگ بجھانے والے فائر وہیکلز و فائر فائٹرز کے عملے اور فیکٹری کے ملکان سے ملاقات کی اور پیش آنے والے اس افسوس ناک واقعے پر انتہائی افسوس کا اظہار کیا۔عبدالکریم تورڈھیر نے تمام امدادی ایجنسیوں اور ان کے عملے کی جانب سے آگ پر قابو پانے اور کسی بھی انسانی جانی نقصان سے بچنے میں اپنی پوری کوشش کرنے اور کامیابی حاصل کرنے پر دکھائی گئی ہمت اور بہادری کو سراہا۔ پشاور کے علاقے حیات آباد میں واقع پشاور اکنامک زون میں ڈائپر کی ایک فیکٹری میں خطرناک آگ بھڑک اٹھی تھی جس کے باعث مذکورہ فیکٹری عمارت کو کافی نقصان ہواہے۔ریسکیو 1122 کے ترجمان کے مطابق کارخانے میں لگی آگ پر قابو پا لیا گیا ہے۔زون کے بڑے صنعتی یونٹ میں لگنے والی آگ پر قابو پانے کے لیے فوری ردعمل اور مشترکہ کوششیں شروع کی گئیں تھیں۔خیبربختونخوا اکنامک زونز ڈویلپمنٹ اینڈ منیجمنٹ کمپنی کے ذرائع کے مطابق زون کی اندرونی ریسکیو ٹیم نے فوری طور پر رسپانس دیا جبکہ فائر فائٹنگ ٹیمیں اور ریسکیو 1122 کا عملہ بھی منٹوں میں موقع پر پہنچ گیا تھا۔

صوبائی مشیر اطلاعات و تعلقات عامہ بیرسٹر ڈاکٹر سیف نے کہا ہے کہ خیبر پختونخوا کی حکومت نے صوبے میں یونیورسل ہیلتھ کوریج کے بعد عوام کو لائف انشورنس فراہم کرنے کا انقلابی منصوبہ منظور کیا ہے،اس فلاحی منصوبے کا مقصد غریب اور کمزور طبقے کو مالی تحفظ فراہم کرنا ہے۔اپنے ایک بیان میں بیرسٹر سیف نے کہا کہ صوبے کی 49 فیصد آبادی خط غربت سے نیچے زندگی گزار رہی ہے، ایک فرد کی موت پورے خاندان کو مالی بحران میں مبتلا کر دیتی ہے، جانی نقصان کی تلافی ناممکن ہے مگر حکومت کی جانب سے متاثرہ خاندانوں کی مالی معاونت کے لیے یہ ایک بڑا اقدام ہے۔انہوں نے کہا کہ 60 سال سے زائد عمر کے افراد کی فوتگی پر ورثاء کو 5 لاکھ روپے کی مالی امداد دی جائے گی اور 60 سال سے کم عمر کے افراد کی موت پر ورثاء کو 10 لاکھ روپے تک مالی معاونت فراہم کی جائے گی۔انہوں نے کہا کہ انشاء اللہ یہ منصوبہ خیبرپختونخوا میں فلاحی ریاست کے قیام کی جانب ایک اور اہم سنگ میل ثابت ہو گا۔مشیر اطلاعات بیرسٹر ڈاکٹر سیف نے کہا کہ حکومت صوبائی سطح پر انشورنس کمپنی کے قیام کی تجویز پر بھی غور کر رہی ہے۔

صوبائی وزیر برائے پبلک ہیلتھ انجینئرنگ پختون یار خان نے کشمیری عوام کی حق پرست جدوجہد میں ان کی غیر متزلزل حمایت کے عزم کا اعادہ کرتے ہوئے کہا ہے کہ بھارت کے غیر انسانی اقدامات، وحشیانہ جبر نے ہندو نظریے کے پیروکار آر ایس ایس بی جے پی حکومت کا انتہا پسندانہ چہرہ بے نقاب کر دیا ہے۔