وزیر اعلی خیبر پختونخوا کے معاون خصوصی برائے اطلاعات و تعلقات عامہ شفیع جان نے پنجاب اسمبلی میں صوبائی وزراء کے ساتھ سیکیورٹی عملے کے ہتک آمیز رویے کی شدید الفاظ میں مذمت کرتے ہوئے کہا ہے کہ منتخب عوامی نمائندوں کی تذلیل کسی صورت قابلِ قبول نہیں اور یہ طرزِ عمل فسطائی سوچ کی واضح عکاسی کرتا ہے۔انہوں نے کہا کہ اسمبلی جیسے جمہوری ادارے میں منتخب نمائندوں کے ساتھ ناروا سلوک ایک سوچے سمجھے منصوبے کے تحت کیا گیا، جس کا مقصد عوامی آواز کو دبانا اور سیاسی انتقام لینا ہے۔ شفیع جان نے مطالبہ کیا کہ اسپیکر پنجاب اسمبلی اس واقعے کا فوری نوٹس لیں اور ذمہ دار عناصر کے خلاف سخت کارروائی عمل میں لائی جائے۔شفیع جان نے کہا کہ ہمارے قائد پر جھوٹے مقدمات بنائے گئے، پارٹی قیادت کو پابندِ سلاسل کیا گیا اور عوامی مینڈیٹ پر کھلے عام ڈاکہ ڈالا گیا۔ مسترد شدہ ٹولے کو اقتدار کے قلمدان سونپ کر عوام کے فیصلے کی توہین کی گئی، جس کے نتائج آج پورا ملک بھگت رہا ہے۔انہوں نے کہا کہ ملک کی موجودہ صورتحال اس بات کا ثبوت ہے کہ نام نہاد اور مصنوعی ترقی کے دعوے زمینی حقائق سے مطابقت نہیں رکھتے۔ 19 دسمبر کو ڈان میں شائع ہونے والا کالم اسی سچ کی عکاسی کرتا ہے، جسے مسترد شدہ عناصر ہر ممکن طریقے سے چھپانے کی کوشش کر رہے ہیں، مگر اب حقائق کو زیادہ دیر دبایا نہیں جا سکتا۔

معاون خصوصی نے کہا کہ ”ووٹ کو عزت دو“ کا نعرہ لگانے والوں کو اب مزید پاکستانی عوام کے ووٹ کی بے حرمتی سے باز آ جانا چاہیے۔ عوام نے واضح اور بھاری اکثریت سے خان کو ووٹ دیا ہے اور عوامی فیصلے کا احترام جمہوریت کا بنیادی تقاضا ہے۔انہوں نے کہا کہ وزیراعلیٰ خیبر پختونخوا سہیل آفریدی کے دورہ لاہور کے دوران پورے شہر میں خوف و ہراس کی فضا پیدا کی گئی، راستے بند کیے گئے اور لبرٹی چوک جانے والے راستوں پر رکاوٹیں کھڑی کی گئیں۔ انہوں نے سوال اٹھایا کہ کون سے جمہوری ملک میں ایک منتخب وزیراعلیٰ کا اس طرح راستہ روکا جاتا ہے۔شفیع جان نے کہا کہ پنجاب کے عوام خوف کے بت توڑ چکے ہیں اور وزیراعلیٰ کے دورے نے کارکنوں اور عوام میں جوش و ولولہ مزید بڑھا دیا ہے۔ طاقت، جبر اور انتظامی ہتھکنڈوں سے عوامی شعور کو دبایا نہیں جا سکتا۔انہوں نے صوبائی وزیر عظمیٰ بخاری کے بیانات کو بھی شدید تنقید کا نشانہ بناتے ہوئے کہا کہ وزیراعلیٰ کے قافلے میں شریک افراد کے لیے ہتک آمیز اور نسلی تعصب پر مبنی الفاظ قابلِ مذمت ہیں۔ ایسے بیانات سیاسی عدم برداشت اور پست ذہنیت کی عکاسی کرتے ہیں۔

