خیبر پختونخوا کے صوبائی وزیر برائے آبپاشی ریاض خان نے ضلع بونیر کے سیلاب سے متاثرہ علاقوں میں عوام کی جان و مال کے تحفظ کے لیے ایک اہم منصوبے کا افتتاح کر دیا

خیبر پختونخوا کے صوبائی وزیر برائے آبپاشی ریاض خان نے ضلع بونیر کے سیلاب سے متاثرہ علاقوں میں عوام کی جان و مال کے تحفظ کے لیے ایک اہم منصوبے کا افتتاح کر دیا۔ صوبائی وزیر نے ضلع بونیر تحصیل گدیزئی کے گاؤں بیشونئی میں 142 ملین روپے کی لاگت سے تعمیر کیے گئے فلڈ پروٹیکشن ورکس کا باضابطہ افتتاح کیا۔
افتتاحی تقریب میں سابق تحصیل ناظم شیر عالم خان، معتبر خان ایڈوکیٹ، ظفر سانی، ضیاء حسین، محکمہ آبپاشی کے ایکسین سلیمان خان، ایس ڈی او رضوان خان کے علاوہ علاقہ عمائدین، معززین، تاجر برادری اور شہریوں کی کثیر تعداد نے بھی شرکت کی۔
اس موقع پر تقریب سے خطاب کرتے ہوئے صوبائی وزیر ریاض خان نے کہا کہ بیشونئی میں فلڈ پروٹیکشن وال کا یہ منصوبہ علاقے کو مستقبل میں سیلابی خطرات سے محفوظ بنانے میں اہم کردار ادا کرے گا۔ انہوں نے کہا کہ گزشتہ سیلاب کے دوران بونیر کے مختلف علاقے، بالخصوص بیشونئی، قدر نگر، بٹئی، گوکند اور چغرزی شدید متاثر ہوئے تھے، جن کی بحالی ان کی اولین ترجیحات میں شامل ہے۔
صوبائی وزیر نے کہا کہ صوبائی حکومت وزیر اعلیٰ محمد سہیل افریدی کی قیادت میں متاثرہ علاقوں کی بحالی، بنیادی سہولیات کی فراہمی اور پائیدار ترقی کے لیے ٹھوس اقدامات اٹھا رہی ہے۔ انہوں نے کہا کہ اس منصوبے کے لیے 142 ملین روپے مختص کیے گئے ہیں، جو نہ صرف علاقے کو قدرتی آفات سے محفوظ بنائیں گے بلکہ مقامی ترقی میں بھی اہم سنگ میل ثابت ہوں گے۔
انہوں نے متعلقہ حکام کو ہدایت کی کہ ترقیاتی منصوبوں میں شفافیت، اعلیٰ معیار اور بروقت تکمیل کو ہر صورت یقینی بنایا جائے تاکہ عوام کو ان منصوبوں کے ثمرات جلد از جلد میسر آ سکیں۔
انہوں نے عوامی مسائل کے فوری حل اور ترقیاتی عمل کو مزید تیز کرنے کے عزم کا اعادہ کیا اور کہا کہ موجودہ صوبائی حکومت عوام کی دہلیز پر سہولیات کی فراہمی، سیلاب سے متاثرہ علاقوں کی بحالی اور پائیدار ترقی کے لیے اپنی کوششیں جاری رکھے گی۔