اپنے ایک بیان میں انہوں نے کہا کہ بھارت کے اقدامات بین الاقوامی قوانین، اقوامِ متحدہ کی سلامتی کونسل کی قراردادوں اور کشمیریوں سے بھارتی وعدوں کی خلاف ورزی ہیں جنہیں کشمیری عوام، پاکستان اور عالمی برادری نے مسترد کردیا ہے کشمیری عوام کئی سالوں سے اپنے گھروں میں قید ہیں وہ اپنی زمین اور اپنی ہی سڑکوں پر آزادانہ طور پر چلنے کے قابل نہیں، 80 لاکھ کشمیریوں پر 9 لاکھ سے زائد قابض فوج نے مقبوضہ علاقے کو دنیا کی سب سے بڑی جیل بنا دیا ہے صوبائی وزیر نے اس عزم کا اعادہ کیا کہ اقوامِ متحدہ کی قراردادوں کے مطابق کشمیریوں کے حقِ خودارادیت کے حصول تک ان کی حمایت جاری رکھیں گے۔

خیبر پختونخوا حکومت نے صوبے کی جیلوں میں قیدیوں کی فلاح وبہبود کیلئے مختلف اقدامات اٹھانے کا فیصلہ کیا ہے اور اس سلسلے میں جیلوں کے اندر قیدیوں کے ہاتھوں بننے والی مختلف دستکاری اور ہاتھ سے بننے والی اشیاء کی ڈیجیٹل مارکیٹنگ کیلئے اقدامات اٹھانے کی ہدایت کی گئی ہے جبکہ مختلف شعبوں میں ضروری فنی تربیتی کورسز کیلئے فنی تعلیم کے شعبے اور جیلوں کے مابین رابطے استوار کرنے کی بھی ہدایت کی گئی ہے۔ اس طرح قیدیوں کو فراہم کی جانے والی اشیائے خوراک کو معیاری بنانے اور اس کے مینیو میں بہتری لانے اور ریٹس کی ڈیجٹلائزیشن پر بھی کام کرنے کی ہدایت کی گئی ہے۔ قید کے اندر تربیت حاصل کرنے والے قیدی ہنرمندوں کی رہائی کے بعد روزگار کیلئے انھیں احساس نوجوان پروگرام کی قرضہ سکیم میں شامل کرنے پر بھی ہوم ورک کرنے کی یقین دہانی کرائی گئی ہے جبکہ قیدیوں کیلئے مختلف تیکنیکی کورسز کیلئے آن لائن کلاسز کا بندوبست کرنے پر بھی غوروخوض کرنے کا عندیہ دے دیا گیا ہے۔یہ ہدایات جمعرات کے روز معاون خصوصی برائے جیل خانہ جات ہمایون خان،صوبائی وزیر اعلیٰ تعلیم مینا خان آفریدی،وزیر سماجی بہبود سید قاسم علی شاہ اور وزیر اعلیٰ کے معاون خصوصی برائے صنعت و حرفت اور فنی تعلیم عبدالکریم تورڈھیر نے سنٹرل جیل پشاور کا مشترکہ طور پر دورہ کرنے کے موقع پر جیل خانہ جات کے حکام کے ساتھ منعقدہ اعلیٰ سطح اجلاس کی صدارت کرتے ہوئے جاری کیں۔دورے کے موقع پر رکن قومی اسمبلی آصف خان،اراکین صوبائی اسمبلی،انسپکٹر جنرل جیل خانہ جات عثمان محسود،سپرنٹنڈنٹ جیل کے علاوہ جیل خانہ جات کے دیگر افسران اور کئی دیگر محکموں کے حکام بھی موجود تھے۔اس موقع پر معزز مہمانوں کو تفصیلی بریفنگ دی گئی جبکہ انھوں نے بیرکس میں قیدیوں سے ملاقات کے علاوہ لیدر انڈسٹری،ہینڈی کرافٹس،ایمبرائڈری،دستکاری و دیگر ہاتھ سے بنی ہوئی اشیاء کے تربیتی و کاروباری مقامات کا معائنہ کیا۔وہاں قیدی ہنر مندوں سے ملے اور ان کے کام میں گہری دلچسپی ظاہر کی۔دورے کے دوران معاونین خصوصی و صوبائی وزرا نے تیکنیکی تربیت حاصل کرنے والے قیدی ہنرمندوں کو اسناد سے بھی نوازا اور انکے روشن مستقبل کیلئے نیک خواہشات کا اظہار کیا۔