وزیر اعلیٰ خیبر پختونخوا کے معاون خصوصی برائے اطلاعات و تعلقات عامہ، شفیع جان نے پنجاب کی وزیر اطلاعات عظمیٰ بخاری کے بیان پر ردعمل دیتے ہوئے کہا ہے کہ پنجاب حکومت کی مہمان نوازی پوری قوم نے دیکھ لی، جہاں وزیر اعلیٰ خیبر پختونخوا محمد سہیل آفریدی کے استقبال کی بجائے رکاوٹیں کھڑی کی گئیں۔انہوں نے کہا کہ اس کے باوجود والہانہ استقبال پر پنجاب کے عوام اور پاکستان تحریک انصاف کے کارکنان کے شکر گزار ہیں۔ شفیع جان نے واضح کیا کہ اداروں پر چڑھائی کرنا اور غیر ذمہ دارانہ بیانات دینا مسلم لیگ (ن) کا پرانا وطیرہ رہا ہے، عظمیٰ بخاری شاید ن لیگ کی جانب سے سپریم کورٹ پر ہونے والی چڑھائی کو بھول چکی ہیں۔معاون خصوصی نے کہا کہ پاکستان تحریک انصاف ایک پرامن، جمہوریت پسند اور آئین کی پاسدار سیاسی جماعت ہے۔ پنجاب بھی ہمارا ہے اور لاہور بھی ہمارا ہے۔ پنجاب کے عوام نے تحریک انصاف کو مینڈیٹ دیا تھا، جسے چوری کیا گیا، اور اب پنجاب میں چوری شدہ مینڈیٹ واپس لے کر رہیں گے۔شفیع جان کا کہنا تھا کہ عوام کو ان کا جمہوری حق واپس دلانا اور قانون و آئین کی بالادستی کو یقینی بنانا اب پاکستان تحریک انصاف کے مشن بن چکا ہے۔ انہوں نے کہا کہ مریم صفدر کی جعلی حکومت نے پنجاب کے کسانوں کا برا حال کر دیا ہے، جبکہ مسلم لیگ (ن) کے دور حکومت میں پنجاب میں کرپشن کو منظم انداز میں فروغ ملا ہے۔انہوں نے مزید کہا کہ بتیاں لگانے اور رنگ و روغن کو ترقی کا نام نہیں دیا جا سکتا۔ پنجاب میں شعبہ صحت کی حالت انتہائی خراب ہو چکی ہے اور عوام بنیادی سہولیات سے محروم ہیں۔معاون خصوصی نے کہا کہ بانی چیئرمین پاکستان تحریک انصاف عمران خان جعلی اور سیاسی مقدمات میں قید ہیں، اس کے باوجود پاکستان تحریک انصاف کی لیڈر شپ اور کار کنان پر امن ہیں اور رہیں گے، بانی چیئرمین عمران خان نے ہمیشہ کارکنوں کو قانون کے احترام اور پرامن جدوجہد کا درس دیا ہے جس کی پاسداری ہر صورت کریں گے۔انہوں نے واضح کیا کہ ملک کے کسی بھی حصے میں جانا اور کارکنوں سے ملاقات کرنا ہمارا جمہوری اور آئینی حق ہے، جسے کوئی طاقت سلب نہیں کر سکتی۔آخر میں شفیع جان نے کہا کہ وزیر اعلیٰ خیبر پختونخوا محمد سہیل آفریدی کی قیادت میں خیبر پختونخوا میں گڈ گورننس کا عالمی سطح پر اعتراف کیا جا رہا ہے، جو موجودہ صوبائی حکومت کی شفاف اور عوام دوست پالیسیوں کا ثبوت ہے۔

نیشنل گیمز کراچی میں شاندار کارکردگی کا مظاہرہ کرنے والے خیبر پختونخوا کے کھلاڑیوں کے اعزاز میں پشاورسپورٹس کمپلیکس میں ایک پروقار تقریب کا انعقاد کیا گیا۔ تقریب کے مہمان خصوصی مشیر برائے کھیل و امورِ نوجوانان تاج محمد خان ترند تھے۔مہمانِ خصوصی نے گولڈ میڈل جیتنے والے کھلاڑیوں کے لیے صوبائی حکومت کی جانب سے 6 لاکھ روپے، سلور میڈلسٹ کے لیے 4 لاکھ روپے جبکہ براونز میڈل حاصل کرنے والے کھلاڑیوں کے لیے 2 لاکھ روپے نقد انعامات کا اعلان کیا۔تقریب سے خطاب کرتے ہوئے مہمان خصوصی تاج محمد خان ترند نے کھلاڑیوں کو مبارکباد دیتے ہوئے کہا کہ ان ہیروز نے محدود وسائل کے باوجود بہترین کارکردگی کا مظاہرہ کر کے صوبے کا نام روشن کیا ہے، جس پر وہ خراج تحسین کے مستحق ہیں۔ انہوں نے کہا کہ خیبر پختونخوا کے کھلاڑیوں میں بے پناہ ٹیلنٹ موجود ہے اور وہ دیگر صوبوں کے کھلاڑیوں کو شکست دینے کی بھرپور صلاحیت رکھتے ہیں ان کا کہنا تھا کہ وزیراعلیٰ کی ہدایات کے مطابق صوبے کے تمام اضلاع میں کھیلوں کی سہولیات کی فراہمی کو یقینی بنایا جائے گا۔انہوں نے بتایا کہ جنوری میں چترال میں آئس ہاکی کے مقابلے منعقد کیے جائیں گے جبکہ اسی ماہ انڈر 21 گیمز کا بھی انعقاد کیا جائے گا۔ اس کے علاوہ 2026 میں بین المدارس اور اقلیتی برادری کے لیے خصوصی گیمز کے ساتھ ساتھ نئے ٹیلنٹ کی تلاش کے لیے جونیئر گیمز بھی منعقد کیے جائیں گے۔ انہوں نے کہا کہ خیبر پختونخوا کی ثقافت اور علاقائی شناخت کو اجاگر کرنے کے لیے روایتی اور علاقائی کھیلوں کے مقابلے بھی کرائے جائیں گے۔تاج محمد خان ترند نے مزید کہا کہ قائد اعظم گیمز کے میڈلسٹ کھلاڑیوں کو بھی وظائف دیے جائیں گے۔ انہوں نے بتایا کہ پشاور سپورٹس کمپلیکس میں سوئمنگ پول کو سردی اور گرمی دونوں موسموں کے لیے موزوں بنایا جا رہا ہے جبکہ ایتھلیٹکس ٹریک پر کام تیزی سے جاری ہے جو جلد مکمل کر لیا جائے گا۔

صوبائی وزیر آبپاشی ریاض خان نے بابائے قوم قائداعظم محمد علی جناحؒ کے یوم پیدائش کے موقع پر اپنے پیغام میں کہا ہے کہ قائداعظمؒ کی جدوجہد ہمیں نہ صرف ایک آزاد وطن دے گئی بلکہ خودداری، آئین کی بالادستی اور عوامی حاکمیت کا واضح راستہ بھی متعین کیا۔اپنے پیغام میں ریاض خان نے کہا کہ قائداعظم محمد علی جناحؒ اصولوں، دیانت داری اور قانون کی حکمرانی پر یقین رکھنے والے عظیم رہنما تھے۔ ان کے فرمودات ایمان، اتحاد اور نظم آج بھی ہماری قومی زندگی کے لیے مشعل راہ ہیں۔ صوبائی وزیر آبپاشی نے کہا کہ آج قائداعظمؒ کے نظریے کو عملی شکل دینے کے لیے بانی چیئرمین پاکستان تحریک انصاف عمران خان حقیقی آزادی کی جدوجہد کر رہے ہیں۔ عمران خان کی تحریک دراصل قائداعظمؒ کے اس خواب کی تعبیر ہے جس میں ایک خودمختار، باوقار اور آئین و قانون کے مطابق چلنے والا پاکستان شامل تھا۔ ریاض خان نے کہا کہ حقیقی آزادی کا مطلب عوام کی بالادستی، شفاف نظام، آزاد عدلیہ اور ایک ایسا پاکستان ہے جہاں فیصلے بیرونی دباؤ کے بجائے عوامی مفاد میں کیے جائیں۔ یہ وہی نظریہ ہے جس کی بنیاد قائدِاعظمؒ نے رکھی اور جسے آج عمران خان آگے بڑھا رہے ہیں۔ صوبائی وزیر آبپاشی نے اس عزم کا اعادہ کیا کہ صوبائی حکومت اور پاکستان تحریک انصاف قائداعظمؒ کے افکار اور عمران خان کے وژن حقیقی آزادی کی روشنی میں ملک کی ترقی، خوشحالی اور خودداری کے لیے اپنی جدوجہد جاری رکھیں گے۔