بریفنگ کے دوران معاون خصوصی برائے جیل خانہ جات کا کہنا تھا کہ صوبائی حکومت جیلوں کے اندر قیدیوں کی فلاح وبہبود کیلئے مثبت اصلاحات لانے کی خواہاں ہے تاکہ اسیران کو تمام انسانی سہولیات میسر ہوں۔انھوں نے کہا کہ اس سلسلے میں ضروری تقاضوں کو مد نظر رکھتے ہوئے جیل رولز میں ترامیم بھی کی جاسکتی ہیں اور اس سلسلے میں موجودہ قوانین میں بہتری لانے کیلئے محکمہ نشاندہی کرے جس پر حکومت عملدرآمد کرے گی۔انھوں نے کہا کہ جیلوں میں آن لائن ملاقاتوں کا پروگرام بنا رہے ہیں جبکہ جیل میں فراہم کی جانے والی خوراک کے مینیو میں بھی بہتری لائی جارہی ہے۔انھوں نے کہا کہ قیدیوں کی تیار کردہ صنعتی اشیاء کی نمائش کیلئے ڈسپلے سنٹر کا قیام عمل میں لایا جائے گا جبکہ آن لائن پلیٹ فارمز پر بھی ان اشیاء کی مارکیٹنگ کے لئے اقدامات اٹھانے کی یقین دہانی کرائی گئی۔معاون خصوصی نے صحت و تفریح اور دیگر ضروری شعبوں میں قیدیوں کی سہولیات کیلئے درکار منصوبوں میں مدد فراہم کرنے کی بھی یقین دہانی کرائی۔ اس موقع پر معاون خصوصی برائے صنعت عبدالکریم تورڈھیر نے کہا کہ جیلوں میں قیدیوں کو مختلف تیکنیکی ہنر سے آراستہ کرنے کیلئے انھیں فنی تعلیم کے مختلف اداروں سے مربوط کیا جائے گا۔انھوں نے کہا کہ صوبائی حکومت کے فلیگ شپ منصوبے احساس نوجوان سکیم کے تحت انٹر پرینیورشپ میں جیلوں سے رہا ہونے والے ہنر یافتہ نوجوانوں کو اخوت فاؤنڈیشن کی قرضہ سکیم میں شامل کرنے کیلئے اقدامات اٹھائے جائیں گے۔اس موقع پر صوبائی وزیر مینا خان آفریدی نے بھی اعلیٰ تعلیم کے شعبے میں درکار مواقع پر جیلوں میں تربیت اور فنڈز کی فراہمی میں معاونت فراہم کرنے کی یقین دہانی کرائی۔دورے کے دوران صوبائی وز راء اور معاونین خصوصی نے سنٹرل جیل پشاور میں پودا بھی لگایا۔

وزیر اعلیٰ خیبر پختونخو ا کے مشیر اطلاعات وتعلقات عامہ بیرسٹر ڈاکٹر سیف نے کہا ہے کہ بشری بی بی کی ضمانت خوش آئند ہیں، لیکن مریم نواز دوسرے جعلی کیس بنانے کی تیاری نہ کریں، اپنے دفتر سے جاری بیان میں انہوں نے کہا کہ جعلی حکومت بشری بی بی کو عمران خان سے وفا کی سزا دے رہی ہیں، انہوں نے کہا کہ بشری  بی بی وفا کی ایک داستان ہے جو عمران خان کے ساتھ نبھائی گئی ہے۔ بیرسٹر ڈاکٹر سیف نے مزید کہا کہ مشکل حالات میں بشری بی بی عمران خان کی طاقت بنی رہی اور انھیں توڑنے کے لئے فارم 47 کی جعلی وفاقی اور پنجاب کی حکومتوں نے ہر حربہ استعمال کیا مگر انھیں ناکامی کے سوا کچھ نہیں ملا۔ انہوں نے کہا کہ بشری بی بی نے راج کماری مریم نواز کی طرح کبھی بھی مگر مچھ کے آنسو نہیں بہائے، اور نہ ہی فرائننگ پین سے کپڑے استری کرنے کے شوشے چھوڑے، بیرسٹر ڈاکٹر سیف نے کہا کہ ناحق قید کے 266 دنوں کا ایک ایک دن وفا کی ایک ایک داستان ہے، وفاداری میں شائد ہی کسی نے بشری بی بی جتنی قربانیاں دی ہوں۔