وزیراعلیٰ خیبر پختونخوا کے معاون خصوصی برائے اطلاعات و تعلقاتِ عامہ شفیع جان نے وفاقی حکومت کی نجکاری پالیسی کو شدید تنقید کا نشانہ بناتے ہوئے کہا ہے کہ وفاقی حکومت نے قومی تشخص اور وقار کی علامت ادارے پاکستان انٹرنیشنل ایئرلائن کی نیلامی کر دی ہے، جسے کسی بھی صورت میں ایک کامیاب قدم نہیں کہا جا سکتا۔ اس نوعیت کے فیصلے وہی جماعتیں کر سکتی ہیں جنہیں نہ عوامی احساسات کا ادراک ہو اور نہ ہی جو عوامی مینڈیٹ کے ذریعے اقتدار میں آئی ہوں۔انہوں نے کہا کہ پی آئی اے کی تباہی کی بڑی وجہ اس ادارے میں وفاق میں بغیر مینڈیٹ کے براجمان انہی جماعتوں کی سیاسی مداخلت، اقربا پروری اور کرپشن رہی ہے، جس کے باعث ایک وقت میں کامیاب ترین ادارے کو اس نہج تک پہنچا دیا گیا، اور اب اسے اونے پونے داموں فروخت کر دیا گیا ہے۔شفیع جان نے کہا کہ نجکاری کے عمل میں نہ قومی وقار کا خیال رکھا گیا اور نہ ہی اس ادارے سے وابستہ ہزاروں ملازمین کے مستقبل کو مدنظر رکھا گیا۔ نجکاری کے بعد 135 ارب روپے کی مالی بولی میں سے حکومت کے پاس محض 7.5 فیصد حصہ باقی رہ جائے گا، جو وفاقی حکومت کی نااہلی کا واضح ثبوت ہے۔انہوں نے مزید کہا کہ ملکی معاشی ترقی کے لیے وفاقی حکومت کے پاس نہ کوئی واضح وژن ہے اور نہ ہی عوامی مینڈیٹ، جس کے باعث نہ بیرونی سرمایہ کاری آ رہی ہے اور نہ ہی ملکی معیشت ترقی کر پا رہی ہے۔ ان کا کہنا تھا کہ فیصلہ سازی کے فقدان اور واضح معاشی پالیسی نہ ہونے کی وجہ سے ملک شدید معاشی عدم استحکام کا شکار ہے۔شفیع جان نے کہا کہ کرپشن اور اقربا پروری کے باعث یوٹیلیٹی اسٹورز جیسے قومی ادارے کو بھی تباہ کر دیا گیا، جبکہ جعلی وفاقی حکومت کی نااہلی کے سبب عوام روز بروز مہنگائی کے دلدل میں دھنستے جا رہے ہیں۔ انہوں نے کہا کہ معاشی استحکام کے لیے بیرونی سرمایہ کاری ناگزیر ہے، مگر وفاقی حکومت کی غلط پالیسیوں کی وجہ سے سرمایہ کار سرمایہ کاری سے گریز کر رہے ہیں۔بعد ازاں بانی چیئرمین عمران خان کی ہدایت پر شروع کی گئی اسٹریٹ موومنٹ کے حوالے سے بات کرتے ہوئے شفیع جان نے کہا کہ وزیراعلیٰ محمد سہیل آفریدی نے بانی چیئرمین عمران خان کا پیغام ملتے ہی اسٹریٹ موومنٹ کا آغاز کر دیا ہے۔ اس سلسلے میں پارٹی کارکنوں، انصاف اسٹوڈنٹس فیڈریشن سمیت دیگر پارٹی تنظیموں کو متحرک کیا جا رہا ہے۔ انہوں نے کہا کہ پاکستان تحریک انصاف ملک کی واحد سیاسی جماعت ہے جس کی مقبولیت کا اعتراف عالمی سطح پر بھی کیا جا رہا ہے۔ عمران خان اور دیگر قائدین و ورکرز کی رہائی کے لیے اسٹریٹ موومنٹ ہمارا آئینی، قانونی اور جمہوری حق ہے۔ پاکستان تحریک انصاف ایک جمہوری سیاسی جماعت ہے جو جمہوریت کی بالادستی پر مکمل یقین رکھتی ہے۔

خیبر پختونخوا اسمبلی کی قائمہ کمیٹی برائے محکمہ معدنیات کا اجلاس بدھ کے روز صوبائی اسمبلی سیکرٹریٹ پشاور میں منعقد ہوا۔ اجلاس کی صدارت کمیٹی کے چیئرمین اور رکن صوبائی اسمبلی اکرام اللہ غازی نے کی۔ اجلاس میں کمیٹی کے اراکین و ممبران صوبائی اسمبلی محمد یامین خان ، محمد نثارباز ، ارباب محمد عثمان،محمد انور خان، محبوب شیر اور محترمہ صوبیہ شاہد نے شرکت کی۔ اس کے علاوہ سیکرٹری معدنیات،مع متعلقہ عملہ، محکمہ قانون، محکمہ خزانہ اور خیبر پختونخوا اسمبلی کے افسران بھی اجلاس میں موجود تھے۔اجلاس میں مختلف پارلمانی سوالات اور سابقہ اجلاس کے احکامات پر عملدرآمد کا تفصیلی جائزہ لیا گیا۔ رکن صوبائی اسمبلی احمد کنڈی کی جانب سے 15 اپریل 2025 کے اجلاس میں پیش کیے گئے سوال پر محکمہ معدنیات نے کمیٹی کو آگاہ کیا کہ صوبے کے مختلف اضلاع میں مجموعی طور پر 3900 بارودی (Blasting) لائسنس جاری کیے گئے ہیں، جن میں سے 2198 لائسنسوں کے تحت کان کنی کا عمل جاری ہے، جبکہ باقی لائسنس تنازعات کی وجہ سے غیر فعال ہیں۔ کمیٹی کو بتایا گیا کہ بارودی لائسنسوں کا اجرا متعلقہ اضلاع کے ڈپٹی کمشنرز کے احکامات کے تحت کیا جاتا ہے اور این او سی قانون کے مطابق جاری کیا جاتا ہے۔ اس موقع پر چیئرمین قائمہ کمیٹی نے محکمہ معدنیات کے حکام کو ہدایت کی کہ کان کنی کے لیے لیز جاری ہوتے ہی فوری طور پر کام شروع کر دینا چاہیے تاکہ تنازعات سے بچا جا سکے اور مقامی آبادی ترقیاتی ثمرات سے مستفید ہو سکے۔محترمہ صوبیہ شاہد کے سوال کے جواب میں محکمہ معدنیات کے ڈائریکٹر جنرل نے کمیٹی کو بتایا کہ جہاں آبادی 50 گھروں پر مشتمل ہو، وہاں 2017 کے ایکٹ کے تحت کان کنی کے لیے لیز جاری نہیں کی جاتی۔ مزید بتایا گیا کہ صوبے کے مختلف اضلاع میں اب تک 7416 مقامات پر کان کنی کے لیے لیز دی جا چکی ہے۔ اس پر قائمہ کمیٹی نے ہدایت کی کہ آئندہ اجلاس میں اس حوالے سے مکمل اور تفصیلی رپورٹ پیش کی جائے۔اجلاس میں رکن قائمہ کمیٹی اور رکن صوبائی اسمبلی محمد نثار کے سوال پر سیکرٹری معدنیات نے بتایا کہ ضلع باجوڑ میں گرائے ماٹ کے لیے چار سال قبل تین لائسنس جاری کیے گئے تھے، تاہم تنازعات کے باعث ان پر اب تک کام شروع نہیں ہو سکا۔ سیکرٹری معدنیات نے کمیٹی کو یقین دلایا کہ ان تینوں لائسنسوں کو منسوخ کر دیا جائے گا اور آئندہ اجلاس میں اس کا نوٹیفکیشن پیش کیا جائے گا۔اجلاس کے اختتام پر چیئرمین قائمہ کمیٹی نے حکم دیا کہ آئندہ اجلاس میں ڈی جی کوہاٹ اپنی حاضری یقینی بنائیں۔ انہوں نے سیکرٹری معدنیات کو ہدایت کی کہ متعلقہ ایکٹ میں ترمیم کے لیے اقدامات کیے جائیں اور عدالتی سٹے کے عمل کو روکنے کے لیے مؤثر حکمت عملی اختیار کی جائے تاکہ ترقیاتی کام بغیر کسی تعطل کے جاری رہ سکیں۔